Chuailo Par  

Posted by Hriatpuia Pa

Chul hnu bukthlam sirah a par chiai e,
A sakhming iang a chul thei lo;
Thliah loh ram hnim chu hrang mah se,
Chuailo par mawi par lai a kham thei lo.

Dawn teh kan nun sul tam liam hnu,
Thliah hnu chhawl ianga uai mai tur;
Uaia'n ka phal thei lo lung min lentu,
Chuailo par ianga lairil fan tur.

Khuangruah, turni, chhimthli hrangin,
Chuailo par mawi a nuai buan buan;
Dawn lem nei lo chuailo parin,
Suihlung mawlte'n a tuar fan fan.

Chuailo par iang kan nun hlim lai,
Ding reng mai se a pawi hlei lo;
Mahse dawn teh, ka thian, a pawi ber mai,
Kumsul veiin ban ni a nei si lo.

A do zo lo chhim thlipui nuai,
A hrang lua e khuangruah, turni;
Chhantu nei lo chuailo par mawi,
A chuai zo ta, awi maw - a chuai!

Dan rual lohvin kumsul a vei,
Chuti'n hringnun par mawi a chuai;
Sakhmel mawi pawh par ang a chuai,
Hai ang kan tar an ti - Karei!!

19 comments

I bei tha thuai thuai hle mai, hlahril lam pawh miril LAIRIL tih takah a ril thin hle mai.. heti hian ka han thalthuam ang e..

An hril Chuailo par mah
Uaia a chul leh si chuan,
Chul tur renga piang hringnun
Uai lo rual zu ni lo chuan!!!

Uai lohna ram mawiah chuan
Ka thla a la chawl ve ang a;
Lei hringnun hi ral mah se,
Chuailo par iangin ka vul reng ang

Hei zet zawng a tha ka va ti em! He hla ril hian lairil a fan a, Mizote hian a saka kan sak duai duai chauh hi emaw hla kan ti ang tih ka hlau thin! Sap ho chuan Poetry kan tih ang chi, a chhama chham chi ho hi hla tak takah an ngai zawk tlat a ni lawm ni?

A Rhyme hi a mawi khawp mai! Hetiang hian ka lo dah ve ngawt a dik chiah emaw? abab abba rhyme anih duh hmel!

Chuailo par mah chuaini a awm thin
Chuailo par iang hringnun
Kumhlun lovin a chuai thin
Vul reng teh mai se, hringnun

kan tui hnih ve lawk

Chuailo parmawi
I vul laini a tawi lua e
Theih nise Josua ianga
Vanlaizawlah Turni tiding tur hian
Khuanu ka ngen nang e
Aw Chuailo parmawi
Zoram tana i mawina leh hlutnate Thangtharte hian hre mawlh rawh se

Haha, thiante u, in va thiamin in va tilawmawm em!! Kei aiin zuk chhuah nalh vek che u a!!

@Pu Fela: Hotupa, a chang tawp bera hman mai ka va it ve!

@kka: Thianpa, a rhyme scheme chu, i tihdik duh hmel ka ti!

Thianpa, hetiang poetry tha tak tak hi han posh zel teh, kei pawhin rawn chhamchhuah ve ka chak teh ania. A tul chuan chawpchilh deuh deuhin ka rawn tuihnih zel ang.

Shakespeara'n Sonnet leh Italian Sonetto bakah ode leh adang tam tak, Romantic Quartain te pawh. Entir nan Romantic Quartain pakhat mai mai. Tlar tin lam zat hi 10 a nia.....

Chhawrthla eng hnuaiah duatte'n ka chawi a,
Hallo ten'n a chhingmitin min melh a,
Tudang lem mah kan thik bik hek lo va,
"Kumtluangin aw tiin kan tiam dun a.

Poetry lamah pawh i lo ril ru riau mai a, hotupa! Hetianga in rhyme nalh tak ang chi phei hi chu a har lehzual a, a mawi danglam hle bawk. Ka'n bei ve chhin dawn a, hei hma lama mite ho hian an rawn tuihnih tha hlawm riau bawk si a, ka hai rih zawk mai ang e... ka ti leh ta.

i van thiamin i van bawn ve, hotupa. Kei zawng, ka thiam ve zawng a nilo hei chu. Mahse, han chhiara, han chhiarnawn leh hi ka tih theih zawng a nia, a nuam bawk a ni tih.

KKA: Thianpa, Hlahril hi post zen zen a har khawp.. min han pui zel dawn nia. Ka no. hi lo nei ve ta la - 9862559130. :P

Faka: Hotupa, ka awih lo. 'Pathian Hmel' pawh kan la ngaithla tlut2 mai!!

