Sahmulphah thla chawhnu lam, zan vâwt vîn tûk maiah chuan, thutthlengah duhdah takin ka mu a. Karen a awm loh avangin engmah tih theih hek loh, ngaihtuahna bâk kawm tur ka nei lo va, ngaihtuah loh atana tha zâwk thil tam tak ka ngaihtuahnaah a rawn lut tuam tuam a.

Zan a rei deuh tawh a, pawn lamah chuan tháwm dang a tam lo viau mai. Khua a vawh êm avangin pawn chhuak an tlem hrim hrim bawk nen, khuangchiri leh khauchher hram chiah chiah tih loh chu thâwm dang a awm lo. Chutiang hunah chuan ngaihtuahna a ding duh bîk a, Buddhist inserh thianghlimho lu ang maia fiah leh faiin hun kal tawh hnu a rawn inlar zut zut mai!

Mi pakhat:

Hetiang hunah hian mi pakhat ka ngaihtuah thin. Hmeichhia a ni. Chu mihring chu khawvêla hmeichhe hmeltha ber a ni lo chiang a, pian nalh ber pawh a ni lo, mah se ka hmangaih ber thin a ni a, ka la hmangaih ber ni pawhin ka hria. Hun hei leh chen a ral hnu hian ka theihnghilh ngai lo a ni lo, ka theihnghilh fo mai. Mahse, ngaihtuahna kawm hmana ka awm chang apiang hian ka ngaihtuahnaah a rawn lût hmasa ber thin a, a chhuak hmasa leh ber ngai miah lo bawk a, a mak êm êm a ni.

Hmangaihna nasat zawng hi sawia fiah thei niin ka hre lo va, hmuh theih leh teh theih ni se, he hmeichhia nena kan inhmangaihna hi nasa ber zingah chhiar tel a nih loh a tâkah! 

A hmel leh a sakruang ka duh a ni satliah lo, a thinlung leh a ngaihtuahna inlumlet dan zawng zawng te chu ka tana duan ni tlatin ka hre thin a. Ka hmangaih tih aia nasa hian ka hmangaih. Ka hmangaih ang tlukin ani pawhin min hmangaih tih hi rinhlelhna chhan tur pakhat mah ka hre ngai lo. Kan pahniha inkarah chuan lungawi lohva han thinrim derna tur eih pawh a awm lo va. Kan khua a inan loh avanga hmel leh hmai kan inhmu zing tâwk lo tih chauh lohvah chuan buaina leh harsatna kan nei ngai lo.

Biakhlatna hmangin ni tin zan tin kan inbia a, kan hma lam hun tur te kan sawidun a, duhthu kan sâm thin a. Kan inhmuh apiangin he khawvêlina hlimna a pêk theih zawng zawng changtu kan ni thin. Chu hlimna chu a vawrtawp a la ni lo va, kan pahniha pumkhat kan nih hunah chuan khawvêlin a pek theih hlimna vawrtawp kan chang dun ang a, he khawvêlah hian thlamuang takin kan awmdun tawh ang tih kan tiam thin.

Ni e, kan pahniha inkara thuthlung chu kan pahnih ngei chuan rinawm takin kan vuan dun a, thlah kan tum lo. Kan inkar pawt hnai a, thlah lova min phuartu hmangaihna hruihrual chu a lian a, a rinawm a, a rintlâk a ni tih kan chiang a; engmah rêngin a pawh then theih niin kan inhre lo. Mahse, a lo ni lo - a lo ni lul lo!

Thinlung kehsawm:

Amah chu ka nghâk a, a inpeih hun huna pumkhat nih tumin. Kei chauhvin a inpeih hun ka lo nghâk lo tih erawh hai rual a ni ta lo. Zan khat chu min rawn bia a, a aw a khur der der a, tap lo turin a intipachang tih ka hria. Keimah ang bawkin a chhungte chuan a inpeih hun an lo nghâk chu niin! Kan inkara hmangaihna awm hmu rengtu a nu leh pate chuan kan inhmangaihna aiin an fanu an hmangaihna chu ropui zâwkin an hria a lo ni! An fanu pasal tur chuan kei aia tling leh tha zâwk an lo beisei a, ka hnêna an fanu a awma a nawmna aia nuam zâwk dinhmun tur an lo mitthla a lo ni!

