A hmel ka hmuh apiang hian High School ka kai (kal ni lovin), tan tirha ka thianpa Fala, Saikhawthlir khua kha ka hrechuhak ziah. A heh a dum chel a, a ngo bik tehchiam lo bawk a. US President hi hmeltha thlanna ni se chuan a thleng sang lo ve ngawtin ka ring. Mahse a finna te, a thusawi thiamna te, mi a hneh theihnate avangin he mihring hi Democratic Party-in US President atana an vawrhchhuah tur a ni mek a; Republican lamin term hnih lai thuneihna an chan tawh avangin Democrat hun a nih hmel tawh a, Obama hi US-in mihang President a neih hmasak ber a nih hmel khawp mai.

India hmarchhak kil tawp atang pawha kan hriat lar, Hawaii-a Honolulu khuaah 1961 August ni 4 khan a lo piang a. A lai-ah hming chu ‘Barack Hussein Obama’ a ni. A pa hi Kenya mi niin, Barack Obama, Sr. a ni a, a nu hi Kansas State ami, S. Ann Dunham a ni a. Dunham -i hi America ‘USA’ a nih hma (Confederate States of America a nih lai) a President awmchhun, Jafferson Davis-a thlah kal zel zinga mi a ni a. Red Indian hnam kawlhsen, ‘Cherokee’ thisen kai a ni bawk. Obama hi a nu leh pate Manoa-a East-West Centre, University of Hawaii-a an kal dun laia an inhmangaihna rah a ni a; kum 2 a nihin a nu leh pate hian inthen leh daih.

A pa hi Kenya lamah a kir leh a, a nu hian an college-a rawn kal ve, Indonesian a nei leh a. Obama kum 10 a nih thleng Indonesia khawpui Jakarta ah an han awm nghe nghe. Kum 10 a nihin Obama hi Hawaii-ah a let leh a, a pi leh pute bulah awmin, ‘Hawaiin Lal Sikul’ an tih mai, Punahou School-ah a kal a. High School a zawh hnuin California-a Occidental College-ah kum 2 a lut a, chumi hnuah New York-ah insawnin, Columbia University-ah Political Science subject a zir zo a ni. A graduate hnu kum 3 ah Harvard University-ah Dan a zir leh a, Harvard-ah hian Harvard Law Review (Pawl hming) a mihang President hmasa ber a ni nghe nghe.

Fit ruk leh inchi khata sang Obama hian a nupui Michelle nen hmeichhe fa pahnih - Malia (9) leh Sasha (6) te a nei a. A pa hi Muslim ni mahse a nu lama a pite bula seilian a nih vang nge, Kristian a ni tlat a. United Church of Christ-ah member niin, an Kohhranah chuan a phusa pawl tak ni vein, Kohhran huangchhunga pawl an din, retheihna, sualna leh hnathawh tur neih loh vanga hrsatna sukiang tura hma latu pawlah a inhmang nasa hle. Car, Chrysler 300C (Ford Escape hybrid) a nei a. Lekhabu pathum a ziak tawh. A pa, Obama, Sr. kha Muslim ni mahse Pathian awm ringlo (atheist) niin ziaktu thenkhat chuan an sawi a. A pu (a pa pa) chu Sap (British) chhiahhlawh ni thin, Beram veng thin niin an ziak bawk.

University of Chicago Law School-a Senior Lecturer a nih laiin, 2004 khan Illinois State-ah Senator seat ruak awm chu Democratic Party ticket-in a chuh a. Amah ang bawka mihang, US Ambassador hlui Alan Keys, Republican lam candidate nen, US history-a mihang ve ve Senator atana an inbeihna hmasa ber atan inbeiin, vote tla zawng zawng za a 70 lai hmua nasa taka hnehin Senator a ni ve tan a, January ni 4, 2005 khan White House-ah thu a tiam a ni.

