Aieng Kan Phur  

Posted by Hriatpuia Pa

(He article hi internet lama ka thuziak chhiar thinte pual liau liau-a ka ziah a ni. Tuklo leh Bawng sava te, Tlaiberh leh Tukkhumvilik sava hramte hre tawh ngai lo, ramhnuaia kum engemawzat kal tawh ngai lo; mahni hnathawhna room zim te atanga khawvel thlir ni tin thin ka thiante tan he thuziak hi ka hlan a ni.)


Young Mizo Association i hriat chuan, Central YMA, Sub-Hqrs., Group, Branch leh Section thlenga a inkhaichhawndiat dan i hre ngei ang. He inkhaidiat chhawng zingah hian a eng hi nge
pawimawh ber tih a sawi theih loh va. Amaherawhchu a hniam ber leh hnuaihnung bera kan ngaih Section-a hruaitu nih hi a hahthlak za (zaw) ber awm e.

Kum engemawzat chu Branch Committee Member niin, Sub-Committee eng engah emaw te kan buai ve viau thin a. Kum tam tak a ni ve tawh ang chu, Section hruaitu hna hi ka chelh ve tawh a. YMA Branch hrana ka pem pawhin Section hruaitu nih hi ka inhmeh emaw ni tehreng ni, a ngaiah bawk bul ka tan leh thin a. Kumin pawh Section Leader ka ni pek a! Sawi tawh angin Section-a hruaitute hi Branch kut leh ke, Branch-in tih tur tul a neih apiang a tihtir thin kan ni a, YMA hruaitu zingah chuan a hah ber group kan ni maithei. Chutiang a nih avang chuan kuminah pawh a vawikhat nan, sum tuak hnatlang kan nei a, chu chu a ni in hnena ka sawi tur hi.

Ram a changkang zel a, pawlho anga inhlawhna tur hi a vang tual tual mai. Kumina a vawikhat nan mimal Aieng phur chhuaka inhlawhna kan hmu hlauh mai a, Mizoram State Day, February ni 20 ni tak khan, Lirthei hmanga Mizoram atanga phai lam zin thinten an paltlang fo Rengtetlangsang pangper, chhuah lam letliamah, ni kang tha zet maiah kan inhlawh a ni.

[ Tun laiah chuan thlam, a chung atana di emaw, thilthek emaw, mau hnah emaw hmanga sak a awm tawh meuh lo ]


A hahthlak
A hahthlak thu hi chu sawi tam ka tum tehchiam lo. Kum engemawzat paper A4 leh Legal (FS) ream khat aia rit chawi tawh mang lo, a chang changa computer monitor (CRT) leh CPU chawi zeuh zeuh bak thil rit chawi ngai lo; In lamah pawh bucket te hmanga tui khai bak rit chawi khat em em mai keini ang tan chuan Aieng chawh hlim, buhfai Kg 50 dahna bag khat tan mai, chhun ni sat vawl vawl laia KM 1 aia thui, kawng chhuk chho leh phihrit tak maia han khe-raw-lai vel kha chu a hahthlak dan tur in chhut thiam ve mai ang.

Ka vawikhat kalnaah chuan a hmun ka thlen hram hi a ni mai. Ka thleng chiah a, ka thil phurh chu ka nghat a, ka delh nghal a. Ka thaw hi ka awmah a rawn inhnawh chho up up a, ka hnarah a leng lova, ka ka ka hmang tel a, chuti chung pawhin chhuahna dang a la zawng ta fo mai! Ka thlan a far zung zung a, ka tawng thei lova, ka meng peih bawk lo! Han din chhin ka'n tum ngial a, ka khup chuan min zo lo, a dursuih tlat!! Min nuih suh, ka hah a ni, ka hah.

Hun leh hmun thawveng
Ni tina Office kai thin emaw, mahni dawr nghak emaw, sikula thawk emaw i nih chuan ramhnuaia hnathawh hahthlakzia i hriat loh ang bawkin a nawmzia leh thawventhlakzia hi i hre lovang.

