Chokapui-ah
Posted by Hriatpuia Pa
Hman a ni ve tawh ang chu, kan naupan lai khan, mi Inah TV enin kan lut laklawh tawh si, Cricket an lo chhuah a, awmzia hre miah lovin kan en ve doh doh thin a. Khatih lai kha chuan Kapil Dev kha a lar thin ngang mai.
Hman a la ni chiah lo, 2004 mai kha a ni. Assam Chief Minister Tarun Gogoi-a bulah khuan chaw ka zuk ei ve zan pek a! Hmarchhaka chanchinbumi kal khawm, Assam RD Minister-in Hotel Ashoka, Brahmaputra lui kama zanriah min buatsaihsak tumin Gogoi-a hi a rawn kal ve 'goi goi' a nih kha.
Kan naupan laia ning chung chunga Cricket kan en thin leh Chief Minister Bungalow-a zanriah ei hi a inzawm ang tih ka ngaihtuah ngai lova, ka beisei phak loh thil a ni.
Board of Control for Cricket in India (BCCI) hausakzia hi kei chuan ka hrethiam chiah lova; mahse an hausa tawk ang tih erawh ka ring. BCCI hnuaia Affiliated member State-te hnenah kum tin Promotional Fund cheng vaibelchhe chuang an pe thin tih an sawite ka hre ve thin a. Chu pawisa chu he Zoramah hian engtinnge a rawn luan luh ve theih ang a, India hausakna hi engtiangin nge hemi kawngah hian kan chhawr ve theih ang tiin mi thenkhat chuan hma an la a. Chumi atana hmalak a awlsam nan Cricket Association of Mizoram (CAM) hruaitute chuan Chief Minister Pu Lal Thanhawla chu President atan an sawm a. Ama tawngkam takin, kan CM hi Jagmohan Dalmyia - khawvela Cricket game tilartu pawimawh bera an sawi hial - nena thlawhnaa lo chuang dun fo tawh a nih avang leh, a CM nihna nen tangkai dawn riauvin kan hruaitute chuan an hria a ni ang, CM an sawm a, ani pawhin 'Zoram tan' tiin a lo pawm ve mai a. Tichuan, kar hmasa mai khan, a hovin Cricket hruaitute chuan Meeting kan nei ta a, chumi tum chuan CM chokaah zanriah ka kil ve khiah a ni.
Chairman-ah CM
Sports Association thutkhawm a ni bawk a, kan Chairman chu CM ni mahse a CM na a tilang lo thiam ngang mai. Pu Hawla hi 'biak har, induh ngulh' niin ka hmu thin. A Committee kaihhruaia member nih erawh ka huphurh aiin a nuam a, ka beisei aiin ka zalen tlat. Ka beisei phak bakin Cricket game a hria a, India rama chengte tana Cricket khelh hlawkzia te, Mizote tana khelh chi tak a nihziate pawh a hminga District hruaitu ka nih avangin ka hre sil ve nial nual a, mah se Pu Hawla hian kei aiin a hre zawk a, kei aiin a sawi thiam bawk.
Committee boruak ti zahawm lo chuang si lova fiamthu han thawh zeuh pawh ka rin aiin a thiam zel. A tul a nih chuan Protocol ngaihtuah hauh lova Sports Minister dah pawimawh a thiamzia pawh mak ka ti a. Budget sawiho nghal kan ni a, CM hova Committee chuan kan sum sawi rik pawh a thau deuh!
Khua a thim
Kan la sawi zo lova, khua erawh a thim tan der a. Kan awmna pindan chu tihen a ngai. CM chuan midang tir lovin amah ber chu a tho thurh a, a kal kual a, pindan chhung tieng turin pindan banga electric switch chu a va hmet kual dun dun a! Hei pawh, ka beisei loh thil.
Hemi hnu rei loteah hian Sonia Gandhi lo kal nia Sonia-i bula inti thu fahrana tawlh harh harh, Mizoram first Lady Pi Rii a rawn lut, 'Zanriah kan peih tawh a nia..' a rawn ti! A lu a rawn hreng tah a, eirawngbawl thuamhnaw nen pawh kan PI hi a nalh tho mai!
Zanriahah Se sa
State pakhata thu ber Inah meuh chuan eng chawhmeh nge kan hmeh ang tih kha, keini mi In hnuai luah ve satliah rilruah chuan a riak lo thei lova. Beisei ngaihna awm miah lo, Sial sa an lo chhawp a, Se chek a lo awm bawk. Hmeh dang chu sawi lo mai ang, rawtuai leh behlawi bai pawlh, tui ka tih em em mai CM chokaa a lo awm ve kher kher erawh sawi loh ka phal lo. Ka chaw ei a tui vang nge ze nge ka hre lo, kan chaw ei lai thla hi ka la ta miah lo!
Mak ka tih leh mai mai chu, CM te nupain kan chaw ei tur inbuatsaih vel min kilkawi zel mai te, inti lal viau tura ka rin ka Pi in a naute nena min suahsak hmiah hmiah maite kha a ni. Hmuhnawm ka ti a, sawi nuam pawh ka ti.
Rii Sermon
CM Pu Hawla nupui Pi Lal Riliani hi Indian Society On Tobacco and Health, (Mizoram Chapter) ah President ni lai a ni tih kan hre theuh awm e. Zanriah kan ei zo va, kan titi khawmuang vel a; anni nupa chu Nilai zan inkhawm turin an lo inpeih leh der a! Kan chhuak tur leh an inkhawm kal tur chu kan chhuak rual a ni ta ber a. Kan chhuah hma chuan amah Pi Rii chuan, 'Sports Association hruaitu in ni a, thenkhat hi chu zuk leh hmuamah in fihlim lo tih in hmel atangin ka hre thei. Infiammite pawh zuk leh hmuama fihlim turin kan ti a, a hruaitute pawh in fihlim loh chuan hruaitu ni tlak in ni lo. Kan inhmuh leh hunah chuan in nghei vek tawh tur a ni,' a ti bawrh bawrh a; a sawi dik phian mai.
Tichuan, an kal a, thian thenkhatte pawh an kal zel a. Kei, CM Bangla ka vawikhat kalna chauh a nih avangin a pawnah chuan, ka phone-a camera hian zan thim a ngam lo tih hre reng chungin thla ka'n la hram a!
