It's Only Christmas  

Posted by Hriatpuia Pa


Kristiante tana hun pawimawh ber zinga mi Krismas hi khawvel mihring zawng zawng deuhthaw hian hun pawimawh berah kan ngai tawh a. A sakhaw thila serhna leh ngaihsanna nei miah lote pawhin Krismas hi khawvel huap hunpuiah an ngai lo thei lovang.

He hun a lo thlen hian Kristianna aṭanga thlir chuan kan lunglènna  hian Bethlehem lam a hawi phâk lo a nih pawhin a lam rawng tal kai hrâm se a duhawm ṭhin a. Amaherawhchu mihring thinlung hi a siamtu Pathian lakah pawh hel ngam a ni tlat a, keini mihring vêkin kan va thunun theih ni hek lo; hmangaih berte ngaihna leh chumi lama lunglènna chu a phum bo theih bik awkawng loh va, Christmas Love song a piang mawlh mawlh reng lo thei bik lo a ni.

Mizote hi hnam naupang leh Kristian sakhaw la vung tak kan nih avangin hun rei tak chhung chu Christmas Love song hi kan nei ngai lova. Tun hnai kum kalta rei lo teah khan pahnih khat a piang ve a tih theih awm e. Chutiang hla pawh chu mi tam tak chuan sak enah an en lova, a phuahtute leh a satute tana hriat nuam lo qawngkam cheh ta mai pawh an awm nual awm e. Chutih lai kara, "It's Christmas and I miss us most of all," han tih chu - Kohhran Dan pawnah min pet chhuah phah ang tih a hlauhawm angreng hle! He hunpui, mi zawng zawng tana hlimna niah hian, mihring zi huai huai karah mal ngawih ngawih leh lungno êm êmin a awm ve theih tlat a, chu'ng mite tan tal chuan lunglèn hnèmtu a lo nih tak hlauhvin kan han thal\huam leh dawn a ni.

Tun tuma kan hla ngaihthlàk tur hi Ronan Keating leh Kate Ceberano te sak, kum thum kalta, 2009 December ni 11 a an tihchhuah, "It's Only Christmas" tih hla kha a ni. A hunlai leh tunlai thlengin nula leh tlangval tam takin 'Mas laia kan 'playlist' a kan dah a ni a, kuminah pawh hian mi tam tak mittui a titla leh ngei ang.

Lungno uchuak:
Hmangaihna khurpuia luh dun tawh chuan engkim hi kan inṭâwm a. Thil awm sa leh la awm lote pawh kan nei dun a, chhinchhiah nan kan hmang ṭhin. Vana arsite khi inhmangaihten chhinchhiah nana kan hman rim ber zinga mi a ni awm e. Kan inhmangaihna min hriatpuitu atan te, hmun danga awm chung si a hun inanga thlir dun atan te kan hmang ṭhin. Ni, chutiang nun leh hmun aṭang chuan he hla hi a piang ve tih hi a chiang.

Lal pian hun a lo thleng leh a, chumi atana kan thutiam leh kan duhthusamte kha hmänah khan kan lo sawidun sep sep tawh ṭhin a. Chu hun lo thleng tur chuan lunglènna khurpuiah min khurbinpui dawn tih hre lâwk ràn chungin kan han lungleng lâwk ngei a! 'Ka lung a leng, a hrehawm' kan han ti fahran ṭhin tak na a, lunglèn hi lunglèn loh ai chuan a nuam veng veng lawi si a ni lo'm ni?

Ni e, he Krismas atana kan duhthusàmte kha kan la hre reng a, kan thutiam leh ṭawngṭainate pawh chunglamah kan thawn ṭhin a. Kan intiamna arsi pawhin vanlaizawl a rawn luah leh tawh a, lung hi a leng thar leh awn awn a. Hrehawm nasa tak thlen mahse, he lunglènna hian rilrua nuam leh na vawng vawng inpawlh a rawn keng tel a, a leng ngawih ngawih mai a nih hi!

Mi te chuan Lungno uchuak min lo ti ang hmiang, a pawi lo ve, Krismas a ni tlat a, hmana 'keimahni' kha ka ngai ber lo thei tlat lo!

          Do you remember what you wish for every Christmas?
          Do you say a prayer and send it on a star?
          Well may be I'm just being over sentimental.
          But now it’s Christmas and I miss us most of all.

