L A I R I L

02.02.2012

2012-02-01T20:08:00.000-08:00

Ka fa naupang ber, ka fanu neih chhun, Vanlalthanpuii chuan vawiin atang hian Sikul a kai ve tan ta. A insiam lai thla ka la a, nuam a tiin a phur ngei mai! Ka LAIRIL luahtu hian he ka blog-ah hian post khat tal chu a phu ve alawm.

Kumin April ni 22 hian kum 4 a tling ve tawh dawn a ni.

Hei leh chen min hruai avangin Lalpa, ka lawm e.

Tawi Leh Nawi

2012-01-22T03:37:00.000-08:00

Ang Em?

Pathian thu hi sawi tam tur nge awih tam tur ni ang? Sawi tam apiang hian an awih tam ang em?

Pathian thu hi chhiar tam tur a ni a, ringtu chuan sawi pawh a sawi tam lo thei lo. Chutih lai chuan kan ram Kristian tam ber hian kan Pathian thu hriat zatve hi kan awih meuh ang em?

Pathianni chawhma, chawhnu leh zan; thalai tan Thawhtanni zan, Hmeichhe pualin Thawhlehni zan; chumi hnuah Nilaini zan leh Inrinni zan kan inkhawm leh thin. Kar khat chhungin Inkhawm vawi 7 kan nei thin tihna a nih chu.

Tu mahin Biak Inah thil sual kan ti ngai lova, kan that theihtawp chhuahin hun kan hmang a. Thusawituin thu chhia leh zawm tlak loh a sawi ngai lova, mahni Ina tawngtai tlem tak pawhin ngei ngeiin tawngtaiin Pathian kan pawl thin; a va lawmawm em!

Chutih lai chuan Biak Ina kan awmdan lo zawk hi Pathian leh midang hian kan nun teh nan an lo hmang zawk em tih hi zawhna pawimawh a ni maithei.

Kan Pathian thu awih leh awih loh hi Biak Ina kan awmdan aiin kan ni tin hnathawh atangin min teh ta se engnge kan an ang? Biak Ina i tawngtai rei theih lam aiin, i contract hna thawhah khan i Pathian thu awih leh awih loh teh ta se i tling zo ang em? Pulpit tlanga i mittui tla zat ai khan midangte chunga that i chhuah tawh zat khan miin i Pathian thu awih leh awih loh teh ta zawk se engnge a chhanna ni ang? Biak In lamtuala i ban vai dan aiin i thenawm khawvengte chunga i ban vai dan kha i Pathian thu awih leh awih loh teh nana hman tur ni se i duh zawk ang em?

Coca-Cola Fakna

Nikum kum tawp lama Coca-cola in an thilsiam fakna an tihchhuah pakhat khan rilru a khawih ngawt mai.

Kha faknaah khan, "Mi tam takin kan chenna khawvel boruak chhe zel hi an ngaihpawimawh loh laiin, ni tin thing nuai 30 phun a ni thin a. Mi thenkhatin khawvel hi a tawp tawh mai dawna an rin laiin kum tinin mi nuai 50 chuangin kumthar duhsakna an inthawn bawk a. Thu ho te teah mi thenkhat an inhnialbuai laiin, mi maktaduai tam tak chuan ni tin Coca-cola an inleisak thung a ni," an ti a!

Ni, a chang chuan kan khawtlang nun te, kan politics khelh dan te, kan khawvel boruak te, kan Kohhran kalphung te thleng pawh hian beisei tur awm tawh mang lovin kan hre hial thin. A bik takin Mizoramah phei chuan kan politics kalphung leh kan zirna kalphung te hian sawi leh sel a hlawh nasa a, mi tam tak kan beidawng a ni. Chutiang chu ni mahse kan sawi loh lamah hian beiseina nung min neihtirtu mai pawh ni lo, hlimna leh lawmna min thlentu hi a lo awm ve reng zel a lo ni.

Thalai tam takin nu leh pa thu awih lovin an nun an chen a, hun lo takin min boralsan mek a. Sualna hrang hrang lo pung zel avangin kan khawtlang a muang lova, nu leh pa thinthi a mut loh chang a va tam em! Mahse, hetiang a nih mek lai hian heti zawng hian ngaihtuah ve teh ang - Kan thalaite zingah hian Missionary-a chhuah duhna thinlung nei an la awm reng a, kum tin kal chhuak kan la nei reng! Thawhtan zan apiangin he Zoramah hian thalai sang tam tak Biak Inah an inkhawm a, Krista leh A Kohhran thuthlung chu rinawm takin an la vuan zel a sin!

