Tawi Leh Nawi  

Posted by Hriatpuia Pa

Ang Em?
Pathian thu hi sawi tam tur nge awih tam tur ni ang? Sawi tam apiang hian an awih tam ang em?

Pathian thu hi chhiar tam tur a ni a, ringtu chuan sawi pawh a sawi tam lo thei lo. Chutih lai chuan kan ram Kristian tam ber hian kan Pathian thu hriat zatve hi kan awih meuh ang em?

Pathianni chawhma, chawhnu leh zan; thalai tan Thawhtanni zan, Hmeichhe pualin Thawhlehni zan; chumi hnuah Nilaini zan leh Inrinni zan kan inkhawm leh thin. Kar khat chhungin Inkhawm vawi 7 kan nei thin tihna a nih chu.

Tu mahin Biak Inah thil sual kan ti ngai lova, kan that theihtawp chhuahin hun kan hmang a. Thusawituin thu chhia leh zawm tlak loh a sawi ngai lova, mahni Ina tawngtai tlem tak pawhin ngei ngeiin tawngtaiin Pathian kan pawl thin; a va lawmawm em!

Chutih lai chuan Biak Ina kan awmdan lo zawk hi Pathian leh midang hian kan nun teh nan an lo hmang zawk em tih hi zawhna pawimawh a ni maithei.

Kan Pathian thu awih leh awih loh hi Biak Ina kan awmdan aiin kan ni tin hnathawh atangin min teh ta se engnge kan an ang? Biak Ina i tawngtai rei theih lam aiin, i contract hna thawhah khan i Pathian thu awih leh awih loh teh ta se i tling zo ang em? Pulpit tlanga i mittui tla zat ai khan midangte chunga that i chhuah tawh zat khan miin i Pathian thu awih leh awih loh teh ta zawk se engnge a chhanna ni ang? Biak In lamtuala i ban vai dan aiin i thenawm khawvengte chunga i ban vai dan kha i Pathian thu awih leh awih loh teh nana hman tur ni se i duh zawk ang em? 


Coca-Cola Fakna

Nikum kum tawp lama Coca-cola in an thilsiam fakna an tihchhuah pakhat khan rilru a khawih ngawt mai.

Kha faknaah khan, "Mi tam takin kan chenna khawvel boruak chhe zel hi an ngaihpawimawh loh laiin, ni tin thing nuai 30 phun a ni thin a. Mi thenkhatin khawvel hi a tawp tawh mai dawna an rin laiin kum tinin mi nuai 50 chuangin kumthar duhsakna an inthawn bawk a. Thu ho te teah mi thenkhat an inhnialbuai laiin, mi maktaduai tam tak chuan ni tin Coca-cola an inleisak thung a ni," an ti a!

Ni, a chang chuan kan khawtlang nun te, kan politics khelh dan te, kan khawvel boruak te, kan Kohhran kalphung te thleng pawh hian beisei tur awm tawh mang lovin kan hre hial thin. A bik takin Mizoramah phei chuan kan politics kalphung leh kan zirna kalphung te hian sawi leh sel a hlawh nasa a, mi tam tak kan beidawng a ni. Chutiang chu ni mahse kan sawi loh lamah hian beiseina nung min neihtirtu mai pawh ni lo, hlimna leh lawmna min thlentu hi a lo awm ve reng zel a lo ni.

Thalai tam takin nu leh pa thu awih lovin an nun an chen a, hun lo takin min boralsan mek a. Sualna hrang hrang lo pung zel avangin kan khawtlang a muang lova, nu leh pa thinthi a mut loh chang a va tam em! Mahse, hetiang a nih mek lai hian heti zawng hian ngaihtuah ve teh ang - Kan thalaite zingah hian Missionary-a chhuah duhna thinlung nei an la awm reng a, kum tin kal chhuak kan la nei reng! Thawhtan zan apiangin he Zoramah hian thalai sang tam tak Biak Inah an inkhawm a, Krista leh  A Kohhran thuthlung chu rinawm takin an la vuan zel a sin!

Kum tin thalai tam takin khawvel sualna sang zel avangin an zirlai zir thei lovin chawlhsan mahse, kum tinin thalai tam tak an Graduate a. Kan Kohhran ringawt pawhin Pathian thu zir duh thalai, lak sen loh a la nei ziah a sin!

Sawi tur a la tam thei ang. Beidawn mai tur a ni lo ve. Engkimah lawmthu hril tel zelin, Krista leh A ram tan i thawk zel ang u.

11 comments

Pu Zaia, i thuziak hi a tha hle mai. 'Kan inkhawm loh lai nun hmangin miin min teh..' tih phei khi chu ka duh zual a. Hetah hian, inkhawm reng si-a nuna langchhuak chuang si lo hi awmzia a awm loh zia a lang chiang hlein ka hria.

A thim zawngin kan thlir thin, beisei tur a vang duh reng a. I ziah ang khian, kan thil thlir dan ki hi thlak ta ila, a ĂȘng zawng hlira thlirin beiseina nei tlat ila, a va nuam dawn em!

I thil thlir dan a dik a nih chuan nangmah i dik a ni mai, an ti thin a chutiang mi chu i ni e. Kumthar chibai le.