Amahah ka awm reng:
Ni e, he inṭhenna ramah hian thinlunga insuihfin tawhte hian inṭhen hun hi kan ngaihtuah mang mang lo. Ngaihtuahna tawi tuk khawpa hmangaihnaa phuar belhbawm kan nih tawh chuan, thinlung chhungrila làwmna khat liam hi kan inhmuh chian sak êm avangin 'ka lawm e' han tih mawihnai a ṭûl lova, chutiangin hmun a chang ngai lo. Englai pawhin hmangaihna hruihrual chuan min phuar reng dawn niin kan hria a, 'keimahni' ngei mai chu nakina kan la mitthla tur a ni tih dawn lek lovin, hmangaihna dinhmun hmun khata ṭhu thluang dun reng turin kan inngai fo ṭhin. Mahse chutiang chu khuanu'n hringnun a duan dan a ni fo lo si!

Boruak a vâwt vîn tâk tawh a, tirilah vâwtin min ṭhâm ang bawkin hmangaihna kut vâwt chuan min rawn ṭhâm er er a. Chutih hunah chuan thildang a ngaihtuah theih tawh loh. Pangngai reng tur emaw kan tih kan nun kha a pangngai tawh lo na a, pangngai rengin chu nun ngaihna chuan min ṭhâm tho si. A va mak em! Boruaka leng vêl thim thuneihna nge ze nge hetia min awm tirtu hi!?

          You know I never really took the time to thank you.
          I was almost thinking you were here to stay.
          Is it something in the air that gets me crazy?
          Cause now it’s Christmas but I miss us just the same.

Se se thu di:
Khaw vâwtin vun leh tisa mai a tawk tawh lo, ruh leh thlîng a fan a, a luhchhuah a. Vur rawn tla chum chum se, lunglenna lungzing zawng zawng hi rawn tleng fai vek se, beisei loh deuhvin nang nen han lam dun leh mai ila! Tah nuih chungin kuah che ila, hlim avanga mittuiin he lunglènna thinlung ipik hi rawn tleng fai vek mai teh sela!

Kan naupan lai ang thovin naupangte chu an hlimin an sahawk a. Zai leh lamin hun an hmang a, Krismas Carol-a an hla sak tur an zir a, an zai rual ṭhap ṭhap a. Chutianga zai ri leh hlim ri karah chuan hmâna ka beng bula i thusawi, zawi tê a i sawi ngei kha a rawn ri leh a. Zawi tê tak taka i sawi kha - ri tam tak karah pawh hian a va ri ring si êm! Chhan dang a awm lo, Krismas a ni a, a ngai tê bawkin ka ngaih kha ka ngai leh ta a ni!

          So let the snow come down and drown out all my sorrows.
          Maybe I can dance again with you.
          And as the children sing I swear I heard you whisper,
          That now it’s Christmas but I miss us just the same.

Angelte nen lungrualin:
Sikni êng lo chhuak ṭhinin, a theihtàwpin he khawvêl vâwt vîn tûk mai hi ur lum han tum ngial mahse a hunin a zir tlat tawh a, Krismas lai ni miau hek, a lum thei tak tak lo. Hetiang hunah hian pawn boruak a thlakhlelhawm tawh lova, lungleng leh khawhar taka in chhunga tawm cheuh cheuh mai loh chu tih tur a vang. Hla takah, ni e, i kut vuana duhthusam chak êm êm chungin ka awm si a, ṭawng a harsa a, sawi tur ka nei lo. Khawiah mah ka kal peih lova, ka thaw hram hram a ni ber e!

Chutih lai chuan ka suangtuahnaah nang chauh i lang a, duat takin min lo kuah a, min lo pawm a, min lo vuan a! He ka thinlung khawhar leh riangvai tak hi van angelte pawh khian min hriatpui a ni ang, Krismas hla sak pahin ka bulah an rawn kal a, ka kiangah an rawn zai ve hial a!

Kan tana nau lo piang avanga thinlung lawm leh hlima hun hmang tur ka nih vei nen! He Krismas hi nang nena kan nun ka ngaih lai ber a ni hlauh thung a. Angel rualin van lal fa an fak ri te, leia mipui sang tam tak zai rual ri karah te hian nang nena kan nunhlui kha ka ngaih ber a ni tlat mai hi a va mak em!

          When it’s cold, I get lonely,
          I can't talk, I can't walk, I can't breathe
          Then I dream and you hold me,
          And the angels are singing with me.
          I guess it’s Christmas when I miss us most of all.

Zawhna Hla  

Posted by Hriatpuia Pa


Hmel leh nungchang, vawikhat hmuhnaa hmangaih nghal mai theih hi a awm niin an sawi a, a dik chiah em tih ka hre lo. Hmangaihna hi chu a mak khawp a, mi dang tana dik hi mi dangah a dik vek kher lo va; thenkhat tana theih loh hi thenkhat tan a theih leh lutuk lawi si thin.

