Krismas zan a ni a, Biak Inah chuan inkhawm an thahnem hle a. Zaipawlin hla an rem a, an zaithiamin an hla sakin a zir bawk a, Kohhran mipui pawh an ngawi duk mai. Zaipawlho hla sakah chuan an rilru zawng zawng an pe emaw tih turin an ka ho hlawm a! Mahse, tlar hnung ber dawttu, bang kil lampang sir bera thu erawh chuan thildang daih a ngaihtuah thung. Zaipawl tlar hnung ber dawttu, a sir ber atanga chhiara a palina chu urlawk zana a zu inpui kha a ni ngat mai! Mak tiin a mit chu a ringhlel rum rum a, a’n nuai a, a mitvai erawh a ni lo chiang nasa mai si!

Buaina siam chi a rui thin ni lo mah se, a ruih chuan KTP hruaitute pawh ni lo, Kohhrana inhmang deuh hlek tawh chu a zah em em, a theih hram chuan hel tang tang thin kha a ni a. A zu inna hmun atanga KTP fellowship zai ri a hriat tumtea a awh ngawih ngawih thin, a tan tel vena chia a ruat si lohzia te kha a rilruah a rawn lang uai uai a. Chutianga Kohhran huangchhung ngei maia Setana’n a rawngbawltu a lo dah reng mai chu mak a ti a, engmah dang reng a rilrua a luh theih hlawl si loh avangin a zun chhuak chhuanlamin a chhuak ta daih a.

* * * * * * *

A tuktin dan pangngaiin chanchinbu zakzeh tutin a kal thauh thauh va. Kawng pengthuam, tuk tina a kalna thin, a hriat bel em em chu zei lutukin a zawh zar zar a. Chumi atanga peng kawitan (short cut) a zawh dawn chiah chu a phu zawk a! Chu kawitan bul chiaha In chu an Kohhran Upa In a ni a. Nimin zinga a kal tum khan an Kohhran Upa chuan an pal ban vel khawih pahin an pal chu pin that a hun tawh thu a sawi ngei mai a. Tukin zinga a huan pal pin thar a han hmu chu mak a ti kher mai! A pal hlui chu thiat lovin, a pal awm sa pawn lamah chuan pal ban a phun a, mawi lutukin pal thar chu a lo ping diam mai a! A huan zauhna chu inch. khat lek mah nise, chutiang hlira vawi sawm vel pal a pin thar hnuah chuan a huan chu a zau tawh dan tur a ngaihtuah thiam ve reng. Kohhran Upa thusawi thiam tak, a bialte pawh a tul leh engtik hun pawha tawng -taisak theiin chutiang thil a han ti ta mai chu mak a tihzia sawi chhuak lo mah se, mak a tihdan chu a nep chuang lo. Intlawh tawn programme an hman zana a thusawite kha.....a han sawi that pap pap tehlul vei nen leh!!

* * * * * * *

Mite angin eng ni lo mah se, nimina Office a va dawr tuma a thil va tawn kha chuan a rilru a luah reh thei ngang lo nia! Ni e, a pawisa va lak tum kha a tam lo tih chu a pha miah lo. An veng mi ni lo mah se, a va dawr-nu kha an Kohhranah Sunday School zirtirtu a ni tih a hai lo va. Meizial pet kawha, lehkhaden phawk chungin a mit sirin a lo melh rulh a. Thutna pawh kawhhmuh lem lova, “Bill chhe te hi in nei a, in rawn lang zing ve dup reuh va,” tih paha lehkhaden a sem zaih zaih kha chu fiamthu mah ni se a tih loh tur a ti ni tlatin a hria a. Mite fiamthu mai mai emaw a lo tih thin, a chungah ngei a han thleng ta mai chu mak a ti a, a titu dinhmun a han ngaihtuah lah chuan...

