Khuangchawi thla pawh kan pel leh fe tawh a, Sahmulphah thla pawh a chanve kan bang liam leh ta hnâwp mai. Zîkpuii pa 'Sikni Êng' chuan loh theih lohvin 'playlist' a rawn luah leh ta a. 'Thlir ve u, khawvêl mawina hi' ti hiala, a hria apiang sawm duh khawpa khuarèl mawina hmu thiam Zîkpuii pa thiamna tel lo chuan he sikni êng hi a kalh a kim tawh tlat lo. En teh, han sa ve mah teh  - 

Sikni êng mawi a rawn thlen leh ta

'Sahmulphah thla' an lo tih ang ngeiin, khua pawh a vâwt ve tawh hle a. Zing ni chhuah hma phei chuan a vâwt vin ve deuh var tawh a, kumsûl a vei dawn ta tih a chiang viau tawh. Chutiang hun leh hmuna chéng a, Mizo nih bawk si chuan Zîkpuii pa sikni êng hi hmuh thiampui loh theih pawh a ni lo. 

Zîngah, ni chhuak lai hmu turin tho hma la, i hmuh phâk china nungcha leh pangpar chi hrang hrang te, hnim hring leh hnah mawi chi tin hmu turin i sahmul puan kha tlawh hlîm la, han hawi vêl teh. I awmhmunin a zir loh chuan khuarèl mawina hmu turin i kal thui deuh hret pawh a ngai maithei. Khawpui lun lai hnuchhawna dai fem i pan phei chuan khuarèl mawina hi a chiang lehzual. Nia, han pên hret la, khua han chuan teh. Vatê sawt nelh nelh te i hmu em? a thlang deuhva tlaiberh inbéngberek ri te chu i hria em? Rairuang par parh tawh, thlasik zing thlifim thaw her herin a chhem var siau siau te chu i hmu ang a. A piah lawka changel hnah hring mawi nghelh mai, induh hmel deuhva a inthen her mêt mêt pawh chu i hmuh hmaih lo vang.

Han thlîr hla hret la, mit tlin tâwk tlang pâwng inchen lo zung maia ngaw dur hring dup mai te chuan computer screen leh television i en nasat avanga i mit kham them thumte chu a tihahdam sawng sawng ang. A aia hnai leh deuhvah khawram chhimbuk an sawi apianga a chhimbuk aia i mitthlaa rawn lang hmasa zâwk ziah thing ding ro, hreu deuh re rùte chu hmuh kân ngawt suh. Hringnun hlimthla nasa takin a rawn phochhuak tih ngaihtuah la, han en chiang teh. Hmânah chuan kha thing kha buk tha tak a ni thin a, mawi takin a bul vêla nungchate tan mawina mai piah lamah thlamuanna te pawh a lo thlen tawh thin a sin. A upat tawh vang leh mihringte awlsam zawnna avangin a nihphung leh a awmdan a hloh zo tawh a, a zara thing hnah hring mawi tak awm thin te pawh a tîl zo tawh a; sava chi hrang hrangin hahchawlh nana an hman thin a zarte pawh tunah chuan mawina nei lovin a kawlh filh ta thuau a nih kha.

I ke bul maiah chuan vailenhlo a lo zam dem dem ang a, chu'ngte pawh chuan sikni êng lawmin an par an rawn chhuah ve siar siar tawh ang a. A bul vêlah chuan tlangsâm pawh a rawn kuhmûm tiuh teuh tawh ang a, nakin lawkah chuan tawrh har khawpin a la rawn par parh nalh dawn tih hai rual a ni lo. A hnah khâwr leh chuar deuh kar te kha en peih phei la chuan, hmanhlel takin fanghmir an lo phe leh suau suau tawh maithei.

Ni e, he thlasik khuaah hi chuan zing ni chhuah sära kawlkil han thlir vang vang te hian leilung mawina a fiah zual bîk thin a. Boruak thiang tak hip lût chunga khawvêl mawina thlir hi a ninawm loh theihtawp a ni.

Tleitir sakhmelin a cho lo che

Partin mawina pawh i zar an ni

A, kan theihtàwpin tangho ila, thlasik ni êng mawina hi inziah tâwm ila, a tha lai lai lawr dawn pawh ni ila Zîkpuii pa hi tluk ngaihna a awm tawh lo. "Nang hi i ni ve ang Remna Lal fa pawh khan a rawn pan," a lo ti daih tawh a, hei aia chawimawina ropui hi chu Pathian hnênah chauh lo chuan pêk ngaihna a awm tawh lo. A ni lo'm ni?

Thinlai a fan nunhlui mual liam hnu'n

Thinlai darthlalengan a lo lang

'Nunhlui mual liam hnu' hi nimin mai pawh kha a ni thei. Kum tam tak liam tawha kan nun leh nimin maia kan nun hi kohkîr theih a nih tawh loh dan a inchen reng mai. Naupan laia engthawl êm êma hun kan hman lai te, tleirawl chhuah chhohva mi lu kara mit leh mit a han intawng siah mai te, tui chénga a biling a balanga kan han sapatal thin te, ho tê tê pawh pum na ûrha kan han nuih kiah kiah thin te, nimin maia hlim taka kan nuihho lai te pawh kha mitthlaah a rawn lang fiah zual a. Khuarél mawina hlat thei ang bera hna thawk thin tan phei chuan sava nena nun inthleng a, hla takah, khawvêl buaina enghelh ngai miah lova hlaa thlawh vang vang a, duhthala thlasik ni êng mawina han chen a châkawm thin.

