Oh.. Gazza!  

Posted by Hriatpuia Pa

Dan pangngaiin Office ka thlen ve leh internet lûtin Facebook ka hawng a, ka hnathawhna lama ka thawhpuite leh hmunpuia kan thawhpuite nena kan group ka en a, thil thar awm lovin a lo ruak hiai a. Official e-mail ka hawng leh a, chutah pawh thu thar a awm chuang lo.

Hna thawh nghâl tur mai ka neih loh avangin infiamna chanchin thar chhiar turin sports website hrang hrang ka lût a. Chutah chuan kan râwlthar chhoh ve tan tih lai atanga rawn lâr, English chhùl chhuak zinga footballer talent nei tha bera an sawi thin Paul Gascoigne, 'Gazza' ti a an koh duat, Mizo pa tam tak ang maia zu vanga tal buai chanchin ka chhiar fu pek a!

He mihring hi ka football en ve tan tirh laia footballer lâr ber, hmel tha bawk si, inkhelh thiam bawk si a nih avangin a chanchin hian min khawih lo thei lo. Zu avanga hun rei tak buai, tûn hnaiah zu chu a hneh tawh nia insawi Gazza chu dawr atanga a haw lai thla an la a, a ipte kenah chuan zu um ni awm tak thla an hmu leh a nih chu!

Chiang kuang taka World Cup ka en hmasak ber, Itlay World Cup, 1990 kumah khan he mihring hi hriat loh theih loh khawpin a lâr a. Player langsar ber chu a ni lo, mahse, semi-final-ah champion zui ta West Germany an hneh loh tuma yellow card a hmuh vanga a tap te kha ka la mitthla thei. Ni e, quarter-final-ah Belgium an hneh khan yellow card a hmu a, semi-final-ah yellow card a hmu leh a, chak pawh ni se England tan final a khel tawh lo vang. Chu chu hriain a mittui a tla a, khawvelin a hmu. English-ho phei chu kha mittui khan a vel a, an tap per pur mai. A hun laiin an tap a ni satliah lo,  England-a National Football Museum-ah zuk kal la, Gascoigne-a mittui tla lai thalâk leh a lem (puppet) i hmu ang.

English writer ropui Salman Rushdie chuan hetih hun lai vel hian The Independent chanchinbuah, "Paul Gascoigne-a hma hian tu nge tah vanga national hero ni tawh? A danglam a ni. Ani chu a tap a, khawvelin a tahpui a ni," tiin a ziak hial. Ni, English-ho chauh an tap lo, Mizorama England tantute pawh kan lo tap hial a ni lo'm ni?

Chu chauh chu ka hriatna a ni lo. 1996 European Championships kha chu ka en nasa ve hlê tawh. Scotland nen an inkhelh tuma goal ropui lutuk a khung te, a goal lawm nana field-ah thu hniam a, a ka ang a, a thianten a kaa spray an phuh lût anga an tihte kha ka hmu. Tûn hnuah kha celebration kha "Dentist's Chair Celebration" an ti tihte ka hre hnuhnawh leh zâwk. (Euro 96 hi England-in an thleng a, qualifying round an khel ve lo va. Friendly an khel nasa hle thung. Hong Kong-a friendly an khelh tumin, Gazza leh a thiante hi zanah, dentist thutthlenga thu chungin, an kaa zu an thli lût lai thlalâk chu sap chanchinbu hovin an chhuah chuai chuai a, chumi tihel nana an goal celebration hi hmang an ni.)

Euro 96-ah khan semi-final-ah Germany nen an intum a, 1-1 in hun pangngaiah an in-draw a. Hun pêk belhah Alan Shearer-a cross tha lutuk chu Germany goal ruakah Gazza hian pet lût mai thei a ni tawh a, a tlawh pha lo chiah a! Goal ban bulah a tawlh chhuak a nih kha. Ka la chiang ngang mai. Khami tuma Gazza ui hmel kha a chanchin sawi ka hriat leh ka chhiar apiang hian ka mitthlaah a rawn lang thin.

England tan vawi 57 a khel hman a, goal 10 a khung bawk. 