A thianpain a zirlaibu a hawh a va lam tum kha chu theihnghilh har a ti ve a ni ang, a sawi deuh reng mai. A thianpate thenawm lawka nu berin awrawl tawp hmanga a fate leh a mote chunga a thinrim a hrik thlak piap piap thawm kha a bengah a cham reh thei lo! Kohhran inkhawma a lam nasat theih vei nen! Tawngtai rual zan pawhin a tawp har berah a tang ziah thin kha a ni si a! A thianpa lah chuan an thenawmnu chu, “Fighter kan ti mai; a fate pawh khian an nu an chhun chuan inhauh leh vengte rel lamah chuan an ngaihtuahawm loh fa ang,” a la ti tak deuh deuh va!

Ani, Miten min chhiar, min thlir reng e....

( A ziaktu pawh hi eng vak kan ni lem lo tih hre reng chunga ziah hi a ngai thin. He Article hi 1997 daih tawh khan Kristian Thalai ah a chhuak tawh. Mahse ka'n dah leh re' re' a nih hi. @#$%)

A hming han zawt ila, Liana tih bak a sawi thei lo va. A pa hming han zawh lahin Rova tih bak sawi tur a hre lo. An veng zawt ila, a hawi ang hu hu a! An buk a, a rit êm êm ringawt lehnghal!!

A mit a siai suk suk a, lehkha a chhiar dawn apiangin a tarmit chu a kut veilam ngeiin a la thla daih zêl lehnghal a! A awmdan chu a linglet ve hle a ni tih han hrilh ila, sawi tur a nei duah zel bawk si! A dul a kiar luah a, a dul chhungah chuan engnge awm tih tumahin an hre lo. An hre lo tak tak!

Nalh deuhvin a rawn inchei chhuak ve a. A hmel han en mai chuan khawi lam model awm tha duh lo nge ni ang aw tih mai tura mawi a ni a. A kawr leh kekawrte pawh Hongkong chhuak a ni awm e! Mobile chu a kekawr iptêah emaw, a kawr iptêah emaw chuan a leng lo a ni ngei ang, a hranpain bag tê a nei a, chu chu a mobile phone dahna a ni. Ni e, mobile phone a nia lo’m. Zawt thui duh suh, handset a hre lova, cellphone awmzia a hre lo.

‘Khaw’nge i kal dawn?’ ti a an han zawh lah chuan, a mobile phone chu a tha lo a ni chek ang, ‘Khulaiah khuan, POC ka zuk hmang lawk teh ang,’ tiin a chhang a! Public Call Office awmzia a hre lova, man neia phone hmanna hmun hi atan chuan POC a ni! A chiang ve tawk!

Kuhva dawrah a lo thu a, English Premier League chanchin a lo sawi zut zut a. Concert pakhatah rui zeta Manchester United player butut Rooney a rap thu te, Gerrard-a’n Owen-a fapa thil a leisak thu te leh Maurinho-a lu meh kawlh thute chu chanchinbu thenkhatin an ziah a chhiar fuh avangin a lo sawi zut zut a; a ve hre tak em! Vawiina a thawh tur han zawt ila, ‘Ka hre lo,’ a ti bui thung a! ‘Zaninah engnge inkhel dawn?’ tiin han zawt teh, ESPN leh Star Sports Programme zawng zawng chu a sawi vek thei ta hial emaw tih turin a hre chiang a. ‘Zanin chu khawhar Inah kal ila,’ han ti thung teh, ‘Hre lo le,’ a ti leh daih thung si ang!!

America Idol chhuah laite khan top 10 mai ni lo, top 13 te a hre vel a! Hre tak hi a ni ringawt. Brad Pitt leh Angelina Jolie-te fa hming chu i hrilh ngai lovin a hre vek tawh, sawi duh suh. Mahse an YMA Branch Finance Secretary hming chu a hre leh hauh si lo. Real Madrid tana Beckhama’n free kick a pet goal tawh zat a hriat hle laiin, kumina mitthi an neih tawh zat erawh a hre lo; a hre lo hul hual!

A fai veng a. A hmel en chuan mi pangngai ni awm tak a ni. A polite ‘over’ a, a tawng seuh seuh a, a nui hek hek a; In chhung tihfai vel pawh a peih rap! Mahse chhungril lamah thildang a ngaihtuah daih a, YMA duty leh Bagha YMA in an man lohva damdawi lâk luh dan a ngaihtuah fo. Zu a in ngai lova, a rui lai hmel an hmu ngai lo. A hmabakah ‘thut’ tam tak a awm thei tih pawh a ngaihtuah ngai lo. Vawikhat ‘par chhak’ bak a rilruah a awm lo.