Thu leh hla thiam elkhen, a thu hman apianga uar lutuk si lova mawina danglam phum thiam Zîkpuii pa meuhvin he hla pakhata ramngaw sawina, "Ramloh lentu" vawihnih lai a hmang hi a mak angreng a. Mi hrang kalta, IFS val lung kha ramngaw hring dup mai hian a lèn ber a ni hial ta ve ang. 

A enga pawh chu ni se, naktûk zing chu tho hma la, thlasik boruak thiang hip chungin, ni chhuak êng mawi mawina thlir chungin, chu mawina zarzotu khuarèl mawina tinreng thlir a fak turin han inring phawt mai teh. I inchhir a tâkah.

Silchar road atanga pengin, Venglai atanga Electric Veng pan pheina kawngah chuan ka phei a. Pa pakhat, a hmel en réng rénga email id nei lo tih hriat hliah hliah hi vâwt tih hmel takin a rawn kal phei hlân hlân a. Zozial a pak khu hlat hlat a, a jacket hlui tawh tak zipper chu a tha vak tawh lo nge, a rawn siamtha pah mawlh mawlh bawk a. 

Ka kal zél a. Kawng sirah chuan Venglai KTP Group hovin thing an phun, an enkawl uluk fahran loh ni a lang te chu ka hmu phei zél a. Tlangval la upa tehchiam lo pakhat hi tuikawhna hmanga tin pahnih kawtin, kekawr bul nen a rawn kal lâwp lâwp a. Tun hmaa tui kang kan nghah lai te, Electric Veng atanga PHE pumphouse-a tui kan zu chawi thin lai te ka ngaihtuah chhuak nghal thuai a. Chutih lai chuan tlangval kum 20 mi awm vel hi a rawn tlan thauh thauh a. A bengah 'ear-phone' a vuah a, eng hla tak ngaithla pah ang maw? Min rawn tlan pelh lai chuan tun hnaia Comedian Search fiamthu lär tak - Police intlar tur exercise laa zing tlan khan Officer dul kiar deuh deuh a tlan pel a, 'Ti ve dawn mi?' a ti lauh lauh - tih kha ka hrechhuak vel a!

Ka kal leh hret a. Nufa za ni awm tak, nu pakhat leh a fate ni ngei tur, kum 10 hnuailam vel tur pahnih an rawn kal dat dat a. Zing tlanna turin track suit leh jogging-shoe an nei lo a ni ang, sleeper nen, thuamhnaw pan dir diar an ha a. Hlim takin an infiam a, an sawi ka ngaihsak lem lo. Mahse, hei erawh ka ngaihtuah - hlimna hi khawia awm nge? Eng hi nge hlimna? Sum leh pai? Thuamhnaw? Mahse ka tawh zawh chiah nufate khan sum leh pai an ngah hmel loh. Thuamhnaw pawh an nei tha fahran lo. An hlim hle lawi si!

Ka kal zél a, kawng thlang lam chu nikum lamah leipui atan an nei tih hriat fahranin, lung tileng tâwk chauhvin a lo chulram riai a! Ka ding hret a, ka hawi vel a, ka ding ta reng a. Ka dinna thlang lawkah chuan rairuang a lo rai zum pãt a. Naupan laia rairuang rai kan vai thin kha rilruah a lo lang vat a. Mim kût thla (September) atang tawhin rairuang rai hi kan vai thin kha a ni a, tunah Sahmulphah thla a ni daih tawh a, a chang tawh ang. Rairuang par til then tawhah chuan vatê mal tlat a sawt nelh nelh a, ka thlir reng a.

Ka bul maiah chuan Japanhlo a zam chingchivet nuaih a. A la par parh chiah lo na a, a hnah hring chawih mawi tawk tur chuan a kuhmûm var nalh tawh ngang mai. Ka din chilh a, vawi tam tak ka hmuh tawh hnu Japanhlo par chu ngunthlûk fahranin ka bih ta veng veng a. Ni e, hruizam nem tak, thil tawnna atan pawha kan hman rim loh zinga mi Japanhlo takngial pawh a rawn kuhmûm a, a rawn parvul leh dawn ta! En teh, kan nun hi i ngaihtuah ve ngai em? Mau pawh a tuai thar leh thin a ni lo'm ni? Engati nge, chawngzawng leh ramtûktinpar thanzia ngaihtuaha rel feltu hian kan nun vullai kha vul nawn tura tuai thar a phal loh le? 

Japanhlo par hi fur ruahtui bawhawk laiin hmuh tur a awm lo, mahse tunah chuan a rawn parvul leh a, a mawina zawng zawng hmangin min rawn elsen leh tan mek a nih hi! Hmanah khan kan lo parvul ve tawh thin a, mahse khuarei a chang zo tawh a, a rawn lêt tawh ngai dawn lo. A lungchhiatthlâk mang e!

Thil tam tak ka ngaihtuah a, ka lung a leng a, ka lung a chhe tel deuh bawk a. Ngun taka min lo entu awm se chuan ka mittui a hla lo tih a hre ngei ang.

