Please Remember Me  

Posted by Hriatpuia Pa

Grammy Award 3, Academy of Country Music awards 11, Country Music Association awards 11, American Music Awards 9 leh People's Choice award 3 a lak thute hi he hla ka hriat hnua ka hriat ve chauh a ni a. Faith Hill hi ka hre ve bawk a, Tim McGraw-a nupui a ni tih pawh ka lo hre hma lem lo leh bawk a! 2007 te khan 'Soul2Soul Tour' te an lo nei daih tawh tihte phei chu he thu ziah ka tum avang hian ka hre ve hnuhnawh chauh!


He hla hian lung a kuai hle a. A 'Please' lai hian a ngen bik riauvin ka hre thin. A thawnthu tur awmte ka ngaihtuah a, a zaithiamna phenah leh he hla thluk leh thu nalh phenah hian thawnthu ngaihnawm tak a awmin ka ring tlat mai! Khaw'nge, i'n khawih chingpen chiam teh ang!!

When all our tears have reached the sea
Part of you will live in me
Way down deep inside my heart
The days keep coming without fail
A new wind is gonna find your sail
That’s where your journey starts

'When all our tears have reached the sea,' tih atangin a intan tawp mai a. A hma lamah an lo tap nasa hle ni tur a ni. An mittui tla zawng zawng pawh a kiang tawh a, tuipui lian takah thlengin, ram hla takah a luang bo daih tawh. Chuti chung chuan he hla phuahtu hian a hmangaih mihringa hlutna leh duhawmna them engemaw chu a la kai tlat a. A pang khawimaw laia kai mai a ni lova, a thinlung chhungrilah a bet tlat a, a paihbo thei lo a ni ang.

Nite chu a ngai tein, bahlah awm miah lovin a chhuak a, a tla leh thin a. Mahse chu ni lo chhuak chuan a hmangaihna thamral tawh hnu chu a herchhuahpui lova. A hmangaih chuan chhemdamthli tharlam dawngin, khawvel dangah a chensan daih tawh si a ni!

A phuahtu hian eng vanga lo tap nasa hle tawh nge an nih hi a sawi chiang si lova, rinthua sawi mai loh chu tih theih a vang khawp mai. Engpawhnise, he hlaa mi pahnih hi hun engemaw lai chuan hlim takin an lengdun tawh a ni ngei anga. Chumi hnuah chuan an hlimna zawng zawng tichhe vek thei thil a lo thleng a ni maithei, a thu bul intan danah hian. An inhmangaih tawh thin a ni ngei ang.

You'll find better love
Strong as it ever was
Deep as the river runs
Warm as the morning sun
Please remember me

A tan chuan tih theih a tlem tawh em em a. 'Hmangaihna ka ngen a ni..' han tih ve mai pawh kha a rem tawh chiah lo a ni ngei ang, 'Hmangaihna ropui leh tha zawk i hmu ang, chutih lai pawh chuan, khawngaih takin, khawngaih takin, min hre reng rawh aw??' tiin a ngen a ni.

A hmangaihna aia hmangaihna tluantling zawk a hmu tawh tih a hria a. Chu a hmangaih hmangaihna hmuh chu hmangaihna dang ang bawka nasa, tuifinriat aia thuk, thlasik zing ni chhuak lum ham ham aia lum nuam zawk a ni ang tih pawh a hria a, a ngaihtuah a, a suangtuah a. Chuti chung chung chuan a hmangaih chuan hre ve reng se a duh si! A khawlh a ni!!

Just like the waves down by the shore
Were gonna keep on coming back for more
‘cause we dont ever wanna stop
Out in this brave new world you seek
Oh the valleys and the peaks
And I can see you on the top

Tuifinriata tui fawn chu vaukam lamah a lo fawn phei nghulh nghulh a, a theih anga tam vaukama vut leh thildangte a hnukkhawm a, tuifinriat lai lamah a hnuk lut thin a. Mahse chu tuifawn chuan 'ka la teuh tawh a, ka duhtawk tawh teh ang,' ti lovin, a ngai tein a rawn fawn phei leh a, a ngai bawkin a rawn thawk leh thin. He khawvela cheng mihringte hi duhdamna leh duhthawhnaa khat kan ni a, Duhtawk chin reng kan nei lo.