Ka va na êm! Chu thu ka hriat chuan ka tliak hnâwp a, khawvêl hi a zîm nghal rawih rawih a! Hmangaihna lipui mai ni lo, hmangaihna tuipui fâwn bulh bulh karah kan lengdun a. Hlim takin hma lam hun kan thlir a, beiseina nen dingdihlipin ring kan fan a. Hma lama khaw ropui tak chu kan hmu pha lek lek tawh tihin min phuartu hruihrual chu sah chahin a awm leh dawn ta maw? 

Mi tih loh dan pawh a ni chuang lo va, a chhungte remti lo chung pawhin kan hmathlir chu tihhlawhtlin a duh. A va buaithlak êm!

Ka naupan laia ka pianthar tirh khan Pathian hnenah ka intiam a, thianghlim tak leh Kohhran dan ngeia nupui neih ka intiam a nih kha. Ka bîng mup mup a, chu hmangaihna aw, mittui tla chunga sawi ngei chuan ka intiamna kulhbîngsang chu a su nghîng dawt dawt a. Pathian ka au a, a tanpuina ka dil a. Ka chhehvêl ka thlir a, ka mit sulh sulh a! Ka thiante pawhin an duhthusam nupui an nei a sin! Eng vangin nge ka intiamna thuthlung bawhchhiat ngai lova kawng tluang leh mam min zawhtir loh? Ka Pathian chu ka dem a, ka zâwt a, ka chhuahchhal a. Engmah a sawi lo, a reh vung vung a, ka dinhmun a danglam eih si lo.

Duh ila, ngam ila chuan ka hmangaih ber hi nupui atan ka nei khawp ang. Mahse, Pathian hnena ka thu lo thlun tawh chu bawhchhe turin chakna ka nei lo va, ka thinlung chhungril hian a ngam thlâwt lo. Tin, a nu leh pate min duh lo chung chung hmangaihna hmachhuana nei luitu nih kha thih hrehin ka hreh bawk. Ni, chutiang chu a ni a, chutiang chuan ni a liam a, thla a liam a, kum hial a vei ta a nih kha.

A nu leh pate duh tak pasal nei tura a inpuahchah lai te, a pasal neih dawn ni thleng te khan engkim min rawn hrilh a. Sawi tur ka nei lo, ka tuar ngawt ngawt a, ka na ngawih ngawih a ni ber mai. Phal lo chungin duhsakna ka hlan a. Hlim se ka ti, mah se ka tel lova hlim turin ka thinlung hian a phal mawlh si lo. Ka thu ni miah lo mah se phalna a rawn la thlap a nih kha. Phal lo chunga duhsakna hlan leh rilrua mangtha thei miah lo chunga ka-a 'Mangtha' tih kha a va harin a va na tak êm!

Hmangaihna thianghlim:

Pasal a nei a, fa an nei a, ka hre ve zêl a. Kei erawh chuan beisei bo chung chungin beisei loh tur ka beisei fan fan a. Tap chungin thil awm lo ka zawng a, hmu dawn lo tih inhre reng chungin nunhlui leh nunthar inkarah ka beisei hmuh tumin ka ding ni tin thin. 

Kan nunhlui ka ngaihtuah kîr fo va. Ani nena kan inhmangaihna nunkawng zawng zawng kha mi zawng zawng hmuha pholan ka zak lo va, vanram kawtchhuaha 'Big screen' a en ka ngam zak. Thianghlim takin ka hmangaih a, sualna leh vertherna tel miah lovin hmangaihna kawng chu kan zawh dun a nih kha. Chu chu kei ngei pawh hian ka chhuang a, Pathian hnenah pawh ka sawi tel kher thin. Chuti chunga kan chunga thil thleng chungchangah erawh Pathian ka dem a, a tanpuina dilin ka tap vawng vawg thin.

