Out Of My Life  

Posted by Hriatpuia Pa

Kum 50 mi ni a a han thih meuh chuan, a hla hluite a lar thar leh a. Hmana mite duh em em thin a hlate pawh mite chuan an duh thar leh a, mite thunlungah thu a sawi thar leh a; kei ve pawhin he hla, King of Pop, Michael Jackson-a'n 1980 kuma Off the Wall album-a a dah, 'She's Out of My Life' tih hla a sakte pawh ka ngaithla nawn leh a, lung hlui a len thar leh a nih hi!

A hla dangte ang lo takin he hla hian lam a rem ve lova, lairil fan chi (emotional ballad) a ni a. A sa thiamin a sa lungrun bawk a, a thu lah hi, he khawvel mihring tam tak nunah hian a dik bawk si a; a hun lai leh tun thleng pawhin mite hla duh ber zinga mi a ni ta zel a ni.

Sapho te leh khawchhak lam unaute pawhin an duh em em he hla hi, he vailui kam atang hian, mahni rin dan danin i'n khawih chingpen leh chiam teh ang!!

She's Out Of My Life
She's Out Of My Life
And I Don't Know Whether To Laugh Or Cry
I Don't Know Whether To Live Or Die
And It Cuts Like A Knife
She's Out Of My Life

A hmangaih hmeichhia chu a nun atangin a paihchhuak tihna lam a ni lo. Chu hmeichhia chuan he hla neitu nuna tel ve hi a duh tawh lova, a tlanchhuak emaw a ni ang. Ni lo se vawihnih ngawt a sawi lovang. A nun atanga he hmeichhia a tal hran atang hian lawm tur nge lungngaih tur a hrethiam lova, 'Nuih tur nge tah tur ka hre lo,' a ti! Nungdama awm zel pawh a thlahlel chiah lo em ni? A mak ngawt mai! A pahnih hian - a ngaihtuah a ngaihtuah hnuah pawh - dik thei ve vein a hria em ni? Chuti chung chuan chu thil chuan chemte-a vih ang maiin a chhun na tho si!

It's Out Of My Hands
It's Out Of My Hands
To Think For Two Years She Was Here
And I Took Her For Granted I Was So Cavalier
Now The Way That It Stands
She's Out Of My Hands

He hla ziaktu, Tom Bahler hi a nupui, Karen Carpenter nen hian an innei ren rawn a. Mahse Karen-i hian Tom-a chanchin a hre chiang a, hmeichhe dang lakah fa a lo nei tawh reng a! A rilru na chuan a pasal hi a tlanchhuahsan niin an sawi a. Chumi avanga a rilru na chuan he hla hi a ziak a ni awm e.

Kum hnih lai chu a hmangaih nen hian an inhre tawh a. An awmdun a, an inhriat leh an inhmuh thin lai chuan chutiang chu thil awmdan ve reng tur emaw a ti a. Chutiang hun lai chuan a hmangaih chu a hmangaina hrilh nachang pawh a hre lova, pangngai takin, nundan tha nia a hriat angin a nung a; chu chuan awmzia neih hun a nei dawnin a hria a ni ang. Mahse chu hun chu a thlen hmain a ban phak lovah a awm a, tuna thil awmdan chu a duh dan a ni tawh lova, a lo mangphan ang a ni ta hauh lo! A la hmangaih reng a nih si chuan a va na dawn e aw!!

So I've Learned That Love's Not Possession
And I've Learned That Love Won't Wait
Now I've Learned That Love Needs Expression
But I Learned Too Late

Helai chang hian mi tam tak a vel a, a satu ngei pawh hian hemi chang atang hian a mittui a sum zo lova. An record dawnin vawi tam a sa nawn a, a mittui a tla zel a. Michael Jackson-a producer Quincy Jones chuan a mittui tla lai chu a record-tir ta nge nge a ni awm asin!

Chutianga rilru na leh ngaihtuahna bing mum muma a awm lai, a hmangaih tak tak a ni tih a inngaihtuah lai vel chuan, a hmangaihna chu a lo hrilh tam tawk lova, a sawi tam tawk lova, a lantir lem lo tih a inhrechhuak a ni ang. A inhmuchhuak a, a piangthar ta hial a ni ang. 'Hmangaihna hi kan thil neih lam a ni lo, hmangaihna hian engmah a nghak thei lo, puanchhuaha lantir a ngai a ni,' tiin a testimony a sawi a; mahse a tlai lutuk hman tlat!