Pulsar chu a duh tawh lo. A chhuahna a rei tawh em mai a ti. Discover a thing a ti deuh si a, Apache a lei ta mai! Kum thum chhung a hnathawh hlawh a khawl ve tang tang atanga a lei phei chu a ni lova, a nu leh pate’n an duat em avangin a leisak zawk a ni!

A khalh thiam ngei mai! Darkar khata KM 85 tih vel chu a speed pangngai a ni a, nula phur chung pawhin a tlanchak thiam. A bike part hming a hre vek a, a helmet pawh a siamtu company a hria! Mahse thiam loh a nei a, hriatloh pawh a nei. Bawngtuthlawh a hum thiam lova, tuboh hmanga perek chhut luh pawh a thiam lem lo. Cancer te Ulcer te hi chu a enkawlna turin damdawi a la awm a, mahse Pulsar kher hi chu a enkawlna an la hmuchhuak lo tih pawh a hre lo!! Ni e, tlan chak hian thlen hma a awl tih a hria a, mahse tlan chak hian thihna kotlang a hnaih tih a hre phak lo. Khawpui chhung mihring chenna hmun leh Highway-ahte hian speed inang veka tlan tur a ni lova, tlan chak theih lam siam vek a ni tihte phei chu a la ngaihtuah chhin hlei ne’m!

Hlimhlawp thil chi hrang hrang hi he Mizo Thalai hian ‘Life’ emaw a ti tawh a ni ber lo maw?? Mahse he khawvela kan chen chhung hian kan hmuh theih piah lam ni lo, kan hmuh theih, mahse kan rilrua kan ngaihsan leh kan duh piahlamah hian ‘nun’ hi a awm a, chu chu nun tak tak a ni zawk. Hmelmawina, incheina leh a behbawm chi hrang hrang hi chu nun tinuamtu mai mai chauh a ni.

Mizo Thalaite hian kan nu leh pate ai kan la awh dawn a, tuna kan tih peih loh leh kan tih thiam loh hrang hrangte hi kan la tih a ngai dawn tih hi kan ngaihtuah phak lova. Kan ram hian eng lam nge a hawi a, khawii lam panin nge a tlan mek tih pawh kan ngaihtuah ngai hek lo. Incheina kan neih a, motor chhuak thar ber ber kan neih a hnu chu engmah mamawh nei lovin kan inhria niin a lang mek. Mahse chumi piah lama kan nihna, Mizo min nihtirtu leh kan damkhawchhuahna tur lam hian kan lungril hi engtikah tak kam ve ang maw le...??

( -15thJuly06)

Sorkar zar zovin Orissa khawpui Bhubaneshwar-ah Mizoram chanchinbu mite zingah ka zuk kal ve a. March thla chawhnu lam a nih tawh avangin keini zo thlifim dawng thang tan chuan Orissa boruak chu tawrh har tham a ni tawh a. Orissa kan luh hma chiah Pathianni (March 14) phei kha chu a lum zual bik a. Bhubaneshwar atanga chhuak chanchinbu ‘The New Indian Express’ tarlan danin hemi ni hi celsius degree 38.47 lai niin, kum 7 kalta chhunga March thla lum ber tum (Bhubaneshwar-ah) a ni nghe nghe.

Chutiang khawpa khaw lumah chuan eng dang mah rilruah a lut thei lova, tui vawt tak in khawlh khawlh reng mai kha a nuam ber. Kalna apiangah mineral water dah vawh kan lei a, kan in pup pup reng mai a ni. Chutia tuiril in hnem ta na na na chu zun a chhuak zing dup mai a, kalna apiangah Zunin ka zawng thin a, min hruaitu (guide) Ajit Kumar Moharana chuan min nuih vur vur zel lehnghal a. Zoram angin hmun tinah Zunin a awm ve lem lova, buai ruk chang a tam mai. Bhubaneshwar atanga KM 250 vel laia hla Nilgiri kan va lehlan tumin, Zunin ka zawng leh pek a. Dawr nghaktu thenkhat leh mimir engemawzat chu ka’n zawt a. English leh Hindi thiam lo deuh hlir an nih avangin kan inzawt kaw lo hle. Ka buai ruk tawh viau hnuah an District Court atang chuan Ukil, gown ha hi a rawn tei chhuak a, ka lo zawt thuai a. Zah hmel takin kan bulhnaiah Public urinal a awm loh thu sawiin, kawng thlang lama pengthuam zim deuh chu min kawhhmuh a, ‘I duh chuan khutah khuan zu chhuk la, remchang a awm mai ang,’ a ti ta ngawt a.