I hlimna chu ka hlimna:

Ni e, kan pahniha kan hlim lai khan hlim pawimawhzia leh a ropuizia kan ngaihtuah thleng pha lo va, kan hlim ve tawp mai thin a nih kha. Khatia, ui chung chunga ka thlah a, phal lo chunga ka thlir liam lai khan, "I hlimna chu ka hlimna," tiin ka thlah a nih kha. Mahse, a ni lo, a pasal nena an fa thlalâk ka hmuha ka hlim lohzia kha aw! 

Ani pawhin, "Nupui nei la, ka hlim famkim thei ang," a ti fo thin. Ni e, a dik maithei e. "Kan fate tal an la innei maithei a sin," tih thute khan rilru na a chhâwk lo va, na tur a siam belh zâwk a nih kha. 

Rilru na ngawih ngawihin Chunglam thil rel ka nghâk a. Kan pahnih chuan duan lâwk kan lo ni lo tih pawm chungin, chul hnu hmangaihna chu ka taivawn a. Kan thawnthu avang chuan ka engkim ka hloh zo va, ka beiseina a chuai a, ka hlimna chu lâk bo a ni bawk a. Chu lungngaihna khurah chuan pil hlen lo hrâm turin ka inpet ruh a, ka theihtawpin ka ban ka vai a, vaukam lam chu ka thlir hrâm hrâm thin.

Ka hlimna chu a tan hlimna a nih dawn miau avangin, a hlim loh ka hlauh êm êm thin hlimna chu ka zawn a ngai - a va makin a va lungchhiatthlâk tehlul êm! Chu a hlima tur chu ka tan hlimna a ni ve ang em? Hetiang khawpa thûka hmangaihna hliam ka tawrh hnu hian hmeichhe dang ka hmangaih leh thei ang em? Hmangaihin nei ta ila, ka hmangaih ber hlimna ka thlen dawn tihna maw?

Hmm.. I hlimna chu ka hlimna - Amen!

Mangtha

Thinlungin a phal lo chung chunga ka mangtha tawh hnu kha mangtha nawn a ngai. A chhan chu - 'mangtha' tiin ka kâ hian a sawi tawh na a, ka thinlung hian a la mangtha lo va, ka thinlung zawng zawng neitu a la nih zêl avangin ka tan mangtha theih rual a ni lo atin ni.

Hun leh kum liamin hriat loh karin min len dawr dawr a. Ka thinlunga thu leh hlimthla awm chu hre ve miah lovin hun hi a kal ngaiin a kal miah miah a. Lungkham leh hmathlir mumal nei lova kum tam ka vei hnu hian hei hi ka ngaihtuah a ngai tih ka hria - a hlim nan ka hlimna ka zawn a ngai a, chumi ti tur chuan ka mangtha a ngai - tih hi!

Mittui tla chungin SMS ka type a. Ka chhiar a, ka duh leh lo va, ka paih a, a thar ka din leh thin a! Khawvêl thara kan inhmu leh a nih loh chuan chu chu a tawpna a ni tawh dawn tih ka hria a, ka ui êm êm a, ka zuam hlawl lo. Mahse, a hlimna thlen tura ka lungngaih a ngai tih ka hriatna chuan chakna min pe a, a tawpah chuan ka thawn ta nge nge! 

A va mak em! 'Kumtluang atan - rinawmin aw' ti a thu ka thlunpui ngei chu, "Kumtluang atan, dam takin mangtha," tiin ka thlah ta zawk si! Ni, bawihte, mangtha, mangtha ber fo le.

