Vai-vawm A ??  

Posted by Hriatpuia Pa

Readers’ Digest-a an fiamthu pakhat, ka hriat chhuah fo a awm - ‘Vaipa pakhat leh a fanu tê hian India leh Australia-te’n One day International Cricket an khel chu a hmunah an en a. India thawh (bat) ni a ni a. A fanu tê chu a ngawi vang vang a, ‘India tan khuan chak ngaihna a awm lo,’ a rawn ti chhuak phawng mai a. A pa chuan, ‘Engati maw?’ a lo ti a. A fanu tê chuan, ‘Khu, en ‘che, Australia player khu 11 an nia, India ve khu pahnih chauh an ni si a, engtinnge an chak theih ang?’ a lo ti a!!’

Hrethiam lo tan chuan Mizo tam takin ‘Vai-vawm’ kan tih mai, Cricket hi a hmuhnawm tehchiam loh khawp mai. Amaherawhchu India thluak hmanga din leh kalpui mek ‘Indian Premier League’ chu khawvela infiamna lama sum tamna ber zinga a tel tak avang hian ngawihsan reng thei kan ni bik lova, a kawngkapuia kan lut thei lo a nih pawhin, pal hniam lai deuhva lawn liam tal kan tum ve loh chuan, IPL a sum leng vel zozai leh la leng leh zel turte hi midang ta tur a ni zel ringawt dawn tlat.

Alpha
Sang leh zakua tih lam a ni lo, kum zabi 12-na leh 13-na vel daih tawh atanga zung kaih tawh Cricket game hi a khel hmasa bertute pawh sawi fak theih a ni lo. Mahse khawvela Cricket pawl hmasa ber leh upa ber zinga mi leh tun laia Cricket Dan leh Hrai (Dan leh Dun ni lovin) lama thuneitu ber - The Marylebone Cricket Club (MCC) hi 1787 a din a ni tih erawh a chiang a. Chuti chung chuan London Cricket Club khu 1744 khan din a ni tawh tih hriat chian a ni bawk. 1744 khan Cricket changkansan tum, tun lai Mizo thangthar min thlahtute khan eng thuamhnaw nge an la inbel kha??

Ram 15 chauh!
Ni e, khawvela Cricket khel thin ram te hi ram 15 chauh an la ni. Amaherawhchu heng ram 15 te hi han thlir teh - Asia khawmualpuia ram lian tak tak - India, Pakistan, Bangladesh leh Sri Lanka te hi ram ropui taka chhiar vek theih an ni lo chungin, mihring tam lamah chuan an duai lo a nia. Australia khawmualpui pumpui khuan Cricket aia game ngaihsan an nei lova, Africa khawmualpuiah pawh a changkang lamin an tuipui mek a, a rethei zawkte pawh an thangharh chho zel. Europe khawmualpuiah pawh England chu sawi lohva leng an ni a, Netherlands, Scotland leh Ireland tih vela a lar chuan ram dang hian an ngainep rei dawn lo tih hi sawi ngam a ni ang.

Ram ropui USA ah pawh Cricket hian zung a kaih mek a, 2004 atang khan Cricket Professional League an tan tawh a. Twenty Twenty format an chin thar tak atang phei hi chuan American-ho khuan Cricket hi an ngaihven thar hle an ti. China ropuizia pawh hi sawi ngai lova chiang a ni. Anni pawh hian Cricket-ah hian ‘awm’ a awm tih an hmu a ni ang, 2004 khan he game tihhmasawnna tur ruahmanna an duang tawh a, tunah hian 2019 World Cup khelh phak ngei tumin an bei mup mup tawh a sin!

Game hmuhnawm
American-ho khuan khawvela game ropui bera kan ngaih Football (anni chuan soccer an tih) hi an ngaisang hlei thei tlat lova, a chhan chu, ‘Score a tlem lutuk,’ an ti! Game hmuhnawm reng reng hi chhut vang vang la, score tam a lo ni deuh zel a, American-ho ngaihsan infiamna khu score tam a ni zel. Basketball-te pawh, second tin deuhthaw maia score a awm hi a hmuhnawmna lian ber a ni.

