Hlim Takin - Swine Flu Nen  

Posted by Hriatpuia Pa

Swine Flu (H1N1) a lar a. Khawvel ram hrang hrangah a darh tawh a, mitin an ralkhel a; a bik takin India ram chu he hriin a sawisak nasat pawl kan ni awm e. Thihna leh a vei tam lamah a nasa ber kan nih loh pawhin, he hri avanga buai nasa ber pawl chu kan ni maithei.

He thu ziah lai (Aug. 21, 2009) hian khawvel pumah Swine Flu vanga thi hi 1800 vel tling tawha sawi a ni a. India ramah pawh mi 48 an thi tawh.

World Health Organisation (WHO) chuan khawvel pumah he natna hi mihring tluklehdingawn 2 velin an vei dawn niin a chhut a. Ram thang mek (developing countries) ah he natna hi a darh chak lehzual dawn niin sawi a ni bawk.

Hetianga hripui leng thin te, chutiangin mihring a suat puk puk dante chu lehkhabu leh internet-ah chhiar sen loh a awm a, chhui zui lo ila. Amaherawhchu hetiang dinhmuna kan awm mek lai, Swine Flu nena kan lenho mek lai hian eng ang rilru pu tur nge kan nih tih hi ngaihtuah tham a ni.

Khawvela piang tawh phawt hi chu thi tur kan ni a, chumi avang chuan ni tin, thla tin, kum tinin khawvela cheng mihringte hi kan thi reng a. Mithiamte chuan hritlang khawsik pangngai (Ordinary/Common flu) avang hian kum tin mihring nuai hnih atanga nuai 5 vel an thi ziah niin an chhut a. A chhan chu eng pawh nise, kum tinin, khawvel pumah mihring maktaduai 56 vel kan thi ziah a ni.

Chhan hrang hrang tam tak a awm thei a. Khawvel boruak inthlak (climate change) avanga natna hrang hrang avangin kum tin mi 150,000 vel an thi ziah ni a chhut a ni a; WHO chuan 2030 ah phei chuan kum khat chhunga climate change vanga thi hi nuai 3 vel an tling dawn niin a chhut.

Lung natna avangin kum khatah mihring maktaduai 17 vel an thi ziahin, Cancer vangin maktaduai 7 vel an thi ziah bawk ni a chhut a ni a. AIDS avanga thihna pawh kum tin maktaduai 3 vel a thleng ziah bawk a. Zu vangin kum tin mi maktaduai 2 aia tam an thi ziah bawk a. Khawvela ram changkang ber, USA ah meuh pawh khuan kum tinin Doctor leh damdawiina hnathawkte tihsual palh (hospital medical error) vangin mi nuai 2 dawn an thi ziah nia chhut a ni a. USA ah pawh chutiang a nih chuan, khawvel hmun dangah chuan engzat nge a thlen ang tih hi chhut phak pawh a ni lo hial ang.

Ni e, heng thihna hrang hrangte atang hian, Swine Flu tel lo pawh hian mihring hi kan thi reng tih a lang chiang a. Thi tura piang kan nih miau avangin he thihna hi kan pumpelh thei lova; kan thi reng a, kan thi mek a, kan la thi zel dawn tih hi ngaihtuah miah lo pawha sawilawk theih a ni.

Chutiang chu a nih mek laiin Swine Flu a rawn chhuak a, kan buai ta nuai nuai mai! He hrileng hi kan theihtawpa kan do tur a ni ang, he hrileng lak atanga inven te pawh kan theih tawkah kan tih tur a ni ngei ang. Chuti chu ni mahse heti em ema lo talbuai (panic) erawh hi chu, kan ngaihtuah chian loh vang a ni thei ang.

Swine Flu hi leng lovin, natna dang pawhin min tlakbuak lo mahse, he khawvela mihringte zingah hian dam hlen tur kan awm lova, eng chen pawh dam ila, kan la thi tho tho dawn. Chu chu kan hre vek a, chuti chung chuan thihna hi kan tawh tur, kan chunga tla ve thei niah ngai mah ila, thi tur erawh chuan tumah hian kan indah thiam meuh lo. Thihna hi kan hlau emaw hlau lo emaw, kan tum emaw tum lo emaw, mihring tan pumpelh theih a ni lova, kan hmabaka awm vek a ni tih hi chiang ila. A chhan chu eng pawh nise - Swine Flu emaw flu lo emaw pawh nise - kan la thi dawn tihah hian chiang ila, chu chuan nunkawng dik min kawhhmuh theih a rinawm a; he Swine Flu pawh hi pawmdan kan thiam ngei ang.