Nilaini, July ni 24, 2013 a ni a. Zing karah internet ka lut a, ka thil hmuh hmasak ber chu Arsenal-in pound maktaduai sawmli leh pound khat (£40,000,001) in Liverpool striker Luis Suarez an dawr tih thu a ni a, ka nuih a za ru viau.

Liverpool fan ka nih avangin Liverpool thu leh hla hi ka ngaihven a, a hriat pawh ka hre thawkhat. Suarez-a chungchang pawh hi Liverpool a lo kal hma mai ni lo, Ajax-a a khelh hma atangin ka hria (ka hre sa tihna ni lovin, Liverpool player a nih hnu hian a nunhlui hi ka hriatsak a ni). Luis Alberto Suarez hi a mihring mihrinnaah chuan pa ropui lem lo ve tak a ni a. Mahse a football thiamzia leh field chhunga chak a tumzia chu turu tak a ni ringawt. Ajax-ah a khelh laiin Ajax mai ni lo, Netherlands player ropui ni phak Marco van Basten leh Dennis Bergkamp-te record a khum thei a. Liverpool-ah lutin, a hma lawka Liverpool-in pound maktaduai 50 a an hralh theih khawpa player tha Fernando Torres aiin game khelh zata chhutin goal a khung hnem zawk thuai bawk a! Mi namai a ni lo.

Field chhung lovah thawm a nei ve vak ngai lova, field chhungah chuan Suarez hi Suarez tak a ni. Ball a beng a, mi a tlawh a, a tlu der a, a seh bawk a! Chutiang mi chu ni mahse club lianin an club-a khel turin an duh deuh vek tho. Arsenal pawh hian an player lei to ber chu pound maktaduai 18 pawh a tling lo tih hre rengin, a tirah pound maktaduai 30 in an han dawr nghal pang a. Beisei ang ngeiin Liverpool chuan an hnar a. Suarez-a contract-ah pound maktaduai 40 aia tama dawr a nih chuan club-in Suarez an hriattir ang tih a awm avangin makatduai 40 leh pound khatin an han dawr ta a nih chu! A nuihzatthlak viau na a, football club-te hian transfer chungchangah hian fiamthu an thawh khat khawp mai. Arsenal hian eng emaw chu an hria tih a chiang.

Suarez hian Liverpool-a a pute leh Liverpool tantute lakah vuina tur engmah a nei lo ang. Ama thiam loh liau liau avanga inkhel thei lo chungin, Liverpool atanga a hlawh pangngai reng a la te, fans leh an hotuten an tan tlat te hi ngaihtuah chiang lo pawh ni se mi pangngai tan chuan lawmna tur a ni. Chu chu a hria a, a sawisel lo rêng. Mahse, chhuah a duh a, a tirah chuan English media-te a chhuanlam. England pawn lamah tih tak taka amah dawrtu an awm lova, Arsenal-in an duh tih a hriat ve leh European competition a khelh chak thu a sawi leh a. A landanah chuan Liverpool chhuahsan a châk a ni.

Kan sawi tak angin Arsenal hian nuihzatthlâk takin, pound khat leka maktaduai 40 pelin an dawr na a, eng emaw hre lovin thil an ti lovang tih hi a rin theih a. Suarez hian chhuah a duh a, Champions League khel thei lo club Liverpool-a khelh zel a duh lo tih a lang. Mahse Liverpool hotute hian Uruguay ram tana goal khung hnem ber ni mek Suarez hi Uruguay tana a khelhpui Edinson Cavani man zat tala hralh an duh a, chu chu pound maktaduai 55 a ni. Hei hi Arsenal hian an hre chiang a, an inlei leh lei loh chu Arsene Wenger, John W Henry, Brendan Rodgers leh Suarez te hian an sawi thei. Keini lo sawi ve phak a ni lo.

Ngaihdan erawh neih a thiang a, sawi a thiang. Liverpool hian Champions League khelh chak Michael Owen chu Real Madrid hnenah an hralh a, an hralh hnu lawkah Champions League-ah Owen-a tel lovin an champion. Hlawh leh dinhmun tha zawk beisei Torres chu maktaduai 50 in Chelsea hnenah an hralh a, mahse Torres-a'n a ti fuh tehchiam lo. Heng an player thate hi a thlaktu, anni aia chhe chuang lo an nei leh mai zel. Suarez pawh hi hralh se, a thlaktu tur tha tak an neih leh mai ka ring.

Liverpool tantu, India hmarchhak kila mi in hnuai luah satliah ni ve ringawt chunga England atanga an jersey chah chhuak ve ngat kei hian Suarez hi chhuak se ka ti miah lo. Awm zel se, lehlam goal-ah khung zel se ka duh. Mahse, hei erawh ka ngaihdan nghet bur a ni - eng club player pawh ni se, a club-a a tui tawh loh chuan man to thei ang bera hralh hmiah tur. Chu chu club tan a tha ber. Player lungawi lo kawl hi eng club mahin an duh lo.

Suarez hi pound maktaduai 55 a an hralh theih dawn chuan chhuak se a pawi lo. Mahse Liverpool tantu tan chuan English club-ah ni lo kal se a duhawm ber. A theih loh a nih pawhin ka vui chuang lo. Nia, Arsenal-ah kal se, Premier League-ah min hnehna goal khung mah se ka inchhir lovang. Liverpool fan ka nih vanga ka mizia ni lovin, ka mihring mihrinna miziaah min duhlotu ngaiin ka tap ngai tlat lo.