Thih dawn tepa piangtharte tan pawh Vanram dah ni mahse, he hmangaihna chungchangah hi chuan pianthar hian tlai luat a nei a ni ngei ang. I hmangaihna chu a hun laia i puanchhuah loh chuan, i puanchhuahna tur lakah khan a tlai thei a tihna em ni? Chu chu he hringnun lamtluangah hian thudik a ni reng em? Dik vek lo pawh lo ni mahse he hla phuahtu nunah hi chuan a dik a; a inhmuhchhuah chuan a tlai lu tawh a, "'A tlai lu ta,' an la ti ang" tih kha a nunah a thleng dik a, indawmkun ngawih ngawih mai loh chu tih tur a vang tawh a ni ber mai!

She's Out Of My Life
She's Out Of My Life
Damned Indecision And Cursed Pride
Kept My Love For Her Locked Deep Inside
And It Cuts Like A Knife
She's Out Of My Life

A va hahthlak em! A inngaihtuah fo va, a ngaihtuahna chuan duh mahse thutlukna a siam thei ngai lova, mahse chu a thutlukna siam theih loh chuan a nun atanga hla taka a awm hnuah a rawn thing nawn leh si! A thutlukna siam theih lawk lohna chhan kan hre phak tawh lova, mahse, amah pawh hian hrehawm a ti a, a inhumruh tih chu a hriat mai! A rilruah inngaitlawma, a hnena hmangaihna dil tura thingthi nun neih ngai nia a hriat laia a tlawm thei lote pawh tunah chuan pawi tiin, insehruh engang mahse awmzia a awm tawh lo. A hmangaihna chu phochhuak lovin a thinlung chhungrilah a vawng reng ringawt a, a puanchhuah loh chuan a hretu tur khan a hre thei si lova; a puanchhuah loh hmangaihna chu a lairilah chuan a la awm reng thung si. Puanchhuah duhin han tum mahse a ban phakah a awm tawh lova, a nun atanga hla taka a awm tawh avangin a hmangaihna vawn reng chuan chemtea vih ang maiin a chhun na ta thung a ni. A na vawng vawng a, a na zel dawn a, a na reng dawn pawh a ni maithei!

He hla, Michael Jackson-a hla dang ang lo taka muang kal raih, lairil fan tak mai hi a nalh bawk a ni ang, MJ chauh hi a satu a ni lova, Patti LaBelle, Ginuwine, 98 Degrees, Jon Lee, Barbara Mandrell, Willie Nelson leh Josh Groban te pawhin an kurpui tawh a. He khawvela mihring hrang hrang, vun ngo leh hang, vun sen leh vun eng te zingah hian nalh titu pawh an tam a, a hun lai khan Michael Jackson-a hla hit niin, United States-a hla lar bikte chauh lanna thin, Billboard Hot 100-ah 10-na a rawn kai phak a. UK lam (Singles Chart) ah pawh 3-na a ni phak bawk a. A sak tirh atanga kum 29 hnu, 2009 a a satu a han thih takah hian a rawn lar thar leh a, UK Singles Chart-ah pawh 95-na arawn ni chho leh ta hial a ni.

(A thih hlim chhawn, MTV, Channel V, VH1 etc. a a hla an rawn play chhen lai vela ka ziah kha a ni a. Khatih lai khan MJ a hawi thuziak hi a tam em a, chhiartute'n in nin ka ring a, ka post ta lova. Post tur nei lova ka Computer Folder ka keu mai maina lamah ka hmu fuh a, ka han tharthawh leh ta a nih hi..)