Kima: Eh! Hotupa.. nangni'n thiam min tih hian kan lo phur ve hlut thin a, a nuam.

Hlahril ang chi hi chu, zankhat inngaihtuah lungpuama han phuah mai chi a ni thin lo.. Hun rei a ngai thin. Tiraw?

Turni sa sen hnuaiah pawh,
I hlahril mi chuan lung min len;
A thuk zia dawn thiam lo mah i,
Tahpui tak ka nap e.

E khai... Han tih ve ngial ka tum ania. Hlahril phuah hi ka thiam chak zawng tak, ka thiam theih si loh. Inzirtir mai chi ni bawk si lo niin ka hria. A ropuiin, a lunglenthlak e.

E, Hotupa, i va han thai chhuak mawi kher em! Hei mi dang te pawh a cho chhuak lehnghal. 'Poet' i lo ni takzet anih hi.

chhiar chet chet a zir chet chet chi anih hi...hun neih deuh hunah ka rawn let leh mai ang...chhiar puat chuan a awmzia tak tak ka zu pawh pha lo deuh :)

Joseph: Hei, i thiam lutuk tlat :D. Inzir theih chu a ni ngei anga, Hla lam thiam tur mi hi an awm a ni ngei ang, ka beih ve viau pawh hian, kei pawh, ka hlawhchham nasa thin khawp mai.. tuna mi hi ka tihfuh pawl tak a ni hial ang - chhuanawm lul lo mahse.

mejsay: Chuti maw hotunu? ka lawm e. Mahse, 'Poet' title hi chu ka khum ngam rih lo... lo la dah tha rawh :P

luliana: Chhiar chet2 hian hun a duh zek zel a, hei, beisei aiin i rawn let leh har ta - nang pawh. :))

kei chu ka chuai ta

Chuailo par iang kan nun hlim lai,
Ding reng mai se a pawi hlei lo;
Mahse dawn teh, ka thian, a pawi ber mai,
Kumsul veiin ban ni a nei si lo.


He lai chang hi amawi kati lutuk, apa Zaite; nang leh kei hi kan la chuai anga kan la chul mai dawn chu ani sia... aw. C.Thuamluaia'n "A pawiber mai chu kan nun khua rei an chang tur hi" alo tih hi a dik ngawt mai ti raw.

blog en ngailo hi blog neitu tih tur ve hrim hrim a mi le

Chhe Heipui!! Enge nita?? Gud job k'u Zaite

Iamb ... comes after Chènier's Iambes and Barbier's Les Iambes —thus we have the IABIC METER system ... "Chuailo Pâr" could be arranged with more appropriate iambic meter, write to you later. I appreciate your piece.

Iamb ... comes after Chènier's Iambes and Barbier's Les Iambes —thus we have the IAMBIC METER system NOW ... "Chuailo Pâr" could be adroitly arranged with more suitable iambic meter, write to you in detail later. I truly appreciate your piece.

Post a Comment

Facebook

Keimah

Visitor Since Feb 09

Khawi lam atangin nge?

online

Followers

Lairil

Mihring ngaihtuahna LAIRIL hi mihringin duhnate, awhna te, hlauhna te, thlamuanna te, hlimna te, lawmna te, lungngaihna te, thinrimna te, chapona te, duhamna te, itsikna te, mahni hmasialna te, hmangaihna te, duhsakna te, engkim mai; mihringa mihrinna siamtu leh neitu a nih avangin a va pawimawh tehlul em!

Nuihtirtu che kha I thinlung a ni a. I tah theihna te, thil mawi leh mawi lo i thliar thiamna te pawh kha thildang a ni chuang lova; khaw lum leh khaw vawt, hlauhawm leh muanawm, hrehawm leh nuam I thliar hran theihna pawh chuti tho.

A chang chuan kan hmuh leh hriat ngeite pawh hi dawt te, a lem te a lo ni thei a! He thinlungin a ngaihtuah hi a lem a ni thei ang em le? Mitin a hmuh a, bengin a hriat avanga duhna leh thinlung LAIRILin a duhna hi a inzawm ang em le? A hrang ni ta se khawii chu nge dik zawk ang? Khawii chu nge tha zawk a, tlo zawk ang aw?

Kan mita kan hmuh leh benga kan hriat te, rilrua kan ngaihtuahna te zinga a tam zawk hi he kan mihrin chhung hian kan theihnghilh leh thin em? Kan theihnghilh tawhte hi kan hrechhuak leh thin em? Thinlung hi bum hmang, chhe lailet der em ni? (Bible – Jeremia 17:9)

Recent Comments

Grab This Widget

Twitter Updates

    follow me on Twitter