Motor tlan indawt zut reng mai, a chang phei chuan khu rum rum, bengchheng bawk si i hmu thin ang a, ninawm i ti thei ngawt ang. Chu mai ni lovin ni tina i hnathawhna chu mipui nena inhne hnai tak a nih phei chuan mipui chimbuai ninawm tih em em chang i ngah ngawt ang. Chutiang mite tan chuan rama hnathawka chhuah hi a thawventhlak a, a nuam lutuk tlat.

February thla a ni a, Mizo chuan Ramtuk thla kan ti. He hunah hi chuan ruah a sur ngai mang lova, khua a rovin, khua a thal a. He hunah hian a ni 'Thal romei' a zam thin. Ni, he huna ram kal i nih chuan thal romei zam i hmu ngei ang a, i rilruah

'Thal romei a zam kai chiai e, Lung min len zual thin, Tlaini ka leng zo lo..'

tih hlate pawh kha a rawn lang uar uar maithei a. A nih loh pawhin, vah baka ramhnuai hring tak nguk maite chu i hmu ngei ang a. Hnahkhar hmun a nih phei chuan, thli chhem zawngin a awn dual dual ang a, a chang changin a rawn var leh tuar anga, a rawn hring leh anga, a inchhawk-nghawlh mawi thei teh mai a sin! Chutiang han hmuh a, zo thlifim han inchhemtir hiau hiau mai bawk chuan thaw hi a veng a, hah hi a dam sawng sawng a, lungleng mi tan chuan lunglenna hi paihbo theih a ni tawh lova; min rawn kher ngut ngut tawh mai thin.

Chutiang hunah chuan -

A saw raltiang lentu zobawn saw, Chhingmit titlaitu tuk loh ram daiah sawn, Mingeng, pasaltha lung tilengtu, Buannel ram dai, lungdumtu...

tih hlate kha thiam leh thiam lova sak ve talh mai a chakawm thin.

Zo tui thiang
Fiara tui hi an sawi fo va, ka la hmu lova, ka la in lo. Mahse Mizo ka nih avangin Zo tui thiang tuizia hi hrilh ka ngai lova, keimahah hian a fiah tawk. Chuti chu ni mahse zo tui thiang tuizia hre tur hian ka hun neihin a zir lova, ka awmna hmunin a zir bawk thin lo.

Kan hnathawhna hmunah hian kawr pakhatah cement-a zut thlap mai tuikhur a awm a. Chhun ni sat vawl vawl laia thil phurh hah hnep hnua chutiang tuikhur tui vawt tha reih rawih tak maia hmai han phih chu.. sawi ngaihna pawh a awm lo. A vawhdan a thiang kak maia, han inte chuan hrawkah a vawt thla raih raih a; kawchhunga a kal thlaknate chu a chiang bik riau hian a hriat. Min tiharh sawng sawng mai. Office-a 'cooler' hmanga tih vawh chawp tui aiin a tui a, In lama fridge tui vawt aiin a hang tui zawk daih tih hi teh kher loh pawha sawi ngam a ni.

[ Aieng phur zo, phur leh tur mah ni ila, a huhova thla lak hi a hlimthlak a ni. Nghawngkawl leh mobile phone nen...... ]

Chhunah chaw fun kan thet a, ram inti kal takin kan han ei a. Thiante an titi mam mam a, kei chuan thildang ka ngaihtuahsan daih a. Ral lehlama tuklo hram kurh kurh chuan ka lung a len tlat. Thlam atanga lang reng, vaua changel hnah hring tliang hlurh mai, ngaihtuah nei awm lo fe a inthen mut mut maite chu ka vawikhat hmuhna ni awm takin ka thlir a. Aieng chawhna hnu, a hnah leh kung khawro tawh dah khawm bula thing tuluang hek then tawhte chu ka en leh mai mai a. Kuthnathawktute hah dan tur te, an tan chuan sorkarin a ngaihsak tha tawk lo nia inngaih a awlsam dan turte. An thawh phu tawk an hlawh si loh dan te, sorkar hnathawk tam tak, mahni hlawh phua hna thawk si lova mahni hlawha lungawi lo an tamziate ka ngaihtuah mai mai a....