Kum tin thalai tam takin khawvel sualna sang zel avangin an zirlai zir thei lovin chawlhsan mahse, kum tinin thalai tam tak an Graduate a. Kan Kohhran ringawt pawhin Pathian thu zir duh thalai, lak sen loh a la nei ziah a sin!

Sawi tur a la tam thei ang. Beidawn mai tur a ni lo ve. Engkimah lawmthu hril tel zelin, Krista leh A ram tan i thawk zel ang u.

Engtikah Emaw Chuan

2011-12-19T20:00:00.000-08:00

A vanglai chuan
Hmel tha pian nalh,
Chak leh hleitling a ni.

A tu leh fa,
Chhung leh khatte,
Rualduh zawngte tan
Thlamuantu a ni thin a,
An innghahna lungpui a ni.

Kumsul tam a lo vei a,
A taksa mawina a chuai a,
A tha pawh a lo thum zo ta.

A tu leh fa,
A chhung leh khat,
A thenrualte innghahna kha,
A tu leh fate kutah,
A innghat ve ta thung a.
Thenrual thlamuantu kha,
Thlamuan a ngai ve thung ta.

Hmanah chuan damlo a menpui a,
A bawihsawm a,
An tan hun a hmang thin.
Tuna erawh a dang zo ta.
Damlo menpuitu kha -
Menpui a ngai ve ta thung a,
Mite bawihsawmtu kha -
Bawihsawm a ngai ve thung ta.

A fate tap thlemtu kha,
A fate'n an tah khum a,
Thlem tur a awm tawh lo.
Duat taka a pawm thinte khan,
Duat takin an chul ve ta thung.

Hringnun tak hi chu aw!

Engtikah emaw chuan,
Nang leh kei -
Mite tanpui thin,
Mite thlamuan thin,
Mite bawihsawm thin,
Midang thlan lai thin,
Midang kuang zawn thin,
A ni, chutiang mi chu -
Tanpui kan la ngai ve ang a,
Thlamuan kan la ngai ve ang a,
Bawihsawm kan la ni ve ang.
Kan thlan an lai ang a,
Kan kuang an la zawn ve ang.

Chu 'engtik emaw' chu,
Engtikah nge a lo thlen ang?

66th YMA General Conference Hlimthla

2011-11-06T03:11:00.000-08:00

Kolasib-a thleng kan ni bawk a, a post awm tak ka ni. Thlalak edit leh post create chhung takngial pawh hun a lo neih loh theih viau mai! Khawnge, vawi tam ka tum hnuah, a tawp nan ka'n tum leh chhin ang e :

Pandal - A tawp zan :

Chheih! -

Pandal chhung - Big Screen

Variety Prgramme - Diakkawn Hall chhung

Celeb: Zaithiam Mimi Lalzamliani [He nu hi, hemi ni hian a hmel chhe lo teh sawng lutuk a, a thla ka laksak. Ka la tih chu a hria, ka blog-a ka dah hi a haw em lo'ng chu maw?]

Kan nulate hetianga an han inchei tawh hi chuan - khawvel hi a parvul a ni ber mai e - Zopa tan chuan...

Ei hun a awm a, in hun a awm a......

Celeb: F. Laldinmawii - Namaste, Namaste.. :)

Celeb: My Friend - TBCA

YMA Run - Pandal hma lam

Duhtawk teh ang. En belh duh tan hetah hian tlem chu ka dah bawk.

Min Tibuaitu

2011-10-16T09:23:00.000-07:00

Buai viau hi chuan thu ziah hi har ve tak a ni. Rilrua a lan ve lai pawha thil dang tih a ngaih tlat chuan, thuziah thlarau kha a lo thlawk bo ve leh mai thin a, ziak lovin kan awm zel mai a nih hi.