He khawvel hrang zet karah hian a thinlai lalnu chuan ram tha lehzual chakin ramthar a zuansan a ni ngei ang. Chu a ram zuanah chuan a hlawhtling hle ni tur a ni, tlang chunga a awm pawh a hmu thei tlat mai!

Remember me when you're out walkin
When the snow falls high outside your door
Late at night when youre not sleepin
And moonlight falls across your floor
When I cant hurt you anymore

A mak ngawt mai - hmangaihna hi! A hmangaih chuan a hmangaih ve tawh lo ni ngei tur a ni a. A nih loh pawhin a hmangaih hian a hmangaihna a hnawl nghal hrim hrim pawh a ni ta ve ang. Chuti chung chuan he hla neitu hian a hriatrengna a ngen char char a. A thil ngen hi a tam lem lo niin a lang a, mahse han ngaihtuah chian chet chet erawh chuan a thil ngen tluka thil harsa hi a tam leh si lovang. Hmangaihte pawh ni lo han hriat reng mai chu thil awlsam a ni lova. 'Min lo hrechhuak ve zeuh zeuh dawn nia,' tih pawh ni lo, 'Min hre reng rawh,' han tih tawl mai chu - a hahthlak a ni!

Pawn boruak thiang dawnga a chhuah hunah te, vur nasa taka a tlak avanga a pawn chhuah theih loh hunahte pawh hre reng se a duh a. Zanah muhil thei lova a ngaihtuahna a kawm melh melh laite leh, chhawrthlapui engin an tukverh parda zar pan te en tlanga, a khum bul chhuat a rawn en raih changte pawhin hrechhuak se a duh tlat a, a ngen ngawl ngei mai!!

He hla phuahtu leh a phuah chhan hi an inngaizawng tawh a, an inban leh tawh a ni thei ang em? A bialnu/bialpa hian ram hla takah a kalsan nge, ram hla tak ni lo, midang lakah a rilru a peksan ta ni zawk ang? Hmangaihtu tan chuan ni tina a biak leh a hmuh pawh nise, a thinlung kawngkhar a hawn loh chuan 'hla tak' a ni ve thei tho em? He hla hian ka ngaihtuahna a kalthuitir ngawt mai!

Mizovin hla nalh kan neih tam ber hi ngaihtuah zui ngai lem lo, nalh ve tawp a ni deuh ber a, he hla hi chuan ngaihtuah a ti tam a ni!!

Mahni Tawng Pawh Thiam Hlei Lo !  

Posted by Hriatpuia Pa

Zan dar 1 a ri tawh. Salt Lake, Kolkata-a Mizoram House chhawng chungnung ber dawttuah, inhnawih rimtui leh inphuh rimtui lama sumdawng Ajit-a leh a nau Pilot, leh a thianpa, Bengali pachal diktak, kan thiam ve loh Bengali kher khera a thiante be ve chhen maite nen kan titi laih laih a. Ajit-a chuan, ‘Kei chu, kan tawng (Bengali) hi ka ziakin ka chhiar thiam miah lo,’ a ti a. Mak ka ti ngang mai. A tawng chu a tawng thei a, mi sawi pawh a hrethiam, mahse a chhiar thiam lova, ziah pawh a ziak thiam hek lo. Ani chuan, ngaihsam hmel zetin, ‘Ka tan ziah thiam a pawimawh lova, chhiar thiam pawh a pawimawh lo,’ a ti mauh mai! Kum 4 lai a liam leh tawh, kha tawngkam khan tun thleng hian engemaw tak min ngaihtuahtir reng mai!

