Mas Sipisial_03 : Amah Chu Mihring Leh Pathian A Ni  

Ropuina leh thiltihtheihna tinrengin a hual vel karah, Angel var leh Serafimte thlazar hnuaiah awm mai mai sela, A duhna lam lam hawiin thle kual sela, he khawvelah hian eng thil nge thleng a, eng angin nge hringfate hi kan awm tih ngaihtuah hauh lo mahse A thiam em em. A ropuinain chhe tê pawhin a chuai phah lovanga, van mipui leh Serafim ten Amah fak an chawlh phah hauh lovang; mahse...... Hmangaihna, khawngaihna leh lainatna tawp nei lo a nih miau avangin chutiang ngawta awm thei Aa ni tlat lo. Pathian, ropuina leh thiltihtheihna zawng zawng neitu, khawvel leh a chhunga awm zawng zawng neitu leh siamtu chu ‘mihring’ ah a lo chang a, ‘Mihring leh Pathian’ a nih a lo ngai ta!

Khawvel mihringte avanga Pathian meuh mihringa a lo chan dan chu sawi ngai lovin a hretute kan ni. Chu hun, mihringa a lo chan hun hriatreng nana kan hman mek a lo thlen hian kan rilru eng lamah nge a hawi ??

Zoramah chuan a boruak hrim hrim pawh a nuam. Mihring zawng zawng deuhthaw Kristian kan nih avangin he hun aia hun ropui hi Zoramah hun dang a awm lo. Mitin rilru chu engemaw zawng talin a thawveng a, khawlai a mawi a, Bazar a mawi a; Biak In pawh hun dang aiin a mawi thin. Kawm kara Japanhlo, ‘Wheat vai’ leh ‘Oil Cake’ ilo leina nei zo lote tan ‘vawk chaw’ a nih bak tangkaina a neih sawi tur awm lem lo, ‘hnawm hnawk’ ni ve satliah ngawt chenin par an chhuang a. Thlasik daifimin a chiah hnawn chip chiap tlangsam par, thlasik ni engin a chhun tlet ser serte pawh he hun tinuamtu pakhat a ni.

Chutiang hun a lo thlen chuan ‘Tah leh rumna leh buainain min nang vel’ tih hla thlan sak a ngai reng mai tih hre reng mah ila kan thinlung chuan Bethlehem lam a hawi lo thei lova, "Aw Bethlehem, ka ngai a che" tiin a kel rawl a kel rawlin, hrawk phiar tawng tawngin kan au ngei ngei a ngai thin.

Chutiang chu ni mahse kan thinlung chhungril tak tak hi chuan misualte tana lo piang, kan chhandamna atana lo piang a nihziate hi a chhut phak lova, a chhut hman hek lo. Thuamhnaw thar leh thil thar ngaihtuahnain kan thinlung a luah a, Kohhran mite pawh kan kan hman chhan lam ai hian kan hman dan that leh that loh te, a hmangtu kan tam leh tam loh lam te leh mite aia hman changkan loh bik hlauhnate hian kan thinlung a luah hneh zawk lo maw ? Khawtlang hruaitu lam pawhin he hun neitu hian engkim a hneh thei tih hre reng chungin ‘khap’ kan ngah lutuk avangin thinlung A lamah kan hawitir hman lo fo a ni em ??

Khawvel mawina, ropuina leh nawmnain kan thinlung a luah hneh em avangin kan fate thinlungah pawh Krismas awmzia tak tak kan tuh thei ta meuh lova. An duhzawng kan leisak a, hlim taka an awm chuan kan duhtawk a, ruih theih thil an tih lem lohva, sual kawng an zawh lem loh chuan kan lawm em em mai. Chu chuan a kum a telin kan Krismas hman dan a tidal a, kan fate chuan sakhaw hun pui a nih theihnghilhin khawvel thil taka nawm chenna hun emaw an ti zo tawh. Tunlai tleirawlte rilru ah chuan Krismas leh zu leh sa a inmil riau tawh a, an tan chuan Krismas leh "A chungnung ber lal ropui" tih aiin, "I need your love at Christmas" tih a inhmeh daih tawh zawk. He nun leh rilru hi engtinnge kan thaibo ang??

Harsatna leh hrehawmna tinreng, phunnawi hauh lova kraws ler thlenga tuartu pian-cham kan lawm lai hian kan thinlung hian ‘Ama’ lam hawi ngei se a va lawmawm dawn em! A tuarna nasa tak avang chauhin keini misual, ‘In thi tur a ni’ tih anchhiain a umzui reng mihringte hian chhandamna kan chang thei a; ‘Amah chu mihring leh Pathian a ni; Lal leh chhandamtu nih a fawm" tih loh theih a ni hlei nem!! Chutiang khawpa hmangaihna nasa chu tu’nge ropui ti lovang? Ropuina leh chawimawina zawng zawng pe chunga fak tlak a ni a, amah chauh chu kan fak tur pawh a ni.

Kan rin, a hnung kan zui, a rawng kan bawl Lal Isua hi Pathian, keimahni avanga mihringa lo chang, kan chhandamtu a ni tih hi mitinin hre chiang takzet ila chuan, thinlung leh tihtakzetin, -
‘Hlim takin Amah i fak ang u,
Min chhandam turin a inngaitlawm;
Ropui rawh se, aw, ropui ber rawh se,
Pathian kan hnena lo thleng hi.’
- kan ti thei ngei ang