Nupui Nei Suh  

Posted by Hriatpuia Pa

Nupui pasal neih chungchanga thurawn tha pui pui te, tih tur leh tih loh tur hrang hrangte, fa enkawl dan te, chhungkaw inrelbawl dan te, nu leh pa enkawl dan thlengin, mi thiam pui puiin an ziak, bu chhah tak tak leh chhah vak lem lote pawh he khawvela tawng hrang hrang hian ziah a lo ni tawh a; chhiar peih tan chuan chhiar sen loh a awm. Mahse mipa fa, he khawvela piang tawhte tana chhiar tur, nupui nei lo tura infuihna thu hi chu chhiar tur a awm a nih pawhin a tam lo a ni maithei, a lar lo em mai.

Pathianin mihringte hi chi tam tak thlah a, lei luah khat tura a siam a ni tih ringtu, Kristian pawl pakhat Presbyterian Kohhran member, pian hlim atanga vawiin thlenga la chhuahsan lo, chu thurin vuan tlattute zinga la tel ngar ngar ka ni a; chuti chunga ‘Nupui Nei Suh’ tih thupui hmanga thu ka’n ziak ta mai hian mi thenkhat hmui a tiner sawk a nih pawhin an thiamawm hliah hliah ka ti a. Mahse lehkhabu hi a kawm atang ringawtin a chhunga thu awm a hriat vek theih loh angin, kan thupui atang ringawt hian kan thuziak hi teh chi a ni lova, chhiar zo ngei la; chumi hnuah min la dem a nih chuan i thu thu.

Nupui ka nei

High School kan kai laia kan zirtirtupa’n ‘Officer lian tak nih hma chuan nupui ka nei lovang ka ti a, mahse, ‘luck’ ve si chuan…’ a tih ang mai khan, hmelin a zir em vang ni maw, mi rin loh deuh maiin nupui ka’n nei thut maiah!

Nupui neih tirh kum khat chhung kha a nuam ber lai a ni awm e. Nupui neih hmaa tho hma ve hle thin kha nupui neih tuk atangin ka’n tho tlai nghal ngawt a. Tun hma zawnga ka kekawr khai an lo khawih danglam leh danglam loh thlenga hre chat chat thin khan a awmnate kha ka’n hre lo thar vel a!

Mahni thawmhnaw zawng zawng bakah chhungte thawmhnaw pawh kar tawpa su thin khan ka T-Shirt pawh ka’n sufai zo lo nghal bawk a! Tumahin min nawhsak ngai lova fai ve em em thin pawh ka nupuiin a nawh loh chuan ka hnungte kha a bal thar ta riau a. Engemaw kawng zawng chuan nuam ve tak a ni.

Thlasik ka cho a, nipui pawh a nuam viau mai.

Mah se..

Ni e, he hringnunah hian engkim hi kan nuam tih zawng leh kan duh zawngin a kal vek lo thin a, chutiang bawk chu nupui neih pawh hi a lo ni. ‘A nuamah pawh, a hrehawmah pawh..’ kan tih miau avangin innei tam tak hian an lo sawi lo mai mai a ni ang. Nge, keini ve hian kan thiam lo zawk? ‘Mah se’ a tam em mai!

Pangti lum insi renga mu zan tin ta chu, kan nungchang a lo tha reng thei bik lova. Chu chuan a hnu lawkah ‘rah’ a rawn nei ta ngei mai. Kan chawhmeh hmeh ve phak tawk, Dal leh Alu, a hmaa a duh em em thin kha a’n ngei nghal em em phawt a. Hmeichhe mize zawi, mi pawisawi hlau tak, midang tih thinrim hlau em em ni a ka hriat thin kha a mizia a danglam vek a. Ka rim thin laia ka taksa leh ka chezia reng reng sawisel ngai lo khan min sawiselna tur a hre thar ta riau a. Office ka tlai hlau taka min insiampui thin khan a hun pangngaia ka kal tur pawh hma ta riau hian a hria a, hmanhmawhna chhan tha te neiah min han chhuah a. A tukah min hau leh ang tih hlau takin ka’n insiam muangchang deuh va, ‘Vawiin chu i va hmanhmawh leh si lo ve?’ a ti leh a. Ka haw tlaiin a ngaih a tha lova, ka haw hmain a lawm chuang bawk si lo!

