Hna leh Keini
Posted by Hriatpuia Pa
Hna hi engnge? 'Hna i nei tawh em?' kan tih hian, a zawttu leh a zawha thinlungah hian engnge awm? Hna kan tih hian eng chin hi nge kan huamtir? Hna zahawm leh zahawm loh a awm em?
Mi thenkhat chuan hlawh tam tak neih theihna hna an thawk a. An hnathawh avanga mi zah hlawhte pawh an awm. Hna avanga zahawmte hi mi zahawm an ni mai em? Hna hian mi a tizahawm tihna em ni? Mi thenkhat hi chu an hna zahawm viau mahse anmahni zahawm lem loh an awm tho em? Hna hian midangte zah min phurhtir lova, hna tha taka thawh erawh a zahawm thung. Tirhkoh Paula chuan Thessalonika khuaa mite chu anmahni hna theuh, an kut ngeia thawk a, midangte neiha innghat lo turin a hrilh a; chu chuan zahawmna a keng tel niin a sawi bawk. (IThes. 4:11-12)
Kan pi leh pute kha chaw leh hna ngah lo tak an ni awm e. Chaw atan buh an ring a, buh tih loh chu chawhmeh vek a ni mai a. Tam lai chuan buh lo deuhte pawh ei ve thin mahse, 'chaw' an ti ngai mang lo. 'Chaw' an tih chuan buh a kawk deuh bik a ni. Chutiang bawkin Lo hna bak hna dang an nei vak lo. Tuikhur hiah leh karkawng sah te bakah a dang chu awm ve bawk mahse, mimalin hna an neih chu lo lam hna deuh chiah a ni.
Chu rilru chu bansanin, an thlah mi tam zawk chuan lo nei tawh lo mah ila, hna kan tih hian kan la kawhtir tlem viau tho. 'Hna i nei tawh em?' emaw, 'Eng hna nge a thawh ve tak?' emaw kan tih hi chuan, kan rilruah sorkar hna a lang deuh vek mai. Sorkar hna kan thawh hmaa kan tih dangte hi chu, 'Hna nghah nana kan thawh' a ni deuh zel. Kan zir chin mil zela sorkar hna thawh kan tum avangin kan ram hian harsatna a tawk mek a. Hetia sawi mai aia nasa hian he harsatna hi a inphum thuk a, a inphan hnawk tawh.
Zirtir hnaa tui hauh lovin 'hna' ni a kan hriat tlat avangin zirtir hna kan thawk a. Sipai a tha tih vang ringawtin tui hauh lo kan fate kan nem liam zut zut a. A mawm ni-a kan hriat avangin Engineer kan zir bawk a. Sum a awm ni a kan hriat avangin a thei apiangin chanchinbu kan siam bawk. Kan hlawh tam mahse tuina leh inpekna tak tak tel lo, hna a nih avanga thawk hram hram kan nih avangin kan hnathawh hian tuihnang a pai lova, a luanchhuahna turah a luangchhuak zo lo fo. Kan zirna kalphung kan sawisel chuah chuah a, Police zingah venhim leh thenfai hna thawk lo, thlabarna leh hnawksak thlentu an awm chamchi a, kan kawngpuite pawh keini aia zir sang lo zawkte siam aiin a chhe bik reng mai a nih hi.
Hna chungchang sawi hi chuan Blackberry fakna hi ka hrechhuak leh thin. Tawngkam mawl tê, hriat awlsam tak, awmze ril tak nei si an hmang a. Mizo tawnga lehlin ngai lo khawpa thu awl hmangin, 'It's our time. Do what you love, love what you do,' an ti!
Taiwan hmeichhia, kum 60 a upa, Forbes magazine-in Asia-Pacific biala midangte tana inpe langsar zual a thlanchhuah mi 48 zinga tel phak Chen Shu-Chu chanchin hi i hre tawh ngei ang. Primary School thleng chauh lehkha a zir a, a hnathawh pawh ropui tak a ni lo. Taitung (Taiwan) Central Market-a thlai (vegetables) zuar ve mai a ni. Bazar-a thlai zuar mai mai, hmeichhia lehnghal hi khawvelin a hre tlat. A chhan chu rim leh taima taka a thawh a, a thawhchhuah atanga midang a tanpui nasat vang a ni. Khawvela hun bik neia chhuak chanchinbu zinga ngaihsan hlawh bera chhal ngam, TIMES chanchinbu chuan 2010 chhunga mi langsar 100 a thlanchhuah zingah, midangte tana inpe (philantrophist) huang atangin a a telh ve hial bawk.
Midangte tana sum leh pai a thawh dan leh thawh zat te chu kan sawi tum loh lam a nih avangin tarlang lo mai ila. Chen Shu-Chu-i chuan hringnun a thlirdan heti hian a sawi. 'Ka nun inkaihhruaina chu ho tê a ni. Thil engemaw i tih a, phurrita i ngaih tlat chuan thil dik lo a ni mai. I thiltihin a tih hlim che erawh chuan i tana tih tur dik tak a ni tihna a ni - midangte sawi a pawimawh lo,' tiin.
Kan dam chhung zawngin rim taka thawk a, kan thawh rah ei a, hmaia thlantui luang zawih zawiha hun hmang tura duan kan ni (Gen. 3:17-19). Thuthlung Tharah pawh thatchhe lo tura fuih zui zel kan ni (IIThes. 3:10). Rinna avanga khawngaihnaa chhandam ni mah ila, chumi chang tur chuan thawh tho a ngai tih Paula'n min zirtir bawk (Phil. 2:12).
Hnathawh hi zak lo ila, eng hna pawh ni se, tha tak leh rinawm taka kan thawh phawt chuan a zahawm tih hi hre bawk ang u. Amaherawhchu hei hi hriat reng a tul - Fel lo taka dehchhuah tam tak ai chuan fel taka dehchhuah tlem tê a tha zawk (Thuf. 16:8).
