Hapta Hapta, a ninawm . . .
Posted by Zaia
(Tun lai chu mahni tawkah ka buai ve hle mai a, thu pawh ka ziak thei meuh lo. Hei, kumin Faina Hapta puala Kolasib chanchinbu pakhatin thuziak tura min ngenna tihlawhtlinga ka ziahsak hi update loh aiah ka'n post ang e. Hetia ka'n tih duahna chhan hi 'intih engemawna' lamah min ngaihsak lo ula. Mahni tawka theihtawp chhuaha thuziak ni lo, mi phut luiha ziah ang chi han post hi, ka blog lo tlawh thinte hnena chhawpchhuah ka inthlahrun vang zawk a ni.)
Kum engzat nge Faina Hapta hi kan hman tak aw? Zoram pumah Faina Hapta-a lawmman atan te, a hawnna leh kharna inkhawm senso atan te hian pawisa engzat nge kan hman tawh ang? Hetianga Faina Hapta kan hman a, a hapta chhunga Sorkar Office-te ni khat tal dawr mumal theih mang lova an awm ziahte hi a man pe dawn ta ila, engzat nge ni ang? Tichuan, chutianga sum leh pai leh tha leh zung kan sen hnuah chuan eng ang faina nge he Zoram hian a hmuh a, eng chen nge he Faina Hapta hian awmzia a neih?
Faina Hapta kan hawng a, mipuite rilruah faina thinlung a inhawng a. Khawtlang hruaitute’n faina an ngaipawimawh thar a, Hotel leh Restaurant-ten fai an ngaina thar a; Sikul leh Office-te pawhin fai turin hma an la thar leh a. Veng tinah fai hnatlang kan nei a, kan thawk sup sup a, kan fai vék vúk a. Hapta khar a ni a, kan thinlunga fai duhna te, ngaihpawimawhna te leh inzirtir tûl nia hriatnate chu he Hapta kharnaah hian kan khar hnan tel ta ni ngeiin a lang, a Hapta kan hman zawh veleh kan bal leh tan a. Vawk tuihâwkah bawk a inbual leh thin ang maiin, tûn hmaa kan tihdan pangngai kan chhawmnung chho leh a, kan va fai rei lo thin ve le aw!!?
Kan thil chai mek hi a hlinna hrui tur kan thlang lian lutuk a, kan hlin tumna hrui hian a hling fuh thei lo a ang riau.
Bawlhhlawh hi engnge tih sawifiah a ngai lo. A bawlhhlawh mai a ni. Bawlhhlawh hi a tirah chuan bawlhhlawh a ni lova, a tirah chuan a tenawm bawk lo. Kuhva ei thinte hian Cheng ngain, Chinai tah sa Panhnah thleh nga leh Kuhva cheh phel panga kan lei thin a, chu chu mawi takin sarãng/sahãar varah thun a ni a, tumahin bawhhlawh kan ti lo. Mahse kha sahãr/sarãng pangngai tho, Panhnah pangngai tho kha, Kuhva kan han ei zo va, kan han hmet hlãwm a, kan han thlauh a; bawlhhlawh a lo ni ta der mai! A awmzia i man em? Hetiang bawk hian bawlhhlawh dang pawh a ni - bawlhhlawh hi bawlhhlawh lo atanga rawn insiam a ni a, a siamtu pawh mihring a ni. Eng hunah mah heng bawhhlawhte hi kan hnén atang hian paih bo a ni dawn lova, ei duh, kam hlei Mizote zingah hian a awm reng ringawt dawn. Mahse kha bawlhhlawh kha bawlhhlawh bawmah chauh paih ta ila chuan kan khawlai pawh hi a thianghlim ngei ngei ang.
Dik tak chuan, ‘Fai hi Pathian anna a ni,’ tih te, ‘Fai i tlin e!’ tihte hi kan hre hnem tawh. Mahse heng thute hian min faitir si lo. Min faitir lova, hetiang thu inhriat thar tir a, hnatlanga Veng leh Khua tihfai leh fai lawmman sem hian he ramah hian awmzia a nei lo tih a chian ém èm hnu pawh hian eng vangin nge ‘Faina Hapta’ kan tih reng mai le!!??? Faina hi hnatlanga hlawh chhuah theih a ni lova, haw-haw-a nawr chhuah mi a ni lo tih hi a lan chianna a rei tawh. Lawmman duh vanga faina te, lawmman duh vanga thuziakte hian ram ropui min thlen lo tih hi kum tin kan hmu reng.