Mizo, internet hmang thinte tana hriat hmaih theih hauh loh khawpa lar, ‘Misual dot com’ hmuchhuaktu Benjamin-a nen hian kan inbia a. ‘Mi tam tak thu rawn thawh hi chu Mizo tawng dik lo a tam lutuk a, edit harsa fe fe pawh a tam mai. Mobile phone-a SMS inthawn ang maia rawn ziakte hi an tam lutuk,’ a ti a. Dawt a sawi ka ring lo.

High School kan kal laiin, kan Headmaster hian khatih laia US President, George Bush (Sr) tihdan kha a zir thin a. English-a tawng pahin, Bush-a tihdanin, a khabe leh hmui a tisawi tawlh tawlh thin a; ngaisang takin kan en thin.

Kum 2003 kum tawp lam vel atang chauh khan Internet hi ka khawih ve a. Khatih lai nena teh chuan tun dinhmuna Mizo ten Internet kan hman tangkai takzia hi sawi thiam pawh a har zawk. Internet hmang thin tam ber kha kan ‘chat’ a. ‘ASL Plizz’ kan ti zankhua a, zing dar 2 velahte khan ‘pingme’ kan la ti kan la ti thin a nih kha! Tunah chuan, internet han lut ila, eng pawh mai han ‘google’ ila, Mizo thuziak emaw, thlalak emaw hi a lo lawr tel ve ta fo mai.

2007 atang khan blog ka siam ve tan a, Mizo thanhnem takin blog kan siam belh zel a. Tunah chuan Mizo blog tam tak a awm ta. Mizo blogger-te address leh chanchin tlangpui tarlanna, bloggers directory pawh en chhuah peihawm loh khawp a awm tawh. Mizo blogger zingah English thiam tak tak an tam hle a, thenkhat phei chuan tum tak tak se India ziaktu lar ni thei hiala mawiin English an thiam a, an hmang thiam tel bawk.

Chutiang karah chuan, a tlangpuiin blogger-te hian Mizo tawng kan thiam lo deuh vek. English thiam takte pawh hian Mizo tawng an ziah chuan thu zawm leh zawm loh turte pawh an hre lova, tawngkam hman loh zawk tur, dik ve thova lang hmang kan tam em em bawk.

Mizote hian English hi kan ngaisang hle a. A bik takin Mizoram chhunga Mizote hian kan ngaisang lehzual emaw tih tur a ni. Kan ngaihsan em avang hian kan thiam chian ve theih loh turah kan ngai deuh niin a lang a. Thiam tak tak si lo hian, miin a hman dik lohte chu ‘correct’ te, nuihzat te kan hrat phian lehnghal. Mi hmuh laia English hmangte chu, ‘a chapo ve’ tih melhin kan melh fote pawh hi kan English ngaihsanin a hrin thalo zinga mi a ni ngei ang.

Planet danga kan cheng a nih loh chuan English hi kan tawng pawimawh a ni kumkhua dawn a, thiam tura inzirtir te, thiam tuma zirte, hmante hi thil tha leh tangkai a ni zel ngei ang. Chutiang bawkin India ram atanga kan inlahrang a, sumdawnna lamah pawh India nena kan inkar hi kan chhu chat hmak a nih loh chuan Hindi thiam hi a pawimawh reng bawk ang. Kan tawng nilo, tawng dangte hi kan zir a, kan hman a, kan thiam hi a tul a. Zoram pawna awmte tan phei chuan loh theih loh a ni a, thiam loh tum pawhin thiam loh theih loh a nihna chen a awm. Chuvangin, English te, Hindi te leh tawng dangte pawh hi zir ila, thiam ila, i hmang zel ang u.

Chutih lai chuan kan pianpui tawng heti tak maia kan thiam ta lo hi chuan ngaih a ti tha zan lo.