Thenkhat chuan hmangaihna hi eng vang pawhin a piang thei a, pian duhna hmun leh hun a nei hran chuang lo niin an sawi a. Hausak leh retheih a hre lo va, chi leh hnam hrang inkarah pian a hreh lo va, a thenah phei chuan kawppui neih leh neih loh pawh a thliar chuang lo; a lo piang ve tawp mai a ni awm e.

Thenkhat tan chuan hmangaihna lo piang hi hmelma ang hial a ni thei a. Phu loh zûna uai phei chu a hrehawm hle a ni awm e. Mahse, mi rethei thinlungah hmangaihna chu a piang thei lo bik lo va, a chawrno hreh map lo bawk si. Hmangaihna tak takin retheih leh hausak thliar lem lo mahse, mi tam takin hmangaihna ni a kan chhàl, hmeichhe hmangaihna tam ber hi chuan hausa a hria a, hmel tha a hria a, dinhmun a thlir a, thiamna leh theihna a en deuh em ni chu aw? tih hi khawvêl puma mi engemawzat zawhna a ni ngei ang.

Ni e, mipa hmel sawrbawl leh bawk ve tak takin hmeichhe hmel tha leh pian nalh tak an sirtlûkpui ve fo tih hre reng mah ila, chuai awm si lova hmel chuai chuk ringawt mai leh hnar tawk, biang puar satliah tan chuan hmeichhe hmel tha nena hmangaihna thlunzawm tum luih talh ngam chu harsa ve tak a ni. Lianchhiari leh Chawngfianga te inkarah hmangaihnain par a chhuang a, an champion-pui tih hriat avang ngawtin kawla ni chhuak chhiara sadai êk thai thin tan kamding nula hleitling hmangaih ve ngawt a zuamawm phah awkawng hlei nem!

Chutiang a nih vang chu em ni dawn, hmangaihna lam puanchhuahna hla zawng zawng deuhthaw hi tlin lohzia lantirna ni maiin a lang a. Kolasib model leh zai thiam, journalist ni tel bawk Rita-i hla, "I Tan Ka  Tling Tâwk" tih kha Mizo lengzem hla zinga tlin tâwkzia tarlanna awmchhun a ni hial awm a sin! Lalzova atanga John Mawitea te nupa thleng hian, hmangaihna hla phuahtute hian an phuah riang ngawih ngawih vek mai rih chu a nih hi!

Khawvêl changkâng chho zela tel ve Mizo zingah pawh kan thu leh hlain a hrut kim chho vel zel a. Chutih lai chuan kil khat atanga thlirna ringawt mai, "Ka Riang Chuang E," tih te, "Mahriakte'n Ar Ang Ka vai e, Parte" tih te, "Rairah Tan Zawng," tih te ringawt mai kan kûrpui chhungin sapho khu chuan hringnun ze hrang hrang hawl kim hla hi an ngah khawp mai a. Sak chi te, chham chi te, chhiar chi te pawh a ni awm e, an nei kûr ngei nguai a. Keini lam hi chuan a saka sak theih loh hi chu hla-ah kan pawm hlei thei lo va, thu leh hla lama mi ril ni a kan hriat tam tak pawh hian 'hla' kan tih huang a la zau tehchiam lo tih chu kan ram zirna ina kan Mizo tawng zirlaibu atang hian a lang thei awm e.

A enga pawh chu ni se, hetiang thu min ngaihtuahtir a, min ziahtirtu chu Tim Hardin-a hla phuah, Johnny Cash-a sak, "If I Were A Carpenter" tih hi a ni a. Kan tihdan pangngaiin i'n pathlawi leipui fan leh thuak thuak ang hmiang.

If I were a carpenter
And you were a lady,
Would you marry me anyway?
Would you have my baby?

If a tinker were my trade
would you still find me,
Carrying the pots I made,
Following behind me

Retheih leh harsat lam emaw, dinhmun lam emaw pawh a sawi chuang lo va, a nihna takah chuan he hla hi zawhna hlir a ni ringawt a; a zawttu hian eng dinhmunah pawh ding se hmangaih a ni ang em tih a hre chak niin a lang.

