Inpuanna
Posted by Hriatpuia Pa
Ka pianna pawh eng ual a nih loh nak laiin, ka parvul lai leh ka taksa pawh a nalh ve lai takin min thliak hmawk hmawk a. Pitar ke khi bal hrih hreihin min han chil hrep mai a. Chumi hnuah, rapchungah, mei khu ur lai tak maiah min dah a, chutah pawh chuan em tha pawh chang zo lovin, pate awng sir siarah min han dah lehnghal a! A hrehawm dan a thuahhnih ngei mai.
Chatuan hi engtia rei nge tih ka hre lova, mahse chatuan tling lo deuh min dah hmanin ka hre hial. A tawpa tawpah chuan min la thla ve ta hram a.
Mahse, 'A zual zapui vaihlenhlo' tih ang maiin, ka hrehawmna chuan kian lam aiin zual lam a pan zel mai lehnghal a. Ip tha pawh chang zo lovin, buara ipah, dim lo baksakin min han hnawh lut a. 'Khawiah chuan min kalpui dawn ni maw!?' tia ka ngaihtuah lai tak chuan min chawi lawp a, motor hnung lamah (a seat pawh chang lo) chuan min han vawrh lut rawk mai a. Hetiang reng renga retheih leh hrehawm hi peih lovin duh lo hle mah ila, ka tana khuanu ruat emaw tih mai turin ka retheihna lah a zaul tak tual tual a!
Chutia hrehawm ti taka ka inngaihtuah lai chuan ka chuanna motor chu a ding chut a. Min han theh thla thuai mai a, chutah chiah chuan a ni, ka hrehawmna chhumpui chuan min kian san a, ka tana vanneihna ni a thlen tak ni. Min dahna khuate chuan min lo tiretheiin min tiduhdah hle ang chu... 'Eng ang takin min nghaisa leh ang maw?' ti a ka lo huphurh ruk em em laiin, chutiang reng reng a lo ni ikhaw lo mai chu... hringmite anga fuke nei te zawng ni ila, pheikhai vawrin chawnban ka phar nasa hle ta ve ang.
Min hmu apiang mai chuan duh em emin min fawp ngawih ngawih zel a. Kei lah chuan a tu amah chu ka lo hnar chai mai si lova. Hnar a hnekin an duh ang chuan ka awm zel mai zawk si a. Naupang nikhaw hre chin atanga puitling, pitar putar thleng chuan mn duh em em vek mai a. Chutih hun lai na na na chuan hmeltha hmingthang Lianchia meuh pawh kei aiin a 'luck' bik ka ring hauh lo.
Chutia min hmangaih a min duh em em tute chu kei chuan ka hmangaih ve thei tlat lo mai pek a! Engati tehreng emaw ni, an chhiatna tur hlir ngaihtuahin an thluakah chuan hri bawlhhlawh pui pui ka tuh ta hmiah hmiah mai a.
Min hmangaih em avangin ka thiltih tha lote chu an hmu thei lova. An tan hri tha lo thlentu ka ni tih an han hriat meuh chuan a lo tlai lutuk tawh thin.
Thenkhat erawh chuan an tan hri thalo thlentu ka ni tih an hre reng chung pawhin ka hmel hmuh leh ka bula awm an chak vang hrim hrim pawh ni chuang lovin, 'rual pawl lo,' nih duh loh vang te, thiante tih ang tih ve duh hrim hrim vang te hmachhuanin an In chhung lumah chuan min hruai lut leh nge nge thin.
Chutiang taka mite duh leh hmangaih chu ka hming pawh i hre duh vein ka ring a; ka hming chu zokhaw rim nam lo ngat, VAIHLO a ni.
------------------------
Tlangval laia ka ziah a ni. Ka ziak tih pawh ka inhre tawh lova, ka lehkhabu hlui ka hai a, exercise bu te pakhat, hlui tawh tak, a kawm pawh awm tawh lovah hian, he ka thuziak hi ka zuk hmu a. 1995 February ni 11 a ka ziah a lo ni a!