Min duh lova min chhuahsantu Owen kha ka ngai lo va, Torres pawh ka la awt leh chhin lo hrim hrim. Suarez pawh hi chhuak se ka ngai teuh lo mai. Mi pakhat avangin Liverpool hi ka tan lova, tu emaw an awm leh awm loh vangin ka buai lo a ni tawp mai.

'Bruno Mars' inti, a hming tak Peter Gene Hernandez hi ka chhang chhang leh rual pawh a ni lova, mahse a hla pakhat hi chu ka rualpui a ni tlat mai! 'Now my baby's dancing, But she's dancing with another man,' a rawn ti ringawt hian awmze ril lutuk a nei a, tahna ruamah min hruai lut a ni. Khawi nge, a hriat miah lohvin, he vai lui kam ram reh atang hian i'n chinglet leh chiam teh ang.

Mihring thinlung leh ngaihtuahna hi a mak khawp a. Kan mamawh leh ngaih ngawih ngawih te pawh hi kan chanpual a nih a, kan ta a nih lai chuan a hlutna leh a thatna kan hmu chiang thiam lo fo va. A tel lova kan awm a, kan ban phâka a awm loh chiah hian kan tana a hlutna leh thatna te kan hre fiah leh uar uar thung si thin. Chu thinlung leh ngaihtuahna ram atang chuan he hla hi sawi leh hrilhfiah thui ngai lovin a chiang êm êm ringawt mai.

Ti teh, ngaithla puat lovin, muangchangin, chîk takin i'n ngaithla teh ang - 

'Same bed but it feels just a little bit bigger now, Our song on the radio but it don't sound the same..' a han ti nghal ringawt mai a! An mutna khum chu an mut dun lai ang tho kha a la ni a, a zawm belh awkawng lo. Mahse tunah chuan  hma aiin a lian tawh a, a thawl tawh. An mutna khum chu 'an' mutna a ni tawh lova, 'a' mutna chauh a ni tawh tlat. Chu khuma mu chung chuan hla an ngaithla dun thin a, lungrual takin an zai dun thin. An hla duh zualah phei chuan an mittui a tla dun fo va, a hlimawm lam an ngaihthlâk pawhin an nui dun hawr hawr thin. Mahse tunah chuan chutiang chu a ni tawh lova, hman ang kha a ni tawh lo. Radio-a an hla rawn 'play' te chu hmana an ngaihthlâk thin, 'Kan hla,' an tih thinte ngei kha niin, a satute aw leh a remna rimawi zawng zawngte chu hmana mi ang vek kha ni mahse a pangngai thei tawh chuang lo - a chhan chu a ngaithlatute rilru chu a pangngai tawh tlat lo. Buh chi thehtu buh chi theh ang mai kha a ni - hmanah kha chuan chu'ng hlate chu lei thaah a tla a, duah takin a chawrno a, par a chhuang a, rah a chhuah thin. Tunah chuan chutiang lei tha chu a awm tawh lova, pialtlêp lei pan hmunah a tlâk a ngai tawh a, tona turin a duh ang tawk lei tha a hmu tawh lo. Ni, hringnun hi a danglam zo tawh a ni.

Awm tawh lo mahse a hming sawi a reh nghâl hmak thei lova, a thiante pawhin an sawi ve fo a ni ang, 'When our friends talk about you, all it does is just tear me down, Cause my heart breaks a little when I hear your name.." a ti. 

Ni e, amah chauhva a ngaihtuah pawha a natpui a sakhming hnaisai lo ngei chu a thianten a beng hriatah an han sawi ri leh ngei a, chu chuan a thinlung chu a chhun na mai a ni lo, a taiin a tai thlér a! Miin a hming an lam ri a hriat ringawt pawhin a thinlung chu a mit nghal sulh thei zu nia! Khawvêlah hian hming maktaduai tam tak a awm a, mahse he mihring thinlung hian hming pakhat hi a hre chiang êm êm bîk thin. Chu hming chu a lam zing a, a ko ngun pawh a ni lo, a thinlunga chu hmingin hniak a hnutchhiah chu a chiangin a nghet êm a, hming dang zawng zawng aia hming ropui a lo ni ta zawk a ni.

Chutiang khawpa hming hnaisai lo vang chuan a thinlung a keh sawm a. A ngaihtuahna leh mitthla zawng zawng sawmkhâwma a ngaihtuah hnuah pawh a thiam thu sawi tur a hre thlâwt lo. He khawvêl thenna rama an inthen chhan chu eng dang vang mah a ni lova, ama thiam loh hulhual a ni tih a hria. Ngaihdam dilna mai lo chu a ka atangin chhuak tur a awm lova, a thinlungah a thiam loh thu a ri nawn tluk tluk a. A tih tur a tih loh te, a tih loh tur a tih lawi si te a inlar zut zut a ni ngei ang, hei hi a thunawnah a hmang tlat -

It all just sounds like oohh...