Mangtha, Liam mai rawh,

Mangtha, dam takin;

Mangtha, liam mai rawh-

Ngaihzual, lungrun,

Mangtha, aw.. mangtha.

Mizo hla phuah thiam zinga ‘tunlai mi’ tih theih tur Zirsangzela Hnamtê hla phuah hian chhui chet leh belh chian a dawl viau thin a. A hla rua hmante hi un tak tak ni lêm lo mah se, a rualpuite hman zen zen loh hmanga a hla phuahte a chei vul chuk thin avangin tunlai mi tam tak chuan a hla thenkhat hi chu han sak chhuah leh chhiar  chhuah maiin kan chiang hlei thei lo fo.

Mi tam takin kan belh chian lém loh, a bel chiang leh nalh titu thenkhat pawhin a thu mawina leh hausakna phawk chhuak khawpa a awmzia kan hriat mang loh fo zinga pakhat chu - Sûlhnû leh Lunglèn hla hi a ni ngei ang.

He hlaa hla rua mawi leh tha tak tak a hman te hi thangthar zâwkte hi chuan a mawina leh hlutna hmu thiam khawpin a awmzia kan hre tawh lo niin a lang a; thu tluang pangngaia inhrilhfiah fe a ngai niin a lang. A hla hi han chhiar phawt mai ila - 

A leng zual thin tinkim ka dawnin,

Lentu chawi vêl tlang khan thuam luaiah;

Sirva lungrual zai thiam, lelthang ni chhun awihna,

Luite dam diai sakruang kan bualna.

Suihlunglen zual chang ni te hian maw,

Tuan ila, zolentu hring hnuaiah;

Perhkhuang awih loh zaikûng rimawi va ngai ila,

Biahthu chang mahna e, lunglen hi.

Aitenàwn par thadang tleitîri,

Zotu lawhleng thle nghial kau vuan a;

Kiva leng fang rawl ngen nui hiauva kan chhaina,

Chul thum zozam a vul chi chiai e.

Kan lenna hmingtha chuang zo lerah,

Lung tileng thal romei zam chiai e;

Fan chang niin, thuva leng mi fang mual chul awitu,

Sûlhnu chhui hi mi dawn ve che maw?

Ka hril seng ne’maw suihlunglen hi,

Hmana hlimtea lung kan rual lai;

Rihsang mual dana leng khan rawn ngai ve che maw?

Engtin tuar ve che maw suihlunglen hi?

A hla pumpui thlir hian ‘lunglen hla’ a ni tih chu a chiang reng mai a. A chang tawp bera a rawn tarlan atang hian he hla phuahtu thian emaw, a ngaihzawng emaw chu hun lo takin thihna kut vâwtin a man a ni tih a lang a. Chu a thian emaw a ngaihzawng emaw nena hlim taka hun an hman thin lai a ngaihzia chu he hlaah hian a aupui a ni ber a. A chang tawpah hian a ngaih ber mai chuan a chhang thei tawh dawn lo tih hre reng chungin a lunglen ve a ring a ni ngei ang, “Engtin tuar ve che maw suihlunglen hi?” tiin a zâwt a ni.

Mizo hla phuahtu leh ziaktu tam zâwk ang bawkin Zirsangzela lung hi ramhnuai leh ngaw dur khup mai te, tlang kara luite tui luang her her te chuan a lèn tih a hriat a. Chang khatnaah hian chutiang chu kan hmu nghâl.

Tlang leh ruam kara thing leh mau te, chutiang hmuna sava chi hrang hrang hrâm ri leh chhun ni sat vawl vawl laia lelte kiu veng vengte chu a ngaihtuahin a lung a leng a. Hah hnêpa hna an thawh zawh tawh hnua haw kawnga luite dam diai maia an han inbual lai vel te pawhin a lung a len a ni.