A dul a lian tual tual a, sawisel tur a nei tam tual tual a. Tun hma zawng aia ka chhuak tlem chung pawhin a ngaihah chuan, ‘Zana chhuahna tur nei reng mai,’ ka ni tho tho a. Han mu ila, ‘Ka kawng hmet rawh,’ a tih loh leh ‘Ka dul a mar, zut teh,’ a ti.

A muhil tawh emaw tiin kut han la thla ila, ‘A mak e, nupuite pawh ngaihsak peih lo,’ a ti a. Han muhil ve dawn ila, ‘Tho teh, ka muhil thei lo. Ka zun a chhuak, keimahin ka zung ngam lo..’

‘Nupui ka’n nei ang a, Inah ka awm hnem ang a, article te chu tha deuh deuh ka la ziak mai ang..’ ka lo tih thin vete chu duhthusam puarpawleng mai maiah a chang zo va. Lunglenna hun hi a awm ta mang hauh lova, lunglenna leh ngaihtuah tura hun thawl leh rilru fim neih loh chuan thu a ziah ngawt theih si loh.

Hetah hian tawp mai se chuan a tha ni mai tur hi a nia, a ni ikhaw si lo. A intan dawn chauh a lo la ni!!

A tui tha tha a tui chuang lo

‘Bawngsa tuihang ka hawp chak,’ a ti. E khai, nupui pakhat kan nei a, a duhzawngte chu kan tihsak tur a lo’m tiin, pa-in kan han lei a; a duh dan chiahin ka’n siam a. Thirfian thum a hawp a, chu sa rim chuan a’n ngei leh nghal a nih chu!

Bawnghnute a in thei lova, artui a ei duh lo bur a; sangha chu ‘a hma pawha a ei tam ngai vak loh hrim hrim’ a ni a! Chawhmeh tha lam chi hi a duh ta miah lo emaw tih hial tur a ni. Chu chu a la ziaawm, nau pai tana damdawi tha an tih ang zawng zawng a ei thei lova, a luak chhuak leh deuh zel mai hian mang a ti ang.

Kan manganna chuan a mang a ti-ang ve tehchiam lo thung a, a ngaihdanah chuan hetiang te chu nau pai vawikhatnaah chuan a awm ve reng tur a ni a. Midang nau paite pawh an chaw ei a tui lova, an thil eite an luak chhuak leh a, damdawi ei luak chhuak ta vek sawi tur a hre hnem lutuk. A sawi danin, Ngura nupui phei chuan a chhungte zawng zawng a ngei vek a, ka nupuite chu a la fel fe zawk; tumah a mimalin a la haw ve miah lo. Kan la vannei ngawt zawk a lo ni!

Ka tih vek

Nupui nei ngam tawh tan chuan mahnia inbawl hran ngam loh kha a zahthlak a. Fa kan han nei a, In hrang changin, kan han awm hrang ve ta ngei a. Tun hma zawnga ka thu thua awm thin ka nupui kha kan chhungkaw ‘hotunu’ a ni ta a. Ani chuan naute nen, In chhung tihfel nen, eirawngbawl nen, tih tur a ngah thin em avangin kei, ‘engmah ti lo’ kha chuan sawi ve tur hi ka nei ngai lova. Tun hma zawnga ka tih thin tho alo’m tiin, kan chhungkaw thawmhnaw zawng zawng sukfai chu ka chanpualah ka dah tawp a.

‘Nupui kan nei ang a, zanah lengchhuak lovin, Inah kan awm keuh keuh ang a. Thute chu kan ziak zur zur tawh mai ang,’ tia ka lo hisap thinte chu, ‘zanah lengchhuak lova Ina awm keuh keuh,’ lai chu a dik khawp mai. Mahse thuziak leh lehkhabu chhiarte chu ka hman reng reng lo. Naute pawm chhawk a ngaia, nau ka lak chhawk loh leh nau puan ka nawh ro a ngai a, chutiang hun a awm lo. Awm tur pawhin ‘hotunu’ rilrem zawng a ni lo. Ani ngaihah chuan lehkha ziahte chu mi awmawl, mihausa, ngaihtuah tur dang neilote tih tur a ni a; a hrim hrimin, Mizo zingah ngat phei chuan ‘thuziak avanga hausa ta’ hi an lo la awm hauh lo mai a lo ni a!