John Donne (1572-1631) chuan thihna hi a'n hlau lo khawp a, 'I tur leh ralthuam tha ber ber nen inthuamin, khawvela mi chi hrang hrangte chu i chhiahhlawhah dah mah la, min tihlum thei lova, rei lote atan chauh min muthilhtir mai a ni. Chu muthilhna chu a reh hunah chuan chatuan atan kan harh tawh thung anga, thihna a awm tawh lovang. Thihna, chutih hunah chuan i thi ve tawh zawk ang' (Death Be Not Proud) a ti a. J. McGranahan (1867 - 1937) pawhin, 'Thihnate hlau tawp lo turin, kan nunna thuhruk a ni,' (Nangni Chhandam Fate Tho R'u - KHB No. 398) a ti bawk.

He Swine Flu hi mawl leh รข taka lo dawnsawn tur chu a ni lova, chutih lai erawh chuan kan hmabak hi chiang taka kan chhut a, kan nihna dik taka kan chian erawh chuan hlauhna awmze nei lo lak ata inthiarfihlimin, Swine Flu nen pawh hlim takin kan leng thei ngei ang.

6 comments

First, template thar a ni maw? A nalh hle mai.

Second, hetianga harsatna hrang hrang kan tawh a, khawvel kan thlabar em em lai te, Mizoram anga thil huphurhawm tak leh tihbaiawm kan hmachhawn apiang hian Sam 23:4 hi ka hre chhuak ziah thin.

A ni, thihna hlimkawr ruam zawh mah ila, thil tha lo reng reng ka hlau lovang, Nang ka hnenah i awm si a. I talhtum leh i tiangin min thlamuan thin a ni.

ringtute fiahna a nih mai bakah lalpa warning hi hriatchian a hun tawh reng a ni. a pui khawp mai

Tunhma han ti ila, kum 1918 velah kha chuan he natna Swine Flu kan tih hi Spain ram leh Russia velah kha chuan a lo leng tawh a ni awm e. Khatih lai kha chuan a lenna ram a zir khan a hming an phuah mai a, Spanish Flu, Russian Flu te pawh an ti a ni awm e. Mi maktaduai telin an lo thihpui tawh a. Tunah chuan khawvel changkang chho zelah inkalpawhna awlsam avangin khawvel pumah tlang hrileng a ni ringawt ber anih hi!

Enga pawh chu nise, Swine Flu vang a ni emaw ni lo emaw, nung turin kan lo piang a, thi turin kan dam chu a ni tho si! Thihna hi ringtute tan chuan van lama kaisanna (Promotion) sang ber a ni zawk asin! Swine Flu avang ni lo pawhin kan la thi ve ngei dawn si!

"Engkim tan hun ruat a awm a,pian hun a awm a, thih hun a awm" a ni lawm ni? Mahse, "Prevention is better than Cure" tih ang khan he khawvelah kan la awm chhung chuan tihdam angaih hma hian kan inven theih thenkhat lakah hi chuan kan inven hi a ngaiin a tul tho si!

Mizoramah Swine Flu in min luhchilh ve ta maw? Mizoramah a test-na tur khawl kan la nei lo zui! Aizawl leh a chhehvel khaw hnai deuh tan chuan a ziatak a awm e. Darkar 48 chhunga test hman turin thlawhna hmangin test tur, Kolkata lamah alaa thawn hman a, hetih lai hian Aizawl District ni lo, Dist. dang tan chuan Swine Flu hi in ringhlel a, test duh awm ve ta se, a va han buaithlak dawn ve! Transportation avang hian test tur test hmanloh hian a awm thei mai lovang maw? Mizote Swne Flu laka kan him leh zual theihna tur hian Mizoram hian a test na khawl hi a neih ve vat a tul takzet a ni. Chutiang anih loh chuan Mizoram District dang hian Swine Flu hi kan lo sepui ruah tawrh tlawk tlawk mai ang tih pawh thil hlauhawm tak chu a ni ve ngei mai!

Swine Flu avang hian kan thian, kan chhung, kan unaute phai lama awm lehkha zir leh hnathawkte an lo haw hian kan lo hmu sir he in, kan lo tih deuh hruk lo maw? Swine Flu hian ngaihtuah a va ti thui em! Climate change avanga tlang hrileng len hunlai a la ni zui nen! Hritlang nazawngin Swine Flu vei nih an inring ang tih a hlauhawm rualin mi thenkhat lahin lo tihbai tawk an la awm zui!

