Ka Ngai Che  

Ka Ngai Che.

Teh tawp a!

Thu puarpawleng mai mai erawh a ni bik lo.

A chhan chu eng vang pawh a ni thei ang bawkin eng hunah pawh a inngaih theih tih hi a chiang khawp mai. A chhan chu mi zik nuaih nuaihna karah pawh ka ngai tlat zel mai che!

'Chhungkaw chaw eikhawm' an ti a. Makpa 'hot' zualte chu an lam suau suau tawh a. Buaina leh harsatna siam zawngin an awm lo bawk a, tumahin an sawisel lem lo.

Krismas a liam tawh a, kum pawh a thar leh tawh. Hetih lai hun velah hian hla ngaihthlak tur a tam lo a ni ang, makpaho chuan 'Thanglunghnemi zai' chu an zaitir char char a, thlan tla phungin a then chu an lam tawh. An ri chel chul a. Kawmchar lamah a thenin ar an lo puah a, kawt zawl zau lamah nuho an thu bial a; a thenin bai an chawk a, a thenin kuhvahring an kheh a. Chutianga zi nuaih nuaih karah chuan ka'n ngai tlat pek che a nih chu!

Theih chu ni se ngaih loh hram che ka duh. Ka zak deuh tlat! Nang ngaih hi a zahthlak ka tihna lam a ni lo, a ngaitu che ka ni tlat mai leh ka ngaih hun che mak thei lutuk hi a zahthlak ka ti.

I laka beisei neih vanga ngai che ka ni lo. Ka laka i awmdan vanga ngai che pawh ka ni chuang lo. Ka ngai tawp che a. Engmah phut ka nei lova, engmah chhan dang pawh a awm chuang lo. Nangmaha nangmah kha ka ngai tawp mai a ni.

Ka kiangah awm reng langin, nilengin awm la; ka inchei nalh lo turte min veng la! Mahse chu chu ka phut lo, ka phut miah lo. Ka duhthusam a ni zawk maithei a, chu pawh chu a ni chiah lovang, ka suangtuahna kal vel mai mai a ni ang.

Mak em em mai chu - Sap sipai bang James Blunt-a'n Wise Men emaw, You're Beautiful emaw a sak pawhin ka ngai tho che a, Pastor nupui Lalruotmawi a zai pawhin ka ngai tho che a; a kal laklawh chuan Journalism zirlai Mimi Renthlei pawh zai mahse i ngaihawm tho tho hi a ni!

Ka inpuang ta laklawh bawk a, ka ngaihzia che hi ka'n vairam zin haw thukhawchang sawi hmiah hmiah mai teh ang! Nang ngaih hi sual ni ta se, ka tan chuan hremhmun lo chu hmabak dang a awm thei lo hulhual dawn a, a lo ni ta a nih pawhin ka chan turah chuan, lungawi lo chung chung pawhin chu sual chu ka paihthla thei si lovanga, ka liampui a ngai ngei ang.

Hlim taka i awm hian ka lo lawm ve ringawt a. I chanchin ka hriat loh apiangin ka thaw a ipik a. I hah apiangin ka thawk a lo rang ve zel a, i chauh thu ka hriat apiangin ka hringnun hi a lo hnim ve ruai ruai bawk thin!

He thil, nang ngaih vanga lunglenna, min kiansan khat em em mai hi engtia tih tur nge ni ang? Ka dam chhung zawng hian mi zui zel dawn em ni? He hringnun ka hman chhung hian min tirethei reng ringawt dawn em ni?

Ka hre lo. Nang pawhin i hre lo. I hre miah lo tiraw?

Mahse, engkim mai hian nang min ngaihtir a. Ral khat hla deuhva tlang lo lang ruihte hian ka lung a tileng em em a. A chhan ka lo hre ngai lova, ka lo chhut ngai bawk lova. Zana thla a en a, chhum awm pheuh pheuh kara a kal delh delhte hian ka lung a leng em em thin a. Chhawrthlapui kha emaw ka lung tilengtu ka ti thin. A lo ni lo! Ka lunglenna hi nang ngaih vang a lo ni!

Zantiang chhawrthla a lo en chang hian,
Nang ngaih a zual thin e.
Thal romei a zam chiai e,
Saw raltiang tlang cham dul nen,
Lung min len e, Awmkhua a har ngei;
Nang ngaih a zual thin ngei e!

……. Ka Ngai che!