Mizo Kristian hla hmasa ber phuahtu nia ngaih, Patea'n (1894 - 1950), 'Mal Min Sawm Turin' tih hla a phuah hi vawi tam kan sa ve ta. A rilna leh a thukna aiin, a mawina leh a boruak vangin kan sa hnem zawk em aw? ka ti. Kum tin, Krismas a lo thlen apianga ka hla duh berte zinga tel ve ziah he hla hian kumin ang em em hian min la tawk ngai lova, heti ema thuk hi em a lo nih ka chhut thuk ngai lo.

Adama, Pathianin duh taka a siam, Ama anpui ngeia a siam mihring kha, a chenpui tura a pek hmeichhia hmangin setana'n a thlem thlu a, hlim taka a lenna thin, a thuhnuaia engkim awm thin, a lalna ram Eden huan chu chhuahsan a lo ngai ta. Chu huan, a chanpual, Pathian nena an lendunna huan ngei mai chu ama chakna leh thiltihtheihna hmanga luh leh theih rual loha ven a ni ta a, he leiah hian vakvai a ni ta!

Bawhchhiatna suala tlu tawh hnu Adama chuan lei danin hun a chhiar a ngai ta a. A bianga thlantui luang zawih zawihin a ei tur a thawkchhuak a. Enghelh nei lovin, rilru kaptu awm hauh lovin, hlim leh engthawl takin kha Eden huanah khan a leng thin a. Kha huana awm ei mi chi hrang hrang kha a ta a ni a, a chhunga ransate pawh a thu thua awm a nih thin kha. Mahse a bawhchhiatna chuan chu'ng chu a lak atangin a thlawhbotir zo tawh a, a tan beisei tur a awm tawh lo.

Adama thlah kal zel chuan ran thisen leh mihring felna hmangin chunglam rawng bawl a tum a, a inthawi a. Mahse ran thianghlim ber thisen pawhin a chhandam zo lova, a tan Eden huan chu vana rah ang a ni tawh. A felna chuan khawi mah a thlen lova, kawlvalenchhama tuikeplung aia hlaah lenbo a ni tawh tlat.

Mahse, hmangaihna tawp nei lo Pathian chuan chutianga a hmangaih, a duh taka a siam ngei mai a bo hlen chu a phal lova, tihdan a dap ta. Ama duh thu ngeia Pathian kalsantu mihring chuan a duh phawt chuan a kalsan Pathian lam a hawikir leh theihna tur ngaihtuah a duh ta tlat. Chutah chuan a ni, 'Van khuaah ro an rel' tak ni!

Chu rorelna hmunah chuan thurel tur a tam lo ang bawkin, a hotupa ber duhdan a nih miau avangin midangin an hnial thei lo hulhual dawn tih hi a lang reng a. A hmangaihna luangliam chuan ui a nei thei tawh lo. A hmangaih mihring, amah tlansantute ngei chu laklet leh a duh a, a hnena kohkir leh a duh. A duhna ringawt chuan Amah anga a siam mihring chu a kokir zo lova, a man a pek a ngai ve ta tlat. A man atan a thilsiamte an tling zo lova, lei leh vana thil awm zawng zawng an zawn hnuah pawh mihringte chhandam tur chuan tling zo reng reng an awm ta lo. A thilsiam mihringte tel lova tlei thei lo Pathian chuan a lama a pawh hnaih leh theihna a nih phawt chuan a fapa, a fapa mal, a neih chhun ngawih ngawih pawh a ui zo ta lova. Chu Vankhuaa rorelnaah chuan Pathian fapa, beramno thianghlim ber chu lei mihringte sual phura, Kraws-a thi turin thutlukna an siam ta!!

Chu thutlukna chu thlarauva mit tihvar lohte tan hmuh thiam chi a ni lova, mihring taka thlirtu tan hriatthiam theih a ni lo. Chu ngei chu 1922 March ni 10 a Presbyterian Kohhran Upa atana nemngheh Patea chuan fiah takin a hmu a, he lei mihringte hriat fiah theih turin a sawi chhuak ta a, a va mawi em! Han chhiar teh -

Mal min sawm turin,
Vankhuaan ro a rel;
Eden kawngkhar an hawng leh ta!
Lut r'u, Zion khua a var ta!!