Interval  

Posted by Hriatpuia Pa

Kan naupan laia kan film en thinah kha chuan 'Interval' a awm ngei ngei. Zunram thiar nan te, kan film en sawiho nan te, kan film ena a changtute tihdan zir nan te kan hmang tlangpui thin. Eng pawh ni se, chu lam chu ka sawi tum a ni hran lova. Tun lai chu thu ziak turin ka kut a chawl tlat mai a. Kar thum lai, buai em emin hna ka thawk a. Tunah erawh ka awl leh ta deuh a, chuti chung chuan ka buai lai ang tho khan ka rilruah thu ziah tur a rawn lut hlei thei tlat lo. Hetia hun khaihlak lai hian, thu fahrah te te tal, blog update nan tiin ka han thaikawi a, chu vang a nia, a sap tawng thiam lo ber maiin, 'Interval' ka'n tih ngawt.

Pu Chawnghilh-te'n ni khatah post pahnih emaw te an dah laiin, post tur nei miah lo, hmeichhe thi hul taka han hul thak mai hrehawmzia hi sawi thiam a har zawk a. Ziah tur ngaihtuah lawk lem lo pawha rawn lut ve zut zut thin kha, vawrh bo ang diak a ni ta mai a, engtia hmuh let leh chi nge maw ni dawn ni? Tesep te te hian bul tan ila, a rawn inkahpup(k)-chaw chho leh mai mahna...

Icon : October thla chawhnu lam atanga tun thla chawhma lam inkar chhung khan Youth Icon thlanna, District dang rualin Kolasib District-ah pawh neih a ni ve a. Management Committee din a ni a, Secretary ka'n ni mauh mai a! A buai theih rem rem teh e!!

Live show engmah la buaipui ngai lo, Visual/Electronic Media-a kerek pawh la dai lo kha, a bultumtu berah ka'n tang ta a, buai lo rual ka ni lo. Zanah dar 12 hmain ka mu ngai lova, ka mut tawh pawhin a tuk zana programme tur ka ngaihtuah niap niap a, dar 3 ah te ka va tho a, ka note bu-ah pawimawh ni a ka hriat ka ziak chhuak leh thul. Show neihna hmunah lah, themtleng te zawk ang maiin, a lang ve lo ber kha ka phili a. Thianpa Tawia'n, 'Task Manager' min ti mathlawn lovin, Computer-a Task Manager-a thil kal inluh thuah nasat tluk zetin ka buai. Contestants, Judges, Hosts, Musicians, Beauticians, a.... refreshment chenin, advertisers leh Organisers inkar chinfel nen... hahdam taka, mahni In luma show lo sawisel thin bak ti ngai lo tan chuan lu a hai map map khawp thin mai!

Buaina kara ka thil hmuh chu - tun lai tleirawl leh rawltharte hian thil hi an lo ti tak tak ta deuh tih hi a ni. Mal zai hmanga inel an ni a, a tu mai pawh an thil tihah an chiang. An thata tur a nih chuan a hma lehtlai an pawisa lo, mi an tlem leh tamah an buai lo, an zai ngawng ngawng a, an duh dana thil a kal loh pawhin an sawi hreh lova, an duh dan an sawi ngam bawk. Kan thalai, engmah thawh peih nei lo, hma lam hun ngaihtuah lem lo nia kan hriat nawlpuite hi chutiang an lo ni vek lo tawp. An thiltih apiang ti tak tak chi, duh tui chi, hmabak ko taka chhawp duh, hmasawn chak, hlawhtlin duha hrehawm tuar peih tam tak he Zoram hian a nei tih ka hmu.

Farewell: Office lama kan pute engemawzat an awmna hmun sawn a ni a, kan thlah a. Kan pute zinga pakhat thusawi hi ngaihnawm ka ti. Sorkar hnathawk zawng zawng hian hria se, hre vek se, an nihdan ni ve vek se ka ti.

'He hmunah hian nikum mai khan ka rawn kal a. Nupui fanau nen, kan inbengbel ve dawn chiah a, ka nupui pawh he lamah a hnathawhna kan ti fel chauh a ni a, ka chet ka la ring lo viau. Beisei loh deuhvin ka che leh ta thut a, kan la inring lo viau a ni. Mahse sorkar hna kan dil lai khan, thawh duhin theihtawp kan chhuah a. Kan luh tirhin, khawi hmunah pawh, eng hna pawh thawk turin kan intiam a. Chuvangin, khawiah pawh, eng hunah pawh min sawn se, phur taka kal mai tur kan ni a...' a ti. A va mawi em!!