Thusawi thiam, mi hneh thei, ngainatawm, hlauhawm lo chuang lo Barack Obama hi 2004 hma hian mi tlem te tih oh chuan a thusawi thiamzia an la hre lo. Hemi kuma Democratic Party-in Boston khawpuia National Convention an neihah thu an sawitir a, America mipuiten an hmelhriat a, khawvelin a thusawi a ngaithla tan. President Bush-a sorkarin Iraq-a sipai a thawn luh a sawiselna, ‘Kan sipaiten kantana hna an thawh lai hian an tan kan thawk tawk lo. Engzat nge kal a, eng vanga kal nge an nih hrilh kan bat a ni a, an kal chhunga an chhungte enkawl pawh kan bat a ni. Indonaah hnehna chang thei khawp sipai tir lovin kan tel tur a ni lo. Zalenna siamin khawvel zah kan ni tur a ni,’ a tihte chu Bush-a tan a ngaihnawm hmel loh na a, America mipuite rilru hnehtu a ni. A thusawi tlip nana, ‘There is not a liberal America and a conservative America; there is the United States of America,’ a tihte phei chuan sawi chhawn a hlawh ngiang mai. Hemi tuma a thusawi hi ram ropui America hruaitute thusawi ropui ber ber zingah mi tam tak chuan anchhiar tel hial a ni.

US President hmel tha Bill Clinton-a nupui Hillary Clinton nena an inel chhoh boruak len tan tirh lai vel atang khan a thusawi chhumbung an tihchhuah (Clip) chu BBC leh CNN-IBN channel atangtein ka en nual a. Chiang taka a thusawi ka ngaihthlak hmasak ber chu Iowa-a Democratic Primary-a a thusawi kha a ni a. A thusawi thiamzia kha ropui tak a ni, tun lai tawng phei chuan sawi ila, a ‘rapthlak’ zawk hial ang. A inringtawk em em a, a thusawiah a chiang a, sawi thiam tumna hmel a lang si lo. Keini ang naupang, Jimmy Carter te, John F. Kennedy te chu sawi loh, Ronald Reagan pawh hre phak fumfe lo tan chuan US hruaitu zinga thusawi thiam ber a ni chiang khawp mai.

Amah mihang a nih bakah a hmingah 'Hussein' a tel a, Obama tih lah hi 'Osama' tih nen a inang bawk si a, a duhlo tute chuan sawichhiatna tur an zawng nasa mai. E-mail hmangtein an vau a, Israel laka US Policy tidanglamtu tur a nih thute an vawrhdarh chiam a. He thu a chhanna leh a Foreign Policy tur a sawina, AIPAC (American Israel Public Affairs Committee) hmaa a sawi kha ka ngaithla bawk a, min hneh cher cher khawp mai!

Israel leh US inzawmna chu Politics-in a tihbuai theih loh a nih thute, McCaine emaw, amah emaw, tu zawk zawk pawh tling se Israel leh US inkar boruakin danglamna a neih loh tur thu a sawi te te a; US President a nih chuan Israel himna turin a theihna zawng zawng a hman tur thu a sawi a, kut beng ri kha!! Mahse Palestinian tan pawh lawmna tur a sawi tho mai. Israel ram bung satthlaa Paletinian State din a tum thu a sawi a, Paletinian an nui var var ang tih veleh, Jerusalem erawh chu Israel khawpui a nih reng tur thu a sawi hlauh thung a! McCaine a kahnate kha a nalh a sin! 'Bush-a tanpuitute tho kha McCaine-a tanpuitu an ni a, McCaine kan thlang a nih chuan Uaiin hlui, a peng thara thun ang chauh a ni ang,' a ti! An hming a sawi kha ka hre reng ta lo, tun hmaa Jewish American leh African American ten, 'Dam leh mual khatah, thih leh ruam khatah,' an tih thin dan a sawite kha ngaihthlak a nuam a ni satliah lo, a ngaihnawm hliah hliah a, a hneh tum Juda-ho khan 'barah' khawn tak maw??

He mihring nen hian inanna kan nei miah lo emaw lo ti suh, kan nei. US President ni mai tura khawvelin a thlir Barack Obama hi a Doctor-te chuan 'Hrisel lohna a nei lo,' an ti niin BBC in a puang a. A hrisel lohna ber chu - vawi tam tak a meizial (Sikret) zuk hi sim a tum tawh a, a la thei lo!

