Rem A Tih Chuan  

Posted by Hriatpuia Pa

He kum tharah hian eng thu nge ka'n ziah hmasak ber ang aw?

TV ka thlir a, Brazil-ah tuilian vangin mi 60 chuang an thi tawh tih ka hre chawpchilh nghal a. India ramah rel chetsual vangin mi 2 an thi tih a rawn intar chhunzawm nghal bawk. Zoram lam thuthar pawh a dang chuang lo. Zualko tharlam a awm reng, kum 17, kum 32, kum 45, kum 72, vawiina vui tur tih intar a awm reng mai. He khawvela piang chhuakte hi chu thi tur kan lo ni ngei e!

Krismas tuk a ni a, ruai kan theh mup mup a. Ka chaw ei kham, kam pawh ka la thuah fel hmain Kolasib Hospital-a CMO hlui Pu Hminga'n, 'Lalhmingliana a thih kha i hre tawh em? tun maiah khan a boral a ni awm e,' a ti a; mak ka ti kher mai! A nat thu ka hre lova, damdawiina a awm phei chu a ka hre lo leh zual.

Hman a ni ve tawh ang chu - kum 12/13 vel lek kan nih lai khan, kan thianpa pakhat chuan, 'Engtikah emaw chuan kan la tar ve ang a, kan tar hunah engtinnge kan awm ang le?' a ti a; dawn thui hi ka ti khawp mai. Mahse, a sawitu chu tunah chuan khawvelah a awm tawh lo, a tar hmain thlanmualah phum a ni. Kan hma lam hun hi kan va hre lo em!!

Kan dam reng dawn lova, kan la thi dawn tih hre rengin, 'Kum za dam tur angin hna thawk la, naktuka thi turin inpeih rawh' tih thute chu kan pindan bangah te tar thin mah ila, thi mai tura inbuatsaih leh inpeih hi chu kan tam lem lo niin a lang. Kan hma lam hun hi, keimahni duh dan leh remhriat danin kan thlirin kan ruahman ve a. Mahse a hlawhtlinna leh a lo thlen leh thlen loh chu kan thu a ni lo tawp tih hi kan ngaihtuahna chhungrilah hian riak reng mahse, kan rilruah thuneitu hnena hlan lova mahni chakna hmachhuana thlirna leh ruahmanna neih hi a awl ngawt mai.

'Kan dam ang a, nakkumah chuan chutiang chu kan ti ang a. Tuna hetiang mite hi chutih hunah chuan chutiang chu an ni tawh ang a, keini pawh chutih hunah chuan kan chuti ve tawh ang..' tiin hmabak kan thlir a, beiseina leh ruahmanna kan siam thin.

Khawvel hi a tawp mai dawn niin an sawi a, 'Kan naupan lai pawhin a tawp dawn an ti tawh a, tun thlengin a la tawp lo,' kan ti fiamthu thin. Kan chenna khawvel hi chhiain boral lo mahse, a chhunga cheng mihringte hian kan tlin lo zawk zel a nih hi!

Rap In, a chung di, a bang leh a chhuat dap kha kan duh tawh lova, kum tina In thawm that ngaia chen kan peih tawh lo. Kum engemawzat daih turin In kan sa a, rinawm tak leh tlo tak, fur leh thala nghing lo tur, furpui tam tak tuar zo tur kan sa a, kan chhawng er ur a. Kan In sakte chuan kan beisei a phak a, kan ruahman lawk aia rei daih tate pawh a awm thin. Mahse a satute bawk hian kan daih rei leh lova, kan thawhrim rah hi kan thihsan leh mai mai thin tih hi thudik a ni. Thudik a va ni tehlul em!!

Engkimah hian Bible hian min lo daikhalh a, kan la ngaihtuah turte, kan la hmuh turte hi a lo sawi lawk dim diam thin. "Tunah ngai teh u khai, nangni, 'Vawiinah emaw, naktukah emaw, chu mi khawpuiah chuan ka kal ang a, chutah chuan kum khat kan va thang ang a, kan sumdawng ang a, hlawkna kan hmu ang,' titute u. Naktukah chuan engnge lo awm dawn in hre si lo. In nunna chu engnge ni? Chhum rei lo te lo lang a, ral leh ta mai thin ang hi in ni si a. Chutichuan, 'Lalpa'n rem a tih chuan kan dam ang a, chu mi kha mi kan ti ang,' in ti tur hi a ni. Nimahsela, in uannate hi in chhuang zawk si a, chutiang chhuanna zawng zawng chu sual a ni." [Jakoba 4:13 - 17] a tih kha!

He kum tharah hian ruahmanna tam tak kan nei a ni thei a, hmabak thlirin ring kan fan mek ngei ang. Eng pawh ti ila, eng pawh ruahman ila, eng pawh tum ila; engkim siamtu LALPA hriatpui ni sela. Kan nunna chungah hian thu kan nei lova, naktukah chuan engnge lo thleng dawn kan hriat loh avangin, 'LALPA'n rem a tih chuan,' ti chung zelin kum thar bul i tan teh ang.

14 comments

Kumthar chubai Nia hei keini te tak ngial poh hi kan naupanlai te kha hmanni mai kha emaw tih tur a ni a tunah chuan half century kan kai ve trep tawh mai a ni a A chang chuan hun an kal duak 2 mai te hian ka thin te an ti rim rum rum zel mai a kan trhian trhen khat lah in mual min liam san mek zel vei bawk trhin nen .han ngaihtuah chian chang te hi chuan HUN awm te hi ka haw lek 2 zel HUN hi awm ta lo se chuan kan tar lo mai tur te ka ti trhin .Trawngkhawlo ni suh P-thian zar ah tun atrang a kum sawm trha te kan hman ral leh chuan TAR tih trawng kam a lam kan ni mai tawh hmel vel tawh si a taksa lam chu lo chuai in lo Tar ta poh ni se rilru lam lah hi a la Tleirawl AT mai si a a sawi tam lo mai ang hnuk a ulh mai dawn

Well spun yarns!