Cricket phei hi chu a hmuhnawm a sin! A hrethiam lo tan chuan a vawmtu lam 11 lai field chhungah an lut a, a vawtu lam pahnih chauh an ding si a, a vawmtu lam hi chak zawk tura rin a awl ngawt ang; a ni der si lo. Vawikhat thawh (Over khat) ah a vawmtuin vawi 6 a vawm thei a. A vawtu chuan ball (vawm) tina run 6 a siam phei chuan Over khatah run 36 a ni daih thei. Chutih lai chuan Over khatah batsman zawng zawng an thi (out) phiar thei tho bawk! Out dan lah a tam - a Stump (hmawlh pathum hi) a fuh te, a Bails (hmawlh pathum chunga kham pahnih) ball-in a pera, leia a tlâk te, Middle Stump zawna ball kal tur ke hmanga lo dan palh (leg before wicket) te bakah Catch out te, Stumping te, Run out-te a la awm a. A thiam leh thiam an inkhelh a, target sang tak mai an han ûm te hian a hmuhnzawm zual. Over khata an run vuak chhuah (run rate) te hian awmzia a nei thui lutuk tlat a. Football anga a goal hun nghah ngawt ngawt a awm ve lova, titi pah leh haw-haw chunga en mai mai chi pawh a ni lo; rilru zawng zawng hmanga en ngei ngei ngai a ni.

Vai vawm a?
Silchar khawpuia vaiho pawh khu MLA 40 nei ve thei ngat Mizo mipuite hian kan zāt lova, Silchar lêt nga vel khu Kolkata khawpuiah khuan vai kan tihte hi an la awm a! Kolkata khawpuia awm lêt tam tak India ramah hian ‘vai’ an awm, tam tak hi an ni ringawt!! Chu’ngho tuipui ber chu Cricket hi a ni. Silchar Super Market a ni emaw, Kolkata Fancy leh New Market a ni emaw, New Delhi-a Karolbagh leh Sarojini te leh Chennai-a T-Nagar leh Broadway Market emaw pawh ni se a dang chuang lo, India team-in Cricket an khelh tawh chuan boruak a danglam vek a, dawr neitu zawng zawngin TV emaw Radio emaw hmangin Cricket chanchinthar an ngaithla a, India hnehna chan lai taka i dawr palh a nih phei chuan an zuansan tawr tawr che ‘nga, i hrilh a hai hial maithei. Chuti chu ni mahse India hian 1932 atang khan Cricket hi a khel ve tan chauh a, an khelh hman hian SAP kan tih zinga an aia sap awm thei chuang miah lo England te, Australia te, New zealand-te leh Canada te chuan an lo khel daih tawh a. International Cricket game hmasa ber phei chu USA leh Canada-te khuan 1844 khan an lo khel tawh a, 1859 khan English Professional player-te chuan North America khawmualpui fangin, ‘Overseas tour’ an lo nei daih tawh! Helai tlang kar atanga ‘Vai-vawm’ kan lo ti ngawt hi chu!!

Kan khelh ve chi a ni em?
Cricket game hi game zinga rilru hmanhmawh ngaithei lo ber pawl a ni hial ang. Rilru hmanhmawh, tih ngai ti rei peih mang lo, kum tina thlawhhma sawn thin Mizote tan khelh chi a ni ang em? Test cricket lam hi chu kan tuipui har deuh maithei a, khawvelah pawh a lăr chak lo. Mahse tun laia lăr chak em em, Over 20 ve ve (Twenty20), invenna rilru tel hman mang lova vawm leh vuak pawp pawp mai ngaihna ang hi chu Mizote khelh chi lutuk a ni.

Hmanni lawk atang khan Mizo thalaite hian an khel ve tan a, Vairengte tlangvalte khu Dholai leh Bagha vaiho, englai pawha Cricket tuipui reng mai thinte khuan an hneh tawh mang miah lova. Kolasib tlangvalte chuan Silchar Cricket Association team an zuk hneh ringawt bawk! Kan thalai engemawzat hi chuan training tha nei ve ngat se chuan Virender Sehwag leh Mahendra Singh Dhoni-te aia nep chuang lo tur Cricket talent an nei ngei ngei ang. A vuaka vuak lamah phei hi chuan kan tha lutuk tlat a, a vawm lamah lah kawng kama Chepa leh Tukkhumvilik vawmthla thei thlahte kan ni.

Kan khel ve dawn em?
Dawn e, dawn chiang e. India ram game tuipui ber Cricket hi Mizote hian kan khel ve dawn khawp mai. India ramah hian khawvel hriat tham khawp a Cricket Stadium ropui 19 a awm a, a tê tham deuh phei chu sawi sen a ni lo. Board of Cricket Control in India (BCCI) a Member State ni turin stadium neih ngei a ngai a, Mizoram pawhin chumi kawng zawh chuan hma a la mek. Sairang bul Sihhmui ramah Cricket Stadium tur a zawl duai tawh a, hna a kal mup mup reng. Stadium kan neih tikah Member State niin, BCCI atangin Promotional Grant nuai bi mai ni lo, vaibelchhe biin kan dawng dawn. Chutih hunah chuan Mizote zingah Santosh trophy khel phãk Footballer kan sawi vul aia nasa hian Ranji Trophy khel phãk hming a lãr zawk ngei ang.