Hmanah chuan Mizote zingah rualbanlote chan hi a chau em em thin. Khawtlang nuihzatbur an ni a, an chhungte ngei ngei pawhin mi pangngai enkawlin an enkawl ngai mang lo. An tan dam man a awm lova, he khawvel hi an awmna tura Pathian siam ve tho ni mahse an chenpuite hnen atangin lainatna an hlawh khat a, an dinhmun atanga khawvel an thlira an chan a chauh tawh vei nen, khawtlanga an chenpuite diriam an hlawh leh zel bawk si!

Mahse chu hun chuan mual a liam a, rualbanlote duatna leh lainatna kawngah 'thiam sang' Zofate pawh kan harh chho mek zel. Chu dinhmun atang chuan mi pangngaite pawhin an talent neihte pholang a, eizawn nana an hman theihna tura 'stage' buatsaih sak an nih chuan, khawvel nihphunga nun khawchhuah harsat zawkte phei chuan an talent an hman tangkai ve ngei theih a tul a, an inpholanna tur hun leh hmun buatsaihsak ve an ngai a ni.

Larna emaw, hmingthan emaw, sum leh paia hlawkna emaw um zawnga thlir tan chuan rualbanlote tana hetiang hun siamsak hi kawng tha ber leh thlannahawm a ni kher lovang. Mahse rualbanlote khawngaih leh hmangaihna atang chuan an tana hmun siamsak chu a ngai ve si a. Kolasib-a mi thahnemngai intelkhawmte chuan 'Zo Vohbik' duang chhuakin, rualbanlote tan zaia intihsiakna hun leh hmun an siamsak ta.

Mitdel, kebai, bengngawng, kut bul leh rilru lama mi phak lote an ding tlar a. Chu'ng zingah chuan kebaite tana a bika siam nawrlirh (wheelchair) a chuangin an sirah chuan pakhat a awm ve bawk a.

'Piangsual kan awm tawh lo'ng, Jerusalem tharah..
Hlim takin kan zai ang, 'Haleluiah' tiin,
Aw, ka ngakhlel em mai!' .................. tiin an zai rual dal dal a.

An thiam hran lo. Zaipawl ropui pawh a ni lo. Mahse an zai chuan a entute leh lo ngaithlatute thinlung erawh a hneh a. He khawvela beiseina nung chhi phak tawh lote'n an rilru leh tihtakzeta piansual awm tawh lohna Jerusalem thar an ngaih hla an han sa zet chuan nutling a vel a, patling hnuk a tiulh a ni.

I mit chhing chungin i thingrem chhunga i kawr leh kekawr kha lachhuak la han ha teh. A nih loh pawhin maimitchhing chungin i thenawmte inah khan han leng lut chhin teh. A harsatzia leh a hrehawmzia hrilh nawn i ngai lovang. Chu chu hun rei lo te chhung atan chauh a ni lehnghal. Dam chhunga khawvel eng hmu tawh lo tur leh chhungte hlim leh nui hmel pawh thliarhrang thei lova han awm mai tur chuh! Thim leh engin danglamna a neih loh va, awmzia a neih tawh loh chuan he khawvel hian i tan awmzia engnge a neih ang??

"Thim leh engin kan tan awmzia a nei ve lo,
Tap chungin Lalpa chenna ram kan thlir.
Kan pawnto nun a reh hunin,
'Tira mei kai' kan bang tawh ang.."

He hla hi ka hre ngai lo. Nang pawhin i hre tawh a nih pawhin i la hre tam kher lovang. Mahse he hla hian hmu ve thei lote dinhmun a hril chiang em em a. Midang ringa kawnga kal thin an nihziate, chu nun hrehawm tak a reh theih nana mittui tla chunga Lalpa chenna an thlir thin thute nen. He hmu thei thinlung hian mit nei lote ngaihtuahna a hriatthiampui lo thin a; midang kai thinte ngei pawh hian kaih ngaite dinhmun kan hrethiam phak tak tak lo. Khaw hmu lo, mitdel ngeiin a thinlung chhungrilah thildang a awm lo tih hriat tak maia he hla a sa lai han hmuh a, han ngaihthlak chuan thinlung a vit bik a sin!