Mmm, too young, too dumb to realize

That I should have bought you flowers

And held your hand

Should have gave you all my hours

When I had the chance

Take you to every party

Cause all you wanted to do was dance

Now my baby's dancing

But she's dancing with another man

A hun laiin ngaihtuah phâk lo mah ila, muangleia ngaihtuah hi chuan thil hi a chiang kuar kuar thin. Ni e, pangpar a leisak ngai loh te, a kut a vawnsak ngai loh te, a tana hun a hman tam tawk loh te, nuam a tih zawng a tihpui hnem lohzia te leh a len chhuahpui ngai lohte chu a ngaihtuahnaah a rawn lût zut zut a. Sawi leh chuan tur a hre lo, "Ka mâwl a ni," a ti tawp mai! 

'Khatiang kha a ni a, chutiang chuan ka lo ti ta lova..' tiin inngaihtuah mahse sawtna réng réng a awm lo. Lungchhe vankaiin a tap a, 'Ka bawihi chu hlim takin a leng tawh a, mahse mi dang nen an ni si..' tiin, beidawng takin a chham chhuak a ni. A va beidawnthlâk tehlul êm!

Chu beidawnna luipuia inchiah chung chuan a ngaihtuahna chu a vâk vel ruai ruai a. A chapona leh amah a induhtâwkna te, a tanghma chauh a hainate chuan hmeichhe awmkhauh leh sehhel ve tak mai chu a nun atangin a hnawt bo a ni tih a hre chhuak a ni ang, "My pride, my ego, my needs, and my selfish ways caused a good strong woman like you to walk out my life.." a ti a! Inchhirin a kut a hum ruh a, a inchhirin a ban a chen mai a ni lo, a pel zawk tih a chiang reng, "Now I never, never get to clean up the mess I made, oohh... And it haunts me every time I close my eyes.." a ti vawng vawng mai!

A tih dik loh leh a tih tur a tih loh avanga thil pawi lo thleng chu a hre chiang êm êm a, awrawl chhuaha tapin siam dik leh tum mahse a ngaihna a awm tawh lo. A maimitchhin apiangin a sulhnu hlui chhuanawm loh tak chuan a rawn bawh tup tup a, ngaihtuah loh tum mahse a hualin a hual tuau tuau mai si a, lung a va zing êm!

A rilru a na vawng vawng a, a dik lohna a hmu a, a hre chiang a, ngaihdam dil a duh. A tihsualte avanga ngaihdam dil chu tlai tawhin a hria a, ngaihdam dil pawh ni se awmzia a awm tawh lo tih a chiang a, ni ang, 

"Although it hurts

I'll be the first to say that I was wrong

Oh, I know I'm probably much too late

To try and apologize for my mistakes

But I just want you to know.." a ti a, "Lo hre ve hram la ka duh a ni," a ti chuai raih ringawt tawh mai! A va na dawn em aw!

Tih tur chu hre mahse tih theih a nei tawh lo. A tih theih hun laiin a ti tlat si lova, a hmangaih lakah chuan duhsakna hlan mai loh chu tih theih a nei tawh lova, a aia sang beisei tawh lo thinlung chuan heti hian duhsakna a hlan ta a ni -

I hope he buys you flowers

I hope he holds your hand

Give you all his hours

When he has the chance

Take you to every party

Cause I remember how much you loved to dance

Do all the things I should have done

When I was your man

Do all the things I should have done

When I was your man

A tih tawh loh zawng zawng, inchhir chunga, 'Ka lo ti ta lova,' a tihte chu chu hmeichhia chuan tawng ngei se a duh a. Hlim taka hun a hmanpui nen chuan hlimna zawng zawng chen se tiin duhsakna a hlan ta tawp mai a. "I laka ka tih tur, ka tih tâk si loh zawng zawng kha tihsak che rawh se," tiin duhsakna a hlan a ni.

Mi thenkhat chuan an hmangaih ber an neih theih loh ai chuan mahni intihhlum an thlang a, thenkhat chuan an hmangaihte chu mi dang ta an nih ai chuan he khawvelah hian awm tawh lo zawk se tiin tual an that hial. Hmangaihna hi a mak a, hrilhfiah leh sawifiah chiama fiah chi a ni lêm lo.

Khawvel mihring tam zawkin hmangaihna dik leh tak taka an ngaih angin he Hawaii tlangval hian a hmangaih chu hlim takin leng se, thil tha zawng zawng chu a chanpual ni se a duhsak a, chutiang tura duhsakna a hlan thei hi he hla ti duhawm zualtu a ni awm e.

Hmangaihna chungchangah hian kan inthurual ber mai. Khawvela thil awm, khawih theih, che thei leh hmuh theihho hi chu kan neih leh kan ta hi a inzât lo hlawm lulai lutuk a. A mawizia te, a ropuizia te, a thatzia te, a tloziate, a man tozia te han sawi dawn ila, kan lungrualna a dang tawh thin a. Kan duhzawng a inang lova, tha kan tih zawng a dang a, mawi kan tih a inmil thei hek lo. Hmangaihna chungchangah erawh kan hmangaih te chu inang lo mahse, kan hmangaihna thinlung a thuhmun tlat a, kan lung a rual bik êm êm thin.

Hmangaihna khawvelah, ding leh vei bo si lova kan vahvaih dun lai kha mitthlaah a lo lang thar leh a. 'Ka hmangaih che,' tih mai duhtawk lova, 'Ka hmangaih ber che' kan tih kher kher lohva kan lungawi loh lai khan, lung a la leng vawng vawng dawn tih kan hre lo.