A hlawk em? Hmabak engnge?
Hlawk lutuk tlat. Indian Cricketer-te hi Sponsorship leh commercial atanga an sum hmuhte nena chhut chuan khawvela Cricketer zinga hlawh sang lawr lak an ni a. India football team captain Bhaichung Bhutia aia Sachin Tendulkar hausak zawk dan atang hian a chiang mai. Indian Premier League hi khawvela infiamna ‘event’ zinga player-te hlawh chawhruala sang ber dawttu (NBA dawt) a ni a, chu IPL-ah chuan Cricket an khel. He IPL ah hian player hlawh tlem berin, ni 50 vel chhungin cheng maktaduai khat a hlawh ngei ngei a, chutah chuan match money leh bonus a la tel lo! IPL team an leina man to turuzia te, player man san dante kha i hria ang, khati chung khan IPL team zingah Kings XI Punjab tih loh chuan season tin pound maktaduai chuang vek hlawkna an tel!

Mizote’n football kan buaipui dan leh India football-a kan thlen chin te, India-in International football-a kehniak a neih tlemziate hi chhút teh. Mizo tlangvalte hian Cricket khel vein, IPL team-ah hian khel phãk se, National team-ah tel phãk ta se, International player langsàr a ni nghal dawn.

He khawvel kan awm chhung hian ‘fame & fortune’ a ni lo’m ni kan duh? Chuti a nih a, infiamna lama kan kal dawn a nih rau rau chuan Cricket hi khelh mai chi a ni.

14 comments

E khai Cricket hi ka khel ve tlaikhawhnu dawn hotupa! Vawiin khan Cricket Assn. of Mizoram-a an Treasurer nen kan titi dun chiam a, an President Pu Hawla hova tan an lak dante min hrilh a. Keiin hmalakna tlak a nihzia phak ang tawk tawkin ka lo seppui chiam bawk a. Chutah i post hi ka chhiar zui leh chiah a...

He game hi chu Mizote khelh mi a ni. Tuipui zel i la, India rama awm kan ni leh nghal a, kan ti fuh khawp ang maw le!

E khai, hotupa, i tuan a va tha ve! CAM treasurer kha, pa nelawm tak a niin ka hria. Hmannia kan meeting-ho bak kha ka la hmu bik lo.

Ni, kan khelh mi a ni. Nang phei chu, i tleirawl lai han ni phei se.. fast bowler tur mawle :D

Mizoram ah chuan criket player nih ai chuan BHAVAN player nih a hlawk fe zawk lawng maw.Tuna CAM fawng vuantu ho poh khan BHAVAN a prasad dawng chin nih a ngai ni in a lang deuh tlat in ka hria.

Hehe, Ku Zohmingte, i ti dik ang. Tun dinhmunah chuan eng player nih mah hi Zoramah hian a la hlawk tak tak lo. Bhavan-a tlatlum deuhte chu an lo awm mahna. Kan hruaitute hi kum 10 chhung Bhavan a ruah lai pawha CAM hruaitute kha an ni e. Chief Minister President-a ruat a nih chhan pawh hi hruaitute'n a hnen atanga mimal hlawkna hmuh an tum vang ni lovin, BCCI approval nei tura kawng a awlsam nan an ti mai niin ka hria kei chuan. Mahse, nang aiin ka hrechiang lo maithei tho bawk.

A that hmel hle tak mai. Mizo thalaite hian talent chu an nei viau zel, beihngawrh leh a tula insum hi kan tlin lo deuh thin mai pawh a. Tih takzeta an khelh chuan hope a sang maithei a lo nih hi.

1978 khan ka khel ve. Bengali tlangval tawngthei chapo zet mai Ashis Das kha a chapo lutuk a, wicket keeper-ah mittens lian tawk nen a che vei khawr khawr a. Run hmuh tum chuang miah lovin, a chaldara hlap per chiah tumin ka bei a. Tihpalh tihluih chiang lutukin a chal dar takah ka vuak per ta a nih kha ... ka va lawm tak! An zawn chhuak vaw vaw ... chawh hi ka'n ti mai mai khawp a.

Tuna ka ngaihtuah let hian, kan va ho mai mai ka ti leh thul!

I ziak itawm bengvarthlak ngei mai. Chaw mangkhawng kil zarah chuan a ni em lo'ng chu maw!

DUCK tih i ziak tel em? Kan India thiampuipa DUCK-a a'n chhuak hnuang hnuang mai kha, lainatawm duh ve khawp.

Imran Khan hi Cricket khelah chuan hmeltha ka la ti ber mai!

I sawi ang hian taima takin khel ta zel ila score thei ta phian ila... khulam selection-ah hian min hmaih leh si se kan va hawi lawl lawl duh mai awm ve. A hriate sawidnah hian India team line up tur hian fairlo deuh chu awm ve thinin an sawi. An thiam ziktluaklo deuh pawh nimahna.Ka hriatchinah chuan Vanlalruata chiah kha junior Indian team a han thleng pha awm chhun a ni a. A ni pawh hi a khel peih tawhlo nge?