Mi tam takin kan pianpui tawng kan thiam chiang tawh lo hian chhan a nei ngei ang. Tuna thiam lo tate’n kan thiam loh chhan hi kan thiam loh niin a lang lova, kan nu leh pate thiam loh niin a lang. He khawvel, sanna leh ropuina uma mihringte intlansiakna hmun tura khuanu ruatah hian kan nu leh pate chuan dam khawchhuak turin min duh a. Chumi atan chuan kan pianpui tawng aiin hnam dang tawng a pawimawh zawk tih an hmu a, chu thil pawimawh nei tur chuan an thiamna leh theihna te, an sum leh pai te sengin lehkha min zirtir a. An duh leh tum chu a hlawhtling a, mahse an tum tel miah loh, mahni pianpui tawng thiamlohna kan zir chhuak tel ve ta tlat. Kan pianpui tawng mah nise, sikulah te, College-ahte leh University-ahte zir hek lovi, engtin nge kan thiam ang ?

Kan tawng kan thiam loh hi keimahni thiam loh ni lo mahse, ngaihtha tak leh thiam inti taka thutpui chi a ni ang em tih hi ka ngaihtuah…

Midangte hian kan thlen chin te, kan zirsan zawng te, kan awmna hmun a zirte, kan thiltih leh hnathawh a zirtein tawng dang leh hnam dang tihdante hi chu hre tura min ngaih chin a awm a. Mahse kan pianpui tawng hi chu thiam tura ngaih sa kan ni hrim hrim. Amaherawhchu mahni pianpui tawng ngei pawh, zirna In sang tak thlenga zir tan lo chuan thiam famkim tura ngaih erawh kan ni ngawt thei lovang. Chutih lai chuan, kan tawng kalphung te, a ziahdan leh a lamdan te, a thlukdan te thlengin, a bulthut leh mi pangngaiin an thiam awm chin hi chu a awm lo maw? Chumi pawh thiam lo hi engzat tak awm tawh ang i maw??

Kan tawng hi khawvela tawng tam tak zinga boral mai hlauhthawnawm zingah a tel tawh an ti. A ral zel lohna tura hma latu tur tunge ni ang? Engtia tih tur nge ni ang? Hetianga kan tawng dinhmun a him loh em em lai hian, nang leh kei hian kan lo la thiam chiang lo ve leh zel a nih phei chuan…

English thiam lovin, tawng dang thiam map lo pawh ni ila, ka pianpui tawng ka thiam chuan khawvel hian min nuihzat tluanchhuah ka ring lo. Tawng hrang dang sawm pawh thiam mah ila, ka pianpui tawng ka thiam loh chuan khawvel hian min ngaihsan rei ka ring lo. Mizo ka ni si a, tawng dang thiam mah ila, Mizo tawng ka thiam chian si loh chuan, mahni tawng pawh thiam hlei lo ka ni kumkhua dawn si.

I ram tan theihtawp chhuah la, i nun hial pawh hlan la, khawvel hian a nuih lo ang che a, a hmuhsit lovang che. I hnam tihdan chawisang la, i hnam tawng thiam rawh – khawvelin a nuihzat lovang che.

Hma Kan Sawn Lo  

Posted by Hriatpuia Pa

Hmasawnna hi a thuanthu ve thei a. Hmun leh thil thenkhata hma kan sawn pawhin, hmun leh thil dangah hmasawnna hi a kairual lo ve thei a, kan sawn miah lo thei bawk. Zofate hian kawng hrang hrangah hma kan sawn a, kan hmasawnna hi thlir thuak chuan khawvel hnam hrang hrang zingah hian a thang chak ber pawl kan ni maithei.