Ni tin chhungkaw ei zawnga buai chunga, Ina hna ka thawh hnem thinzia leh ka hahzia han sawi dek dek ila, kei aia thawk tam mi pasal hi an lo awm teuh zel a. Ka thiltihte chu a ‘ve’ lek a ni a; a han sawi tak tak chuan hah em ema inhria kei hian ‘tih ve’ hi ka nei mang thin lo. Ni tin ka insu a, zanah nau puan ka nawt ro va, a chang chuan khum ka siam a, hmun ka phiat bawk a. Mahse chu’ngte chu ‘a chang chang chauh’ a lo ni a, a hman loh changin, chu pawh tum bur chungin ka lo ti thin a lo ni lek chauh mai!

E khai!

Kan fapa pawh kum hnih a tling ve tep tawh a, nu ber chuan eizawnna lama inrawlh a duh ve ta tlat. Aizawl-ah ‘Second hand bale’ la-a kal a tum ta rup mai! Ka sawiin awmzia a nei dawn lo tih ka hriat avangin ka hnial duh lova, a tuk zinga nu ber a zin dawn avangin kan zavai mut hma ta a nih kha.

A tuk zing chu a lo thleng ta ngei a. Nu ber zin turin a chhuak tawh. Naute a la tho lo. Ka tho va, thlasik lai a nih avangin ‘Sikri’ ka chhem a. Tih tur tul chu hrilh ka ngai bik lova, ka ti ve zung zung a. Bawnghnute ka chhuang a, pindan lamah naute a thawh avangin ka phei a. Ka bulah ka dintir a, khum puan chu ka’n thlep fel te te a. Chutih lai tak chuan ri deuh thuai hi ka hria a, ka harhchhuak zawk a.

Thut pindana ka va phei chu, ka fapa chuan Sikri a lo titlu chu lo niin! Hrilhhai takin a hmaa meiling baw nuaih chu a lo en a. Vanneihthlak takin a taksa vur lo zawngin a lo ti tlu hlauh mai. Ka rut sawk sawk a. Ka fapa neih chhun chu a lo ‘e’ bawk chu niin! A va buaithlak tehlul. Chutia ka buai avang chuan ka bawnghnute chhuan chu ka lo ngaihtuah miah lo tih ka lo hre lova, a ri sur a, ka’n melh chho chu gas thuk a lo thi hmak a, a var nguai a. Rang taka ka’n off pawh chuan awmzia a nei tawh lo tih hriat takin a khu rum rum a, bawnghnute bel chu a ruak huai a! E khai!!

Nupui nei suh

Hengte hi nupui neih chuan thil thleng ve tur reng niah ka ngai hmiah a, hengte avanga nupui then erawh ka tum hauh lo. Hengte chauh hi nupui neihin a ken tel a ni lova, kan sawi loh lamah ‘nuam’ leh ‘hlimawm’ tam tak a awm ve bawk a, chu chu kan thupui a nih loh avangin kan sawi lo mai a ni zawk.

Eng pawh nise, mipa leh hmeichhe in-nupa-na hian heng harsatna neuh neuh hi a keng tel tih hi hringnun hmang tirte tan hriat ngei a tha a, chumi tawn tlang peih lote chuan nupui neih loh mai tur. Heng harsatna leh buainate hi paltlang huam lo tan chuan nupui neih chi a ni lo.