Thingremsiamtu hna hi hna tha tak, thiamna leh theihna bakah thahrui ngah ngai zet a ni na a, khawvel mihringte hian hna ropui takah kan ngai lo niin a lang. Ni lo se mihring ngaiha hniam taka bul rawn tan kher kher duhtu Isua Krista khan pazawnah thingremsiamtu a rawn thlang kher kher lo maithei. Chutiang chu a nih avang leh chutiang thu chu a hriat vang a ni chek ang, "Thingremsiamtu ni ta ila, nang nula tlâwntlai tha tak ni bawk la, min nei duh ang em? Ka fa i pai duh ang em?" a ti tawp mai!

Mitthlaah hian a rawn lang nghal uai uai a! Belvawtu nupui chuan bel chhipchhuan leh khai bawr chungin a pasal a zui ngei a rinawm nghet tlat. Chutiang hna chu thawk ta ila, ni tin mai ka hnungah min zui ziah turin ka hmangaihi hmangaihna hian a tlin ang em? Car chhuak thar ber kawngkhar veilam khar rik thawp sat paha hmangaih ber melh nghal theih dinhmun nen chuan a inthlau a nia, i thlang meuh ang maw?

If I worked my hands in wood,
Would you still love me?
Answer me babe, "Yes I would,
I'll put you above me."

If I were a miller
at a mill wheel grinding,
would you miss your color box,
and your soft shoe shining?

Thingkittu hna hahthlâk leh rothapzia hi sawi tam a ngai lo. Hreipui leh chem hriam a ngai a, thluak aia tihrâwl ngah zawk mah tan lo chuan a beiha beih rual a ni lo. Tihrâwl nei mang lovin thingkih hna thawh ngai tlat se, pawisa thir indelh ri aia hreipui leh thing insi ri ngaithla zing zawk chiang bàng tur hmangaih hi khawvêl hmeichhe tam zawk hmangaihna hian a thleng phâk kher ang em? Ni, chutiang dinhmunah pawh chuan ding se, a hmangaih chuan, "Aw, ka hmangaih ang che. Hmeichhe lu chu mipa a ni e," a tih zel theih a duh a, a ngên zuk nia!

Cement bag put te, maipâwl put te, chhangden te hi chu hmabâk a ropui tehchiam lo. Faina leh thianghlimna lam rim a nam lova, nalh leh mawina kawng a hawi hran lo khawp mai. Chhang her leh deng chunga pheikhawk tle var reng mai bun chu thil theih a ni lova, chutiang dinhmun atang chuan thinghlimna leh mawina dinhmun beisei loh law law a awlsam zawk. Chutiang dinhmuna ding tura hmangaihna hmachhuan tlattu thinlung ngei pawh chuan Aigupta sa bel a ngai leh mai ang tih a hlauhawm a ni!

Save my love through loneliness,
Save my love for sorrow,
I'm given you my onliness,
Come give your tomorrow.

If I were a carpenter
and you were a lady,
Would you marry me anyway?
Would you have my baby?
Would you marry anyway?
Would you have my baby?

Khawhar leh riangvai tak chungin, harsatna thlipui karah pawh a hmangaihna chu a hmangaih ber tan a lo khêk ve tang tang a. Amaha amah ngei mai chu a hmangaih tan a pe a. A hmangaih chuan, "Damlai par chu i hmang chul dun ang," a tih ve a beisei tlat.

Khawvêlah hian rei lo tê kan tel ve zawk a, rei tak tel a, century hial siamte pawh hian chiang taka an hriat chu kum 60 lo liam a ni lovang. Chutiang hringnunah chuan engkim hi zawhna hlir zawhna hlir a ni mai a. Kan dam chhunga kan chhan theih loh zawhna hi mihringte hian engzat fakau tak zawt ang i maw? A chhang theituin a chhan tâk lêm loh zawhna te, a zawttu turin a sawi chhuah lohva a rilrua zawhna a neih, thlanmuala a liampui tak engzat tak awm ang maw?

A hla phuahtu pawh hian zawhna a zâwt tam mang e! A zawhna zawng zawng chhanglêttu tur hian eng ang takin chhang ang maw?

Malin I Awm Lo  

Posted by Hriatpuia Pa


Ka taksa hi i tana hlan ral vek tur ni ta se, ka hlàn vek duh tak tak ang! Mahse ka duh avanga hlan theih a ni lo va, ka peih avanga tuar thei ka ni si lo!

Hmangaihna zawng zawng la khâwm ila, mihausa leh thiltithei, hmel tha leh pian nalh, thiamna leh finna zawng zawnga thuam te hmangaihna pawh tel vekin, ka hmangaihna che nën hian tehkhinin khaikhin ila, bûkin teh vek mah ila, ka hmangaihna che hi ama tâwkah hian a chhuanawm phâk ve ngei ang tih ka ring. Tu hmangaihna mah hian nang ka hmangaihna che hi a khûm ka ring lova, tu tan maha khûm rual a ni lovang.