Inhmuh ka duh tehlul nen kan inhmu ta lo Next-ah ni mai rawh se. I post a hlu hle mai ka chhiar chhuak dap e.

TSA, i tilawmawm thin e. A eng zawng hlira thlir ngawt tur tihna pawh a ni chuang lova, beidawnga thu mai tur kan nih lohzia inhriattir hi a ngai ve niin ka hria a ni.

Ropuia, Kumthar chibai le. Nia, next ah a nih mai loh chuan .. :D

Blog thar neih manah ka rawn fang kual lawk. Ka lo la lenluhna tur tha tak tak a tam hle mai.

A tawi a, a nawi lo e ka U Zaite. Tha thuai2 khawp mai. Veng thenkhatah chuan Ningani zan hian Ramthar inkhawm a la awm zui mawle. Kan thianpa pakhatin, "Nupui pasal tur chu Biak Inah nilovin Picnic le Party naah zawn zawk tur. Biak Inah chuan mitin kan tha vek a, Picnic leh Party naah chuan a tha tak2 ho chu kal ve mah se an nawi ve ngai lo" a tih kha ka hrechhuak uai uai mai. Biak In pel phak Ringtu nun kan neih hi chu a ngai a ni. Tunlaia ka vei, ka ziah thiam si loh i rawn ziak chhuak.

Ziak tha thei hle mai..Pu Zaia nge nge..

"Chutih lai chuan Biak Ina kan awmdan lo zawk hi Pathian leh midang hian kan nun teh nan an lo hmang zawk em tih hi zawhna pawimawh a ni maithei.

Kan Pathian thu awih leh awih loh hi Biak Ina kan awmdan aiin kan ni tin hnathawh atangin min teh ta se engnge kan an ang? Biak Ina i tawngtai rei theih lam aiin, i contract hna thawhah khan i Pathian thu awih leh awih loh teh ta se i tling zo ang em? Pulpit tlanga i mittui tla zat ai khan midangte chunga that i chhuah tawh zat khan miin i Pathian thu awih leh awih loh teh ta zawk se engnge a chhanna ni ang? Biak In lamtuala i ban vai dan aiin i thenawm khawvengte chunga i ban vai dan kha i Pathian thu awih leh awih loh teh nana hman tur ni se i duh zawk ang em?"

Zaite, i va han sawi dik tha dap dap em!

Sunday tuka kan incheina aiin kan hnathawhnaa kan rinawm leh rinawm lohah hian min teh ta se a va tha dawn tak ve le.

Van tawi fel thlip thlep ve.. ziak tha bawk si. COca cola fakna hi ka en ve reng sia, hetiang thu ropui tak erawh sawi tur ka hre ve miah lo mawle :)

lr hlonchhing, i lo leng a, ka lawm e. Blog i nei ve ta tih ka hriatin ka lawm lehzual. Lo leng ziah ang che aw?

Gemini, a nia sin. Ka inrin loh laiin i lo comment leh thin! :D

RB, haha, ka blog lam lamah i lo thleng phei a ni maw? I chhiar chhuah pawh ka ring chiah love.. lolz

Keimah, nia, thu dik awm sa hi ziak ila, keini ang duang tan chuan a awlsam ber. Thupui hlapui han vai vung turin heti mai kan nih si hi! :D

Caribou, nia. Lo leng ziah rawh.

Er, hehe, i ti lawmawm e. I lo leng ve teh tlat chu ka lawm e.

A thim lam thlir laklawh hi chuan bei a dawng lek2 thin a. A eng lam thlirnain i titawp a, chhiar chhuah a nuam sawt e.

Post a Comment

Facebook

Keimah

Visitor Since Feb 09

Khawi lam atangin nge?

online

Followers

Lairil

Mihring ngaihtuahna LAIRIL hi mihringin duhnate, awhna te, hlauhna te, thlamuanna te, hlimna te, lawmna te, lungngaihna te, thinrimna te, chapona te, duhamna te, itsikna te, mahni hmasialna te, hmangaihna te, duhsakna te, engkim mai; mihringa mihrinna siamtu leh neitu a nih avangin a va pawimawh tehlul em!

Nuihtirtu che kha I thinlung a ni a. I tah theihna te, thil mawi leh mawi lo i thliar thiamna te pawh kha thildang a ni chuang lova; khaw lum leh khaw vawt, hlauhawm leh muanawm, hrehawm leh nuam I thliar hran theihna pawh chuti tho.

A chang chuan kan hmuh leh hriat ngeite pawh hi dawt te, a lem te a lo ni thei a! He thinlungin a ngaihtuah hi a lem a ni thei ang em le? Mitin a hmuh a, bengin a hriat avanga duhna leh thinlung LAIRILin a duhna hi a inzawm ang em le? A hrang ni ta se khawii chu nge dik zawk ang? Khawii chu nge tha zawk a, tlo zawk ang aw?

Kan mita kan hmuh leh benga kan hriat te, rilrua kan ngaihtuahna te zinga a tam zawk hi he kan mihrin chhung hian kan theihnghilh leh thin em? Kan theihnghilh tawhte hi kan hrechhuak leh thin em? Thinlung hi bum hmang, chhe lailet der em ni? (Bible – Jeremia 17:9)

Recent Comments

Grab This Widget

Twitter Updates

    follow me on Twitter