A sawitu hi a awmna Kohhranah rawngbawltu a ni lova, Pathian thu a sawi ka la hre miah lo. Chuti chung chuan Kohhran Upa tam takin an pawm theih loh, a nihna leh awmna hi a pawm thlap mai a, hotute rorel a sawisel miah lo. Kohhran hruaitu, mipuiin kan rin em em zingah hotute rel anga awm thei lo, mahni duhdana sorkar hna thawh tum ka hmu fo. Ka pu, ka fak che, ka fak thlawt che.

He tawngkam avang hian ka pu hi ka theihnghilh tawh kher lovang. He lam hawi ka ngaihtuah apianga ka hriat chhuah tur thu a sawi tlat.

Khai! A thupuiah sapho tawng hlir ka hman tak chu! Weekend (leh pek a!!) hman nuam vek u le....

Khuangchawi Thla  

Posted by Hriatpuia Pa

A hming ka hre tawh lo. Tlangval hmel chhe lem lo, lian lem lo, te lutuk lo, pangngai tak, lu buk lam lek lek; felfai tak a ni tih erawh ka la chiang. Kekawr zuih uar lai kha a ni a, a inha zuih ve ngang mai thin.

Tingtang tawng lam tawh, a ri erawh la dik ve zet, hmel hlui bum tawh mai kan nei thin a, kha tingtang kha ka tingtang hmeh hmasak ber a ni nghe nghe.

Kha tingtang leh kha tlangval kha tun thleng hian ka mitthlaah ka hmu hrang hleithei lo. Kan In luah kha sorkar quarter awngrawp lam tawh, lian huau mai a ni a. Bungrua kan nei tam lova, kan luah seng lo lam a ni. A thawl deuh vang a ni ang, aw a thangkhawk thei lek lek a, zai a mawi duh phian thin.

Kha tlangval kha a rawn leng fo a, a rawn len tawh chuan, a haw leh hma chu tingtang nen chuan an inhlat ngai lo. A zai a zai thin a, zaithiam ka ti thei ngang mai.

A rawn len apiangin hla pakhat, sak ngei ngei a nei a, chu hla chu a sak hma chuan a haw ngai lo. Chu hla chu hla dang zawng aiin a duh tih a hriat a, kei pawhin mawi ka ti thin. Hla dang zawng aiin a sa thiam ka ti a, a aw nen inhmeh ka ti a; a zai paha tingtang a'n perhdante chu tun thleng hian ka la mitthlain, ka bengah hian a la cham thei.

Kawngkapui atanga luh a ding lam, lo hmasa berah thutthleng sei kan dah a. Chu thutthleng hmawr tawp lam, In chhung lam zawkah chuan, a sir deuhvah a thu ziah a. Chu hla a sak apiang chuan a bawp a khawkherh a, a bawp ding lam chu a vei lamah hlang chhovin, a ke veilam chuan chhuat a khawng dat dat thin a. Tingtang chu a perh sawt deuh auh auh a, a chang chuan pindan bangah chuan a tukkhum nghat meuhvin a dak a, a zai vang vang thin.

A hla sak thin chu -

Hun leh nite an her liam zel
Thal tui ianga ka nghah hlim ni
Hmangaih lenrual lungduh zawngte
Hlim leh lawma kan len hun tur
Dawnin zan mu ka chhing thei lo

Chung khuanu malsawmna zarah
Damte'n kan tawng leh ta hlim ni
Lengzawngte hian kan au a che
Ding rih turin, aw, hlim lai ni

Kan chan tawka khuanulengin
A rel ve chu i vui lo'ng aw
Chantawkah lungawi thiam ila
Ral leh mai tur hringnun kan chan
Damlai pialral i chantir ang

A tawp ber atan chuan hei hi
Vawng reng ang u, lenrualte u
Hmangaihnaah insuihkhawmin
Tuarte tuarpui, Lawmte lawmpuiin
Lungngaih ni leh hlimni zawngte'n.....

He khawvelah hian kumhlun a awm lova, engkim hian hun lai a nei vek mai. Pian hun, parvul hun, chuai hun leh boral hun nei vek kan ni.

He kumhlun lohna khawvela cheng mihringte zingah hian nunhlui leh hun liam hnu chhuikir ngai lo a awm theih ang em? He nun hlui hi eng tik hunah nge mihring hian a ngaihtuah let thin ang aw?