Hmu theia ka awm hi thil nihphung pangngai emaw ka ti thin a, hmu theia min siamtu Pathian hnenah lawmthu ka sawi khat em em. Hmu ve thei lote tana khawvel thim turziate, an tana dam reng chunga damlaite nun tawmpui phak loh hrehawm turziate ka dawn ngai lo. Nunkhaw nuam zawk an neih ve theihna tura an tana ka neih ang ang thehchhuah ve pawh rilruah ka nei ngai lo.

Ka unau, hmu theia i awm kha lawm la, hre theia i awm kha hlim rawh. Kebai lova i kal a, duh duha i lim thei kha lawmthu sawina tham a ni tih i hre tawh a nih pawhin lo hre nawn leh teh. Chu dinhmuna awm leh cheng mek i nih avang chuan rualbanlote tana i theihnate, i rosum te seng turin i Pathianin a duh che tihte pawh ngaihtuah hram teh. Piansual awm tawh lohna Jerusalem thar kan thlen hma pawha nun khaw nuam an neih ve theihna turin tih theih i nei a, tihsak duhna thinlung nen lo pen chhuak la, i rawngbawlna puanin han zauh ve ta che. Chu chuan he khawvelah hian nun hlimna a pe ang che a, vanah pawh i tan lawmman dah a ni ngei ang.

‘Vaibelchhia’ ti thinte u, ka thusawi hi lo ngaithla ula. Ti ve lem lote pawhin lo bengkhawn ve tho teh u. He Zoram khawvel, vaibelchhe larna ramah hian vaibelchhe nei ve lote hian sawi ve theih kan nei tlem em em a, tih theih phei chu kan nei lo tluk a ni. Toilet Van-a la e ngai lo, dam chhunga e ngai lo tur hian sawi tur a nei ve tlat a, sawi tura sawm a nih hun a nghah chuan a rei dawn lutuk a, sawm hmain a ding ta mai a ni e!

Sachin leina tur
Zan khat chu mipa naupang pathum hian mi concrete In chunga rod lawr elhbungin an lo ru a. An ‘uire’ lai ngei hmuh an nih avangin lunga den tum an inhawrkhawm. ‘Sualna nei lovin deng hmasa rawh se,’ ti ve lem lovin, an thil ruk chhan an han zawh chuan, ‘Sachin lei nan..’ tih chu an chhanna hmuh a ni! A va rapthlak em! Nang ni’n ‘vaibelchhia’ in sawi laiin, in fate chuan Sachin leina tur nei lovin, mi thil an ruk phah a nih chu!! Pu te u, naupang chumchiapin Sachin lei nana rûk a rûk duh chuan, lo puitling se la, a chanvo eirutu ni a a hriat chungah eng thil tak la ti ngam ang maw??
Nau paw chunga SMS
Micro-oven hmanga ar pum in hem hmin, sap zu changkang ber ber nena in thial pawn tawlh tawlh lai khan, an awm ve tih pawh in hriat loh, a changa ‘public’ in tih, a changa ‘voter’ in tih bawk, mi za tam tak, ni lo.... mi sang tam takte chuan chaw chhum nan, sorkar plantation ami Teak thing zar ro an kuaithla a. BAFFACOS huam ve loh Phulraw ro duhin Phulraw hung an thlek an thlek a sin!

Chutiang mite chu ‘Network busy’ vangin an buai lo va. ‘Facility not available’ tihte erawh chu a awmzia hre lem lo mahse an nitin ngaihtuahnaa lut thin a ni thung. Nau paw chunga nula SMS in chhiar nuih vur vur lai khan anni chuan tuikhur tui an chhipchhuan a. Car chhuak thar ber ber hmanga meeting attend tura in tlan lai khan an chhipin buh an la phur a ni.

