Tawi Leh Nawi  

Ang Em?

Pathian thu hi sawi tam tur nge awih tam tur ni ang? Sawi tam apiang hian an awih tam ang em?

Pathian thu hi chhiar tam tur a ni a, ringtu chuan sawi pawh a sawi tam lo thei lo. Chutih lai chuan kan ram Kristian tam ber hian kan Pathian thu hriat zatve hi kan awih meuh ang em?

Pathianni chawhma, chawhnu leh zan; thalai tan Thawhtanni zan, Hmeichhe pualin Thawhlehni zan; chumi hnuah Nilaini zan leh Inrinni zan kan inkhawm leh thin. Kar khat chhungin Inkhawm vawi 7 kan nei thin tihna a nih chu.

Tu mahin Biak Inah thil sual kan ti ngai lova, kan that theihtawp chhuahin hun kan hmang a. Thusawituin thu chhia leh zawm tlak loh a sawi ngai lova, mahni Ina tawngtai tlem tak pawhin ngei ngeiin tawngtaiin Pathian kan pawl thin; a va lawmawm em!

Chutih lai chuan Biak Ina kan awmdan lo zawk hi Pathian leh midang hian kan nun teh nan an lo hmang zawk em tih hi zawhna pawimawh a ni maithei.

Kan Pathian thu awih leh awih loh hi Biak Ina kan awmdan aiin kan ni tin hnathawh atangin min teh ta se engnge kan an ang? Biak Ina i tawngtai rei theih lam aiin, i contract hna thawhah khan i Pathian thu awih leh awih loh teh ta se i tling zo ang em? Pulpit tlanga i mittui tla zat ai khan midangte chunga that i chhuah tawh zat khan miin i Pathian thu awih leh awih loh teh ta zawk se engnge a chhanna ni ang? Biak In lamtuala i ban vai dan aiin i thenawm khawvengte chunga i ban vai dan kha i Pathian thu awih leh awih loh teh nana hman tur ni se i duh zawk ang em? 

Coca-Cola Fakna

Nikum kum tawp lama Coca-cola in an thilsiam fakna an tihchhuah pakhat khan rilru a khawih ngawt mai.

Kha faknaah khan, "Mi tam takin kan chenna khawvel boruak chhe zel hi an ngaihpawimawh loh laiin, ni tin thing nuai 30 phun a ni thin a. Mi thenkhatin khawvel hi a tawp tawh mai dawna an rin laiin kum tinin mi nuai 50 chuangin kumthar duhsakna an inthawn bawk a. Thu ho te teah mi thenkhat an inhnialbuai laiin, mi maktaduai tam tak chuan ni tin Coca-cola an inleisak thung a ni," an ti a!

Ni, a chang chuan kan khawtlang nun te, kan politics khelh dan te, kan khawvel boruak te, kan Kohhran kalphung te thleng pawh hian beisei tur awm tawh mang lovin kan hre hial thin. A bik takin Mizoramah phei chuan kan politics kalphung leh kan zirna kalphung te hian sawi leh sel a hlawh nasa a, mi tam tak kan beidawng a ni. Chutiang chu ni mahse kan sawi loh lamah hian beiseina nung min neihtirtu mai pawh ni lo, hlimna leh lawmna min thlentu hi a lo awm ve reng zel a lo ni.

Thalai tam takin nu leh pa thu awih lovin an nun an chen a, hun lo takin min boralsan mek a. Sualna hrang hrang lo pung zel avangin kan khawtlang a muang lova, nu leh pa thinthi a mut loh chang a va tam em! Mahse, hetiang a nih mek lai hian heti zawng hian ngaihtuah ve teh ang - Kan thalaite zingah hian Missionary-a chhuah duhna thinlung nei an la awm reng a, kum tin kal chhuak kan la nei reng! Thawhtan zan apiangin he Zoramah hian thalai sang tam tak Biak Inah an inkhawm a, Krista leh  A Kohhran thuthlung chu rinawm takin an la vuan zel a sin!

Kum tin thalai tam takin khawvel sualna sang zel avangin an zirlai zir thei lovin chawlhsan mahse, kum tinin thalai tam tak an Graduate a. Kan Kohhran ringawt pawhin Pathian thu zir duh thalai, lak sen loh a la nei ziah a sin!

Sawi tur a la tam thei ang. Beidawn mai tur a ni lo ve. Engkimah lawmthu hril tel zelin, Krista leh A ram tan i thawk zel ang u.