Engtin Awm Ta Zel Maw??
Posted by Hriatpuia Pa
A ding lama a fanu kum hnih mi mu chu a en a, a hnar sek sek a, a kut a phar diai a. A hmel chu a en ngawih ngawih a, kuah pawh a kuah lo; a en tawp mai a ni.
A vei lamah chuan a pasal a mu a, lehlam a hawi a, a ngawi reng a; ngawi reng mahse a muhil lo tih a hria. Engnge a ngaihtuah tih pawh a hre thei. A thinrim lo tih a ring a, a rilru erawh a na tih a chiang. A rilru nat chhan chu a hrechiang em em a, engtia hnem tur nge a hrethiam lo thung. A be ngam lova, sawi tur lah a hre hek lo. Hria pawh ni se sawi hun a ni em tih a chiang lova, eng tianga sawi chhuah tur nge tih pawh a ngaituah thiam lo, a rilru chu a chawl vekin a hre hial.
Kum sawm liam ta a ngaihtuah let a, khatih laia a awmdan avang khan zaninah hian rilru mangang, baihvai leh hrehawm takin a awm a. Khawvela a hmangaih ber a pasal rilru na lutukin a awm a, a va pawi lungrun kher em! Siamtha turin theihna chhe te pawh a nei tawh lova, he khawvela a dam chhungin kum sawm kaltaa a thiltih khan a zui zel dawn.
VL-i chu tleirawl hmel chhe lem lo tak, a rualpuite aia langsar lo thei lova sang bik, Mizo hmeichhe dangin an neih ve loh hnar ngul sang vah mai, khabe ruh kual mawi tak nei a ni a. A tleirawl chhuah hlim atangin mipa tam takin an mitmei a, ani pawhin a hai lo. A tam zawk chuan an fiam mai mai tih a hria a, thenkhat chuan a taksa mawina an thlahlel niin a ring. Chutiang zingah chuan tlangval ngawichawi zet, hmel tha tih tur ni si lo, mah se nelawmna leh duhawmna riau nei tlat si pakhat a awm a, a hming chu Biaka a ni. A ute inleng zingah Biaka chu a lo tel ve thin a, kil khatah a thu ve ran thin.
Tlangval liana sawi tur a ni lova, amahah chuan danglam tehchiam awmin a lang lo. A fai vang reng a, mei a zu zeuh zeuh a, kuhva a ei thin bawk a. A sualna sawi tur a hre lova, a felna em em pawh sawi tur a hre chuang lo.
Zan tin deuhthaw VL-i te inah chuan a leng ve thin a, engmah sawi lem lovin, midang rualin a lo lut a, midang haw rualin a haw leh mai thin a. Chutianga hun engemaw chen a len ve tak hnuah chuan VL-i nen pawh chuan an innel tial tial a, an inbe ve ta fo va.
Vawikhat hmuhnaa inhmangaih nghal ang chi hi an sawi teh fo va, mahse thil thleng zen zen niin a lang lo. Inhmangaih tur chuan inhriat chian a ngai a, hmangaih tura keimahnia engemaw bik awm turin kan hriat chian loh lakah chutiang thil a thleng ngawt thei lo fo. Chutih lai chuan a hmaa inhmangaih lem lote pawh hun engemaw chen inkawm a, duh zawng leh duh loh zawng te, ngainat zawng leh huat zawng te, titi dan kalhmang te, chhung leh khat te leh an mizia te inhriat vek hnua inhmangaihna piang a awm fo va, chutiang chu a tam zawk a ni hial ang. Chutiang chu a ni a, chutiang chuan VL-i leh Biaka inkarah pawh hian thil a thleng ta a ni ber mai.
Khawi hmunah nge hmangaih biahthu an inhlan hmasak ber tih te, a tu zawkin nge sawi hmasa a, eng hunah nge an lo inhmangaih tak tih chu thil pawimawh ber a ni lova, an lo inhmangaih a, inneih hial duhna rilru an pu chho ta tih hi a pawimawh lai chu a ni.
Hmangaihna hmasa ber hi a na a, a reh pawh a reh har an ti a, thudik tak niin a lang. Thinlung thianghlim tak, tumahin an la hliam lohva hmuamhma awm hmasa ber chuan engvangin nge a tawh nat loh tehlul ang? Sakawrekhrik danna tur pawhin taksa raldo tithangharh a, inrinna leh invenna dar vuak a nih theih nan Sakawrekhrik ve tho an thun thin an ti a ni lo'm ni?