Take me back in the arms I love

Need me like you did before

Touch me once again

And remember when

There was no one that you wanted more

Ka tel lovin a khawvel a kim thei lo ve thin a. Ka bana ka kuah a thlahlel ve ngawih ngawih thin a nih kha. Ni, chutiang bawk chuan a tel lova hun hman hrehawm ka ti thin. Ni khata darkar 24 hi ka duh ang taka hman turin sem sawm dawn ila, darkar 24 chu a bulah ka hmang ang a, ka kham ngai lovang ka ti thin.

Chutiang mihring, min duh a, min thlahlel a, min mamawhtu, kei pawhin ka thlâkhlelh ngawih ngawih chu eng vang maha then ka duh ngai lo. Mahse ka duhna chu thil awmdan siamtu leh nihtirtu a ni lo miau a, engmah a thlenin a thlen loh phah lo. Ka hmangaihna chu amah hual velin la zam phui chuk mahse, ani pawhin min theihnghilh bîk lo mahse, ka lam hawi lo zawnga a kal a tûl a. Nui chunga kan hun hman dun tawh chu tap chunga koh a ngai a, a lo kir duh mang si lo!

Ka hmangaih, ka duh, ka thlâkhlelh awm nghenga duhthu sam leh ka chak a. Vawikhat chauh tal min khawih leh se, 'Helai hi a mawi, hei hi a mawi lo, mahse ka duh vek tho,' ti leh se ka ti! Ni, khawvela mihring awm zawng zawng aia min duh zawk hun lai kha a thinlungah cham ve reng se ka ti a ni.

Don't go you know you will break my heart

She won't love you like I will

I'm the one who'll stay

When she walks away

And you know I'll be standing here still

Ni ngawt mai, a ni ngawt mai. Min kalsan avanga ka thinlung kehsawm tur hi ka hrilh ngai lovin a hre chiang êm êm a. Kei aia hmangaihtu a nei dawn lo tih pawh hrilh nawn a ngai lo. Khawvel zawng zawngin an ensan a, hmangaihna dang zawng zawngin an kiansana an hmuhsit tawh hnuah pawh, ka hmangaihna chu a tan a ding reng dawn tih ka chiang ang bawkin ani pawhin chiang a sin! Mahse, he khawvel ram zauvah hian engatinge, engati kher kher nge thlahlel chunga inkalsan a ngaih fo va, duh reng chunga duhna thinlung hmeh mih tum luih talh a ngaih tlat thin?

Chu dinhmun atang chuan he hla hi a va mawi tak em!

I'll be waiting for you

Here inside my heart

I'm the one who wants to love you more

You will see I can give you

Everything you need

Let me be the one to love you more

See me as if you never knew

Hold me so you can't let go

Just believe in me

I will make you see

All the things that your heart needs to know

And some way all the love that we had can be saved

Whatever it takes we'll find a way

Sawngsawhlawtna rêng rêng nei dawn tawh lovin, nghah chhuah tur a awm dawn chuang lo tih hre reng mah ila, he thinlung hian a nghâk tlat a! Ka hmangaihna zawng zawng ka hlan tawh na a, a aia nasaa la hmangaih zel ka la inhuam cheu va! He khawvel rosum hi ka ngah tawk lova, a duh chu sawi loh, a mamawh zatve aia tlem daih leina tur pawh ka nei zo lo tih hre reng mah ila, ka hmangaihna hian a mamawh zawng zawng pek a inhuam miau a, he hla hi inthlahrung lo takin ka sa a ni.

Min hre ngai lo ni awm takin, min hmu leh tawh lo tur ni awm taka duhthawh êm êmin min en la. Min thlah tawh ngai lo turin min kuah la, i rinna zawng zawng ka chungah nghat la, tichuan i thinlungin a mamawh zawng zawng chhanna chu ka hrilh ang che. Kan inkara hmangaihna hi a bo va, a reh mai loh nan, eng anga tam pawh a man pêk ngai dawn mahse, engtin emaw tal, engemaw tal kan ti thei ngei ngei ang.

Zual zawka hmangaih che ka va duh em!

[He hla hi 1995 October ni 23 khan Celine Dion chuan Japan-ah  a tlangzarh a, Japanese TV drama series, 'Koibito Yo (My Dear Love) atana an record a ni nghe nghe. David Foster leh Junior Miles-te phuah a ni.

Japan ramah ringawt hian kar nga chhung number one a ni a, copy 1,240,000 lai an hralh. Canada, US leh UK ah te a lâr hle a. Brazil-ah pawh lâr thla zelin, Portuguese-in, 'Te Amo Cada Vez Mais' tiin an letling a, Brazil-ah chuan a lâr hle. A bik takin Asia ramah a lâr zual a, tun thlengin hla lâr pawl tak a la ni zêl a ni.]

Office-a ka thutna rawn panin, "Ka pu, ka.." a rawn ti chiah a, keimah ka ni tih a hre chhuak thut a, ring fahranin, "Awi, awi, awi, Zaia hi! I va han thau tawh em em ve! Ka pu thlawt lovang che.." a ti nghal bawrh bawrh a!

