Zan dar 1 a ri tawh. Salt Lake, Kolkata-a Mizoram House chhawng chungnung ber dawttuah, inhnawih rimtui leh inphuh rimtui lama sumdawng Ajit-a leh a nau Pilot, leh a thianpa, Bengali pachal diktak, kan thiam ve loh Bengali kher khera a thiante be ve chhen maite nen kan titi laih laih a. Ajit-a chuan, ‘Kei chu, kan tawng (Bengali) hi ka ziakin ka chhiar thiam miah lo,’ a ti a. Mak ka ti ngang mai. A tawng chu a tawng thei a, mi sawi pawh a hrethiam, mahse a chhiar thiam lova, ziah pawh a ziak thiam hek lo. Ani chuan, ngaihsam hmel zetin, ‘Ka tan ziah thiam a pawimawh lova, chhiar thiam pawh a pawimawh lo,’ a ti mauh mai! Kum 4 lai a liam leh tawh, kha tawngkam khan tun thleng hian engemaw tak min ngaihtuahtir reng mai!
Mizo, internet hmang thinte tana hriat hmaih theih hauh loh khawpa lar, ‘Misual dot com’ hmuchhuaktu Benjamin-a nen hian kan inbia a. ‘Mi tam tak thu rawn thawh hi chu Mizo tawng dik lo a tam lutuk a, edit harsa fe fe pawh a tam mai. Mobile phone-a SMS inthawn ang maia rawn ziakte hi an tam lutuk,’ a ti a. Dawt a sawi ka ring lo.
High School kan kal laiin, kan Headmaster hian khatih laia US President, George Bush (Sr) tihdan kha a zir thin a. English-a tawng pahin, Bush-a tihdanin, a khabe leh hmui a tisawi tawlh tawlh thin a; ngaisang takin kan en thin.
Kum 2003 kum tawp lam vel atang chauh khan Internet hi ka khawih ve a. Khatih lai nena teh chuan tun dinhmuna Mizo ten Internet kan hman tangkai takzia hi sawi thiam pawh a har zawk. Internet hmang thin tam ber kha kan ‘chat’ a. ‘ASL Plizz’ kan ti zankhua a, zing dar 2 velahte khan ‘pingme’ kan la ti kan la ti thin a nih kha! Tunah chuan, internet han lut ila, eng pawh mai han ‘google’ ila, Mizo thuziak emaw, thlalak emaw hi a lo lawr tel ve ta fo mai.
2007 atang khan blog ka siam ve tan a, Mizo thanhnem takin blog kan siam belh zel a. Tunah chuan Mizo blog tam tak a awm ta. Mizo blogger-te address leh chanchin tlangpui tarlanna, bloggers directory pawh en chhuah peihawm loh khawp a awm tawh. Mizo blogger zingah English thiam tak tak an tam hle a, thenkhat phei chuan tum tak tak se India ziaktu lar ni thei hiala mawiin English an thiam a, an hmang thiam tel bawk.
Chutiang karah chuan, a tlangpuiin blogger-te hian Mizo tawng kan thiam lo deuh vek. English thiam takte pawh hian Mizo tawng an ziah chuan thu zawm leh zawm loh turte pawh an hre lova, tawngkam hman loh zawk tur, dik ve thova lang hmang kan tam em em bawk.
Mizote hian English hi kan ngaisang hle a. A bik takin Mizoram chhunga Mizote hian kan ngaisang lehzual emaw tih tur a ni. Kan ngaihsan em avang hian kan thiam chian ve theih loh turah kan ngai deuh niin a lang a. Thiam tak tak si lo hian, miin a hman dik lohte chu ‘correct’ te, nuihzat te kan hrat phian lehnghal. Mi hmuh laia English hmangte chu, ‘a chapo ve’ tih melhin kan melh fote pawh hi kan English ngaihsanin a hrin thalo zinga mi a ni ngei ang.
