Sikni Êng  

Posted by Hriatpuia Pa

Khuangchawi thla pawh kan pel leh fe tawh a, Sahmulphah thla pawh a chanve kan bang liam leh ta hnâwp mai. Zîkpuii pa 'Sikni Êng' chuan loh theih lohvin 'playlist' a rawn luah leh ta a. 'Thlir ve u, khawvêl mawina hi' ti hiala, a hria apiang sawm duh khawpa khuarèl mawina hmu thiam Zîkpuii pa thiamna tel lo chuan he sikni êng hi a kalh a kim tawh tlat lo. En teh, han sa ve mah teh  - 

Kumsûl lam ang a lo her chang hian
Sikni êng mawi a rawn thlen leh ta
Zingtian lenkawl leh ramloh lentu
Thingsiri zar tin an mawi mang e
Thlir ve u, khawvêl mawina hi
Nungcha leng leh partin hian
Siamtu fakin zia an tar
Hringmi leng hian dawn thiam ve maw?


'Sahmulphah thla' an lo tih ang ngeiin, khua pawh a vâwt ve tawh hle a. Zing ni chhuah hma phei chuan a vâwt vin ve deuh var tawh a, kumsûl a vei dawn ta tih a chiang viau tawh. Chutiang hun leh hmuna chéng a, Mizo nih bawk si chuan Zîkpuii pa sikni êng hi hmuh thiampui loh theih pawh a ni lo. 

Zîngah, ni chhuak lai hmu turin tho hma la, i hmuh phâk china nungcha leh pangpar chi hrang hrang te, hnim hring leh hnah mawi chi tin hmu turin i sahmul puan kha tlawh hlîm la, han hawi vêl teh. I awmhmunin a zir loh chuan khuarèl mawina hmu turin i kal thui deuh hret pawh a ngai maithei. Khawpui lun lai hnuchhawna dai fem i pan phei chuan khuarèl mawina hi a chiang lehzual. Nia, han pên hret la, khua han chuan teh. Vatê sawt nelh nelh te i hmu em? a thlang deuhva tlaiberh inbéngberek ri te chu i hria em? Rairuang par parh tawh, thlasik zing thlifim thaw her herin a chhem var siau siau te chu i hmu ang a. A piah lawka changel hnah hring mawi nghelh mai, induh hmel deuhva a inthen her mêt mêt pawh chu i hmuh hmaih lo vang.

Han thlîr hla hret la, mit tlin tâwk tlang pâwng inchen lo zung maia ngaw dur hring dup mai te chuan computer screen leh television i en nasat avanga i mit kham them thumte chu a tihahdam sawng sawng ang. A aia hnai leh deuhvah khawram chhimbuk an sawi apianga a chhimbuk aia i mitthlaa rawn lang hmasa zâwk ziah thing ding ro, hreu deuh re rùte chu hmuh kân ngawt suh. Hringnun hlimthla nasa takin a rawn phochhuak tih ngaihtuah la, han en chiang teh. Hmânah chuan kha thing kha buk tha tak a ni thin a, mawi takin a bul vêla nungchate tan mawina mai piah lamah thlamuanna te pawh a lo thlen tawh thin a sin. A upat tawh vang leh mihringte awlsam zawnna avangin a nihphung leh a awmdan a hloh zo tawh a, a zara thing hnah hring mawi tak awm thin te pawh a tîl zo tawh a; sava chi hrang hrangin hahchawlh nana an hman thin a zarte pawh tunah chuan mawina nei lovin a kawlh filh ta thuau a nih kha.

I ke bul maiah chuan vailenhlo a lo zam dem dem ang a, chu'ngte pawh chuan sikni êng lawmin an par an rawn chhuah ve siar siar tawh ang a. A bul vêlah chuan tlangsâm pawh a rawn kuhmûm tiuh teuh tawh ang a, nakin lawkah chuan tawrh har khawpin a la rawn par parh nalh dawn tih hai rual a ni lo. A hnah khâwr leh chuar deuh kar te kha en peih phei la chuan, hmanhlel takin fanghmir an lo phe leh suau suau tawh maithei.

Ni e, he thlasik khuaah hi chuan zing ni chhuah sära kawlkil han thlir vang vang te hian leilung mawina a fiah zual bîk thin a. Boruak thiang tak hip lût chunga khawvêl mawina thlir hi a ninawm loh theihtawp a ni.

Tleitir sakhmelin a cho lo che
Partin mawina pawh i zar an ni
Sâppui thiltin tuahrem thiam pawh hian
Nang anga rawng mawi an bàn ngai lo
Aw khawvêl mawina Sikni êng
Ka fak seng lo'ng che lungmâwlan
Nang hi i ni ve ang
Remna lalfa pawh khan a rawn pan


Zîkpuii pa hian hei êm êm hi chu a ti lutuk em aw ka ti thin. Mihringte mawi hun lai ber chu kan tleirawl chhuah chhoh lai hi a ni ti a, chu pawh chuan he sikni êng hi a tluk lo a ni satliah lo, a cho pawh a cho lo niin a hria! Khaikhin leh tehkhin rual lohva mawina danglam ve ve a khaikhin avanga thiam loh tur erawh a ni lo. Ani ngaihah chuan he sikni êng mawina hi eng dang mawina mah hian a hen lo a ni mai a ni. Pangpar chi hrang hrang mawina pawh thlasik ni êng zara mawi ve lek lo zuk ni a!