Chubakah Swine Flu chungchang-ah hian Doctor leh mithiamte test turin Lengpui Airport leh Vairengte Check Gate-ah chauh duty pawh hi a him ber tawh angem? Phai lam atang ringawt ni lo, Foreign atang pawhin Mizoramah hian mi tam tak an lo lut reng thin asin! Bangladesh te, Myanmar ten min hual vel a, Lengpui Airport leh Vairengte atang ni lo hian Mizoram hi a luhkhan dang a la tam em asin!

Kan chhak Myanmar ramah pawh mi thahnem takin Swine Flu an vei a, chutiangin, China ramah te pawh. Kan ramah Burma sumdawng thahnem tak an rawn lut reng a, an ramah Swine Flu a len mai bakah, sumdawnna avangin China han thleng a, helai hmun Mizoram rawn thleng lehte pawh an awm asin! Chuvang chuan test loh vanga Swine Flu vei lo nia kan ngaih Swine Flu lo vei reng leh lo thihpui reng pawh thil awm thei a ni tlat.

Engapawh chu nise, Pu Zaia a vengvar thlak i ziak tha thei thuai thuai khawp mai! Comment rualin sermon pate ka han thlak ve vak ringawt mai min lo hrethiam mai a ni ang chu.

Ni e, tute pawh hi kan la thi dawn ngei alom! John Donne-a'n, "Thihna chapo suh, nangmah i la thi dawn" a tih ang khan kan la thi ngei dawn alom! Mizoramah hian "Hlim takin - Swine Flu Nen" hian kan lo leng reng a ni thei asin!

Mi tam tak pawn an ziak tawh a lawm... Swine Flu aia hla awm hi a tam em he khawvel ah hian... Thihna hi chu tawk vek thei kan nia, chuvangin mahni nun khawibuaithei khawpa lo chet pawh hi a dik ber a ni chuanlo, ka ngaihdan chuan hotupa. i sawi dik lutuk, kan nihna diktak leh rinna diktak nen a kan nun chuan thil dang te hi chu engtihna mah a nilo. Engkim "A" kutah a awm vek.

Dam tawpa thi mai tur vek phei chu kan ni a, 'marawhchu natna chi hrang a rawn chhuah hian rilru hi a phawklek ta thin alawm...

Kei chu ka hlauh tak ber zawk chu thiante ti-a kan chhal ve ten min phatsanin min be duh lo vel ang a, thi mang si lo-in khawhar deuh hian tar alamah kan tei ruk ruk ang tih ka hlau..

Ziak tha hle mai.

Post a Comment

Facebook

Keimah

Visitor Since Feb 09

Khawi lam atangin nge?

online

Followers

Lairil

Mihring ngaihtuahna LAIRIL hi mihringin duhnate, awhna te, hlauhna te, thlamuanna te, hlimna te, lawmna te, lungngaihna te, thinrimna te, chapona te, duhamna te, itsikna te, mahni hmasialna te, hmangaihna te, duhsakna te, engkim mai; mihringa mihrinna siamtu leh neitu a nih avangin a va pawimawh tehlul em!

Nuihtirtu che kha I thinlung a ni a. I tah theihna te, thil mawi leh mawi lo i thliar thiamna te pawh kha thildang a ni chuang lova; khaw lum leh khaw vawt, hlauhawm leh muanawm, hrehawm leh nuam I thliar hran theihna pawh chuti tho.

A chang chuan kan hmuh leh hriat ngeite pawh hi dawt te, a lem te a lo ni thei a! He thinlungin a ngaihtuah hi a lem a ni thei ang em le? Mitin a hmuh a, bengin a hriat avanga duhna leh thinlung LAIRILin a duhna hi a inzawm ang em le? A hrang ni ta se khawii chu nge dik zawk ang? Khawii chu nge tha zawk a, tlo zawk ang aw?

Kan mita kan hmuh leh benga kan hriat te, rilrua kan ngaihtuahna te zinga a tam zawk hi he kan mihrin chhung hian kan theihnghilh leh thin em? Kan theihnghilh tawhte hi kan hrechhuak leh thin em? Thinlung hi bum hmang, chhe lailet der em ni? (Bible – Jeremia 17:9)

Recent Comments

Grab This Widget

Twitter Updates

    follow me on Twitter