Kan hmasawnna hi a chhan bulpui ber chu kan Kristianna niin mi tam tak chuan an sawi a, a dikna chen a awm a, a dik vek hial maithei bawk. A chhan chu kan zavai deuhthawa Kristian kan nih avangin hmasawnna hna thawh a chak a, a kairual deuh bawk. Amaherawhchu kan hmasawnna a thang kan tih lai leh, thil tam taka kan changkan tawh lai hian, kan Kristianna pawhin a tihhmasawn zawh loh a awm niin a lang a. Mi tam ber chuan heng hma kan sawn lohnate hi kan hre lova, a hriate pawhin kan ngaipawimawh lem lo niin a lang. Hma kan sawn lohna ni a ka hriat hrang hrangte hi chhiar la, lo ngaihtuah ve teh.

Mizote hi mei zu nasa ber hnam kan nih loh pawhin, a dawttu zingah a hniam pawl kan ni lo maithei. Kan pi leh pute hun lai atang tawhin, ram tang rual chin chuan mei an zu vek a. Kan pi leh pute kha ram tang rual an nih atanga an pitar/putar thlenga mei zu deuh vek an niin a lang. Tun thleng hian Mizo zingah mei zu hi kan la tam em em a, Mizo vaihlozial ngei zu hi chu kan tam ta vak lo.


Ka pa hi meizial heh tak a ni a. Ka nu hian zan lamah a zial khawlsak thin. Zozial chu a hmawr lamah la hmanga tawn a ngai thin a, naupan lai chuan zozial tawn nasa ber pawl ka nih hial ka ring. Ka unaute kha an tlaw riau a, an meizial han tawn vete kha an tawn rek ngut a, a then chuan an tawn hmawr lutuk a, a thenin a zatve dawnahte an tawn ta thin a. Kei kha chuan nalh thlapin ka tawn thiam bik tlat a! (Ka unaute kha an zeilo ka ti thin a, mahse tun hnu hi chuan an lo zei lo 'zei' hi ka ti leh ta khawp mai!!) Zan tin hian zozial zial 40 vel hi chu ka tawn deuh ziah.

Kan naupan lai pawh a rei ve ta fu mai! Khatih laia kan u te, kan pateho meizial zuk thin kha tuna vaihlozial kan tih ang tho hi a ni a. Chutih lai chuan khatih laia an sikret zuk thin ang kha chu a awm tawh mang hauh lo thung a. Kan hriat ve hnuah pawh hian changkang zawk, hmel mawi zawk hi a chhuak reng a ni.

Heti em ema Mizo zialin hma a sawn thei lo hi a mak ka ti. Hmeichhiain an zial a, a hmawr an bilh a; a hmawr lehlamah lazaiin an tawn a. Lazaiah pawh a hringa tawn ngei hi a tui hmel thin a, tun thlengin chutiang chiah chu kan 'vaihlozial' dress hi a la ni a. Heti khawpa mei zu nasa hnam Mizote hian kan vaihlozial hma kan sawntir lo hi a mak ngawt mai!

2. Khuang:
Kan pi leh pute hun atang tawhin Mizote nunah khuang hi a bet tlat a. A tel lovin Mizote hian hun pui kan hmang thei lo tih hi dawt a ni lovang.

Kristian kan nih hma atang tawhin khuang hi zai leh lam leh chai hunahte kan leklam ber a ni a. Mizote kutpui ti hlawhtlingtu ber chu khuang a ni thin a, 'Khuang lova chai ang,' tih tawngkamte pawh kan nei a. Chu chu thil kim lo engemaw awm sawina a ni. Kristian kan nih hnuah pawh Biak Inah kan lalut a, kut ni vangthla apiangin kan lekchhuak bawk.

En zui duh tan : Korean Khuang leh Red Indian Khuang 

Heti khawp hian Mizote nunah khuang hi pawimawh mahse, kan khuang hmel hi a la ngai reng mai. Savun kaih mar, thing kawrawnga tawn khawm a ni a, rawngte chu han hnawih ve deuh thin mah ila, a la mawi tawk lo. A hmel hian changkan lam a pan mawh tak tak a ni.