IPL hi chu a hmuhnawm ka ti ve tho a chu pawh a last part, one day hi a rei ka ti hle a, test match phei chu ka en peihlo! Ka lo buai ber zawk chu a game rei lutuk hi a ni. I sawi ang a score zawt zawt tur si hun tlem si ah han innuai hi chu a hmuhnawm a lawm. Khawvel thalai hmanhmawh tak te hian vaw delh delh khel delh delh hi chu hmuhnawm kan tilo, a rang deuh kan duh! Haha ka han sawi ve mai mai nih chu

MJ: Ni e tiraw. Beisei tur nei lo thalai kan ngah em avang hian an tana beisei tur kawng dik kawhhmuh tura ngaihtuahna kan sen hi a ngai a ni.

Chawnghilh: Chaw mangkhawng :D, Kan vote tling tawh a, a tan mangkhawng a ngai tawh vak a mi?? Duck ka ziak tel lo. Kan India ngaihsan ber khelhdan leh a endan takngial pawh thiam lo 'Indian' nih hi a fel lo.
Imran Khan.. nia..

Sawmpuia: I rawn sawi duah duha ka lawm e.

Ni e, kan India ramah hi chuan sum neih deuh loh chuan mimal ang chuan hope a sang lo. A Association zawnga hma kan lak theih chuan kan zia deuh ang.

Hmanah, Telegraph chanchinbuah hian, zawhna leh chhanna ka chhiar ah, Tripura lam miin a zawhna an chhannah - Vaibelchhe khat tal i nei a nih loh chuan Cricket hi khel ve lo mai rawh, ram ropui i i thleng chuang lovang' tih lam hawi ka chhiar tawh tlatin ka hria :D Engpawh nise, MJ ka chhanna ang khi ka rilru a ni e.

Kan naupan lai chuan Marble-in kan inthap a, kan in Vai vawm thin, nang chu tlemin i nau deuh a, Vai Vawm chu i hre pha lo deuh mai thei.

Advertisement ka hmuhah chuan i ziah hi a la tha lawt lak a ni e, Cricket vawm nuam... :D

Vairama sikul ka kal lai kha chuan ka khel ve zuai thin, inter-house match te tan. Mahse college atang kha chuan ka khawih tawh lo. Cricket hi khawvela game ka en peihloh pawl tak a ni e. :)

E, Zaia, a va ngaihnawm leh ta ve! Cricket hi Mizote hian han khel chiah ila chu kan thiam ngawt ang! Pathian hian kut leh ke hmanna lamah hian themthiamna Mizote hi min pe a, Vai ho ai chuan kan zei daih zel! Vuak leh vawm lam na na na chu kan thiam hrim hrim ang. Thangthar te han cho chhuak tak tak teh u khai!

I would like to exchange links with your site zaitea.blogspot.com
Is this possible?

I would like to exchange links with your site zaitea.blogspot.com
Is this possible?

Brilliant phrase and it is duly

Post a Comment

Facebook

Keimah

Visitor Since Feb 09

Khawi lam atangin nge?

online

Followers

Lairil

Mihring ngaihtuahna LAIRIL hi mihringin duhnate, awhna te, hlauhna te, thlamuanna te, hlimna te, lawmna te, lungngaihna te, thinrimna te, chapona te, duhamna te, itsikna te, mahni hmasialna te, hmangaihna te, duhsakna te, engkim mai; mihringa mihrinna siamtu leh neitu a nih avangin a va pawimawh tehlul em!

Nuihtirtu che kha I thinlung a ni a. I tah theihna te, thil mawi leh mawi lo i thliar thiamna te pawh kha thildang a ni chuang lova; khaw lum leh khaw vawt, hlauhawm leh muanawm, hrehawm leh nuam I thliar hran theihna pawh chuti tho.

A chang chuan kan hmuh leh hriat ngeite pawh hi dawt te, a lem te a lo ni thei a! He thinlungin a ngaihtuah hi a lem a ni thei ang em le? Mitin a hmuh a, bengin a hriat avanga duhna leh thinlung LAIRILin a duhna hi a inzawm ang em le? A hrang ni ta se khawii chu nge dik zawk ang? Khawii chu nge tha zawk a, tlo zawk ang aw?

Kan mita kan hmuh leh benga kan hriat te, rilrua kan ngaihtuahna te zinga a tam zawk hi he kan mihrin chhung hian kan theihnghilh leh thin em? Kan theihnghilh tawhte hi kan hrechhuak leh thin em? Thinlung hi bum hmang, chhe lailet der em ni? (Bible – Jeremia 17:9)

Recent Comments

Grab This Widget

Twitter Updates

    follow me on Twitter