October thla, Khuangchawi Thla a lo thlen hi chuan Zoram boruak hi a nuam tan tawh a. Khaw lum huam huamin mual a liam tan a, ral khata romei zam chek chuk thin pawh a phai tan a; lung tileng tawk chauh a ni tan tawh a - chu chu chhun lam boruak a ni. Zan lamah ni se, pi pu chena an lo sawi, Khuangchawi zan thla eng en hun a ni chho va. Thla a rawn eng a, thla pangngai tho kha ni mahse, van lam boruak a thiang tawh a, thla eng daltu tur chhum a tlem tawh avangin a eng bik riau a. Van dumpawl ruih mai kara thla eng rawn chhuak chu a eng pawh a mawi a, a lunglenthlak bik tlat.

Chutiang hun, hun thengthaw leh nuam lai takah chuan ka nu chuan, kum 32 liamtaah khan nau a pai puar luah a, a pum pawh a na ve sek thin ang. Ni 17 zante chuan a mu tawh mang lovanga, mahse a tuk ni 18 ah chuan nau a nei tawh ngei dawna ring chungin, huphurh leh beisei rilru tak chungin a inpet nasa awm mang e! Ni e, a chhan chu kei hi Khuangchawi Thla tahrik ni sawm leh pariatah ka piang tlat.

October ni 17 kha a ni a, niminpiah mai kha a ni. Aizawl atangin Kolasib panin motor-ah kan chuang a. Hmanhmawh avanga tlan chak theih chuang map loh khawpa kawng a chhiat avangin kan tlan det det a, kan insawh bep bep a. Ka hma chiahah pitar, kum 70 mi, motor a ruih thin mai piah lamah a kum upat tawh em avanga thutna tha ka ken avanga hlim taka titi bawrh bawrh reng mai a thu a. Ka bul chiahah chuan mipa, kum 47 a upa, hmai hnawih leh rimtui lama sumdawng, tunlai ve zet a thu bawk a.

Driver nen chuan sawi tur kan hre ve vak lo. Kan upate pahnih titi chu kan ngaithla a. An kum zat te, an chhungte leh thiante kum zatte an thlur chhoh lai chuan, a tuk lawk chu ka pianchampha a ni tih ka lo zep zauh a. Ka kum zat min zawt var a, naupang min la ti ngang mai! Mahse an titi chhunzawm zel a, huan te, In leh lo te, sumdawnna te, thihna leh inneihna chungchangte an sawi nawk nawk a; ngaihdan sawi ve lem lo mah ila, an thusawi atang chuan tun hmaa ka ngaihtuah tam lem loh ka ngaihtuah ve rauh rauh tho a.

He khawvela awm kan nih kan hriat ve tan atanga tun thlenga kan nun ka ngaihtuah a. Naupan lai chuan, a changin han tapin, a chang chuan han lunghnur ve deuh thin mah ila, khawvel hi a nuam a. He khawvelah hian thi thei leh na thei kan ni tih pawh kan ngaihtuah ngai lo hial thin a nih kha.

Kan upa hret hret a, rualawh a na tial tial a. Chu mai chu ni lovin, he khawvelah hian 'thawk' tura piang kan nihzia a lang chho tial tial a, kan hmabaka awm apiang kan thawk chho ve zel a. Tun hmaa kan thawh loh pawha awm mai thin tam tak kha a awm mai thei tawh lova. Mahni kea din hnu phei chuan thawh hma leh thawh zawh tawh hnu thlenga rilru sen a la ngai zui a. Engkim maiin man a neih a, lei a ngaih vek hnuah phei hi chuan thawh nasat hi a ngai ta ngawt mai. Pianchampha kan vuiliam hnem tial tial a, thil thar tam tak kan hmu a, thil hlui a lo thar leh thin bawk a. Mahse ngai reng leh danglam ve lo chu - he mihring hi dam chhunga hnathawk tura piang a ni tih hi a ni.

Mite angin dinhmun sangah ka awm lo. Mite angin hmun leh hun pawimawh chang phak ka ni lo, mahse kum 32 lai khawvela ka awm tlin ve tak hnuah hian dam rei hi thawhrimna mai a nihzia hi kei ve tehlul nunah pawh hian a va lang chiang em! Ka phak tawk leh theih ve tawk ka thawh a, duham leh duhthawh taka hna ka lak avanga a hun taka he thuziak pawh hi post thei lo ka ni.

Engpawh nise, mi tam takin ka pianchampha hriain duhsakna thilpek min pe a, SMS leh internet kaltlangin duhsakna thu min thawn a, ka lawm ngei mai. Hei hi ka lawmthu sawina ni teh se.

Kum engzat nge kan dam anga, engtikah nge thawhrimna piaha chawlhna ram chu kan thlen ang??