Ni, chutiang chu ni mahse, kan inkarah mel tam tak a awm ang bawkin, ka taksa ngei hmanga kuah che a, thlamuan che a, hlimpui tur che hian hringnun kal pangngai hian remchanna a siam si lo va. Harsatna ruam dungchhir leh hrehawmna tlang chhip lawn chhuah tur pawh lawn chhuah huam êm êm chunga hmangaihtu che hian hetiang thu bâk a hraw leh awmze nei hi sawi tur ka nei ve ta lo a ni. 

Ka theihtâwk hi a va tlem em! Ka hmangaihna che hi chu a tlemin a neu bik lo a sin maw le!

Mahse, heng thu tal hi ka la sawi thei alawm -

I hun lo kal leh zel turah vàn angelte chuan vengin hualhim zêl che se la, harsatnain hlahthlem thin che se. Lo hmuingilin, Pathianin eizawnna tha tak pe chein, i no chu englai mahin ruak suh se.

Hlimna hi mihringin a dam chhunga a zawn, duhtâwk leh chin lêm nei lova kan zawn thin a ni. Chu hlimna chu i ta ni se, i nuih nasat luat avangin i mittui luang hial thin se la. Thian fel tak tak neiin, chûngte chu i tan rangkachak leh lunghlu aiin lo hlu zawk sela. Thinrimnain i hmel tidur ngai lo se, hlimnain i hmel chu ti-êng reng zawk rawh se.

A chang chuan hringnun hi a nih ang anga pawm a ngai ve bawk tih hi i hriat loh ka duh lo. Ni, he khawvêlin a pêk theih zingah hian a tha ber, a mawi ber, a thlum ber, a duhawm ber leh a hlimawm ber duhsak che mah ila, chutiang zawng zawng, englai pawha neih reng chu thil theih a ni lova, hringnun kalphung a ni lo. 

Harsatnain a nuai hun che a thleng ang a, thlasik khaw vâwt ang maiin hun khirhkhan i tawh hun a la awm ngei ang. Chutih hunah chuan hlauhna leh timnain i rilru a luah ang a, i la khur hial maithei. Ni e, engpawh ni se, he khawvela mihringin a tawn tur ang chu mihring kan nih miau avangin eng vang tehlulin nge keini pahnih hian, keini kan nih avanga kan pumpelh kher kher bik ang? Tiraw?

Chutiang hun a lo thlen a, harsatna leh buainain a nan tikah che hei hi i hre dawn nia - ka hmangaihna chuan englai pawhin a zui zêl che a, i bulah a awm reng a, i ke hniak tin a rap ve zêl - tih hi.

I lungphu tinah khan ka hmangaihna chuan thu sawi reng sela, hriat loh lamtluang i zawh lai te, nuam ti taka hringnun i hman lai pawhin ka hmangaihna che hi a chuai ve lova, hmangaih tàwp lovin ka hmangaih reng che tih hi i hre reng dawn nia.

Bawihte, nangmah chauhva i awm lai pawhin, malin i awm lo tih hi hre reng rawh aw - ka hmangaih êm êm si che a.

(Ref. 'Never Alone' By Lady Antebellum)

Hmangaihna  

Posted by Hriatpuia Pa


'Hmangaihna hian ramri a nei lo,' an lo ti thin. Ni, Pathian thuin 'bat' a phal awmchhun hmangaihna hian vun rawng a thliar lova, hnam leh chi a thliar lova, dinhmun leh nihna a ngaipawimawh ber lo fo. 

Chutiang a nih avang chuan he khawvel ram zauvah hian, kan Pathianin kan chenna turin ramri te min khamsak mahse, he hmangaihna avang hian chu sadai chu kan thiat thin.

Chi leh hnam dang inkara hmangaihna piang chhuak hi chu a nawlpui hian pawm harsa kan ti tawh lem lo a ni maithei a. Chutih lai chuan mi thenkhat chuan an huam zau leh hret a, mahni neih ang nei hmangaih ta tlat pawh kan awm leh ta zel a, hmangaihna hahthlâk leh buaithlâk tak a va ni em!

Hmangaihna chauh changchawia nupui pasal inneihna hian rah thlamuanawm a chhuah loh chang a tam ve khawp mai. Hnam hrang inneih avanga harsatna hi khawvel hnam tin zingah a thleng ve reng a. Mizo leh zo lo chu hmangaihna kawngah inthurual mahse, hmangaihna huang piah lama kan nunhonaah harsatna awm chang a awm leh thin.

