Mas Sipisial_01 : Mas Hi Chu Aw.......
Posted by Hriatpuia Pa
Hawina lam apiang a mawi lai, Nu leh Pate chu engkim ti theia kan ngaih thin lai khan ‘Masi te kha a thlen har theih ve nen! Chi bura chi a awm leh awm lohte, Fate monthly fee kan clear leh clear lohte leh nupuite sam tihkirna man kan pek tawh leh tawh lohte nen lama ngaihtuah a ngaih tawh chinah hi chuan inrin loh lai tak hian ‘Mas hi a lo thleng duh viau mai a lo ni!
Lawmna nge lungngaihna ?
Hmeichhe nau hrin hun ang deuhin, inpeih lo eng ang mah ila a hun a nih chuan ‘Mas hi chu a lo thleng mai thin a. Fate kawr thar leina tur neih loh pawhin hman ve loh theih a ni lo kher kher thin hi chhungkaw tam tak tan chuan a huatthlala lek lek fo. Nu leh Pa tam takin an fate lawm atana Krismas Kawr mawi leh thil chi hrang hrang an leisak chur chur laia second hand lane aia sang melh phak loh chuan Pa thinlung hi a na thin a. Puh mawh tur dang nei miah lo mah ila lungngaihna hual vel karah thil thalo pui pui ngaihtuah a awl chang a tam mai. Rilruah Krismas awm chhan hre reng mah ila, hre ve thiam rih lote’n mite an awh bik lohna tura chet lak a rem loh tlat chuan lawmna hun hi lungngaihna hunah a chang lo thei lova, nau piang lawmin kan hui ha pap pap lo thei lo.
A hla nge tha a hnai ?
Foreign thil a nih tawh chuan engkim hi a tha deuh tura ngaihna rilru nei tlat Mizote thinlungah hian a hnai aia a hla ngaihsanna hi a awm ve hrim hrim emaw tih mai tur niin a lang thin. Pawl hrang hrangte pawh hian kan thenawma hnuchham leh riangvaite ai chuan hla deuh zawka mite kan vei duh deuhvin a lang thin a. Kan In bula ‘Mas kawr mawi nei lo an awm reng laiin hmun hla zawka tanpui ngaite tana thilpek thehkhawm kan duh tlat a. ‘I kut dinglamin thil tha a tih chu i vei lamin hre suh se,’ ti hiala duh fir zirtirtu hnungzuitute hian, kan tih thatin mite beng a thlen dawn loh chuan thil tha tih hi harsa kan ti thin em? tih hi zawhna holam mai mai mah ni se inzawh fo chi zinga mi a ni mai thei.
Heti tur em ni?
‘Oh Christmas Tree - How Wonderful Your Branches...’ tih hlate kan sukpui lawp lawp tak vang pawh a ni chuang lo. Changel kung pahnih phun a, mau nena hawlh zawm hnua Tlangsam leh Japanhlo par te, Zamzo leh Kumtluang par te nena cheimawi duhna thinlung nei reng tawhte hian a awm tih kan hriat tirh atangin, ‘Christmas tree’ hian kan thinlung a luah a, chumi rual chuan kan In chhung kan luhpui a, Biak In chhungah pawh kan luhpui ta zel mai! Tunhmaa kan mamawh ngai miah loh, ‘Christmas Card’ tel lovin ‘Mas biahthu kan inhlan hlei thei tawh lova. ‘Mas a lo thlena ei khawm tel tel leh kan ser ser ngaihtuah tlat nu leh pate hian fate kawr thar leh thil thar ngen hi khap reh tum lo law law ila a tha ang. Cheimawi chitin nena kan In leh Biak In bakah kan taksate kan cheimawi chung pawh hian, he ‘Mas hunah hian kan thinlung hi Lal piang lawina tlakin cheimawi a har a. Theihtawp chhuaha, A tana inpek tumna tak tak nen pawh a harsat tehlul nen, chutiang lam ngaihtuah miah lova tisa lama inpenparh chunga ‘Mas kan lawm thin hi chuan, ‘In halral thil hlan leh inthawinate hi ka hua a ni,’ titu thinlung hi kan tihlawm loh rin hi thil harsa a ni lo tawp.
‘Mas hi chu aw!
Sawi tur a va tam thin! Kan hriat hnu vek hi inhrilh inhrilh a ngai a. Sawi sawi a ngai thin. Krismas kan hman dan hi chu aw....!!!!!
