DUHTHLANNA
Posted by Hriatpuia Pa
A pawi ngawt mai. Naupang fel a ni thin, tleirawl fel a ni chho zel, 'Ani hi chuan tleirawl sual pawh a nei lo,' tih thin a ni. Mahse, chutiang chu ni mah se tunah chutiang chu a ni tawh lo. A Matric pass kum Krismas lai khan, 'Mite pawhin an ti tho a lawm, vawikhat pian mana tih ve chhin zeuhte chu a pawi hlei nem,' tiin a ti ve chhin a, khami zan atang khan 'Zu' a la thlah leh ta lova, zu pawhin a thisen a chhuahsan ngai ta bik lo. Tunah chuan nupui fanau a nei duah tawh a, a fate pawh an nula tlangval ve uaih tawh. Mahse ani ber hian hma a sawn lo. Tun hmaa a thiam thilte chu a theihnghilh a ni lo, zu vang chuan hmang theiin a awm tawh lo. Zu a in loh chuan a khur tlat a, chakna a nei lo. Zu a in lahin a rui a, engmah a ti thei chuang si lo.
A naupan laia a kawm thin, Sikul pindan khata a thutpui thinte kha chu khi-ah an awm tawh. A then chuan sorkar hna lian tak an thawk a, a then chu Kohhran leh khawtlangah hruaitu, mi zahawm tak tak an ni. Ani ve chuan, 'He mite nen hian sikul kan kaiho thin,' tih bak sawi tur a nei ve lo, chu bak chu a fate hnena han insawitheihna tur a nei ve thlawt lo. A nupuiin sorkar hna thawk lo phei se chu.....
******************
A thi tawh! Naupang hmel tha tak, harhvãng em em, a rualpuite aia lehkha thiam thei thin a nih kha. Mi tam tak chuan a hming, 'Lalthafamkima' chu inhmeh an ti thin. A chhan chu a hmel tha a, a fel a, lehkha a thiam thei bawk a; a kuziak nalhziate kha a a sikul kai rualpuite sawi a nih thin kha.
Ni e, kha tleirawl hmeltha kha kum khat lekah a hmel a danglam vek a, a cher ruam a, a thú thet a, lehkha pawh a thiam thei tawh lo, Matric pawh a pass zo lo. A chhungte pawhin mak an ti.
A thih hma khan a thian thenkhatte bulah chuan khatia a awm chhan kha a sawi an ti. Matric an zir kum khan a thian chhar thar - mikhual lehnghal, pahnihte nen khan an inkawmngeih fal a. Pawisa an nei a, an fel bawk si, kawm an nuam em em mai. Ni khat chu - ruihhlova an inchiunaah an hruai ve. 'I duh ve em?' an ti, a duh lo. Mahse, an ban an tawn a, han invit a, an invih zawha sikret an han fawp vang vang a, an kut an han nuai set sette kha 'pa' riauvin a hre tlat a. 'Ti ve chhin rawh, i ti hlen chuang nang, keini pawhin a awm loh chuan kan nghei thei reng a lawm, engmah a ni lo; a nuam a nia,' an tih khan, 'Aih' ti se a fel tur; a ti si lo. A invit ve chhin a, a nuam a ti. A zawngchhang a, a tawpah chuan a thiante aiin chu damdawi chu a ngaina ta a, a chhungte leh khawvel thildang zawng zawng ai pawhin a mamawh tawh zawk a; a thih phah ta. A thih chhana 'accident' tih kha chu 'tih mai mai' tih mi zawng zawngin an hai lo.
********************
'Mite pawhin an ti tho, ka tih loh avangin engmah ka ni bik lo. A ti nasa apiangin lawm an hlawh zawk niin a lang tho,' tia, inthiam taka a hlawh ni lo thla tin a lak ve ziah thin khan tunah chuan a thing let ve tan ta.
In leh lo zahpuiawm loh tak a nei, lirthei pawh a chhuak thar ber ber a khalh. A fate pawhin sikul tha atangin tha takin an zir chhuak. A buaithlak lai ber chu - a fate chuan an zirnaah chuan hringnun zirlai an zir tel tlat lo. A nupui pawhin thawmhnaw chhuak thar ber ber a inbel a, rimtui leh tlereuh changkang chitin a nei, a hmui hmai leh a sam pawh 'world class' a ni hial ang chu; mahse a nalhna leh mawinate chu a pasal chuan a pumbilh tlat lo; a driver-te nen miin an sawi leh thin. Thudik a nih leh nih loh tumahin an hrilh duh lova, ani lahin a tak a nih leh nih loh a fiah thei si lo.
A fapa chuan lehkha a thiam thei a, zirna in thaah a kal bawk a, a zir zawh ve leh hna a hmu nghal. Sum leh pai thawhchhuahah a buai lo, a thawhchhuah sa sum leh pai hmanna lamah a buai a ni. A thawhchhuah zozaite chuan zahawmna a pe lova, hlimna a pe hek lo. Vawi tam tak a staff-te nuihzat khawpin a 'rui' a, a ruih vangin vawi tam tak a chesual tawh a, rui chunga motor a khalh avanga a chetsualnaah a malpui ruh a titliak tawh. Chuti chung chuan zu leh nula vanga mi sawi a la reh thei lo.
Ni, sum leh pai ngah hi zahawmna niin a hria a, zahawmna chu In leh lo leh lirtheiah a awm emaw a lo ti thin; dik taka thawhchhuah a nih loh chuan zahawmna thlawhbotirna hmanraw tangkai ber a ni tih a hre tawh. Mahse a hriat chhuah chuan a tlai lutuk tawh. A va hahthlak em!!
****************
Mosia chuan hun rei lo tê atana sual nawmna hlimpui ai chuan Pathian mite nena tihduhdah tuar a thlang zawk a. Krista an hmuhsitna chu Aigupta ram rote ai chuan sum ropui zawkah a ruat.
Daniela leh a thiante chu lal chaw leh uain in thin te chuan an intihbawlhhlawh duh lo tlat a, chutiang ei leh in thin te ai chuan an hmel a lang mawi zawk mah a! A rawng an bawl thin, an Pathian chuan meipui lak ata chhanchhuak dawn lo mah se Nebukadnezzara pathian chu chibai an bûk duh lo tlat a. Meia paih luh an nih pawhin an taksa chungah meiin thiltihtheihna a nei lova, an sam pawh a kang kir lova, mei rim pawh an nam lo!!
Khawvel mithmuha thiamlohna pakhat mah nei lo chungin Ruthi chuan a pasala nu chu a kalsan duh lova, a vuan tlat a; Isua Krista, khawvel chhandamtu thlahtute zingah chhiar tel a nih phah ta.
Ringtute chuan -
Ram zau taka lal bera thut ai chuan,
Sual thunun ka nih si chuan;
Isua neih ka duh zawk, thil dang zawng aiin,
Khawvel zawng ai pawhin.
an ti mai!!