Mi tam tak chuan hmangaihna hi an la na lutuk fo va. Hmel leh nungchang te, nihna leh rosum avang tea inhmangaihna hi an mausam a. Hmangaihna chu vawikhat inhmuhnaa piang nghal ngei ni kher turin an beisei bawk a. A chang chuan tu emaw kan hmangaihna te hi kan ringhlel leh thin.

Lalhmingliana Saiawi chuan, "A chhan chu eng vang pawh ni se, kan inhmangaihna chuan dam chhung a daih chuan a tawk mai," a lo ti tawh a, hmangaihna chi hrang hrang sawifiah leh sawi thiam tumna zinga pawmawm ber a ni hial ang.

Khawvelin India ram a ngaihnêp theih lohna chhan lian ber chu mihring kan tam hi a ni tih mithiamten an sawi thin. Sumdawn nana khawvel company lianten India ram an it tlat mai hi thildang vak a ni lo - mihring kan tam vang a ni ber mai. Chutih lai chuan Mizote hi India ram mihring zingah, a hnam anga tlem ber pawl kan ni.

A chunga thu hlawm khian hmangaihna kawng a zawh lo hle na a, a inzawm ve tlat lawi a! A chhan chu keini ang, hnam tlem leh hmasawn mek tan hian hnam dang hmangaih hian hmasawnna lam kawng a hawi lo ve thei tlat.

Kan hmangaihna leh mi kan va hmangaih chhan chu eng pawh ni rawh se - a theih hram chuan, a hmei a pain, Mizo ngei hmangaih hi a him ber tih hian thu lai a la tâwk hle ngei ang.

Mizo nula chuan a hmeichhiatpui hmangaih lovin, mipa ngei hmangaih se, a theih hram chuan Mizo tlangval ngei hmangaih se a duhawm ber.

Chutiang bawkin Mizo mipa pawhin Mizo nula ngei hmangaih se, hmangaih tlâk leh Mizo hmeichhiate rinchhan tlâk mipa nih tum bawk se a tha ngawt ang.

Hnam damna atana thil pawimawh hi a tam hle ang a, sawi mai sen a ni lovang. Chutiang zingah chuan inthlahpun a, hnam anga dinchhuah hi a pawimawh zinga tel ve tlat a nih ngai chuan, hmangaihna pawh hi hnam dam leh dam loh hriltu a ni ve ngei ang.

Mizo i ni em? Tunge i hmangaih a, eng ang mi nge i hmangaih?

Vai-Lala Mobile  

Posted by Hriatpuia Pa


Lu meh dan hrim hrim pawh hi a dang ta e! Tlangval lu buk lutuk te kha vantlang aia boruak hap sang deuh, an inkhawm ve chang pawha hnung lam tlara thu tura mi ngaih deuh thup an ni thin. Nulate pawh sam ngil siau, dar vaw hnâp mai kha ‘a mawi ber mai’ kan ti thin em ni kha? Chutiang chu kan tunlai khawvel hi a ni tawh lo tih hi sawi thiam a har zawk. Chutiang sawi takah chuan, Chawlhni chawhnu inkhawmah,tlar hnung lam atangin hmeichhe thutna lam i thlir ve tawh em? I la thlir lo a nih chuan, en teh, ka sawi hi lo ngaithla teh - nula sam aiin nuho sam zuk nalh zawk daih a! I awih loh chuan han thlir ve la, i hre mai ang. 

Mobile Phone awm tan tirh lam kha chuan, khawlaiah, kal paha mi biak te kha a zahthlak deuh roh thin. Tunah chuan Vai lala pawhin kal pahin a duh duh a bia a, tumahin barah kan khawn tawh hlei nem!

Hmanah chuan innei thar deuh pawh khawlaiah kut inkaiin an kal ngam mang lo. Nulate phei kha chuan an chawn aia sang hi khawtlang an hmuhtir ngai lo hrim hrim. Vawiin kan khawlai hi thlir la, tleirawl tê tê pawh kut insuih rial rialin an kal ngam tawh a, an hmuhnawm zék lehnghal! Kan nulate pawhin hisap zui  tur awm mang lo khawpin min hmuhtir zo ta deuh vek mai!