BAFFACOS sum tel lo pawha vawi tam in lo sah tawh, BAFFACOS hmanga in chei hnum leh tak mek Sangha dil atanga in man sangha in buk lai khan, ‘Farmer’ in tih thinte chuan an Lo-a an thar chhuah Samtawk an lo chhep hrang ve a. Sanctuary bul ami Sakhi sa in ei lai khan, hmasawnnain a zuan khum laklawhte chu phalna tel lova rawtuai chheh hnih khat an lak avangin ‘chawitir’ leh ‘man’ an ni mek si! Man an nih lai khan vaiho-in dim lo baksakin an la sât rem leh mai mai dawn tih hre ngat se chuan thih ngam lupu-in an tang ve ngei ngei ang.

Anthur-riam !
NLUP hmanga intodelhtir min tum hnuah MIP min chhawpchhuahsak leh a. Kum thum chhunga intodelhtir min tumtu, loneitute ngaihpawimawh vanga midang pawh pe duh lova ‘Agriculture Deptt. la chattu’ CM kan neih hnuah pawh ‘ngai’ kan awh tawn tawn a. A ngaihna a hriat loh avanga midang a pek leh hnu phei hi chuan ngai pawh kan awh phak tawh lo va, tha in tih apiang min chintir a. A thatna leh a hlawkna kan hmuh hmain a aia tha min sawihmuh zel a, kan tan khua a var mawlh lo.

Kum tam tak ‘Iskut’ kan chin tawh hnu hian vawikhat mah ‘Iskut Festival’ min la siamsak ngai lo va, fawrenah min la thawnchhuahsak hek lo. Mahse, vaibelchhe sawi thin nupuite’n an tuipui thar thut, Anthurium chu kar lovah Fawrenah in thawnchhuak a. Mizoram mihring hmun sawm a thena hmun kua aia tamin a hlawkna kan tel ve phak loh Anthurium chu chawimawina parthi in awrhtir a, hmun sang ber in chantir a. Chu mai chu duhtawk lovin, sum tam tak sengin ‘Anthurium Festival’ min huaihawt khum a! Keini chuan Anthurium aiin Anthur kan hrechiang zawk a, ‘thur’ kan ti zawk daih. Kan tel ve phak lohna ‘Anthurium Festival’ hi in huaihawt fo dawn a nih chuan ‘Anthur khawmpui’ kan neih hunah kan sawm ve ang che u a, phur lo takin in la tel khawp ang.

Aw khawvel!
Nangni zawng, in vannei bik teh e! Hong Kong dawrpuiah in fate kekawr bul in lei a, in duh leh Chicago-a bawng vulhna hmun min ensan a. In lungin Thames lui kamah min lensan a, kan mamawh lai takin AIIMS ah in hnungzang na entirin min kalsan vel a. In tan chuan khawvel hi a va han te tehlul! Chutih lai chuan in hmangaihte hi min han en teh u - kan khawvel hian in phuahchawp BAFFACOS bak hi a pel hlei thei lo. BAFFACOS inhlawhnaa kan thawh sawt lohziate hi kan nuihpui ve bawk bawk a. Thenawm pitar, hna thawk tawh pawha mawi lo, a tu leh faten an thawhtirte pawh kan khawngaih em em thin a; chu chu kan khawvel chu a ni.

Zan hnih kan tlaivar hnua ‘in sawi chhuah’ eirawngbawlna ‘gas’ a lo thlen changte hian kan lawm em em a, kan khawvel hi hahdam huai huai hian kan hre thin a. Kan intlar thup laia in naute’n ‘Quota’ hmanga an rawn la hmasa zut zut thin kan hmuh chang erawh hi chuan nangni leh keini inkarah hian ‘leikhi’ a awm lek lek fo va. Sawisel thei che u dinhmuna ding lo chung chung hian, kan tapchhak zawlah vut dur kan thai a, nangni leh keini inkar daidangtu hi bawngtuthlawha laih darh vek mai kan nap thin.

In fapaten ‘Zen’ an ngen a, in leisak laiin kan fapate chuan pen an ngen a, kan leisak thei lo thung a. In tu leh fate tan Computer ‘Dual Core’ in leisak a, in mitmen a tihbuai map loh lai hian keini fate chuan inkhelhnaa bun tur ‘ngal kawr’ an ngen a, kan leisak thei lo hian kan thinlung a vit a, kan mitmeng a tibuai fo mai. Nangni chuan in duh duh in nei thei a, keini chuan kan duh duh hi kan neih theih loh a ni thung a. Khawvel hi chu a mak mang e!!