A tleirawl lai, Ipswitch Town, Middlesbrough leh Southampton vela a trial hlawhchham tlauh tlauh hnua lalûttu, Newcastle chairman Stan Seymour chuan a tleirawl lai daih tawh khan, "He pa hi George Best thluak nei lo zâwk a ni," tiin a lo sawi tawh a. A sawi dik ngawt mai. Football chu a thiam chiang a, world class tih ngam a ni. Mahse, a lu burah thluak fim a awm lo. A rui thei êm êm a, a tleirawl lai atangin a over-weight deuh reng mai a ni. 1996 ah nupui a nei ve a, kut a thlâk nasa thei lutuk a, kum thum hnuah an inthen leh tawp a. A lar vanglaia company hrang hrangin a signature an duh nasat avanga chutiang lam lo buaipui tur staff neih duah ngai khawpa pa hausa leh ropui kha, kum 2008 ah chuan chhiah a bat avangin a talbuai a, kum 2011 te khan London High Court-ah a kal zak zak ta mai!

A zu nghei thei lo chu amah ngei pawhin hrehawm a ti a, Gospel ni lo, camping (rehab) ah vawi sarih a lût a, a piang thar tak tak thei chuang lo. Vawiin thlengin zu chuan a la tibuai ta zêl a nih hi!

Pa pian tha, sap pachal, hmel tha si, a awmna ram mipuiin an âtchilh ber mai football thiam bawk si, hma lam hun nei êng ber zinga mi, nuamsa taka a dam chhung hun hmang thei tura vantlang ngaih Gazza te meuh zu vanga a han tal buai hi chuan ngaihtuah a tithui ngawt mai.

Mihring nunah hian insumtheihna leh tumruhna tak tak a awm loh chuan thiamna te, zir sanna te leh remchanna te hian hun rei a daih thei lo tih hi Gazza nun atang hian a lang chiang ka ti. Kum 47 chauh a la ni a, inkhèl pawh a hmunah a en peih tawh lo! A mak a ni!

Zum Zât Kua  

Posted by Hriatpuia Pa

Aizawl khawpui lun lai taka ke-a kalte tana kalna tur bîk an siamah chuan hmanhmawh fahran lovin ka kal a. Ka kal ruala kal ve chu chhiar sen an ni lo va, min tâwk zawng pawhin an rawn ka zut zut mai. Kan bul lawkah chuan lirthei chi tin an inzui duah duah bawk a. Khua a lum uap churh a, khua chu a dur hnîm deuh ruai bawk a.

Kawngpui leh ke-a kalte kalna tur indawh sang inkarah chuan inlehkhadenna lehkha (playing card) tla hlang, zum zât kua ka zu hmu a, a la thar vang lehnghal! Motor-in an rawn tlàn pelh lai chuan a lëng leh lap lap hin a, Tumahin an ngaihsak lo va, an en zui hek lo. Chutiang inlehkhadenna tlahlang, leia awm tawh lehnghâl tu khaw-khain an ngaihven lo pawh chu thil àwm tak a ni. 

Mahse, ka mit a la tlat.

Zum zât kua, sen vir ver, motor tlan thâwt avanga phe leh lep lep thin chu ngaihtuah chhunzawm loh ka tum viau na a, ka kalsan hnu pawhin ka mitthlaah a rawn lang leh zawk thin a! A mak mang e! Ni e, a mak a ni, hringnun hi!

Kha inlehkhadenna lehkha them kha a vul lai chuan a tangkai ve thin ngawt ang a, khawiah emaw a lo tlâk bo palh pawhin amah hmangtu turte chuan duli bo zawn aia nêp chuang miah lovin an zawng ve fo tawh ngei ang. Pawisa inchuha inlehkhaden tum a nih a, thiltithei bîk (joker) atana a tan fuh tum phei chuan inlehkhadennaa telte chu neih tumin an hmanhlel vek ang a; an kuta a rawn awm fuh hlauhva an làwmna sàn turzia chu aw!

Ni e. Chutiang chu a ni. Chu zum zât kua avang chuan tu emaw ber chuan hlâwkna a lo tel ve tawh ang a. A vanglai chuan tangkai ve tak, a awmna biala mite tana làwmna thlentu a ni ve tawh ngei ngei ang. Mahse, tûnah chuan kawng kamah, tu ma ngaihsak hlawh lovin a let bém a. A hman hmanin an pheikhawk mawi fahran tawh lote chuan an rap siah siah a. Motor khuin a phuh thawt thawt a, a leng lawp lawp a. Tu tan mah tangkaina a nei tawh lo va, an fate inkhualtelem nan tal pawha awttu an awm tawh lo. A va lungchhiatthlâk êm!