Khawvel kalphung ngaihtuah zui tur leh hisap zui tur hi a zuah tlem ta tial tial hrim hrim mai. Tun hma kha chuan Israel ram thu thar te kha Pu C. Rokhuma’n a ziah hma chuan a ngai kha kan ring char char mai a. Himalaya tlang khawimaw laia kephah lian hniak an hmuhte kha a hnu kum thum velah kan han thu thar chhiar ve ta thin kha a nia! Tunlaia thu thar kan tih te hi chu a thar thei a nia. Mumbai-a hel hovin Taj Hotel an tihbuai lai te, England-a khaw tam taka thalai rual awmngaihna hre lovin an duh duh an phingchil te pawh khan, a hnu hretah kan hmu a ni mai lo - chutiang thil a thlen lai la la chuan kan hmu thei nghal tawh a nia! changkang tawh vet vet tak kan ni!

A changtu pakhat chauh lanna film, mobile phone hmanga siam te pawh itunah chuan ‘ngaiah’  kan neih ta deuh dêr a! Britney-i leh Kim Kardashian-i te pindan chhungril nunchan pawh awlsam takin kan hmet chhuak thei mai tawh a, khuhhawnna hran hi a ngai tawh lo reng reng.

Kan duh emaw duh lo emaw, khawvel changkanna hian min nuai chho mawlh mawlh zel a. Kan inrin hun nghâk lovin changkanna hrang hrang hi barh luih kan ni a, tlanchhiat pawh tum ila tlanchhiatna tur a awm tawh lo. Thliarkar rilru hmanga lo indan mai chi lah a ni hek lo; engtia tih chi nge maw ni dawn le!?

Hmanah kha chuan naupang exam laia hmuhnawm chhuah kan khap mai thin kha a ni a, tunah erawh chutiang tih tum chu Sanghawngsei hriau benga luhtir tum nen a inang reng tawh. Chutiang nun leh huna kan chen tawh hnu pawha Kohhran leh YMA ten kalphung ngaia inhruai kan tum reng a nih chuan a harsat dan tur hi sawi ngai lova chiang a ni.

A lova kan awm theih loh chemtê ken khap ai chuan a ken dan inzirtir mai hi a finthlâk thin a. Hmasawnna leh changkanna ken tel tha lo tam tak avanga inkhap thianghlim tum ai chuan a tha leh tha lo thliar thiam tura infuih leh inzirtir hi a finthlâk zawk lo maw? tih hi mi tam tak ngaihdan a ni mai lo - khawvel ngaihdan a ni tawh.

02.02.2012  

Posted by Hriatpuia Pa

Ka fa naupang ber, ka fanu neih chhun, Vanlalthanpuii chuan vawiin atang hian Sikul a kai ve tan ta. A insiam lai thla ka la a, nuam a tiin a phur ngei mai! Ka LAIRIL luahtu hian he ka blog-ah hian post khat tal chu a phu ve alawm.




Kumin April ni 22 hian kum 4 a tling ve tawh dawn a ni.

Hei leh chen min hruai avangin Lalpa, ka lawm e.

Tawi Leh Nawi  

Posted by Hriatpuia Pa

Ang Em?
Pathian thu hi sawi tam tur nge awih tam tur ni ang? Sawi tam apiang hian an awih tam ang em?

Pathian thu hi chhiar tam tur a ni a, ringtu chuan sawi pawh a sawi tam lo thei lo. Chutih lai chuan kan ram Kristian tam ber hian kan Pathian thu hriat zatve hi kan awih meuh ang em?

Pathianni chawhma, chawhnu leh zan; thalai tan Thawhtanni zan, Hmeichhe pualin Thawhlehni zan; chumi hnuah Nilaini zan leh Inrinni zan kan inkhawm leh thin. Kar khat chhungin Inkhawm vawi 7 kan nei thin tihna a nih chu.

Tu mahin Biak Inah thil sual kan ti ngai lova, kan that theihtawp chhuahin hun kan hmang a. Thusawituin thu chhia leh zawm tlak loh a sawi ngai lova, mahni Ina tawngtai tlem tak pawhin ngei ngeiin tawngtaiin Pathian kan pawl thin; a va lawmawm em!

Chutih lai chuan Biak Ina kan awmdan lo zawk hi Pathian leh midang hian kan nun teh nan an lo hmang zawk em tih hi zawhna pawimawh a ni maithei.