Hmangaih dang reng reng la nei ngai lo VL-i tan chuan a hmangaih hmasak ber leh amah hmangaihtu hmasa ber Biaka tluka hlu an awm thei lova, he khawvelah hian an pahnih chauh pawhin awm se nuam a tih a ring hial thin. Englai pawhin a bula awm a chak a, an Inah chuan lo leng reng se a duh a, zan hi a ral chak a ti a, a kham thlawt lo. Chhunah an inhmuh theih loh avangin a tan chuan chhun hi a ninawm ngawih ngawih.
Chutiang chuan hun a kal zel a, a thian kawm thin te a mamawhna aiin Biaka a mamawhna chu a lian zawk tawh a, Biaka hualvel lo chuan a khawvel a vir thei lova; amah tlansan zawng phei chuan a ngaihtuahna a hmang ngam thlawt tawh lo.
Biaka bulah chuan khawvel hi a nuam a, a rilru a hlim a, engkim mai hi mawiin a hria a. Khawvelah hian thil mawi ber ber te, thil hlu ber berte nei lo mahse Biaka bulah chuan engmah dang a ngai lova, 'Hmangaih berte nena Bahra laih' an sawite chu a huam zek zek a, chu aia hrehawm pawh chu tawn dawn se, a bula Biaka a awm dawn phawt chuan a pawiti lo a ni satliah lo, a zuamin a zuam hliah hliah zawk a ni! A tel lo chuan ni te hi a sa ve ringawt a, zanah pawh a tel lo chuan thla engin awmzia pakhatmah a nei lo, lunglen tizualtu mai a ni. A thiltihna apiangah a ngaihtuahchhuak a, a mitthlaah a hmu chamchi a. A hre reng phei chu a ni lo, a hriat loh karin a lo ngaihtuah leh thin zawk a; a hre reng tluk chu a ni!!
Zan khat chu Biaka chuan, 'Innei mai ang, ni tin i bula awm ka duh, englai pawha ka ta i nih ka duh,' tiin a sawm ta! VL-i chuan Biaka chu a ngai a, a hmangaih a, a thlahlel tih a hria a, a pha lo. Mahse inneih lam erawh a lo ngaihtuah ngai miah loh a ni. Chhan dan tur a haihchham hle a, a duh loh bur chuan a thinrim ang tih a hlau a. A nihna takah chuan Biaka bula awm tluka chak a nei lo. Inneih chungchangah a rilru a la pe miah lo tih mai a ni.
A inngaihtuah a, a ngawi reng a. Biaka chuan, 'I duh lo a mi? min duh lo a mi?' a ti a, a zawt sek sek tawh si. 'A, kan la naupang si, bakah...' a sawi zawm thiam lo.
'Engnge bakah, ngaihzawng dang i nei a ni maw? Min neih i duh lo tihna em ni?' Biaka'n a ti.
VL-i chuan, 'Kan la naupang em a, ka nute'n an phal ka ring lo a lawm. Bakah, nang pawh i nute'n an phal lovang, hnathawh pawh i la nei si lo..' a ti a. Mahse Biaka a tang tlat, 'A.. min duh lova, chhuanlam i siam mai mai a nih kha. Min hmangaih a, ka bula awm i duh ve emaw ka ti a, ka lo ring sual a nih hi..' a ti deuh hmak a. A tho a, VL-i chuan sawi ngaihna a hre tawh lo, 'A....' a ti a; Biaka kal liam chu a thlir reng ringawt a.
Chumi zan tluka a inngaihtuah nasat chu a la awm kher lovang. Biaka chu a hmangaih a, a tel lova awm a theih a inring lo. A bula awm a, a nupui nih chu a duhthusam a ni. Mahse pasal nei turin a indah chhin ngam lova, a la naupang lutuk. High School chu kai ve tawh mah se pawl sawm em pawh a la pass si lo. Engtinnge a tih ang?? A thinrim a, a haw tau kha a ni a, engtinnge an awm zel ang? A la hmu duh ang em? Inhmu leh ta se engnge a sawi ang? Sawm leh ta se engtinnge a chhan ang? Innei dawn ta se... a nu leh pate'n hria se engtinnge an tih ang? A thiante'n engtinnge an sawi ang?