Planet danga kan cheng a nih loh chuan English hi kan tawng pawimawh a ni kumkhua dawn a, thiam tura inzirtir te, thiam tuma zirte, hmante hi thil tha leh tangkai a ni zel ngei ang. Chutiang bawkin India ram atanga kan inlahrang a, sumdawnna lamah pawh India nena kan inkar hi kan chhu chat hmak a nih loh chuan Hindi thiam hi a pawimawh reng bawk ang. Kan tawng nilo, tawng dangte hi kan zir a, kan hman a, kan thiam hi a tul a. Zoram pawna awmte tan phei chuan loh theih loh a ni a, thiam loh tum pawhin thiam loh theih loh a nihna chen a awm. Chuvangin, English te, Hindi te leh tawng dangte pawh hi zir ila, thiam ila, i hmang zel ang u.
Chutih lai chuan kan pianpui tawng heti tak maia kan thiam ta lo hi chuan ngaih a ti tha zan lo.
Mi tam takin kan pianpui tawng kan thiam chiang tawh lo hian chhan a nei ngei ang. Tuna thiam lo tate’n kan thiam loh chhan hi kan thiam loh niin a lang lova, kan nu leh pate thiam loh niin a lang. He khawvel, sanna leh ropuina uma mihringte intlansiakna hmun tura khuanu ruatah hian kan nu leh pate chuan dam khawchhuak turin min duh a. Chumi atan chuan kan pianpui tawng aiin hnam dang tawng a pawimawh zawk tih an hmu a, chu thil pawimawh nei tur chuan an thiamna leh theihna te, an sum leh pai te sengin lehkha min zirtir a. An duh leh tum chu a hlawhtling a, mahse an tum tel miah loh, mahni pianpui tawng thiamlohna kan zir chhuak tel ve ta tlat. Kan pianpui tawng mah nise, sikulah te, College-ahte leh University-ahte zir hek lovi, engtin nge kan thiam ang ?
Kan tawng kan thiam loh hi keimahni thiam loh ni lo mahse, ngaihtha tak leh thiam inti taka thutpui chi a ni ang em tih hi ka ngaihtuah…
Midangte hian kan thlen chin te, kan zirsan zawng te, kan awmna hmun a zirte, kan thiltih leh hnathawh a zirtein tawng dang leh hnam dang tihdante hi chu hre tura min ngaih chin a awm a. Mahse kan pianpui tawng hi chu thiam tura ngaih sa kan ni hrim hrim. Amaherawhchu mahni pianpui tawng ngei pawh, zirna In sang tak thlenga zir tan lo chuan thiam famkim tura ngaih erawh kan ni ngawt thei lovang. Chutih lai chuan, kan tawng kalphung te, a ziahdan leh a lamdan te, a thlukdan te thlengin, a bulthut leh mi pangngaiin an thiam awm chin hi chu a awm lo maw? Chumi pawh thiam lo hi engzat tak awm tawh ang i maw??
Kan tawng hi khawvela tawng tam tak zinga boral mai hlauhthawnawm zingah a tel tawh an ti. A ral zel lohna tura hma latu tur tunge ni ang? Engtia tih tur nge ni ang? Hetianga kan tawng dinhmun a him loh em em lai hian, nang leh kei hian kan lo la thiam chiang lo ve leh zel a nih phei chuan…
English thiam lovin, tawng dang thiam map lo pawh ni ila, ka pianpui tawng ka thiam chuan khawvel hian min nuihzat tluanchhuah ka ring lo. Tawng hrang dang sawm pawh thiam mah ila, ka pianpui tawng ka thiam loh chuan khawvel hian min ngaihsan rei ka ring lo. Mizo ka ni si a, tawng dang thiam mah ila, Mizo tawng ka thiam chian si loh chuan, mahni tawng pawh thiam hlei lo ka ni kumkhua dawn si.
I ram tan theihtawp chhuah la, i nun hial pawh hlan la, khawvel hian a nuih lo ang che a, a hmuhsit lovang che. I hnam tihdan chawisang la, i hnam tawng thiam rawh – khawvelin a nuihzat lovang che.