Keini chan ve tur sum tam tak ‘bo’ nia an sawi thin min zawnchhuahsak thawm a awm loh lai leh, chutiang an sawi an sawi pawha in ngeng a chhun phak loh laia in Uite bo zawn dante kan ngaihtuah hian nangni khawvel leh kan khawvel danglamzia hi kan hre uar uar a, Mizo tawnga in tawng ve loh hialte hi kan ring rum rum thin!

Mizo naupang theuh theuh
Toilet Van kan hmelhriat hma atang tawh khan tun thlengin, Toilet Van pawh a din tawih leh tawh hnu thleng hian kan fate hian eng lai mahin kum tawp ekzamah result tha an la nei ve ngai lo va. Thawka phita ‘Kan ram hruaitu tur in ni’ in rawn tih leh thin kan fate hi chuan eng tikah mah in thusawi hi an hnaih theiin kan ring lo, a chhan chu maw....

Mizoram mai ni lo, India ram, ni lo, India ram mai pawh ni lo, khawvela zirna In tha ber bera in fate in dah theih laiin kan fate chuan kan khuaa High Sikul awmchhunah lehkha an zir a. Kum tam tak chhung zirtirtu awm tha duhlo deuh dahna hmuna in hman he sikul hian hmangaih leh ngaihpawimawh a hlawh tawh loh avangin a chung a pawp seng sung tawh a, ruah a sur apiangin sikul chawlh a ngai thin.

Ekzam naah khawpuia mite zawhna ang tho an chhan ve thin avangin kan fate tan hian a har lutuk tlat. A thiam thei deuhte tan pawh mark hmuh san ngaihna a awm chuang lo. Agriculture-a intodelhna zuan khuma min tumpui in tumna IT lamah phei chuan keini tan hian hmasawn vena tur a vang lutuk tlat. Zoram khaw hrang hranga sikulah hian nangni’n in In chhunga pahnih pathum in neih Computer-te hi a awm ve lo va, ‘practical’ ekzam ve turin engmah kan nei lo. Hetiang hi awm se chuan thingtlang naupang tam tak hi chuan ‘First division’ te pawh an phak ve ang chu.

Zirtirtu tha tha in dahkhawmna, facility tha tak tak in pek leh a thiam thei rual kalkhawmna sikulte leh keini, ‘Zokhua’ a sikulte hi chu min tehkhin fo tawh teh suh u. A duh duhin ‘aikal’ in rawn tir a, a duh duhin min ruihsan a, a thei deuhvin ekzam hnaih tawh lamah ‘Earn Leave’ min laksan a; kan tan chuan kawl hi a eng ve mawlh lo a ni. Mizo naupang theuh theuh, in fate leh kan fate hi khaikhin ngaihna pawh an awm lo ve, result chiat leh that hian hnuk a hlat em a kan la dam tlang mai mai chauh a nih hi!

‘Vaibelchhia’ in tih teh fo hi neih ve chhin kan chak khawp mai, neih ve erawh kan inring lem lo. Vaibelchhe tam tak in sawichhuah hnu pawha hmasawn ve hlei thei lova kan awm reng bik hi in thiam loh vek a nih pawh kan ring lo, keini lam pawh kan dik lo a ni ang. Amaherawhchu nangni leh keini khawvel inhlat ta lutuk erawh hi chu kan hria a, kan mitin kan hmu. Ni tin hian chu kan hmuh leh hriatna chu kan nunah hian a thar deuh deuh va; nangni nunah hian eng ang fakauvin nge thu a sawi ve tih hi kan hriat chak a ni. Mahse inthlan dawn leh inthlan zawh hnua in awmdan a inan loh em avang hian he kan hriat chak hi hriat theih pawh kan inring chiah lo. Vaibelchhia hian van ram a kaitir dawn lo che u tih erawh kan hrechiang a, kan tawpna tur chu a inang vek tih pawh kan hria; chu chu kan inhnemna neih ve chhun a ni.