Concert Ka En
Posted by Hriatpuia Pa
Kekawr bul tial
Dawhsan chu a la thim thap a, mipui an rawn lut nguah nguah a,
Aurinna atang chuan minute nga hnuah concert tan a nih tur thu a rawn puang lauh lauh a. Ka Nepali thianpa, Manu Subedi chuan a phone a lachhuak a, sana a en a; kei aiin Mizo hla hlir sa thin T-Melody Concert chu tan thuai thuai se a ti zawk niin ka hria.
Kolasib an lo kal hmasak tuma an concert lo huaihawttu zinga mi ka nih avangin T-Melody te hi ka hrechiang ve hle a, tun tumah hian an khuangpu (drummer) an rawn thlak a, a bika zai turin Lalpanliani (Pantei – Maphasi) an rawn hruai bawk a. An zaitupa ber Lalnunsanga leh an guitarist Thanthawngate sam a sei ta deuh bawk a, a bak chu a ngai vek an ni.
A e-mail address min pek, ka ziahna lehkhabu te nena ka tihbo tak daih, vawikhat mah ka biak zui tak loh, an guitarist Thanthawnga ngei mai chuan a tingtang a rawn chawi chhuak a. Lengzem leh lenglawng sa tur an nih theihnghilh ni awm fahran hian – hla mawi leh mittui pawt ngawih ngawih, ‘Khawngaihna Mak,’ (Amazing Grace) ngei mai kha, mawi-fan-nalh-ril leh lungrun lutukin a’n rawn zut hmasa tehreng a nih kha!
Zaithanmawia a rawn che ve leh a, lungkuai takin, ‘Mangtha’ a rawn sa. Lung a leng a, lung a chhe tel thei deuh bawk. ‘Mangtha, liam mai rawh, Ngaihzual lungrun..’ han tih ngaih ngaih mai chu! A sa zo va, rilru hnim leh khawhar atanga chhuahna tur ni awm fahranin, Pachhunga hla, ‘Han nui leh la’ tih a rawn thlawh leh nghal a. Kolasib khawpui thawm a chhuak tan.
Lalnunsanga a rawn chhuak ve leh, ‘Kar Mah Hla Se’ a rawn ti! Kar lam hla taka ‘D’ neite tana a mawi dan tur ka ngaihtuah a. Ka hma lawka tlangval pahnih, ‘lam huaina’ an ti hmasa ni ngeia langte’n maimitchhing, thle lawng lawnga an lo zawm vete chu ka dem lova, ka nuih lo bawk a.
Tlar hma lam chu a boruak a tang ngang mai. An su dual dual a, tuisik bur ni awm tak hi an rawn vawr chhuak leh nawlh nawlh thin a. A then an inkokichhuan a, an lam hulh hulh a. Kan naupan laia kan inkhelhna thin, sikul sport leh football tournament zawng zawng an nghahna thin, tuna Youth Hostel tur, ‘tur’ ni rei tawh tak an sak hnan tak, Hmarveng Field chu a suk hian a su dup dup a ni ber mai.
Eng a tha a, rimawi hmanrua a tha a, ring mahse a bengchheng lo. Dimmer angzatnge an hman ka chhiar lo, an hmang thiam hle tih erawh ka theihnghilh lo. An thawm kha, Kolasib eptu, chhuah lam tlanga awm Bukpui leh Hlimen khuate pawhin, ‘
Venhimna lam a tha a, intibuai an awm meuh lo. A lam duh leh lam ve duh lem lote inkara daidanna bang a rinawm a, buaina a awm lo. Police duty te pawhin concert an en ve mai mai, tihtur an nei lo. Khawlum lai a ni a, pawn boruaka concert kha a inhmeh lutuk. Kolasib-a Concert awm tawh zinga a ropui ber a ni ngei ang.
Concert ka en lai leh ka haw hnua ka rilrua awm ber chu – min zirtir an nei em? tih a ni a, hengte hi a chhanna niin ka hria – thil engemawzat min zirtirin,
Min zirtir nia ka hriatte –
1. Mizo hlain a rock theih a, hlim takin zan hnih lai a lam theih.
2. Mi tam tak sawi ang em emin
3. Zu rui tam tak an awm. Zu ruih thiam lo an awm mang lo.
4. Engkim deuhthaw khapna ramah hian thalaite hian hlim an duh a, zalen tak leh engthawl taka nun an chak a; chutianga an awm chu hmuh a nuam.
Thildang pawh a la awm thei ang. Engpawh nise, ka rilrua lian ber zawk chu – Mizo hla ngei hian a ‘rock’ theih tih hi a ni.
Mizo thalai zingah rock band din a, theihtawpa hma la an awm ve ta nual. Mizoramah, Mizote zing ngeia concert si, sap hla un tak tak leh rimawi danglam pui pui zir chawpa bei vak vak an ni deuh vek. T.Melody te hian Zoram chhungah na na na chuan Mizo hla ngei maia rock a theihzia leh sum lakluh nan a tawkzia an rawn lantir a. Zan hnih chhung khan cheng nuai hnih deuhthaw an lalut tlat!