An inhmu leh ta ngei a, a sawm leh ta ngei mai. A hmangaihna chuan engmah a dang zo lova, eng pawh thleng dawn se Biaka chan ai chuan a thak thakin thak mai rawh se a ti ta a, 'Aw' a ti ta! Aw, kha 'Aw' kha 'Aih' lo ni zawk se tunah hian hlim takin a awm tur! A va pawi tak em!!
Inneih pangngaia innei turin kawng pangngai zawh chu Biaka'n a ngam tlat lova, mite pawhin an zawh fo, kawng bel zawk mah chu an zawh ve mai loh chuan tihngaihna a awm lo; awmdun an duh si!
Ni, chutiang chuan a ni a, zan khat thil thuah a riahna a sawn a, Biaka khum chu a khum atan a thlang fel a, a mu ve ta ran mai! Chumi zan chuan khawvela a la tawn ngai loh a tawng a, a hmangaih ber Biaka nen chuan eng ang chiahin nge an awm tih hriat theih a ni tawh lo; amahin a sawi si lo!
VL-i nu leh pate chuan an fanu chu pasal nei turin an la phal lova, Biaka nu leh pate pawhin an fapa chu nupui nei turin naupang an la ti. Thil awmdan chu siamthat theih ni tawh lo mahse, an pahniha dinhmun thlirin sawirem chhunzawm chi-ah an ngai lo. Zan khat an riak dun a, a tukah chuan an chhungte ve ve remtihnain lakhran an ni leh nghal. VL-i pawh venthawn thilah a Patea-te awmna lamah puanthui zir turin an tir bo ta daih a, engemaw chen awm turin an tir lo; 'Rei tak awm rawh se,' an ti!
--------------------------------------
Hun a kal a, a kal zel a. VL-i chuan Biaka chanchin a hre ngai tawh lo. A hmuh loh rei tawh vang a ni ang, a ngaihnate, a duhnate pawh a reh tial tial a, a hrechhuak khat hle tawh. Kum sarih lai a Patea te Ina a awm hnu chuan an khaw lamah a haw a, a thlen tirh chuan a rilruah Biaka a rawn lang zawk a! A thiante an lo lut sap sap a, a thian kawm ber thin Lawmi chuan Biaka nupui neih tawh thu te, a awm loh chhunga nupui pahnih lai a lo neih hman thute a hrilh a, mak a ti lutuk. A hmangaih thin Biaka kha chu a la hmangaih reng a, mahse nupui pahnih nei tawh Biaka erawh eng vang maha hmangaih a tum lova, a lam hawia a ngaihtuahna sen a tum tawh lo. Biaka pawh chuan chutiang chuan a en chhunzawm lo a ni ang, khawlaiah pawh an inbe ngai ta lo va.
Nula dang ang bawkin a awm chho a, Kohhranah pawh a inhmang a, nuam a ti viau zel. A hmelin a zir a, duh dertu pawh a hmu ve reng, mahse tihsual a hlau tawh a, a fimkhur em em tawh. Engemaw chang chuan hmana zan khat kha a hrechhuak thin a, a inthiamlo thin. A chang chuan mite pawh an chesual fo va, ani a nih avanga chuti lutuka a pawina a awm chuang lovin a hria a, engahmah a ngaih loh chang a awm bawk a.
Chutianga hun a hman lai chuan mi danglam pakhat a tawng leh ta.
chu tlangval chu vawikhat mah a la hmu ngai lova, a hriat mi a ni lova, a chanchin miin an sawi pawh a la hre ngai lo. A hmuh hmasak ber tumin an inbe nghal a, a miziaah chuan 'engemaw' awmin a hre nghal a.
An thawmawmte an awm lova, chu tlangval chu an thenawmte Ina len tumin a lo kal a, ruah a sur bawk si a, an Inah chuan a ko lut ta ngawt a nih kha.
Tlangval nelawm tak a ni a, a tawng duh a, a nui heuh heuh a. A titi atang chuan lehkhathiam a ni ngei ang tih a rin theih. A duh zawng leh duh loh zawng sawi ngam tur khawpin tlangval naupang a nih tawh loh bakah a awmdan atang chuan a danglam hrim hrim.
