Vai-vawm A ??
Posted by Hriatpuia Pa
Readers’ Digest-a an fiamthu pakhat, ka hriat chhuah fo a awm - ‘Vaipa pakhat leh a fanu tê hian India leh Australia-te’n One day International Cricket an khel chu a hmunah an en a. India thawh (bat) ni a ni a. A fanu tê chu a ngawi vang vang a, ‘India tan khuan chak ngaihna a awm lo,’ a rawn ti chhuak phawng mai a. A pa chuan, ‘Engati maw?’ a lo ti a. A fanu tê chuan, ‘Khu, en ‘che, Australia player khu 11 an nia, India ve khu pahnih chauh an ni si a, engtinnge an chak theih ang?’ a lo ti a!!’
Hrethiam lo tan chuan Mizo tam takin ‘Vai-vawm’ kan tih mai, Cricket hi a hmuhnawm tehchiam loh khawp mai. Amaherawhchu India thluak hmanga din leh kalpui mek ‘Indian Premier League’ chu khawvela infiamna lama sum tamna ber zinga a tel tak avang hian ngawihsan reng thei kan ni bik lova, a kawngkapuia kan lut thei lo a nih pawhin, pal hniam lai deuhva lawn liam tal kan tum ve loh chuan, IPL a sum leng vel zozai leh la leng leh zel turte hi midang ta tur a ni zel ringawt dawn tlat.
Alpha
Sang leh zakua tih lam a ni lo, kum zabi 12-na leh 13-na vel daih tawh atanga zung kaih tawh Cricket game hi a khel hmasa bertute pawh sawi fak theih a ni lo. Mahse khawvela Cricket pawl hmasa ber leh upa ber zinga mi leh tun laia Cricket Dan leh Hrai (Dan leh Dun ni lovin) lama thuneitu ber - The Marylebone Cricket Club (MCC) hi 1787 a din a ni tih erawh a chiang a. Chuti chung chuan London Cricket Club khu 1744 khan din a ni tawh tih hriat chian a ni bawk. 1744 khan Cricket changkansan tum, tun lai Mizo thangthar min thlahtute khan eng thuamhnaw nge an la inbel kha??
Ram 15 chauh!
Ni e, khawvela Cricket khel thin ram te hi ram 15 chauh an la ni. Amaherawhchu heng ram 15 te hi han thlir teh - Asia khawmualpuia ram lian tak tak - India, Pakistan, Bangladesh leh Sri Lanka te hi ram ropui taka chhiar vek theih an ni lo chungin, mihring tam lamah chuan an duai lo a nia. Australia khawmualpui pumpui khuan Cricket aia game ngaihsan an nei lova, Africa khawmualpuiah pawh a changkang lamin an tuipui mek a, a rethei zawkte pawh an thangharh chho zel. Europe khawmualpuiah pawh England chu sawi lohva leng an ni a, Netherlands, Scotland leh Ireland tih vela a lar chuan ram dang hian an ngainep rei dawn lo tih hi sawi ngam a ni ang.
Ram ropui USA ah pawh Cricket hian zung a kaih mek a, 2004 atang khan Cricket Professional League an tan tawh a. Twenty Twenty format an chin thar tak atang phei hi chuan American-ho khuan Cricket hi an ngaihven thar hle an ti. China ropuizia pawh hi sawi ngai lova chiang a ni. Anni pawh hian Cricket-ah hian ‘awm’ a awm tih an hmu a ni ang, 2004 khan he game tihhmasawnna tur ruahmanna an duang tawh a, tunah hian 2019 World Cup khelh phak ngei tumin an bei mup mup tawh a sin!
Game hmuhnawm
American-ho khuan khawvela game ropui bera kan ngaih Football (anni chuan soccer an tih) hi an ngaisang hlei thei tlat lova, a chhan chu, ‘Score a tlem lutuk,’ an ti! Game hmuhnawm reng reng hi chhut vang vang la, score tam a lo ni deuh zel a, American-ho ngaihsan infiamna khu score tam a ni zel. Basketball-te pawh, second tin deuhthaw maia score a awm hi a hmuhnawmna lian ber a ni.
Cricket phei hi chu a hmuhnawm a sin! A hrethiam lo tan chuan a vawmtu lam 11 lai field chhungah an lut a, a vawtu lam pahnih chauh an ding si a, a vawmtu lam hi chak zawk tura rin a awl ngawt ang; a ni der si lo. Vawikhat thawh (Over khat) ah a vawmtuin vawi 6 a vawm thei a. A vawtu chuan ball (vawm) tina run 6 a siam phei chuan Over khatah run 36 a ni daih thei. Chutih lai chuan Over khatah batsman zawng zawng an thi (out) phiar thei tho bawk! Out dan lah a tam - a Stump (hmawlh pathum hi) a fuh te, a Bails (hmawlh pathum chunga kham pahnih) ball-in a pera, leia a tlâk te, Middle Stump zawna ball kal tur ke hmanga lo dan palh (leg before wicket) te bakah Catch out te, Stumping te, Run out-te a la awm a. A thiam leh thiam an inkhelh a, target sang tak mai an han ûm te hian a hmuhnzawm zual. Over khata an run vuak chhuah (run rate) te hian awmzia a nei thui lutuk tlat a. Football anga a goal hun nghah ngawt ngawt a awm ve lova, titi pah leh haw-haw chunga en mai mai chi pawh a ni lo; rilru zawng zawng hmanga en ngei ngei ngai a ni.