Ni chhuak turin kawl a rawn èn a, mawina danglam a rawn lantir lai i hmu ve tawh a nih chuan, 'Sâppui thil tin tuahrem thiam pawh hian, nang anga rawng mawi an bàn ngai lo,' a tih hi i pawmpui loh pawhin i hriatthiampui ngei ang. 

Kawl a rawn êng sen phut a, ni hlat deuh apiang a êng sen dal tial tial a, a chhak deuhva chhûm tlem tê tê inzar pharh diar diar a rawn èn tlé te chu sâp thiamna sang eng ang tan pawh siam thiam ve ngaihna a awm lo va. Chutiang mawina - sawia fiah lo, hmuh chauhva fiah thei mawina ropui chu he leia mihring tan hian a zâtve tal pawh tluk chi  ni lo a, a tina tin chhin chi hi a ni lo. Ni chhuak tirin a rawn ên fuh chuan kawmthlanga bahra hnah mai mai pawhin lung zuk tileng thei a!

A, kan theihtàwpin tangho ila, thlasik ni êng mawina hi inziah tâwm ila, a tha lai lai lawr dawn pawh ni ila Zîkpuii pa hi tluk ngaihna a awm tawh lo. "Nang hi i ni ve ang Remna Lal fa pawh khan a rawn pan," a lo ti daih tawh a, hei aia chawimawina ropui hi chu Pathian hnênah chauh lo chuan pêk ngaihna a awm tawh lo. A ni lo'm ni?

Thinlai a fan nunhlui mual liam hnu'n
Thinlai darthlalengan a lo lang
Suihlunglengin khua tin hawi ila
Tuan ka nuam lentu zo thing tin hi
Sirva len thiam nun inthleng i'
Khawvel taksa lungkham pelin
Tuan ka nuam ramloh lentu
Zingtian sikni êng mawi lawmin


Thlasik khaw vâwt hnuaiah, mahni chauhvin khawvêl mawina thlir la, i hawina lam apiang a mawi tawh chinah chuan lunglènnain i thinlung a rawn luah nghal thuai ang.

'Nunhlui mual liam hnu' hi nimin mai pawh kha a ni thei. Kum tam tak liam tawha kan nun leh nimin maia kan nun hi kohkîr theih a nih tawh loh dan a inchen reng mai. Naupan laia engthawl êm êma hun kan hman lai te, tleirawl chhuah chhohva mi lu kara mit leh mit a han intawng siah mai te, tui chénga a biling a balanga kan han sapatal thin te, ho tê tê pawh pum na ûrha kan han nuih kiah kiah thin te, nimin maia hlim taka kan nuihho lai te pawh kha mitthlaah a rawn lang fiah zual a. Khuarél mawina hlat thei ang bera hna thawk thin tan phei chuan sava nena nun inthleng a, hla takah, khawvêl buaina enghelh ngai miah lova hlaa thlawh vang vang a, duhthala thlasik ni êng mawina han chen a châkawm thin.

Thu leh hla thiam elkhen, a thu hman apianga uar lutuk si lova mawina danglam phum thiam Zîkpuii pa meuhvin he hla pakhata ramngaw sawina, "Ramloh lentu" vawihnih lai a hmang hi a mak angreng a. Mi hrang kalta, IFS val lung kha ramngaw hring dup mai hian a lèn ber a ni hial ta ve ang. 

A enga pawh chu ni se, naktûk zing chu tho hma la, thlasik boruak thiang hip chungin, ni chhuak êng mawi mawina thlir chungin, chu mawina zarzotu khuarèl mawina tinreng thlir a fak turin han inring phawt mai teh. I inchhir a tâkah.

[November ni 17 a ka ziah a nia, ka blog-ah ka suan lût har hret.. ]

Facebook

Keimah

Visitor Since Feb 09

Khawi lam atangin nge?

online

Followers

Lairil

Mihring ngaihtuahna LAIRIL hi mihringin duhnate, awhna te, hlauhna te, thlamuanna te, hlimna te, lawmna te, lungngaihna te, thinrimna te, chapona te, duhamna te, itsikna te, mahni hmasialna te, hmangaihna te, duhsakna te, engkim mai; mihringa mihrinna siamtu leh neitu a nih avangin a va pawimawh tehlul em!

Nuihtirtu che kha I thinlung a ni a. I tah theihna te, thil mawi leh mawi lo i thliar thiamna te pawh kha thildang a ni chuang lova; khaw lum leh khaw vawt, hlauhawm leh muanawm, hrehawm leh nuam I thliar hran theihna pawh chuti tho.

A chang chuan kan hmuh leh hriat ngeite pawh hi dawt te, a lem te a lo ni thei a! He thinlungin a ngaihtuah hi a lem a ni thei ang em le? Mitin a hmuh a, bengin a hriat avanga duhna leh thinlung LAIRILin a duhna hi a inzawm ang em le? A hrang ni ta se khawii chu nge dik zawk ang? Khawii chu nge tha zawk a, tlo zawk ang aw?

Kan mita kan hmuh leh benga kan hriat te, rilrua kan ngaihtuahna te zinga a tam zawk hi he kan mihrin chhung hian kan theihnghilh leh thin em? Kan theihnghilh tawhte hi kan hrechhuak leh thin em? Thinlung hi bum hmang, chhe lailet der em ni? (Bible – Jeremia 17:9)

Recent Comments

Grab This Widget

Twitter Updates

    follow me on Twitter