Hringnun hi hetiang mai hi a lo ni! Kan vanglai leh that laia hlu tak pawh hi khua reiah chuan hlutna rêng rêng nei lo kan lo ni dawn a. Tu mahin an ngaihsak loh kan la ni thuai dawn a lo ni a! Chu hun chu kan duh emaw, duh lo emaw kan pumpelh theih a ni lo. Khuanu duan dan a ni si a, engtikah emaw chuan chu hun chu kan la tawng theuh dawn. Vanneihthlâk êm êm chu - chu hun chu kan hre tawh kher dawn lo lai hi a ni! A va lungchhiatthlâkin a va vanneihthlâk kher si em!

I ngaihtuah ve tawh em? Aurinna a\angin mitthi an rawn puang a. A tàwpah, 'A ruang hi...' tih a lo ngai tawh thin! Ni e, 'a ruang hi!'

He khawvêla kan nun hi a tàwp hunah chuan min hmangaih êm êmtuten mawi an tih ber, ni e, tha an tih ber mai min sak sak kan hming ngei pawh hi kan pu lo nghâl titih mai dawn a lo ni a. Kan taksaa nunna thaw chuan min chhuahsan ve-leh kan mihringpuite thinlung atang pawhin nèk chhuahin kan awm ve nghâl dawn a lo ni!

Thanga chu a thi a, a chhungte chuan ui takin an tah hliam hliam a. Pawn lamah chuan YMA hruaitute an lo thukhâwm a, an thurel chu 'Thanga chungchang' ni lovin, 'ruang chungchang' a ni! Ni e, 'Ruang chu tlaivarpui tur nge phùm nghâl tur?' tih te, 'Ruang chu kuanga dah nghâl tur nge dah rih loh tur?' tih te, 'Ruang awm laiin thingpui sem tur a ni em?' tih te a ni! Khawiah nge Thanga chu?

A dam lai kha chuan an veng pa ràwn zinga mi kha a ni ve a. A tel lovin eng committee-ti emaw chu an thukhâwm thei lo ve fo va. Biakina a inkhâwm lohte kha a langsar thin a sin aw! Mahse, tûnah chuan a tangkai tawh lo. A taksa chu a mihringpui, an pawi sawi a hlauh êm êm thin, anni pawhin an ngaihsak ve tak ni thinte bulah a la awm, mahse, 'Pu Thanga' titu an awm tawh lo, 'Ruang' a ni tawp mai!

Pu Thanga leh zum zât kaw chan chu inang rengin zu hria i a! 

Mi thenkhat hi chuan he khawvêlah hian awm hlen dawnin an inhre deuh ni te hian a lang thin. Mi dangin min fin khalh ang tih hlauvin kan phe dàwr dâwr a; mi dangin min neih khalh ang tih hlauvin kan ham buan buan a! A ni, fing kan inti a, miin min sawi khalh ang tih te hi kan hlau va! Thenkhat phei hi chuan tu mah rêng hi kan han ngaisang fahran lo vêl a!

Chutiang lo zawng pawh chuan chhût teh. Awm hlen tur ang maiin, kan dam chhung min daih lo ang tih hlauvin sum leh pai kan chhêk khâwl a. Rem leh rem lo, a dik a dawk thlu hauh lovin sum hmuh tumin kan pên sau pâwk pâwk a! He khawvêl kan awm chhunga nawmsak loh kan hlauh luat avangin kan inhrêk riltam a! Mi hmuha changkâng nih duh vangin mi hriat lohvin kan ei kan tichhia a; lan mawi tumin, ni e, kan nihna aia mawi daiha lan tumin kan inchei a - kan nui lui vêl thin a nia!

Khawvêlah hian dik taka nung tam tak an thi tawh a, dik lo taka nung pawh tam tak an thi tawh. Dam rei loh hlauva mahni duhzawng pawh ti ngam lo leh ei ngam lo tam tak pawh an thi tawh! Kan la thi zêl dawn. Chutiang hmun leh rama chêng chu kan ni miau va, zum zât kua leh Pu Thanga chan aia sang hi chan tum sateh thin mah ila, kan tum chu hlenin a awm lo kumkhua dawn chiang si!