Nupui hmu chuan thil tha a hmu a ni (Thufingte 18:22) tih a ni a, thil tha hmuh duh chuan nupui neih ngei a tha hle a ni. (050209-1650)

THINLUNG THAWNTHU  

Posted by Hriatpuia Pa

Mita kan hmuh leh benga kan hriatte hi thil thleng ngei a ni fo thin. Chu’ng, mita kan hmuhte chu hun rei tak chhung kan mitthlaah a cham a; benga kan hriatte pawh a thangkhawk chamchi a. Kan hmuh chian leh chian loh te, kan hriat chian leh chian loh te, kan hmuh ngun leh ngun loh te, kan benga a rik rin leh rin loh vangte aiin, hmuh theih mit leh beng ni lo, hmuh theih loh thinlung lama hmun a chan thuk leh thuk lohvah mita kan hmuh leh benga kan hriatte hriatrengna chu a innghat zawk thin.

Thinlung hi hmuh theih a nih loh avangin eng anga hnathawk nge tih sawi thiam a har a. Hna erawh a thawk nasa tih a chiang a, mi pangngai thinlung chuan a neitu dam chhung chuan hna a thawk a. A hnathawh chu a neitu tan lo chuan va hmuhsak chi a ni lova, a neitu pawn lam lanchhuah danah thinlung chhungril hnathawh tam tak a lan theih laiin, mi thenkhat chu an rilru leh ngaihtuahna ni miah lova an lanchhuah thiam tho avangin pawn lama an lan ang ngawta teh theih loh an awm ve tho si.

Mihring ngaihtuahna chhungril hi mihringin duhnate, awhna te, hlauhna te, thlamuanna te, hlimna te, lawmna te, lungngaihna te, thinrimna te, chapona te, duhamna te, itsikna te, mahni hmasialna te, hmangaihna te, duhsakna te, engkim mai; mihringa mihrinna zinga pawimawh lutuk hlir siamtu leh neitu a nih avangin a va pawimawh tehlul em!

Nuihtirtu che kha I thinlung a ni a. I tah theihna te, thil mawi leh mawi lo i thliar thiamna te pawh kha thildang a ni chuang lova; khaw lum leh khaw vawt, hlauhawm leh muanawm, hrehawm leh nuam I thliar hran theihna pawh chuti tho.

Ni, mihring thinlung hian thil tam tak a ngaihtuah thin a. A putu mihringin a hun tawn mil zela a ngaihtuah thin avangin hun leh hmun hrangah thinlung ngaihtuahna chu a dang ve zel thin.

A chang chuan kan hmuh leh hriat ngeite pawh hi dawt te, a lem te a lo ni thei a! He thinlungin a ngaihtuah hi a lem a ni thei ang em le? Mitin a hmuh a, bengin a hriat avanga duhna leh thinlung chhungrilin a duhna hi a inzawm ang em le? A hrang ni ta se khawii chu nge dik zawk ang? Khawii chu nge tha zawk a, tlo zawk ang aw?

Kan mita kan hmuh leh benga kan hriat te, rilrua kan ngaihtuahna te zinga a tam zawk hi he kan mihrin chhung hian kan theihnghilh leh thin em? Kan theihnghilh tawhte hi kan hrechhuak leh thin em? Thinlung hi bum hmang, chhe lailet der em ni? (Bible – Jeremia 17:9)

Khawvel hi thil mum a ni a, thil pakhat hel a nih bawk avangin vawi tam tak a herchhuahpui thin pangngai hlir a herchhuahpui tawh a. Chu bak chu tih theih a nei lo tih hi ka ring. Chumi avang chuan hman a nipui ang kha tunah leh nakinah pawh a lo lang leh a, a lang zel dawn a. Fur, thal leh thlasik pawh. Chutianga hun inher thin hmuna cheng chu thinlung neitu mihring hi a nih avangin, hmana ka hriatna leh ka ngaihtuahna kha tharthawhin a awm fo ngei ang tih pawh ring.

He thinlung hian thil tam tak a lo duh tawh thin a, a lo awt tawh thin. Chutiang bawkin thil tam tak pawh a hnawl a, a thlauhthla tawh bawk. Thinglungin a duh zawng zawng nei tur hian mihring theihna leh remchanna hian a tlin lo thin a. A thil duh ngei pawh a nei thei dawn lo ni a a duhtu mihring thinlungin a hriat chuan a duhna chu a tilang ngai lova, pawn lam chauh hmu thin mihring dang tan chu chu va hmuhsak rual a ni lo.