Chu thutlukna avang chuan lei lalte aia lal, hotute hotu, lal zawng zawngte lal, Zion - Pathian khawpuia roreltu chu lei mihring zingah, tlawm takin, Bethlehem-a ran inah chuan a lo piang ta ngei mai! He thil a thlen theih nana hmangaihna insawkkhawm nasat dan tur hi mihringte ngaihtuahna leh chhutrilna hian eng ang fakauva thuk leh nasa nge a nih a chhut thiam lova, tu tan mah chu zawhna chu chhan dik theih a ni lovang -

'Lal berte lal ber,
Leh Zion roreltu,
Engtia awm thei nge mihringah?
A hmangaih a va mak em ve!'
tih mai loh chu he mihring lei hian sawi tur a nei lo.

Van rorelna hmanga Eden kawngkhar, mihringte tana luh rual lohva khar leh ven hnu lo inhawng leh ta vanneihthlakzia hre tur chuan, Eden huan atanga mihringte paih chhuah an nih avanga mihringte dinhmun chhiatzia hriat fiah phawt a ngai a. Chumi hre fiahtute chuan, 'Hmanah Eden huana nunna kraun hlu kan hloh kha, Tunah Lalpa’n min chharsak leh ta;' [(Rokunga (1914 - 1969)] an ti hial a ni.

Ni e, chu rohlu chu a neitu tur bik siam a ni lova, a changtu tura ruat lawk pawh an awm chuang lo. A vanneihthlak leh zel mang e! Hmana Bethlehem-a lo piang, Kraws lera vuakthitlina awm ta Lal Isua ringtu leh a hnen pan duhtu apiangte luh nana hawn a ni a, a duh apiang tan a ni!

Ka unau, i tan leh ka tan Eden kawngkhar a inhawng mek. Zion-a khawvar hmu turin i lut ve dawn em??

Kum 50 mi ni a a han thih meuh chuan, a hla hluite a lar thar leh a. Hmana mite duh em em thin a hlate pawh mite chuan an duh thar leh a, mite thunlungah thu a sawi thar leh a; kei ve pawhin he hla, King of Pop, Michael Jackson-a'n 1980 kuma Off the Wall album-a a dah, 'She's Out of My Life' tih hla a sakte pawh ka ngaithla nawn leh a, lung hlui a len thar leh a nih hi!

A hla dangte ang lo takin he hla hian lam a rem ve lova, lairil fan chi (emotional ballad) a ni a. A sa thiamin a sa lungrun bawk a, a thu lah hi, he khawvel mihring tam tak nunah hian a dik bawk si a; a hun lai leh tun thleng pawhin mite hla duh ber zinga mi a ni ta zel a ni.

Sapho te leh khawchhak lam unaute pawhin an duh em em he hla hi, he vailui kam atang hian, mahni rin dan danin i'n khawih chingpen leh chiam teh ang!!

A hmangaih hmeichhia chu a nun atangin a paihchhuak tihna lam a ni lo. Chu hmeichhia chuan he hla neitu nuna tel ve hi a duh tawh lova, a tlanchhuak emaw a ni ang. Ni lo se vawihnih ngawt a sawi lovang. A nun atanga he hmeichhia a tal hran atang hian lawm tur nge lungngaih tur a hrethiam lova, 'Nuih tur nge tah tur ka hre lo,' a ti! Nungdama awm zel pawh a thlahlel chiah lo em ni? A mak ngawt mai! A pahnih hian - a ngaihtuah a ngaihtuah hnuah pawh - dik thei ve vein a hria em ni? Chuti chung chuan chu thil chuan chemte-a vih ang maiin a chhun na tho si!

He hla ziaktu, Tom Bahler hi a nupui, Karen Carpenter nen hian an innei ren rawn a. Mahse Karen-i hian Tom-a chanchin a hre chiang a, hmeichhe dang lakah fa a lo nei tawh reng a! A rilru na chuan a pasal hi a tlanchhuahsan niin an sawi a. Chumi avanga a rilru na chuan he hla hi a ziak a ni awm e.

Kum hnih lai chu a hmangaih nen hian an inhre tawh a. An awmdun a, an inhriat leh an inhmuh thin lai chuan chutiang chu thil awmdan ve reng tur emaw a ti a. Chutiang hun lai chuan a hmangaih chu a hmangaina hrilh nachang pawh a hre lova, pangngai takin, nundan tha nia a hriat angin a nung a; chu chuan awmzia neih hun a nei dawnin a hria a ni ang. Mahse chu hun chu a thlen hmain a ban phak lovah a awm a, tuna thil awmdan chu a duh dan a ni tawh lova, a lo mangphan ang a ni ta hauh lo! A la hmangaih reng a nih si chuan a va na dawn e aw!!