A thian emaw, a ngaihzawng emaw, tleirawl chhuak hlim hmel tha veng vawng chu a mitthlaah rawn langin, kawng sira ram pangpar lo par chiai mai a han thliak a, a han hnim lai te, a bula kala a han khawih dan dan  laite chu a mitthlaah a lang a. An lo thlen hmaa nikum hmasa lama lova an lo neih tawh chul deuh rap tawh hnim kara zamzo par te chuan an nun - hlui tawh hnu - chu hmaih leh thelh awm hauh lovin a ngaihtuahnaah nimin ang maia chiangin a rawn pho lang thar leh a. Vaki rual, buh vui hmasa apiang ei tuma rawn intuk khâwm ven paha helhkham leh enghelh nei miah lova an nuih awr awr laite nen!

‘Lawhleng’ hi ram pangpar chi khat a ni a, hla thu-a hmang hmasa ber ni-a lang chu Lalawithangpa kha a ni. Zirsangzela hian lunglenah Awithangpa hi a rualpui chei a nih loh pawhin, a hla thu pur châwk nan a hmang a nih ka ring - a chhan chu 'Lawhleng' tih hla thu hi Awithangpa khan Lalchani a phuahnaah a lo hmang tawh a. Awithangpa chuan, "Zokai lamah lawngleng thingsir han hmu i" a ti a, Zirsangzela pawh hian, "Zotu lawhleng" a rawn ti ve a. Awithangpa hla tho, a nupui Laltuahpuii a phuahnaah, "Chul thum zozam parin min thuai ta si lo," tih a awm a. Zirsangzela hian, "Chul thum zozam," tih hi a rawn hmang ve leh chiah a ni.

An nun hluia hun an hman tawhna hmun, an chul (lo hlui) tlangah chuan romei a zam chîk chek a. Chul ramah chuan thuro a lo mal tlat kêrh kêrh a hmu a ni ngei ang, "Hmun hlui rawn fang lehtu hi min lo hre ve em?" tiin a zâwt hial mai!

A chang hmasa pahniha a sawi chhuah loh chu a chang tawpnaah hian sawi chhuakin, a lawm nu chu a boral tawh tih a rawn tarlang a. Mitthi khua atang chuan rawn thlir ve rengin a ring a ni maithei, a lunglen ang chuan a lawm nu hlui chu lungleng ve tur tein a ngaihtuah a ni ang, a au ruai ruai a ni ber a. A lunglenna chu sawi zo sengin a inring lo va, an nun, hlui tawh hnu, a thinlunga thar reng si chu a tuar thiam lo va. A thunawnah - 

Suihlunglen zual chang nite hian maw,

Tuan ila, zolentu hring hnuaiah;

Perhkhuang awih loh zaikûng rimawi va ngai ila,

Biahthu chang mahna e, lunglen hi ...............a ti vawng vawng mai.

A lung a len tak tak chang chuan ram ngaw hring nghulh, daihlim dam dup mai hnuaiah chuan va thut hah-chawlh veng veng a châk a ni tih a lang reng mai. ‘Perhkhuang awih loh zaikûng rimawi’ a tih hi ramhnuaia sava leh hrâm thei chi tin hrâm ri niin a lang.

Mihring zawng zawng, kan Lal Isua pawh kha telin - he khawvêla piang tawh hrim hrimte hi natna te hria a, lunglen te hre mi kan ni. Mahse, he khawvêlah hian lungleng thei bîk, lungleng chungchuang thin kan awm tih chu a chiang a. Mizo hla phuah thiam tam tak hi an lungleng zual bîk emaw tih a awl thin. Mahse, a ni lo - sâp hlate hi han belh chian chuan Mizo thu leh hla thiamte aia lunglenna lama an nasat zâwkzia chiang takin kan hmu thei a ni.