Bhubaneshwar atanga Puri kan pan tumin Bus-ah kan guide Ajit-a nen chuan kan titi a. Nilgiri-a ka thil tawn chu ka sawi chhuak a. Kan sawi thui zel a, anni awmnaah chuan vantlang zunin hmuh tur a tam loh thu sawiin, ‘Bhubaneshwar-ah kha chuan hmun hnih hmun thum velah chuan a awm a, man chawiin, vawikhat zunah Rs. 2/- zelin a hman theih,” a ti a. India ram hmun danga an tih thin dante kan sawi dun zel a, ‘Mizoramah chuan hmun tin deuhthawah a khat tawkin vantlang zunin a awm vek a sin,” ka ti a. Mak a ti hle tih a hmel atangin ka hre reng tawh a. Min zawh chhunzawm ngei ringin ka sawi chhunzawm duh lo ngat a. ‘Engzat nge vawikhat zunah in chawi thin?’ tiin min zawt zui ta reng a. A thlawn vek a nih thu ka’n sawi chu a meng bial hle.

A mitmeng bial leh mak ti hmel kha ka mitthla ah a cham reng a. Ka ngaihtuah chhunzawm a, mak a ti kha mak ka ti lo tawlh tawlh mai. Ani kha chuan zunin thianghlim tak, vantlang tana hman tur hmun tin maia a’n awm tur kha a mitthla ngei ka ring a. Chutiang free vek a hman theih a han ni kha keini ang, State changkang lo, thawhchhuah sawi tur nei mumal lo khawpa pachhia in kan ‘afford’ kha mak a ti a ni ngei ang. Kei lah khan min zawh zui loh avangin kan zunin te balh zia leh rimchhiat zia te, mihring ek leh damdawi bur ruak tam thin ziate kha ka sawi zui duh ta bik si lova, tun thleng hian mak a la tih a nia ka rin.

Nia, kan vantlang zunin te hi ngaihtuah peihte tan chuan lu tihai khawpa tawp an ni hlawm. Thenkhat phei hi chu a thlawn chu sawi loh, hlawh nei pawha zun duh lohna tur khawpa tawp leh tenawm a ni. Tuna kan kalphung pangngai ang hi chuan kan zunin hian hma a sawn dawnin a lang lo. Hma thar laka, kawng dang dap a ngai niin a lang.

LAD in khawlai phiat fai tur a la ang hian kan vantlang zuninte tifai a, enkawl tur hi lak a tha ang em? Thla khata Rs. 2000/- hlawha thawk peih an tam a rinawm. Thawktu tur la ta ila, chu chuan tifai sela, zunin hman man pawh mi pakhatah Re 1/- emaw a aia tam emaw pawh la ve in, a enkawltu chuan khawn nghal ta sela a that hmel em? A nih loh pawhin sorkar sum sen ngai lovin, Bazar fee khawn tur LAD in a lak ang hian an thawh ngamna zat sawiin, zunin enkawltu tur hi lak ni ta sela, thla khata sorkara chhun luh inhuam sang ber thawh tir ni ta sela, engnge a an ang? Hetianga hma kan la a nih ngat chuan Sorkar revenue hmuh belhna, a thawktu tan hlawkna, a hmangtu mipui leh khawtlang tan thianghlimna leh hriselna a ni dawn a, a tih chi hmel hle lo maw??

(A rei tawh, 2004 kha a ni tawh. VANGLAINI chanchinbuah a chhuah tawh kha!!)