Kan Pathian thu awih leh awih loh hi Biak Ina kan awmdan aiin kan ni tin hnathawh atangin min teh ta se engnge kan an ang? Biak Ina i tawngtai rei theih lam aiin, i contract hna thawhah khan i Pathian thu awih leh awih loh teh ta se i tling zo ang em? Pulpit tlanga i mittui tla zat ai khan midangte chunga that i chhuah tawh zat khan miin i Pathian thu awih leh awih loh teh ta zawk se engnge a chhanna ni ang? Biak In lamtuala i ban vai dan aiin i thenawm khawvengte chunga i ban vai dan kha i Pathian thu awih leh awih loh teh nana hman tur ni se i duh zawk ang em? 


Coca-Cola Fakna

Nikum kum tawp lama Coca-cola in an thilsiam fakna an tihchhuah pakhat khan rilru a khawih ngawt mai.

Kha faknaah khan, "Mi tam takin kan chenna khawvel boruak chhe zel hi an ngaihpawimawh loh laiin, ni tin thing nuai 30 phun a ni thin a. Mi thenkhatin khawvel hi a tawp tawh mai dawna an rin laiin kum tinin mi nuai 50 chuangin kumthar duhsakna an inthawn bawk a. Thu ho te teah mi thenkhat an inhnialbuai laiin, mi maktaduai tam tak chuan ni tin Coca-cola an inleisak thung a ni," an ti a!

Ni, a chang chuan kan khawtlang nun te, kan politics khelh dan te, kan khawvel boruak te, kan Kohhran kalphung te thleng pawh hian beisei tur awm tawh mang lovin kan hre hial thin. A bik takin Mizoramah phei chuan kan politics kalphung leh kan zirna kalphung te hian sawi leh sel a hlawh nasa a, mi tam tak kan beidawng a ni. Chutiang chu ni mahse kan sawi loh lamah hian beiseina nung min neihtirtu mai pawh ni lo, hlimna leh lawmna min thlentu hi a lo awm ve reng zel a lo ni.

Thalai tam takin nu leh pa thu awih lovin an nun an chen a, hun lo takin min boralsan mek a. Sualna hrang hrang lo pung zel avangin kan khawtlang a muang lova, nu leh pa thinthi a mut loh chang a va tam em! Mahse, hetiang a nih mek lai hian heti zawng hian ngaihtuah ve teh ang - Kan thalaite zingah hian Missionary-a chhuah duhna thinlung nei an la awm reng a, kum tin kal chhuak kan la nei reng! Thawhtan zan apiangin he Zoramah hian thalai sang tam tak Biak Inah an inkhawm a, Krista leh  A Kohhran thuthlung chu rinawm takin an la vuan zel a sin!

Kum tin thalai tam takin khawvel sualna sang zel avangin an zirlai zir thei lovin chawlhsan mahse, kum tinin thalai tam tak an Graduate a. Kan Kohhran ringawt pawhin Pathian thu zir duh thalai, lak sen loh a la nei ziah a sin!

Sawi tur a la tam thei ang. Beidawn mai tur a ni lo ve. Engkimah lawmthu hril tel zelin, Krista leh A ram tan i thawk zel ang u.

Facebook

Keimah

Visitor Since Feb 09

Khawi lam atangin nge?

online

Followers

Lairil

Mihring ngaihtuahna LAIRIL hi mihringin duhnate, awhna te, hlauhna te, thlamuanna te, hlimna te, lawmna te, lungngaihna te, thinrimna te, chapona te, duhamna te, itsikna te, mahni hmasialna te, hmangaihna te, duhsakna te, engkim mai; mihringa mihrinna siamtu leh neitu a nih avangin a va pawimawh tehlul em!

Nuihtirtu che kha I thinlung a ni a. I tah theihna te, thil mawi leh mawi lo i thliar thiamna te pawh kha thildang a ni chuang lova; khaw lum leh khaw vawt, hlauhawm leh muanawm, hrehawm leh nuam I thliar hran theihna pawh chuti tho.

A chang chuan kan hmuh leh hriat ngeite pawh hi dawt te, a lem te a lo ni thei a! He thinlungin a ngaihtuah hi a lem a ni thei ang em le? Mitin a hmuh a, bengin a hriat avanga duhna leh thinlung LAIRILin a duhna hi a inzawm ang em le? A hrang ni ta se khawii chu nge dik zawk ang? Khawii chu nge tha zawk a, tlo zawk ang aw?

Kan mita kan hmuh leh benga kan hriat te, rilrua kan ngaihtuahna te zinga a tam zawk hi he kan mihrin chhung hian kan theihnghilh leh thin em? Kan theihnghilh tawhte hi kan hrechhuak leh thin em? Thinlung hi bum hmang, chhe lailet der em ni? (Bible – Jeremia 17:9)

Recent Comments

Grab This Widget

Twitter Updates

    follow me on Twitter