Keimahni:

Nia, chutia min titu chuan 'Ka pu' min ti lo se ka lawm zawk daih. Amah chu tleirawl laia ka thian thin, hmeichhia a ni na a hmeichhia leh mipa inkawma inkawm ngai lo, thian dik tak inkawma inkawm thin, kan thian zaho, mipa pali leh hmeichhe panga zinga pakhat, Lalmuanpuii a ni. 'Lalmuanpuii' tih ngawt hian a fiah lo, 'R. Lalmuanpuii' tih zawk tur. A chhan chu kan thian zaho zingah khan Lalmuanpuii dang a awm ve a. 'R' tel zawk hi chu 'Lalmuani' a ni a, a tel lo zawk hi chu 'Mapuii' a ni.

Kan sikul kaina a inang vek lova, ni tin chuan kan inkawm lem lo. Mahse Chawlhniah te, Kohhran inkhawm leh Inkhawmpui chang zir, Inkhawmpui nikhuaah te hi chuan inkawm nasa tak kan ni. Kan thawnthu pawh hi chutiangah chuan a inhlawm kual vel ti ila a dik awm e.

Keini mipa lam, kei, Zova (Ni tin sikul zirtirtu a ni tawh), Sangliana (Kolasib Zone Football President a ni mek) leh Rosanga (RSA - khawvel a chhuahsan tawh) te kan ni a. Hmeichhe lam hi engnge an nih a, khawii hmun leh ramah nge an awm ka hre bar lo. Lalmuanpuii te pahnih, Dingpuii, Dawngi leh Nunmawii te an ni. Engti tia han inkawmho ta viau nge kan nih ka hre tawh mang lova, mahse a maka makin kan inngaina hlawm si.

Chawlhni a nih tawh chuan sawi lawk a ngai lo. Chawhma inkhawm banah Nunmawii te inah kan han kim deuh thap zel a! Nunmawii pa Pa KL Siama (Fam) kha chuan min ûksàk tehchiam lo, a nu Nu Thianghlimi kha chuan min fak loh leh min vin a. A eng hawi pawhin min sawi se keini thian zaho khan kan haw lo reng reng ringawt. An sertawk kan lo va, serthlum rah lai a nih phei kha chuan eng ang pawhin min hrâwk se, chawlhni kawr nen an serthlum kûngah kan lawn tawi tawi a, kan duhtawk kan lo tho tho.

Dingpuii te in kha Hmarveng tlang, va phei leh hret ngai kha a ni a, kan inzui phei ngun viau bawk. Lalmuani te inah khan mipaho kan leng nasa ber. Carrom-board an nei a, midang an lo awm bawk nen, kan ri luih luih thin. Pa Chhuna'n chhuah a phal loh pawhin keini'n kan tum tawh chuan Lalmuani kha kan hruai chhuak ngei ngei tho va, amahin a duh a, a bialpa a kawm duh vang pawh khan keini mipaho khan kan chhuahpui fo thovin ka hre ta!

Kan zai, kan lam, kan zak:

Keini thianho kha solfa leh zai lamah, Kolasib Hmarveng Kohhrana kan generation-ah na na na chuan ngaihtuahawm loh tak kha kan ni hlawm a. A mipaho phei kha chu Senior department-ah (kan inkawmho vanglai) khan a tenor part min chantir a, zirtirtute zirtir kan ngai ngai lo.

Ka la hriat chian em em thil kan tawng nual. Keini thian zaho vang a ni em ka hre lova, Senior Department kan nih kum khatna a ni tain ka hria. Kan zirtirtu Pu Nghaktea khan inkhawmpui chang min zirtir thin a. A strict si, a vin si, naupang zawng zawngin kan ning a. Tlai khat chu a lung kan tiawi lo alawm le! A na chi kha chuan min hrem bik miah lova, mahse tun thlenga kan thianho, pahnih khat kan inhmuh pawha kan la sawi fo min tihtir - kan inkhawmpuinaa tel miah lo, hla min saktir a, chung lamah ban pharin, 'Ka chenna ram thlaler a ni Lalpa' tih hla kha min han saktir thap thap mai chu! Hmeichheho ning tawh lutuk, thenkhat mittui a lo tla, chu chu keini nuih a lo za, kan nui kha kan zirtirtupa ngaihdan a ni lo. Min tih thattir leh zel, zan inkhawm dar a ri tawh a, zan inkhawm kha Inkhawmpui a ni tawh a, report pek zan a ni. Inkhawm dar rik tlang tlang tawh laia, 'Ka tawngtai ngaithla la, ka dil malsawm ang che..' tih hla, tuina leh châkna pakhatmah tel miah lova ban phar chunga han sak ngang ngang mai kha chu - theihnghilh a har ngawt mai. He hla kan sak apiang hian khami tum kha ka mitthlaah a rawn lang var thin.

He inkhawmpuiah bawk hian nasa taka zak leh nuihzain kan awm leh pek a! Kan zirtirtupa vang bawk hi!