Ruah a sur reng avangin a leng ta reng a, eng vanga a album-te kha entir ringawt nge a hre lo. A entir a, a tleirawl lai thlalak a en a, 'Hei hi a va hmeltha ve, tunge?' a tihte khan a sen ap ap a, a zak hle a nih kha! A mak mang e! Nula senior a ni ve tawh a, tlangvalin an fiam nazawngah a zak ngai tawh mang lo kha a ni a, he tlangval hi chu a danglam tlat mai!
Khami ni atang khan chu tlangval chu a hre chiang tial tial a, an inkarah engemaw a awm chho zel a. A nunah tun hmaa a la hriat ngai loh hlimna engemaw riau a rawn thlen tlat a, a fimkhurna zawng zawng a sawmkhawm pawhin a lakah chuan a tuiral lo chauh a ni tho tho a, a tana khuanu ruat a nihte a ring rum rum.
Chu tlangval chu Remliana a ni.
Ani chuan kawng pangngai zawh lova kal a duh lova, VL-i chu nula thianghlimah a ngai a, a nupui atana a duh thu a sawi pawhin VL-i chuan a phu lo tih a hria a, engmah a sawi ngam lo. 'Palai ka rawn tir ang aw?' a tih pawh, ban zetin, 'Aw' a ti ta a, hmana 'Aw' a tihna ka tho kha a ni a la hman ni!
Chutiang chuan an awm ta a, fa hial an nei ta a. Nupa hlim tak an ni a, an fanu pawhin kum hnih a tling ta hial a. Khawtlangah pawh mi zahkai pawl tak niin, Kohhran leh khawtlangah a pasal chu mite rin kai tak, a theih ang tawk tawka inhmang thin a ni a, an nupa nunah sawiselna tur a hre lova, a laka a awmdanah a pasal chu demna tur a hre lo.
Tlai khat a pasal office bang rawn haw chu hlim lo riauvin a hria a, a awmdan a zawhin engmah fel lo a awm loh thuin a chhang mahse a hmelah chuan thil dik lo a awm tih a hai si lo.
Zan a ni a, an mu ta a. Ni, chutah chuan a ni, a pasal, a hmangaih em em, hmangaih theihtawpa hmangaihtu, hnathawh pawh phal lova duat taka enkawltu chuan a thinlunga thu awm a puanchhuah tak ni. Chumi zanah chuan a pasal chuan hmana 'zan khat' kha tute emaw hnen atangin a hrechhuak tih a hre ta a, awmdan tur pawh a hre lo. Van chimin rawn khuh hlup sela, khawvel hi thim mup se, thi daih se a inti a, a thaw a ipik mup mup a.
A pasal rilru nat dan tur chu a ngaihtuah a, eng ang chiahin nge a nat ang tih a hrethiam chiah lo chungin, amah a hmangaih dan a ngaihtuahin a rilru na chu tawrh a har dawn tih a hmu tlang reng a; hnem ngaihna a hre lo.
A ngawi tawp a, sawi tur a hre lo; a hre hlawl lo.
Hmanah khan 'Aw' a lo ti a, kha tawngkam khat avang khan tunah a khawvel chu tihchhiatin a awm mek em ni? He a khawvel keh chhe mek hi engtia phuarkhawm leh tur nge ni ang?
A pasal chuan a hmangaih tih a hria a, eng dinhmunah pawh ding se a phatsan dawn lo tih a hre chiang em em. Mahse he thil kher kherah hi chuan eng rilru nge a put dawn a ngaihtuah thiam lova, a ngaihtuah ngam bawk lo.
A pasal hmangaihna chuan he thil hi a ngaidam zo ang em? Vawikhat mah a la ngaihtuah ngai loh, a pasal nena inthen chu a ngaihtuah a, a ngam lo. Ngaihdam dil a duh a, chu pawh a ngam lo. Engatinge hmanah, an inhriat tirh khan a sawi loh? Ama ka ngei atangin hria se chuan a tuar nep deuh maithei a sin! Mahse chutiang chu a ni si lo, engtin nge a tih ang??
Chu zan khawhar takah chuan, zan danga hlim taka a nuihna thin khum ngeiah chuan, a pasal leh a fanu inkarah chuan, ngaihtuahna mumal nei hleithei lovin, khawhar takin a mu a. A fanu chu a en a, ani chuan engmah a hre lo. Tui takin a mu a, he khawvel buaina hian a rilru a la tibuai ve lova, chu zan reh tak hnuaiah chuan eng boruak nge inmun hre lovin a thawri sek sek reng a..