Kum khata thla sawmpahnih zingah hian thla ngainatawm bik, kan nun theuhva kan hriat rei deuh bik vek, kan intawm hi a awm ang em? Awm ta se Khuangchawi Thla hi a ni ang em?

Hlimna leh lawmna zawng reng renga hun hmang thin mihring kan ni a. A hnu leha hlimna kan beisei avanga hun harsa leh hrehawm tam tak tawn tlang hreh lo mihring kan ni vek mai. Hlim leh nawmchen duh luat avanga a tawpa hrehawm tuar thin pawh he mihring tho hi a ni a. Chutiang mihringte chenna khawvela cheng ve zinga hnam tlem te kan nih avangin, tun hma ata tawh Kut ni vangthla leh neinungte'n chawng an chen a, khuang an chawina thin thla, he Khuangchawi Thla hi Mizote rilruah chuan thla ngainatawm ber zinga mi a ni ngeiin a lang.

Mizo hla phuah thiam C. Durthanga chuan he Khuangchawi Thla chhawrthlapui eng leh a chhehvel, a eng lawma mihring lawm nui rite nen lama chiang taka min hmuhtir thei khawpa lungkuai leh chiang siin heti hian a phuah a -

Leng zawngte hlimna ber Khuangchawi Thla hi
Pi leh pu vanglai paw'n sawi nuam an ti
Chung Turni khua tlaiin, thlang kawla'n a liam
Chhawrthlapui engmawia'n khuang a rawn chawi e

Chuti'n zaleng zawng te a eng mawi lawmin
Mahni chhai lai di run hlimten an kai a
Chhawrthla arkai partlan hlimten zai an vawr
Lengi hlim nui ri nen, lengdang an ngai lo

Thangvang sang lah mawi chuang, thlir ninawm loh
Siar lengrual zawng paw'n a sir an bel a,
Vanrang chhum lah sira'n an herliam zel a
Thlir ninawm loh thangvan khua in mawi ngei e.

Mahse khuanu leng ruat dan rual si loh
Thlang khuandimin kawlrawn an liam zo ta
Ngaiin au mah ila kir zai an rel lo
Thangvan mawina zawng pawh puanang chul zo ta!

Khuangchawi thla arkaiden zan thla eng mawi lutuk hnuaiah, ral lehlamah pathlawi lungleng a zai vawng vawng a. Tlang pawng remchang leh kawng chhawrdawh (step) remchang laiah, tingtang nen tleirawl rual an lo zai that that bawk a. Kawtthler mam leh zal tha laiah naupang an tualchai bawk a; a tua mah chu an inngaihsaktawn lova, nuam an ti ngei mai!

Van lam han thlir ila, a hliahtu tur chhum rang awm hauh lo vanga intithei fahranin thla a lo eng paw heu mai a. A bul hnaia arsite pawhin chu chhawrthlapui chu an zah a ni ang, an eng tha ve ngam lova, an awm ve tih hriat chang changin an de set set a; thlir nin a har mang e!

Ni, chutiang hunah chuan a ni, mi tam takin nunhlui an ngaih a, lungleng taka an zai vawng vawng thin. Chutiang hunah chuan a ni, mihringin a mihringpui a hmangaih theihna sang bera inhmangaihte'n hmangaih biahthu an inhlan fo ni. Chu hun duhawm avanga nupa kawp chawi rem tak ni chho ta tam tak an awm ngei ang a; chu hun avang vek chuan hringnun hrehawm taka hmang zui ta pawh engemawzat an awm ngei bawk ang.

Hlim leh lawm takin, chu thla eng hnuaiah chuan kan nui thler a. Kan zai vak vak a.

Khua a vawt deuh vur tawh a, kawrlum hakchhuahna tham em a la ni si lo. Pangti luma inur tawn nawm hun lai tak a ni. Chu hunah chuan tirila khur deuh der der chungin chu thla eng hnuaiah chuan kut insuihih, inngheng rialin kan kal a... kan kal zel a...