Kan thih hunah chuan kan hming hi lam rîk a ni khat tial tial ang a, kan pawimawhna hi a ni tèlin a nêp tial tial ang a, hun rei lo tê-ah theihnghilhin kan awm ang. Chu chu he leia nung tura piangte chan tâwka khuanu rèl a ni; dan theih a ni lo.

Chutiang chu a nih a, chutiang chu kan chan tur a nih si chuan, he khawvêlah hian eng vangin nge lem chan a ngaih reng ang? Tute emaw ngaihsan hlawh duh vanga mahni nihna bâka inhampuar hi eng nge a tùlna? Kan hlawh bâk ei rûk duhna thinlung hi eng vanga nei tlat nge maw kan nih le!? Kan nawmsak nan kan intirethei a, kan hahdam nan rilru kan tihah a; mi dang hmin tumin kan hmanhlel a! Chu chu eng nge a tùlna leh a sâwngsawhlawtna? 

Kan thawhrimna zawng zawng hi kan hrawk tan mai a ni a, eng zâta tam pawh thawk chhuak ila kan châk a daih dawn lo va, kan duh a reh phah dawn lo. Kan dam chhunga kan duhàmna zawng zawng hi kan thih hnua nuihzatbur mai mai tur a lo ni!

He kan hringnun hi 'chhûm, rei lo tê lo lang a, ral leh ang mai' nena tehkhin a ni thin.  Zai leh hlimhlawp bawlna hmun, zan khat atan chauhva siama kal ang mai kan ni a. Chutiang hunah chuan a tawp hma ngeia nuam theihtawp leh hlim theihtawpa awm kan tum thin a ni lo'm ni? Engah nge kan sum neihte khâwl a, kan neih bâk bâk kan ban chiam chiam? Nui hlei thei lova kan awm fo mai hi eng nge a chhan ni le? He thi tur taksa hi a thih hma hian he taksaa hringnun nunna hi a nih tur ni pha lovin kan tihlum fo lo maw?

Hringnun hi - 'Engmah lo leh thil lo thlawn mai a lo ni' tih hi a va dik lungrun tak êm! Kei leh Pu Thanga hian kan zum zât kaw tlahlang chan aia ropui bîk chuang hauh lo chanvo bâk hi hmachhawp leh hmabâk kan nei chai lo a lo ni! Lungchhiatthlâkin!

Facebook

Keimah

Visitor Since Feb 09

Khawi lam atangin nge?

online

Followers

Lairil

Mihring ngaihtuahna LAIRIL hi mihringin duhnate, awhna te, hlauhna te, thlamuanna te, hlimna te, lawmna te, lungngaihna te, thinrimna te, chapona te, duhamna te, itsikna te, mahni hmasialna te, hmangaihna te, duhsakna te, engkim mai; mihringa mihrinna siamtu leh neitu a nih avangin a va pawimawh tehlul em!

Nuihtirtu che kha I thinlung a ni a. I tah theihna te, thil mawi leh mawi lo i thliar thiamna te pawh kha thildang a ni chuang lova; khaw lum leh khaw vawt, hlauhawm leh muanawm, hrehawm leh nuam I thliar hran theihna pawh chuti tho.

A chang chuan kan hmuh leh hriat ngeite pawh hi dawt te, a lem te a lo ni thei a! He thinlungin a ngaihtuah hi a lem a ni thei ang em le? Mitin a hmuh a, bengin a hriat avanga duhna leh thinlung LAIRILin a duhna hi a inzawm ang em le? A hrang ni ta se khawii chu nge dik zawk ang? Khawii chu nge tha zawk a, tlo zawk ang aw?

Kan mita kan hmuh leh benga kan hriat te, rilrua kan ngaihtuahna te zinga a tam zawk hi he kan mihrin chhung hian kan theihnghilh leh thin em? Kan theihnghilh tawhte hi kan hrechhuak leh thin em? Thinlung hi bum hmang, chhe lailet der em ni? (Bible – Jeremia 17:9)

Recent Comments

Grab This Widget

Twitter Updates

    follow me on Twitter