A luruh ring chi a ni a, fiah tak leh ring taka sawi turin min zirtir reng thin. Keini, til-pawr-aw tawh, ngeng ve deuh bawk nen, a duhthusamin kan ti tha tawk lo fo va, chu chu chang zirnaa min hrem chhan pawh kha a ni pakhat a. Thu inchhang a chang a, kan zirnaah pawh khan, "Ka zawhna awki rual chiah hian min chhang tur a ni," a ti fo va. Inkhawmpui a ni a, Thu inchhang sawi turin min ko va, kan zirtirtupa chu kan hmaah a ding a, min dintir a, kan ding rual khawp mai. Zawhna pakhatna min han zawt a, a zawhna pawh kha ka la hre chiang ngang mai - Pathian engnge ni? - tih a ni. Ani, kan zirtirtupa khan zak miah lovin, ring pangngai mai ni lo, patling awrawl tawp takmeuh, hrawk phiar tawng tawngin min han zawt tehreng a nih kha! A zawhna awki mila chhan ngaihna a awm thlawt lo. Mipui an thum hak a, keini mipa lam, nuihza insum, zak bawk si, kan hmel kha a hmuhnawm ngawt ang. Hmeichhe tlar hmasa ber phei kha chuan chhan zai an rel lo, an kun nghiai mai a, a va zahthlâk tak e aw! Awki pangngai zawkin min zawt nawn a, kan sawi chhuak ve leh ta vek tho va, mark kan hmu tam ta lem lo niin ka hria. Inkhawmpui zawha sawi hlawh ber kan ni chiang khawp mai.

Tihtauh zara zilhna tha:

Inkhawmpui chang zir vawikhat chu, mipaho kha kan titau a. Kan tih tauh chhan pawh ka hre tawh lo, kan titau ve hle a ni. Hmeichhe lam lahin a phuk a phak an ngaihtuah lova, keini kan tihtauh chuan tihtauh ve tur kha a ni tawp mai a. Kan thianho chuan kan titau tlang ta vek a, chang kan zir duh lova. Keini mipa pali phei chu a tenor sa thin, midang pahnih khat bakin an pawlh ngai loh kha kan ni a. Hmeichhe lamah lah, Nunmawii te, Dawngi te leh Muanpuii-te pahnih kha a zai ring ring an ni a, an tel loh chuan buaithlak ve deuh kha a ni a. Chutia kan titau tih an hriat chuan kan zirtirtu zinga pakhat, la naupang deuh ber chuan min rawn thlem a, min thlem tuk (zing) atang chuan chang chu kan zir ve leh mai.

Chang kan zir ve leh duh tak hnu khan kan zirtirtu pakhat (a chunga mi khi.. lolzz) chuan min zilh ta a, kha zilhna kha tun thleng hian ka la hrechhuak fo va. Naupang SS zirtirtuah a zawna kum sawm ka tan chhung (tunah chuan ka tang tawh lova) khan ka sawi chhawng fo.

Heti hian a ti a, "In lungawilohna kha ka hrethiam a, in lung tiawi lotu zirtirtu pawh ka kawm tawh a, a thahnemngaih vang a ni. In titau kha a awm ka ti a, mahse in titau a, chang in zir duh lo erawh kha chu awm ka ti lo. Lungawilohna in nei a nih pawhin, titau a, Kohhran hlat zawnga in awm hi a tha lo. In lungawi lo a nih pawhin inkhawm loh phah nan te, Kohhran thiltiha tel loh phah nan te in hmang a nih chuan, a tuartu tur chu nangmahni in ni. Kohhran hi tihtauhsan chi a ni lo. Kan pian hma kan Pathian hian a Kohhrana tel tur a nei tawh a, kan thih hnuah pawh a la nei zel dawn. Kan tel lo hian inkhawm tur te, Kohhrana inhmang tur te hi an tam lutuk, chuvangin tihtauh chi a ni lo, ti tawh ngai suh u," ti lam hawiin min zilh a; tun thleng hian ka la pawm thlap.

Nunhlui ngaihawm:

Sawi tur a tam, kan thianhova tel lo tan ngaihnawm a tling lo maithei. Mahse, hetiang kum leh hun lai vel hmang ve vek in ni a, keini aia thawnthu ngaihnawm nei tam zawk in ni hial ang. Han sawi ve teh u.

Lalmuani te lo kan zawh tuma kan hahzia leh kan nuih nasat si zia te, an Inah kan haw a, Uisa an lo siam a, kha kha ka uisa ei hmasak ber leh ei tanna a ni ta te kha ka la hre reng.

Krismas laiin thingpui kan lum a, kan sem leh nghal a. Dawngi-te ina Mas kan hman tum a ni a, hmeichheho chu an zaikhawm a, thingpui sem pawh kan phur tlang viau. Sangliana a kal hmasa ber a, ke tahna (Welcome.. lol) kha a rap sual a, chhuatah a tleng phei, thingpui semna (tray) chawi chungin, khuangpu hmaah tak a va tlu bawkkhup thuai. A hnunga kal keini kan nui a, kan thian hmeichheho nuihza insum hmel te kha a va ngaihawm ta em ve aw!

Tunah chuan kan kim ta lo. RSA chuan min kalsan tawh a, midang chu kan la dam hlawm a, mahse kan inhmu khat hlawm ta hle. Dingpuii tih loh chuan pasal an nei vek tawh a, mipa lam pawhin nupui fanau kan nei vek tawh. 'Mahni seh seh mual hranah,' tiin kan bur ngar ngar tawh.

Nunmawii te In, choka hran awm ngei mai te kha a awm tawh lova, a aia nalh leh tha zawkin an lo sa thar vek tawh. Keini tan chuan an in thar, mawi leh changkang tak ai hian, an choka hlui, an tukverha dâk chunga duhthu kan samna ngei maite kha a ngaihawm zawk a, thinlung mitthlaah hian a la cham reh thei lo.

A then rihsang mual liamin, A then lenna tlang dang si maw?

Vanglai nun, aw, lenlai ni - Kir zai an rel si lo.