Duhna hi hmangaihna thlentu a ni a. Kan duh zawng zawng erawh kan hmangaih vek lo thung. Hmangaihna chu mipa leh hmeichhe inkarah a piang a; mipa leh hmeichhia induh apiang an inhmangaih vek kher chuang lo thung a. Duhna hi chu a reh leh mai thin a, hmangaihna avanga duhna erawh a reh thei lo fo thung. Mihringin a duh reh theih loh apiang erawh a hmangaih a ni vek lova, nih lah a ni vek thei lo bawk.

Thinlungin a ngaihtuah zawng zawng hi sawichhuah vek a ni ngai lova, a tul vek lo bawk a. Rinawmna te, taimakna te, tlawmngaihna te hi chu phochhuah lansarh a, midang hnena hrilh leh sawichhuah ngai lo a ni. Hmangaihna erawh hi chu hmangaihtuin a hmangaih hnena a hrilh lohva, sawichhuak lova a thinlunga a vawn reng chuan awmze nei a ni phak lova. Awmze nei tur leh hmangaihtu leh hmangaih an intawn a, an thinlung chhungril an inhriat tawn theih nan chuan sawichhuah kher a ngai ta bik thin a; chumi chuan hun a nei bawk. Hun a nei a, hmun erawh a nei hran lo. A sawichhuahna hmun chu khawi pawh nise, a hun a dik chuan hmangaihna chu a parvul a, rah duhawm tak a chhuah thin.

Kan hmel hmai leh taksa hi kan mihrinna tilangtu, mit hmanga hmu thin mihringin min hriat a, min thliarhranna a ni a, a pawimawh takzet mai. Thinlung erawh chu mihring timihringtu, nun hruaitu, chhungril atanga pawn lam landan enkawltu a ni a. A puitu mihring hmel leh hmai a zur a, vunte a chuar a, mit leh bengte an chak loh hnu pawha rinawm taka mihringte vengtu a ni a, Pathianin mihringte a pek zinga hlu ber a ni hial ang.

Tang laiah run rem tir ka phal ne’maw hmelma tan,
Khandaih hriamin, aw , ka hmelma chu fam ka chantir a;
Hrehawm tin tawrh tirin, thlan thim hnuaia zal turin ka nawrliam ta,
Hmelma hnawksak ber a lo ni, he ka thinlung hi..
(Thinlung Thawnthu – T. Melody)

(30 jan 09, 0014)

Facebook

Keimah

Visitor Since Feb 09

Khawi lam atangin nge?

online

Followers

Lairil

Mihring ngaihtuahna LAIRIL hi mihringin duhnate, awhna te, hlauhna te, thlamuanna te, hlimna te, lawmna te, lungngaihna te, thinrimna te, chapona te, duhamna te, itsikna te, mahni hmasialna te, hmangaihna te, duhsakna te, engkim mai; mihringa mihrinna siamtu leh neitu a nih avangin a va pawimawh tehlul em!

Nuihtirtu che kha I thinlung a ni a. I tah theihna te, thil mawi leh mawi lo i thliar thiamna te pawh kha thildang a ni chuang lova; khaw lum leh khaw vawt, hlauhawm leh muanawm, hrehawm leh nuam I thliar hran theihna pawh chuti tho.

A chang chuan kan hmuh leh hriat ngeite pawh hi dawt te, a lem te a lo ni thei a! He thinlungin a ngaihtuah hi a lem a ni thei ang em le? Mitin a hmuh a, bengin a hriat avanga duhna leh thinlung LAIRILin a duhna hi a inzawm ang em le? A hrang ni ta se khawii chu nge dik zawk ang? Khawii chu nge tha zawk a, tlo zawk ang aw?

Kan mita kan hmuh leh benga kan hriat te, rilrua kan ngaihtuahna te zinga a tam zawk hi he kan mihrin chhung hian kan theihnghilh leh thin em? Kan theihnghilh tawhte hi kan hrechhuak leh thin em? Thinlung hi bum hmang, chhe lailet der em ni? (Bible – Jeremia 17:9)

Recent Comments

Grab This Widget

Twitter Updates

    follow me on Twitter