Korean-ho khian khuang an ngah ngang mai. Anni pawh khi khuang tel lova 'chai' thei lo, an tihpui nikhuaa ri bung bung chi an ni ve tho va. Anni chuan an changkan ang zelin an khuangte pawh an siam changkang ve  zel niin a lang.

Zan khat chu 'Discovery channel' ah hian Korean-ho khuang siamdan leh an khuang hrang hrang chanchin tarlanna ka en fuh hlauh mai a. Internet lamah ka'n bih chiang chhunzawm a. Khuang chi hrang hrang an lo ngah ngang maia, an siamdan pawh a changkangin, a ri herh mil theihte pawh an siam a. An hman duh dan a zirin a pianphungte pawh a danglam a ni.

Mizote hi kan ral hma chuan kan zai reng dawnin a lang a, kan zai chuan khuang hi kan mamawh reng dawn niin a lang bawk. Chuti chung chuan kan khuang ngai hi kan vaw tlut tlut a. Heti khawpa vuak nasat si hi khuang siamtu lian deuhte pawh kan la awm miah lo mai hi a mak. Khaw tinah Biak In tam tak a awm a, YMA Branch kan ding zel bawk a. Biak In leh khawhar Inah khuang tel lovin engmah kan ti thei lova; chuti chung chuan kan khuangte hian hma an sawn lova, an hmel ngai an pu reng mai hi thil mak a ni. Hei aia hma sawntir theih hi niin a lang.

3. Thildang: 
A sei lutuk dawn.. khaikhawm tawh mai ang.

'S Chhang' te, 'Convoy' te emaw, 'Sandwich' emaw pawh ei thin mah ila, Mizo chhang kan sawi apianga kan mitthla thin chu 'Chhangban' a ni.

He chhangban pawh hian hma a sawn thei lo. Kum engzatnge changel hnaha kan fun tawh? A funna te hi tihchangkang ve theih chi a ni em?

Kurtai pawh hi! Hmanah chuan tuna mi ang tho hi a ni a. A funna atan Hnahthial kan hmang thin a, Hnahthial a van tak deuh vang a ni ang - a nih loh pawhin a awlsam zawk vang a ni ngei ang - lehkhain kan fun ta a. A tawnna atan pawh hnang aiah 'rawbar kual' kan hmang ta a, a bak zawng chu a ngai. A lang mawi sawt lova, a thianghlim sawt bawk lo; a man a to sawt tih mai a ni.

Bekang te pawh hi - a ngai reng. A man a to deuha a ni mai. 

Heng kan thil neih leh siamchhuah vete hi tihmasawn ila, a hlui hi i thlauhthla vek ang u tih lam a ni lo. A nihna pangngai ang hi la awm zel se, chutih lai chuan kan changkan ang zel leh hma kan sawn ang zelin, hnam dang leh thang leh thar zawkte tan pawh duhawm zawk a nih theih nan rilru thar kan put deuh a ngai em? Nge, 'Kan kaldan ngai hi a la tha rih e,' kan ti zel dawn??

Kan Vanglai – 01 : Lehkhathawn  

Posted by Hriatpuia Pa



2,

Thian duh tak leh ngaih em em,
Tun lai i dam lai a nih ka beisei, kei pawh chung Pathian venna leh hualhimna zarah ka dam lai a ni e. I ban na kha a dam tawh em? Ka kezungpui tin lut kha kei chu a dam daih tawh. Hmanni-ah pawh DamdawiIn tlangah kan inkhel a, a na tawh lo reng reng. Kan inhmu khat hle mai. Sikul i lo kal ngai bawk si lo, inkhelhho a chakawm hle mai. Thangchep kan kam dun kha i en ve thei ta si lova, hmanni chu ka zuk en a, a awk miah lo! A bel tha ve viau si a, bakah ka va en chuan a lo per ngei a, a awk si lova. Huala ten min lo en khalh a nih ka ring deuh. Sawi tur chu tam hle mahse duhtawk phawt mai ila,

i thian,

Tun hma kha chuan hetiang deuh hi kan lehkhathawn ziah leh dawn tlangpui a ni.

