Mas Sipisial_05 : Krismas Lunglen - II
Posted by Hriatpuia Pa
Tlai a ni a.
Nipui laia a tlakna thin kalsanin Ni chuan chhim thlang lam a pan ruai ruai a. A mawina zawng zawng hmanga min elsen tum ni awm takin kawlkilah chuan a eng sen phut a. Photosop thiam lutukin rawng nalh chitin chawhpawlha a duh ang tawka mawia a cheimawi hnu ram thla emaw, kawlkil lem emaw aia a let sang tam taka mawi zawk mawina a pechhuak a, a va hmuhnawm em!
Kawm chhak kawia Lamkhuang thing chhipte chu a nihphung pangngai mawina belchhah turin a'n en hring no nghulh mai a! A hlimte thleng pawh chuan a nalh zo vek mai ka ti!!
Ral lehlamah ui a lo bauh lauh lauh a. A va ho e aw.. ui bauh mai maite chu.
Tlai ni tlain kawl a liam tan tawh avangin ral hla tak chu a hmuh theih tawh loh. Thli a thaw lova, hnim hnahte pawhin chetzai an rel lo. Khawvel hi a ngawi duk em ni? ni lo, he khawvel hian he mihring hnaisailo thinlungah hian thusawi tur a nei zawk a ni ang.
Kumsul liam hnu kan nun........Ngaih lai tho leh thin!
RemLal pian ni hmatiangah kan thlir,
Sikni eng mawi leh zan boruak thiang leng vel
Ngaihlai tizual tur renga'n maw......
Ni e, he sikni eng mawi hnuaiah hian kumsul liam hnu ngaih lai a tho leh lo thei lo thin a lo'm! Kan hma lawkah Remna Lal pian champha a lo thleng dawn bawk nen. 'Nunhlui ngaiin kan tap, hman lai kan ti vawng vawng..' titu thinlung leh ngaihtuahna kha zuk tawmpui pha chiah lo mah ila, he thinlung hian thildang a ngaihtuah thei lo. A leng a ni, a leng.
Ngaih bik pawh sawi tur a awm lo. He lunglenna khawvelah hian suihlung hi a leng ve ringawt a. Chu lunglenna chuan min phuar a, thildang a ngaihtuah theih hlawl loh. Paih bo daiha hna dang thawhsan atan ka phal si lo. He lunglenna hi Krismas lunglen a ni chiah pawhin ka hre lo. En teh, hmana thlasik kha a lo thleng leh tawh a. Kan naupan laia thlasik ang tho khan khua a vawt leh ver tawh. Tun ni tawh mahse hmana 'hman' ang tho kha tun a nih leh si avang tak hian hman kha min ngaihtir lo thei lo.
Zan a lo ni a.
Lung tileng tawk chauhvin chhum kal del del karah thla ral lam a rawn eng chiai chiai a. He lei mawina hi hringfa ten kan hmu lovang tih a hlau em ni?! Chutiang hunah chuan In chhunga awm chi a ni tawh lova, pawnah, mihring siam chawp eng leh mawinain a tihbuai phak loh mawina thlir tura chhuah ngei ngei a ngai.
Hla tak ka thlir a, engnge ka ngaihtuah ka hre lova, ngaihtuah tur pawh ka nei em ni? Ngaihtuah tur pawhin rilru mumal ka pu hlei ne'm. Chhim chhak lam hla deuh fe a motor kawngpuiah chuan a khat tawkin motor a rawn tlan eng leh zuai thin a, khawiah nge an kal ang aw... an lungleng ve a'ngem le?!
E khai! Kumpuisul a lo vei chang hian lunglen a tho leh thin tak tak a lo nih hi!!