Thildang ang bawkin faina nei tur pawh hian thinlung lam a pawimawh ber tho. Vantlang hmuna bawlhhlawh paih hreh lohna thinlung hi he Mizo thinlung atang hian paihbo a ngai a. I fa hnênah khan ‘bawlhhlawh a bawmah chauh paih tur a ni,’ tih i zirtir a, a zawm hunah Faina Hapta awmzia i hmu ang. Kawngpuia In sakna bungrua chhék i sim hma chuan YMA hruaitu, Faina Hapta-a nasa taka hma latu ni mah la, faina hian a kalsan rih dawn che a, kawng kama In sak te, Motor sil te, In chung atanga kawng puia tui khawhthlàktir te i chin reng chhung chuan, i lehkhathiamna te, i neihnunna te khân faina a pe dawn lo che a; i In chhung kha faiin, i Car te pawh fai teh mahse, i chhehvél kha a bal reng tho tho va, faina tak tak chu hla takah a la awm tho.
Changkãng taka thil ngaihtuah a, District Level leh State Level-a Committee din lo hian fai hi kan tlin ang em le? Túna kan hman aia nasa zawka tan lak hi a ngai tihna nge, kan hman dan hi kan tumdan nen a inang lo zawk aw?? Faina Hapta chhunga fai chauh tur hian em ni Committee kan din? A mak ngawt mai!
Ram dangah leh State dangahte i kal tawh em? Dawr changkãng tak takah i lut tawh em? Chu'ng hmunahte chuan bawlhhlawh bawm lovah bawlhhlawh i paih ngam em? Engatinge nangma Khua, i Veng ngeiah khan bawlhhlawh bawm ni lovah bawlhhlawh i paih tlat si!? Midangin an tihhnawk pawh hau zawk tur khan eng vangin nge inthlahrung lo taka i Veng leh i Khua kha i tihbawhhlawh tlat mai? Chu zawhna chu inzawt theuh ila, a chhanna kan hmuh phawt chuan kan fai ngei a rinawm. Faina hi hla takah a awm lo, a Hapta hmang kher lo pawh hian khawvel hmun hrang hrang hi an fai mai. Keini zawng, Rih-artui phur ang mai kan ni reng mai a, a zia lo a ni.
Faina Hapta hian min balhtir a nih loh pawhin, min faitir lêm lo tih hi chu a chiang reng a. He Faina Hapta kan hman thin veng hi em ni mi tam takin mahni kawta bawlhhlawh awm pawh kan thenfai hreh tâk? tih te, mahni feh kawng leh huan kawng takngial pawh hnatlang kher lova tihfai tumna kan nei ta lo hi a chhan engnge? tihte hi zawhna ho te te ni mahse chhan a ngai a ni.
Faina lama hma la thate lawmman pêk hian faina kawngah thui tak min kal tir lo tih a chian ém èm hnu hi chuan Sorkar lam pawh hian tibawlhhlawhtu hremna lamah hian tun aia awmkhauh zawk thupêk zawm tur chhuah ta se awmzia a nei deuh ang em? Fai Lawmman inpêk aiin balh man inchawitir a fuh zâwk ang em? tih hi zawhna awm thei a ni.
Chhandamna a awm theihna tur pawhin Pathian fapa meuh Kraws-a a thih a ngai a. Chu Kraws-a a thihna avanga chhandamna chang tur pawh chuan mihringin he leiah hian chan leh kalsan tur tam tak a nei bawk. He khawvélah hian kan mamawh nei turin a man kan pék a ngai a, Pawisa kan neih loh pawhin a ba tala kan lâk a ngai. Faina pawh hi a lawmman la lovin, a pêka kan pêk a, a leia kan lei a ngai a ni ang. Faina Hapta kan ti reng a, kan bal reng tho, a ninawm ém mai. Fai tura inpuahchahna thinlung tel lo chuan Faina Hapta hi i hmang tawh lo mai zawk ang u. ‘Mizote chuan kum tin Faina Hapta an hmang a, an bal reng tho,’ tia hnam dangin min sawi a, kan thãwm a than mawi loh viau hunah kan zak lutuk palh ang e..