Ni lo, chutiang lamah chuan kan kual thui lutuk dawn e. Amah Zirsangzela hian a lunglenna chu ramhnuaia luhpui a, ramhnuaia ri hriat theih hrang hrangte va ngaihthlâk veng veng mai a duh a. Tukkhumvilik leh Taliberh inbêngberek ri te, Tuklo hram det det te, Kawlhâwk inchhaih ri bawrh bawrh te, kawrte tui luang ri her her te, thli thâwt ruala mau leh mau innâwt ri tâwt tâwt te chu! Thlifim thaw heuh heuhvin a rawn thlen thlai leh hnim hring rim - thiang tui leh fim kâk mai hip paha chutiang ‘zaikûng rimawi’ han ngaihthlâk nawmzia tur chu! Lungleng sa ve lo tan pawh loh theih lohva lunglen bul tan nghal a ngai mai ka ti!

Ni e, mihringte hian hun leh kum ral zelin a her liampui kan nun hlui hi kan ngai vek mai a. Kan lunglenna chu kan hun tawn rei leh hmanlai thu hla emaw, tute tan emaw a tunlai viau vang emaw lam a ni lo - nun hlui hrim hrim hian kan lung a len vek tih hi zêp rual a ni lo. Awithangpa leh Zirsangzela Hnamte te anga hla chul thei lo phuah chhuah erawh kan thiam vek lo tih mai a ni.

Zirsangzela hian a hla rua pûr châwkna Awithangpa ang maiin lunglenah rual a pawl ve hle tih a lang a. Amah, hmar hla phuah thiam hmingthang, a ropui leh chungchuan anga hmar lam mipuiten kan chawi san thiam tehchiam si loh Awithangpa (Hmàrlûtvunga) hla hi han chhiar leh teh mah, a lung hi leng thei deuh a sin:

"Muvanlaiin chhawl a bang ang hian,

Aitenawn par Lalhniang tangah,

Lunglen a inbang reng e,"................ zu ti a!

Dan pangngaiin Office ka thlen ve leh internet lûtin Facebook ka hawng a, ka hnathawhna lama ka thawhpuite leh hmunpuia kan thawhpuite nena kan group ka en a, thil thar awm lovin a lo ruak hiai a. Official e-mail ka hawng leh a, chutah pawh thu thar a awm chuang lo.

Hna thawh nghâl tur mai ka neih loh avangin infiamna chanchin thar chhiar turin sports website hrang hrang ka lût a. Chutah chuan kan râwlthar chhoh ve tan tih lai atanga rawn lâr, English chhùl chhuak zinga footballer talent nei tha bera an sawi thin Paul Gascoigne, 'Gazza' ti a an koh duat, Mizo pa tam tak ang maia zu vanga tal buai chanchin ka chhiar fu pek a!

He mihring hi ka football en ve tan tirh laia footballer lâr ber, hmel tha bawk si, inkhelh thiam bawk si a nih avangin a chanchin hian min khawih lo thei lo. Zu avanga hun rei tak buai, tûn hnaiah zu chu a hneh tawh nia insawi Gazza chu dawr atanga a haw lai thla an la a, a ipte kenah chuan zu um ni awm tak thla an hmu leh a nih chu!

Chiang kuang taka World Cup ka en hmasak ber, Itlay World Cup, 1990 kumah khan he mihring hi hriat loh theih loh khawpin a lâr a. Player langsar ber chu a ni lo, mahse, semi-final-ah champion zui ta West Germany an hneh loh tuma yellow card a hmuh vanga a tap te kha ka la mitthla thei. Ni e, quarter-final-ah Belgium an hneh khan yellow card a hmu a, semi-final-ah yellow card a hmu leh a, chak pawh ni se England tan final a khel tawh lo vang. Chu chu hriain a mittui a tla a, khawvelin a hmu. English-ho phei chu kha mittui khan a vel a, an tap per pur mai. A hun laiin an tap a ni satliah lo,  England-a National Football Museum-ah zuk kal la, Gascoigne-a mittui tla lai thalâk leh a lem (puppet) i hmu ang.

