We look before and after,
And pine for what is not;
Our sincerest laughter
With some pain is fraught;
Our sweetest songs are those that tell of saddest thought.
- To a Skylark by Percy Bysshe Shelley
Mihring nunah hian nun hlui leh hun liam hnu ngaih hian ban ni a nei thei dawn lova. Kan ngaih ber ber leh kan hriat rei ber ber hi hun nuam leh hlimawm ber ber a ni kher lova. Kan hringnuna kan ngaihtuahna lairil ber luahtu leh min chhun vawng vawng thintu chu kan hun tawna lungchhiatthlak lai takte kha a ni chawk thin.
Kum hlui a liam a, kum a thar a. Chuti kum tin chu a ni chungin, hetianga hun hlui leh thar inthlak lai vel hian lung a leng duh a. Hun thar thlir ai mahin hun hlui thlira hun hman a awl a, nun hlui ngaiin, 'Hman lai,' kan ti vawng vawng fo a nih hi.
A mak ngawt mai. Hlim taka kan nuih rawih rawih laite kha mitthlaah a rawn lang a. Lenrual hluite hmel leh hlimthla a rawn inlar zut zut a. Chutianga hlim lai leh lawm laiin kan rilru a luahna chhan chu kan hlim laia kan hlimpui tu emaw berin min awmbosan vang emaw, rihsangmual min liamsan vang emaw a lo ni chawk a. Kan hlim lai min hriatchhuahtirtu chu thil hlimawm loh zawk kan tawn vang a ni chawk mai!
Mi tinin changkan chakin hmalam kan thlir a. Hun tharah, nun thar hmangin, thil thar tiin, kawng thar kan zawh a. Kan tum ram thlenga hmasawnna ke pen ruala ke pen a, nun nuam leh tha zawk chena kan awm hun a lo thlen a; kan hlawhtlinna par kan tlan hnu pawhin kan nun hlui bawk hi thinlungah a lo lang nawn leh a. Harsa taka hun kan hman a, kawla ni chhuak chhiara, thlan tui luang zawih zawiha hna kan thawh laite chu mumang aia chiang zawkin kan mitthlaah hian a inlar nawn lo thei lova. Changkanna avanga thian kawm hman lo leka kan buai tak hnu phei hi chuan thiante nena engthawl taka kan nuihho laite kha 'Kumhlui' tingaihawmtu a lo ni a, a ni zel dawn a nih hi!
Kum sarih lai a liam leh tawh. Mi pakhat a lo lut a, 'I thianpa Mazaa kha a boral a..' a rawn ti a! Ka unaupa a boral ta riakah ka ruat a, ka bing mup mup a. An Inah, amah thlahna hun kan hmante khan, thu sawi ve turin min ti a, mahse ka sawi thei lo. Ka ngaih thu, ka ui thu, kan inkawm dan, thildang pawh, sawi tur ka ngah vei nen, sawi thei miah lovin ka han awm a nih kha!
High School kai lai atanga inhria kan ni a. Ka college kal lam, ka kawng kal lai min lo pawtding a, Beat group din an tum thu leh khuang vaw tura min ruat thu min hrilh a. Beat group chu kan din ta a, a hmingah 'Megahertz' kan sa a. Kan ri tlut tlut a. Kolasib MZI ten District huap Beat Contest an buatsaihah khan kan tel a, lawmman pawh kan la ve hial a. Kolasib-a Drixian Empire an rawn concert-te pawh khan 'Opening act' te pawh kan neiho a nih kha. Kan han zai a. A bass guitar leh drums inlalawn nalh lai kan han thlen chiahte khan min rawn melh a, kan insiai sak a, kan lung a awi dun em em thin kha a nia..
Kan khaw footballer, foreign-a hlawhtling taka inkhel zo, India ram club lian zawm tur kan hmuak a. Kolasib-a Journalist pawl ziaktu lian ka nih lai a nih vang maia thu sawi tura min ruat tuma thu ka sawi dawn lai, min ko tep tiha ka phone rawn ri kha aw.. 'A-Tawia kha tun maiah a boral a. Khawsikpui a ni a, Damdawiin an thlenpui hman lo a ni awm e..' a rawn ti a.
Naupan zual lai atanga inkawm, ka 'kid' dik tak thin. Robin Hood-a lema ka chan apianga Little John lema ka chantir ve thin, Nunzira, A-Tawia kan tih khan min boralsan a nih chu!
Kawm thlang luikawr kan zawh thla a, kan swimming pool neih chhun, dil te deuh, kan khuah belha kan chen thinnaa kan pahnih chauhva kan chendun thin laite, ngunhnam lem ka suihsak a, khauchhim hrui hmanga a kawnga ka veh-beh saka, inhmeh inti taka a tlan-kawi lai velte kha ka mitthlaah a rawn lang a.
He khawvel inher zelin kumthar a rawn herchhuahpui apiang hian kumhlui a herliampui ve thung thin a. Chu kumhlui herliam zel chuan nunhlui a herliampui zel bawk a. Kan duh emaw, duh lo emaw he hun hi kan chelhding thei lova, kan tlansan thei bawk lova. A hun takah, tumah rawn lovin, a ngai tein a kal mai thin si a, kan thu a ni si lo.
Thihna kut vawtin a man avanga kan then takte aia tam hi he khuarel avang hian kan then bawk a. Hmana kan nuihpuite khan khiang min awihsan a, mual za kar tam danah hrai an chawi a. A thente phei chu kan hriat hnu an ni tih pawh kan hriat tawh loh hial khawpa kan nun atanga hlaah an tawlhsawn a...
Aw khaw'nge lenrual hlui zawngte kha?
Hmanah chuan nauang nui za thinin,
Hlim leh lawmin tlaitla eng hnuaiah,
Duhthuleng tinkim kan sam za thin..
Mahse, khuarei an chang leh si!
Hei hi maw lo ni le lunglen!?
Mahriakte'n luaithlipui nul zelin,
Hlimlai ni kha ka tahpui ta'ng e..
He kumthar pawh hian nakin lawka kumhlui ni leh mai tur a herchhuahpui zel a. Nunhlui ngaihawm ni leh mai tur nun hi ni tinin kan vuiliam zel a ni.