Hma lam huna thil lo thleng tur chu suangtuahna hian a chhui phak lo tih kan hriat vang a ni lo, ngaihtuahna chang kan hre lo zawk a ni. Kan hmaah chuan eng hun nge lo thleng dawn, chu kan hma lam hun atan chuan eng chen nge kan lo inbuatsaih theih ve tih lamin ngaihtuahna a luah phak lo. Kan hlim lai chu a rei dawn lova, nakina kan la ngaih vawng vawng tur a ni tih kan hre si lo.

Mahse, khuanu ruat chu dan rual a ni lo. Ni a chhuak a, a tla leh a, thla pawh a chhuak a, a tla leh a. A de a, a bial a, a mang leh thin a. Chu'ng chu vawi tam tak a rawn kal leh chuan hmana Khuangchawi thla thla eng kan hmuh ang bawk kha a rawn eng leh a. A eng chu hmana mi ang mai kha a la ni a, a mawina chu chhe te pawhin a la danglam lo. Mahse a thlirtu mihring chu a lo pangngai tawh si lova, a thlirna hmun pawh a dang ta. He khawvela thil mawi zawng zawng hi nei vek mah la, mawi ti tura i thinlung i pek loh chuan awmzia a nei lova, chu mawina chu i lakah chuan vawk hmaa tuikeplung paih ang chauh a ni ang.

Ni lo, chu mai a la ni lo. Mawi tihna thinlung neiin, mawi ti takin i thlir zawk em ni? Nia, i thlir a nih kha. Mahse a mawina kha a kim lo ni si lovin engatinge i kim loh riau? a mak a sin! Hmana Khuangchawi thla thlahleinga zan i hmanpui kha a awm tawh tlat lo. A then chu he khawvela i hmuh ngai tawh miah loh turin phum bo an ni tawh a, a then chu eng tika nge i hmuh leh ang tih rin chhin ngaihna awm lo khawpin, kawlvalenchhamah an lo awm tawh. A then chuan nupui an nei a, pasal an nei bawk a, i hmuh leh pawhin hmana hun hlimawm kha kohkir leh chi a ni lo tih i hriatchhuah ngei theih nan an hmelte pawh a lo danglam zo tawh a, chutih lai chuan i chunga chhawrthlapui kha chu a la pangngai reng lawi si a, a lungawithlak loh lek lek mai ka ti!!

** October thla kha ka pian thla a ni a. Chumi pual chuan he thu hi ziah ka tum a, mahse ka hna lamah ka buai em avangin ka zo hlei thei lova. Tunah pawh hian a phuai lai a tam ang tih hre reng chungin, blog update duh ve bawk si avangin ka han post ta rawih a ni.

Facebook

Keimah

Visitor Since Feb 09

Khawi lam atangin nge?

online

Followers

Lairil

Mihring ngaihtuahna LAIRIL hi mihringin duhnate, awhna te, hlauhna te, thlamuanna te, hlimna te, lawmna te, lungngaihna te, thinrimna te, chapona te, duhamna te, itsikna te, mahni hmasialna te, hmangaihna te, duhsakna te, engkim mai; mihringa mihrinna siamtu leh neitu a nih avangin a va pawimawh tehlul em!

Nuihtirtu che kha I thinlung a ni a. I tah theihna te, thil mawi leh mawi lo i thliar thiamna te pawh kha thildang a ni chuang lova; khaw lum leh khaw vawt, hlauhawm leh muanawm, hrehawm leh nuam I thliar hran theihna pawh chuti tho.

A chang chuan kan hmuh leh hriat ngeite pawh hi dawt te, a lem te a lo ni thei a! He thinlungin a ngaihtuah hi a lem a ni thei ang em le? Mitin a hmuh a, bengin a hriat avanga duhna leh thinlung LAIRILin a duhna hi a inzawm ang em le? A hrang ni ta se khawii chu nge dik zawk ang? Khawii chu nge tha zawk a, tlo zawk ang aw?

Kan mita kan hmuh leh benga kan hriat te, rilrua kan ngaihtuahna te zinga a tam zawk hi he kan mihrin chhung hian kan theihnghilh leh thin em? Kan theihnghilh tawhte hi kan hrechhuak leh thin em? Thinlung hi bum hmang, chhe lailet der em ni? (Bible – Jeremia 17:9)

Recent Comments

Grab This Widget

Twitter Updates

    follow me on Twitter