English writer ropui Salman Rushdie chuan hetih hun lai vel hian The Independent chanchinbuah, "Paul Gascoigne-a hma hian tu nge tah vanga national hero ni tawh? A danglam a ni. Ani chu a tap a, khawvelin a tahpui a ni," tiin a ziak hial. Ni, English-ho chauh an tap lo, Mizorama England tantute pawh kan lo tap hial a ni lo'm ni?

Chu chauh chu ka hriatna a ni lo. 1996 European Championships kha chu ka en nasa ve hlê tawh. Scotland nen an inkhelh tuma goal ropui lutuk a khung te, a goal lawm nana field-ah thu hniam a, a ka ang a, a thianten a kaa spray an phuh lût anga an tihte kha ka hmu. Tûn hnuah kha celebration kha "Dentist's Chair Celebration" an ti tihte ka hre hnuhnawh leh zâwk. (Euro 96 hi England-in an thleng a, qualifying round an khel ve lo va. Friendly an khel nasa hle thung. Hong Kong-a friendly an khelh tumin, Gazza leh a thiante hi zanah, dentist thutthlenga thu chungin, an kaa zu an thli lût lai thlalâk chu sap chanchinbu hovin an chhuah chuai chuai a, chumi tihel nana an goal celebration hi hmang an ni.)

Euro 96-ah khan semi-final-ah Germany nen an intum a, 1-1 in hun pangngaiah an in-draw a. Hun pêk belhah Alan Shearer-a cross tha lutuk chu Germany goal ruakah Gazza hian pet lût mai thei a ni tawh a, a tlawh pha lo chiah a! Goal ban bulah a tawlh chhuak a nih kha. Ka la chiang ngang mai. Khami tuma Gazza ui hmel kha a chanchin sawi ka hriat leh ka chhiar apiang hian ka mitthlaah a rawn lang thin.

England tan vawi 57 a khel hman a, goal 10 a khung bawk. 

A tleirawl lai, Ipswitch Town, Middlesbrough leh Southampton vela a trial hlawhchham tlauh tlauh hnua lalûttu, Newcastle chairman Stan Seymour chuan a tleirawl lai daih tawh khan, "He pa hi George Best thluak nei lo zâwk a ni," tiin a lo sawi tawh a. A sawi dik ngawt mai. Football chu a thiam chiang a, world class tih ngam a ni. Mahse, a lu burah thluak fim a awm lo. A rui thei êm êm a, a tleirawl lai atangin a over-weight deuh reng mai a ni. 1996 ah nupui a nei ve a, kut a thlâk nasa thei lutuk a, kum thum hnuah an inthen leh tawp a. A lar vanglaia company hrang hrangin a signature an duh nasat avanga chutiang lam lo buaipui tur staff neih duah ngai khawpa pa hausa leh ropui kha, kum 2008 ah chuan chhiah a bat avangin a talbuai a, kum 2011 te khan London High Court-ah a kal zak zak ta mai!

A zu nghei thei lo chu amah ngei pawhin hrehawm a ti a, Gospel ni lo, camping (rehab) ah vawi sarih a lût a, a piang thar tak tak thei chuang lo. Vawiin thlengin zu chuan a la tibuai ta zêl a nih hi!

Pa pian tha, sap pachal, hmel tha si, a awmna ram mipuiin an âtchilh ber mai football thiam bawk si, hma lam hun nei êng ber zinga mi, nuamsa taka a dam chhung hun hmang thei tura vantlang ngaih Gazza te meuh zu vanga a han tal buai hi chuan ngaihtuah a tithui ngawt mai.

Mihring nunah hian insumtheihna leh tumruhna tak tak a awm loh chuan thiamna te, zir sanna te leh remchanna te hian hun rei a daih thei lo tih hi Gazza nun atang hian a lang chiang ka ti. Kum 47 chauh a la ni a, inkhèl pawh a hmunah a en peih tawh lo! A mak a ni!