Tun lai angin inbiakpawhna a chak lova. Telephone a awm mang lova, mi pangngai neih phak a ni lo. Dak hmanga lehkha inthawn a ngai a, a chak vak si lova. Truck driver leh handy-man te hmangin kan inbe pawp a ni deuh ber. Chhungte tlawha zin tur kan Nu leh Pate kha chuan lehkhathawn an keng hnem thei ngawt mai. Nu leh pate an zin dawn kha chuan an fate khan an zin hma zanin lekhathawn kan ziak sap sap hlawm a, kan kentir ngei ngei thin. An rawn haw ve leh a chhanna kan beisei leh nghal tlangpui bawk.

Kan han leikang hret a, hmel duh kan lo nei ve a, inbiakpawhna dang vak a awm lo - lehkhathawn lo chu. Telephone-te kha chu khaw khatah pawh a vantlang chunglam deuhho chauh khan an nei a. Khaw khata mi pawh lehkha inthawn uar lai a awm ve reng reng bawk. Veng khata awm pawh kan inthawn tho thin a nih kha!

Chutiang lehkhathawn chu -

Just 4,
Hmangaih leh duh ber,

A hmasain he lehkha ka ziahna kut dinglam ngei hmang hian chibai ka buk a che…


tiin a intan tlangpui a.

A tawpah ’

' Tawk lo chungin tawk rih mai se,

I tan chauh ti reng fo '

tih a tel deuh ziah bawk a.

Lehkhathawn tlang sirah chan, 'Zing ni chhuak hi ka chibaina che ni se, tlai ni tla hi ka mangthana che ni rawh se,' tihte kha a inziak kawi deuh nguai ngei bawk a, chhiar nawn a hlawh ngiang thin a nih kha!

A ziaktuin hmanhmawh taka ziah tih hriat takin, a tlang sir lehlamah, 'He lehkhathawn hi i chhiar zawh ve leh pawtchhe nghal rawh aw.. plizz' tihte pawh a inziak fo mai!

Hetiang lehkhathawn 'age' a awm laia khaw lam hla taka ngaihzawng neite kha an khawngaihthlak thin teh e! Keini'n ni khata lekhathawn pahnihte kan dawn lai khan, anni chuan thla khatah vawikhat dawn loh chang pawh an nei a. An lehkhathawnin a thlenna tur a thleng ta ang em tih an ngaihtuah nasa thei hle a. Kan thianpa pakhat phei chuan –

'Aw, kar a hla,
Duhlai mi u,

Min dantu lamtluang a sei lua e;

Lunglen biahthu, thaikawi bawng te,
Thleng zo ang maw ka di runah...?'


tihte kha a sa rawng rawng thin.

Keini, mahni khua ngeia ngaihzawng nei kha chu kan vannei bik a. Zingah lehkhathawn kan dawng a, chhunah a chhanna kan ziak a, zanah a dang kan dawng leh a!! Kan inhmuh zin avangin kan inthawn khat phah chuang lova, lehkhathawn ziah leh dawn 'addict' hun laite kha a awm ni ngei tur a ni. Ni khata pakhatmah dawn loha awm thiam lohte pawh kha zuk awm thei a!

Palai emaw, puarak emaw pawh kha an ngai vak lo. A ziaktu khan a pe a, a dawngtuin a ziaktu kut ngei atangin a dawng mai a, kawngbo a awm thei lova, a tha phian.

A inpek lai boruak kha a nuam ve mai mai thin. Mi karah kan han inchibai zauh a, kha second hnih khat chhung lek khan kan kutah lehkhathawn a lo awm hman reng tawh thin a. Kan hawpui vang vanga, pindanah luhpuiin, kan han chhiar nghal niap niap a. Vawikhat chhiar mai khan fiah mahse a tawk zo lova, vawihnih chhiar hnuah pawh a hlutdan a dang chuang lova.