Vai vawm a?
Silchar khawpuia vaiho pawh khu MLA 40 nei ve thei ngat Mizo mipuite hian kan zāt lova, Silchar lêt nga vel khu Kolkata khawpuiah khuan vai kan tihte hi an la awm a! Kolkata khawpuia awm lêt tam tak India ramah hian ‘vai’ an awm, tam tak hi an ni ringawt!! Chu’ngho tuipui ber chu Cricket hi a ni. Silchar Super Market a ni emaw, Kolkata Fancy leh New Market a ni emaw, New Delhi-a Karolbagh leh Sarojini te leh Chennai-a T-Nagar leh Broadway Market emaw pawh ni se a dang chuang lo, India team-in Cricket an khelh tawh chuan boruak a danglam vek a, dawr neitu zawng zawngin TV emaw Radio emaw hmangin Cricket chanchinthar an ngaithla a, India hnehna chan lai taka i dawr palh a nih phei chuan an zuansan tawr tawr che ‘nga, i hrilh a hai hial maithei. Chuti chu ni mahse India hian 1932 atang khan Cricket hi a khel ve tan chauh a, an khelh hman hian SAP kan tih zinga an aia sap awm thei chuang miah lo England te, Australia te, New zealand-te leh Canada te chuan an lo khel daih tawh a. International Cricket game hmasa ber phei chu USA leh Canada-te khuan 1844 khan an lo khel tawh a, 1859 khan English Professional player-te chuan North America khawmualpui fangin, ‘Overseas tour’ an lo nei daih tawh! Helai tlang kar atanga ‘Vai-vawm’ kan lo ti ngawt hi chu!!
Kan khelh ve chi a ni em?
Cricket game hi game zinga rilru hmanhmawh ngaithei lo ber pawl a ni hial ang. Rilru hmanhmawh, tih ngai ti rei peih mang lo, kum tina thlawhhma sawn thin Mizote tan khelh chi a ni ang em? Test cricket lam hi chu kan tuipui har deuh maithei a, khawvelah pawh a lăr chak lo. Mahse tun laia lăr chak em em, Over 20 ve ve (Twenty20), invenna rilru tel hman mang lova vawm leh vuak pawp pawp mai ngaihna ang hi chu Mizote khelh chi lutuk a ni.
Hmanni lawk atang khan Mizo thalaite hian an khel ve tan a, Vairengte tlangvalte khu Dholai leh Bagha vaiho, englai pawha Cricket tuipui reng mai thinte khuan an hneh tawh mang miah lova. Kolasib tlangvalte chuan Silchar Cricket Association team an zuk hneh ringawt bawk! Kan thalai engemawzat hi chuan training tha nei ve ngat se chuan Virender Sehwag leh Mahendra Singh Dhoni-te aia nep chuang lo tur Cricket talent an nei ngei ngei ang. A vuaka vuak lamah phei hi chuan kan tha lutuk tlat a, a vawm lamah lah kawng kama Chepa leh Tukkhumvilik vawmthla thei thlahte kan ni.
Kan khel ve dawn em?
Dawn e, dawn chiang e. India ram game tuipui ber Cricket hi Mizote hian kan khel ve dawn khawp mai. India ramah hian khawvel hriat tham khawp a Cricket Stadium ropui 19 a awm a, a tê tham deuh phei chu sawi sen a ni lo. Board of Cricket Control in India (BCCI) a Member State ni turin stadium neih ngei a ngai a, Mizoram pawhin chumi kawng zawh chuan hma a la mek. Sairang bul Sihhmui ramah Cricket Stadium tur a zawl duai tawh a, hna a kal mup mup reng. Stadium kan neih tikah Member State niin, BCCI atangin Promotional Grant nuai bi mai ni lo, vaibelchhe biin kan dawng dawn. Chutih hunah chuan Mizote zingah Santosh trophy khel phãk Footballer kan sawi vul aia nasa hian Ranji Trophy khel phãk hming a lãr zawk ngei ang.
A hlawk em? Hmabak engnge?
Hlawk lutuk tlat. Indian Cricketer-te hi Sponsorship leh commercial atanga an sum hmuhte nena chhut chuan khawvela Cricketer zinga hlawh sang lawr lak an ni a. India football team captain Bhaichung Bhutia aia Sachin Tendulkar hausak zawk dan atang hian a chiang mai. Indian Premier League hi khawvela infiamna ‘event’ zinga player-te hlawh chawhruala sang ber dawttu (NBA dawt) a ni a, chu IPL-ah chuan Cricket an khel. He IPL ah hian player hlawh tlem berin, ni 50 vel chhungin cheng maktaduai khat a hlawh ngei ngei a, chutah chuan match money leh bonus a la tel lo! IPL team an leina man to turuzia te, player man san dante kha i hria ang, khati chung khan IPL team zingah Kings XI Punjab tih loh chuan season tin pound maktaduai chuang vek hlawkna an tel!
Mizote’n football kan buaipui dan leh India football-a kan thlen chin te, India-in International football-a kehniak a neih tlemziate hi chhút teh. Mizo tlangvalte hian Cricket khel vein, IPL team-ah hian khel phãk se, National team-ah tel phãk ta se, International player langsàr a ni nghal dawn.
He khawvel kan awm chhung hian ‘fame & fortune’ a ni lo’m ni kan duh? Chuti a nih a, infiamna lama kan kal dawn a nih rau rau chuan Cricket hi khelh mai chi a ni.