'Lord's willing' in the Highest! As two pieces of wood, floating on the ocean —come together at one time, and are again separated. Such is the union of living creatures on this earth —but through and in Christ, we have hope, a sure hope of next world. For which we are born to inherit and to rule there, with Jesus Christ!

Kumthar Chibai phawt.


Chhiar a va han man hla tak em aw...
A dik chiah alawm Pathian tih hi finna bul a ni tih pawh ka hre reng mahse ka tih peih lo thin chang atam khawp mai keimah ngei pawh hian.

Ku Zohmingtea : Lawmawm thin. Min lo visit ziah a. I thil pawh kha, ka theihnghilh miah lo a nia...

Chawnghilh : Hehe, mi hi i fak thiam thin. Han bawl phawnna tur thu leh hla lam hi ka tlakchham lam a ni ziah mai tih i hre reng sia, 'Well spun yarns' chu ka thuziah hian a phu thlawss lo..

Irene: Unaunu, Kumthar Chibai le. Mail lamah min rawn be zui anga, i chhungte pawh 'min lo biak rawh' i ti dawn maw ka tia... :) Hriat reng hi kan ti lo leh thin a, mahse 'Thil tha tih tur hriaa ti lo chu atan sual a ni,' tihte pawh a inziak a, sual tak hi kan ni awm e!!

Ni e, engkim mai hi Rem a tih chuan tiha in nghat vek mai a ni, Jakoba 4:13 hi ka nu chang duh ber a ni.

"Kan dam reng chuan kan la thi dawn tih hre rengin"... a mak thin euh ouh e mai a...

Zaite i mail id kha min la pe lo contact che ka duh ania. Feb thla hian Kolasib ka rawn kal ngai a.

A lomom e i hriat reng chuan mahse hriatreng bak ah khan tih hlawhtlin na in a zui em ang chu maw Hminga te lai 2 in mual min liam san ta mai chu ka u khawp mai

Varte: I nu chang duh ber chu ka lo duh tlaikhawhnu ve a nih awm chu.

Hehe, ka siamtha nghal e. Zoawi chu, ka yes a, ka pe ta bawk (4 Jan)

Irene: Ka mail chu (zaia@kolasib.com leh zaitea@gmail.com) min han contact ngei teh.

Hminga: Ku Zohmingtea, ka lo ti ngei ang.

Amen ka pe e hotupa! Ro te hi kan han relin ruahmanna te hi kan han duang lawk ve thin tak na a, kan lo va thu lo tehlul em! Ama kuta innghat thiam apiangte hi mi fing chu an lo ni mai e!

Kum thar chibai le... nang zawng a bul tanna a dik leh bik ta thlup mai. Han tum ve chhin teh ang khai :-)

Kumthar chibai! Ni e, kan nunna chungah hian thu kan nei viau emaw te hi kan lo ti palh leh thin a. Kan thu lo nasa mai si.

Kumthar chibai Hotupa...

great post!!

engnge chanchin zel

Faka : Hotupa, welcome back. A nuam leh ta e. I comment-in a'n zui hi chuan a ziaktu nih hi a nuam thin!

VaiVa: Haha! Chutia mi hotupa? Kumthar chibai le.

Mesjay: Hotunu, kumthar chibai le. I sawi dik chiah.

Mnowluck: Kumthar chibai le. Thanks.

Hmingtea: Tha zel e.. i thil pawh ka la theihnghilh love

Post a Comment

Facebook

Keimah

Visitor Since Feb 09

Khawi lam atangin nge?

online

Followers

Lairil

Mihring ngaihtuahna LAIRIL hi mihringin duhnate, awhna te, hlauhna te, thlamuanna te, hlimna te, lawmna te, lungngaihna te, thinrimna te, chapona te, duhamna te, itsikna te, mahni hmasialna te, hmangaihna te, duhsakna te, engkim mai; mihringa mihrinna siamtu leh neitu a nih avangin a va pawimawh tehlul em!

Nuihtirtu che kha I thinlung a ni a. I tah theihna te, thil mawi leh mawi lo i thliar thiamna te pawh kha thildang a ni chuang lova; khaw lum leh khaw vawt, hlauhawm leh muanawm, hrehawm leh nuam I thliar hran theihna pawh chuti tho.

A chang chuan kan hmuh leh hriat ngeite pawh hi dawt te, a lem te a lo ni thei a! He thinlungin a ngaihtuah hi a lem a ni thei ang em le? Mitin a hmuh a, bengin a hriat avanga duhna leh thinlung LAIRILin a duhna hi a inzawm ang em le? A hrang ni ta se khawii chu nge dik zawk ang? Khawii chu nge tha zawk a, tlo zawk ang aw?

Kan mita kan hmuh leh benga kan hriat te, rilrua kan ngaihtuahna te zinga a tam zawk hi he kan mihrin chhung hian kan theihnghilh leh thin em? Kan theihnghilh tawhte hi kan hrechhuak leh thin em? Thinlung hi bum hmang, chhe lailet der em ni? (Bible – Jeremia 17:9)

Recent Comments

Grab This Widget

Twitter Updates

    follow me on Twitter