Helai chang hian mi tam tak a vel a, a satu ngei pawh hian hemi chang atang hian a mittui a sum zo lova. An record dawnin vawi tam a sa nawn a, a mittui a tla zel a. Michael Jackson-a producer Quincy Jones chuan a mittui tla lai chu a record-tir ta nge nge a ni awm asin!

Chutianga rilru na leh ngaihtuahna bing mum muma a awm lai, a hmangaih tak tak a ni tih a inngaihtuah lai vel chuan, a hmangaihna chu a lo hrilh tam tawk lova, a sawi tam tawk lova, a lantir lem lo tih a inhrechhuak a ni ang. A inhmuchhuak a, a piangthar ta hial a ni ang. 'Hmangaihna hi kan thil neih lam a ni lo, hmangaihna hian engmah a nghak thei lo, puanchhuaha lantir a ngai a ni,' tiin a testimony a sawi a; mahse a tlai lutuk hman tlat!

Thih dawn tepa piangtharte tan pawh Vanram dah ni mahse, he hmangaihna chungchangah hi chuan pianthar hian tlai luat a nei a ni ngei ang. I hmangaihna chu a hun laia i puanchhuah loh chuan, i puanchhuahna tur lakah khan a tlai thei a tihna em ni? Chu chu he hringnun lamtluangah hian thudik a ni reng em? Dik vek lo pawh lo ni mahse he hla phuahtu nunah hi chuan a dik a; a inhmuhchhuah chuan a tlai lu tawh a, "'A tlai lu ta,' an la ti ang" tih kha a nunah a thleng dik a, indawmkun ngawih ngawih mai loh chu tih tur a vang tawh a ni ber mai!

A va hahthlak em! A inngaihtuah fo va, a ngaihtuahna chuan duh mahse thutlukna a siam thei ngai lova, mahse chu a thutlukna siam theih loh chuan a nun atanga hla taka a awm hnuah a rawn thing nawn leh si! A thutlukna siam theih lawk lohna chhan kan hre phak tawh lova, mahse, amah pawh hian hrehawm a ti a, a inhumruh tih chu a hriat mai! A rilruah inngaitlawma, a hnena hmangaihna dil tura thingthi nun neih ngai nia a hriat laia a tlawm thei lote pawh tunah chuan pawi tiin, insehruh engang mahse awmzia a awm tawh lo. A hmangaihna chu phochhuak lovin a thinlung chhungrilah a vawng reng ringawt a, a puanchhuah loh chuan a hretu tur khan a hre thei si lova; a puanchhuah loh hmangaihna chu a lairilah chuan a la awm reng thung si. Puanchhuah duhin han tum mahse a ban phakah a awm tawh lova, a nun atanga hla taka a awm tawh avangin a hmangaihna vawn reng chuan chemtea vih ang maiin a chhun na ta thung a ni. A na vawng vawng a, a na zel dawn a, a na reng dawn pawh a ni maithei!

He hla, Michael Jackson-a hla dang ang lo taka muang kal raih, lairil fan tak mai hi a nalh bawk a ni ang, MJ chauh hi a satu a ni lova, Patti LaBelle, Ginuwine, 98 Degrees, Jon Lee, Barbara Mandrell, Willie Nelson leh Josh Groban te pawhin an kurpui tawh a. He khawvela mihring hrang hrang, vun ngo leh hang, vun sen leh vun eng te zingah hian nalh titu pawh an tam a, a hun lai khan Michael Jackson-a hla hit niin, United States-a hla lar bikte chauh lanna thin, Billboard Hot 100-ah 10-na a rawn kai phak a. UK lam (Singles Chart) ah pawh 3-na a ni phak bawk a. A sak tirh atanga kum 29 hnu, 2009 a a satu a han thih takah hian a rawn lar thar leh a, UK Singles Chart-ah pawh 95-na arawn ni chho leh ta hial a ni.

Kan naupan laia kan film en thinah kha chuan 'Interval' a awm ngei ngei. Zunram thiar nan te, kan film en sawiho nan te, kan film ena a changtute tihdan zir nan te kan hmang tlangpui thin. Eng pawh ni se, chu lam chu ka sawi tum a ni hran lova. Tun lai chu thu ziak turin ka kut a chawl tlat mai a. Kar thum lai, buai em emin hna ka thawk a. Tunah erawh ka awl leh ta deuh a, chuti chung chuan ka buai lai ang tho khan ka rilruah thu ziah tur a rawn lut hlei thei tlat lo. Hetia hun khaihlak lai hian, thu fahrah te te tal, blog update nan tiin ka han thaikawi a, chu vang a nia, a sap tawng thiam lo ber maiin, 'Interval' ka'n tih ngawt.