Fountain pen uar lai a nih kha! Ziahna atan writing pad mawi leh changkang tak tak kha a la chhuak ve lova. Mikado Exercise Book pawhthlak ngei kha kan han hmang a! Mikado kha a lehkhapuan a tha a, Fountain pen hman pawhin a ziak a pherh ve lova, a tha. Apsara exercise book kha chu Fountain pen hmanga ziahna chi a ni lo, a pherh duh. Catholic School-ho exercise book pawhthlak pawh kha a lar lai chuan a lar ngang mai. A phek a hlai a, exercise bu pangngai aiin a sei hret bawk a, a hun lai kha chuan hmangaih lehkhathawn ziah nana hman rim ber pawl a ni ve ang.

Hun a lo kal hret a, writing pad a rawn chhuak a, mi thenkhat kha chuan lehkhathawn ziahna atan sum an seng hnem ngawt thin mai. Pen tui hring te, pen tui rimtuite a rawn chhuak a, a timi tan chuan neih ve zel kha 'hmangaihna' puanchhuahna a ni si.

Lehkhathawn ziah leh dawn hun lai hi chu tleirawl lai thil niin a lang. Tleirawl lai inngaihzawn hi a nuam a, a na bawk a, chu vang chu a ni ang, 'First Love Can Never Die' an lo tih!!

Tunah chuan kuta hum pil theih mai, mobile phone kan lek ta sup sup a; lehkhathawn pawh a lar tawh lo. Kan thalaite chuan awm hmunah, duh duh an sawi a, an thut hmun atangin hlate khua an bia a. Kal chung te, ding chung te, thingthi chungte pawhin, an biak chu a hla emaw, a hnai emaw, a dang chuang lo; duh duh an sawi zung zung tawh mai a. Kutzungpui hmangin, a ri-a an sawi ngam loh pawh an inthawn zung zung a. 'Thaikawi bawngte' pawh a awm tawh lo - 'hmeh niap niap bawngte' te kan vuah a nih ngawt loh chuan..

Facebook

Keimah

Visitor Since Feb 09

Khawi lam atangin nge?

online

Followers

Lairil

Mihring ngaihtuahna LAIRIL hi mihringin duhnate, awhna te, hlauhna te, thlamuanna te, hlimna te, lawmna te, lungngaihna te, thinrimna te, chapona te, duhamna te, itsikna te, mahni hmasialna te, hmangaihna te, duhsakna te, engkim mai; mihringa mihrinna siamtu leh neitu a nih avangin a va pawimawh tehlul em!

Nuihtirtu che kha I thinlung a ni a. I tah theihna te, thil mawi leh mawi lo i thliar thiamna te pawh kha thildang a ni chuang lova; khaw lum leh khaw vawt, hlauhawm leh muanawm, hrehawm leh nuam I thliar hran theihna pawh chuti tho.

A chang chuan kan hmuh leh hriat ngeite pawh hi dawt te, a lem te a lo ni thei a! He thinlungin a ngaihtuah hi a lem a ni thei ang em le? Mitin a hmuh a, bengin a hriat avanga duhna leh thinlung LAIRILin a duhna hi a inzawm ang em le? A hrang ni ta se khawii chu nge dik zawk ang? Khawii chu nge tha zawk a, tlo zawk ang aw?

Kan mita kan hmuh leh benga kan hriat te, rilrua kan ngaihtuahna te zinga a tam zawk hi he kan mihrin chhung hian kan theihnghilh leh thin em? Kan theihnghilh tawhte hi kan hrechhuak leh thin em? Thinlung hi bum hmang, chhe lailet der em ni? (Bible – Jeremia 17:9)

Recent Comments

Grab This Widget

Twitter Updates

    follow me on Twitter