Pu Chawnghilh-te'n ni khatah post pahnih emaw te an dah laiin, post tur nei miah lo, hmeichhe thi hul taka han hul thak mai hrehawmzia hi sawi thiam a har zawk a. Ziah tur ngaihtuah lawk lem lo pawha rawn lut ve zut zut thin kha, vawrh bo ang diak a ni ta mai a, engtia hmuh let leh chi nge maw ni dawn ni? Tesep te te hian bul tan ila, a rawn inkahpup(k)-chaw chho leh mai mahna...

Icon : October thla chawhnu lam atanga tun thla chawhma lam inkar chhung khan Youth Icon thlanna, District dang rualin Kolasib District-ah pawh neih a ni ve a. Management Committee din a ni a, Secretary ka'n ni mauh mai a! A buai theih rem rem teh e!!

Live show engmah la buaipui ngai lo, Visual/Electronic Media-a kerek pawh la dai lo kha, a bultumtu berah ka'n tang ta a, buai lo rual ka ni lo. Zanah dar 12 hmain ka mu ngai lova, ka mut tawh pawhin a tuk zana programme tur ka ngaihtuah niap niap a, dar 3 ah te ka va tho a, ka note bu-ah pawimawh ni a ka hriat ka ziak chhuak leh thul. Show neihna hmunah lah, themtleng te zawk ang maiin, a lang ve lo ber kha ka phili a. Thianpa Tawia'n, 'Task Manager' min ti mathlawn lovin, Computer-a Task Manager-a thil kal inluh thuah nasat tluk zetin ka buai. Contestants, Judges, Hosts, Musicians, Beauticians, a.... refreshment chenin, advertisers leh Organisers inkar chinfel nen... hahdam taka, mahni In luma show lo sawisel thin bak ti ngai lo tan chuan lu a hai map map khawp thin mai!

Buaina kara ka thil hmuh chu - tun lai tleirawl leh rawltharte hian thil hi an lo ti tak tak ta deuh tih hi a ni. Mal zai hmanga inel an ni a, a tu mai pawh an thil tihah an chiang. An thata tur a nih chuan a hma lehtlai an pawisa lo, mi an tlem leh tamah an buai lo, an zai ngawng ngawng a, an duh dana thil a kal loh pawhin an sawi hreh lova, an duh dan an sawi ngam bawk. Kan thalai, engmah thawh peih nei lo, hma lam hun ngaihtuah lem lo nia kan hriat nawlpuite hi chutiang an lo ni vek lo tawp. An thiltih apiang ti tak tak chi, duh tui chi, hmabak ko taka chhawp duh, hmasawn chak, hlawhtlin duha hrehawm tuar peih tam tak he Zoram hian a nei tih ka hmu.

Farewell: Office lama kan pute engemawzat an awmna hmun sawn a ni a, kan thlah a. Kan pute zinga pakhat thusawi hi ngaihnawm ka ti. Sorkar hnathawk zawng zawng hian hria se, hre vek se, an nihdan ni ve vek se ka ti.

'He hmunah hian nikum mai khan ka rawn kal a. Nupui fanau nen, kan inbengbel ve dawn chiah a, ka nupui pawh he lamah a hnathawhna kan ti fel chauh a ni a, ka chet ka la ring lo viau. Beisei loh deuhvin ka che leh ta thut a, kan la inring lo viau a ni. Mahse sorkar hna kan dil lai khan, thawh duhin theihtawp kan chhuah a. Kan luh tirhin, khawi hmunah pawh, eng hna pawh thawk turin kan intiam a. Chuvangin, khawiah pawh, eng hunah pawh min sawn se, phur taka kal mai tur kan ni a...' a ti. A va mawi em!!

A sawitu hi a awmna Kohhranah rawngbawltu a ni lova, Pathian thu a sawi ka la hre miah lo. Chuti chung chuan Kohhran Upa tam takin an pawm theih loh, a nihna leh awmna hi a pawm thlap mai a, hotute rorel a sawisel miah lo. Kohhran hruaitu, mipuiin kan rin em em zingah hotute rel anga awm thei lo, mahni duhdana sorkar hna thawh tum ka hmu fo. Ka pu, ka fak che, ka fak thlawt che.

He tawngkam avang hian ka pu hi ka theihnghilh tawh kher lovang. He lam hawi ka ngaihtuah apianga ka hriat chhuah tur thu a sawi tlat.

Khai! A thupuiah sapho tawng hlir ka hman tak chu! Weekend (leh pek a!!) hman nuam vek u le....