Kumin zet chu buaina tur a tam ngei mai. Kan Kohhranah SS Inkhawmpui, Bial Inkhawmpui leh Presbytery kan thleng a. Gospel Camping kan nei bawk a. YMA lamah, Zolentu Kutpui leh Sub-Hqrs Conference kan thleng tawh a, YMA General Conference-in min hmuak leh mek bawk. Heng ka sawi hovah hian ka inhnamhnawih ve deuh vek mai a, a chang chuan 'ninawm' tih mai a awl khawp mai!

A hnuaia mite hi han en ve mai mai la, tun hnaia min tibuaitute zinga mi, banner ka design ve te an ni e. Mite angin thiam lem lo mah ila, kan theih ve chinah Kohhran leh khawtlang tan kan inhmang ve a, kan buai ve hle a ni tih HOTUTEN in lo hriat nan ka han tarlang ve a ni e.

Loving Arms

2011-08-03T05:44:00.000-07:00

Hringnun makzia hi chu aw!

Hma lam hun thlirin ring han fan sateh thin mah ila, kan kalsan hnu nun hlui ngai hian kan kûr chang a awm lo thei si lo hi a buaithlâk êm êm lai a ni.

Mita hmuh theih leh kuta khawih theih thilte hi a hlui a, a chuai a, a vuai a, a uai a, a ral thin. Mahse chutiang hmuh theih leh khawih theih thil chuaia uai leh mai thin zinga mi ve tho thenkhat hi chu he mihring thinlungah hian a hlui ve thei tlat lo. Chu chu hringnun makna chu a la ni lo.

Kan thinlungah riak reng sela, vawng reng ila, hre reng ila, thar leh zel se kan tih ngawih ngawih thil thenkhat hi kan theihnghilh tlat thin a. Ziaka kan vawn thlap lohva hriat chhuah theih tawh miah loh thil, kan tana pawimawh tam tak chu kan ngaihtuahna atang hian paih bo a ni fo. Chutih lai vek chuan, hriat reng atana kan duh lem loh, a then te phei chu theihnghilh daih ila kan duh zawk ngawih ngawih te pawh hi he thinlung chhungril hmun khawimaw laiah hian a lo inkhawlkhawm a, a lo awm kar thin! Chu chu a ni, hringnun makna chu!

A makzia leh a chang phei chuan a ngeiawm lek lekzia hi, i mak tih ve atan leh i ngei ve lek lek tur ni lovin, mak ka tihzia leh a chang phei chuan ka ngei lek lek thinzia i hriatna tur zawkin, heti hian ka'n ziak teh ang.

Hmãnah khan hetiang hian min thinglet dawn tih hre miah lovin, ngaihngam tak leh duhthawh tak khan hun kan lo hmang thin a. Kan duh duh kan sawi a, kan nui hawr hawr a. Duhthu kan sãm a, khawvel hi kan tã, kan duh dana her danglam theih emaw kan ti ni hiala mawiin kan dungchhir vel thin a nih kha.

Ni, duh leh kan inkuah a, duh leh kan infawp a. Nghet deuhvin min kuah a, ngaihtuahna tawi tuk khawpin i kuah kha nuam ka ti a! I biang ka khawih a, ka sam i zút a. Khai! ka sawi thui thei lo. Hnai taka kan innuih lai khan, inhlat takah kan la awm ang tih kan ngaihtuah ngai lo. Mahse engatinge, inhlat taka kan awm hnu hian, hnai taka kan innuih lai kha ka tahpui a tul kher kher? Ka hrethiam lo!

En teh : 'Ka buai, engmah ka ngaihtuah hman lo,' ka tih lai tak te hian ka ngaihtuah leh tlat mai thin che hi a mak tawp thei lo! Hei, tunah pawh, ka bulah hian thuziak tura sawmna lehkha ip a let bam a. Ka email-ah pawh chutiang chu pakhat a la awm! Mahse min sawm lotu, ni e, min sawm ngai rëng rëng lotu nang ngaihtuahin a nih hi hun ka hman! Ngaihtuah tur dang ka neih lai hi chuan ngaihtuah ngai lo nang hi ngaihtuah lo che ila a pawi loh tehrëng nen, ngaihtuah loh theih lohva thar leh nunga i rawn inlár leh thin hi a buaithlak a; ka ngaihtuahna hi i va han tibuai zozai tak em!

If you could see me now

The one who said that she'd rather roam

The one who said she'd rather be alone

If you could only see me now

If I could hold you now

Just for a moment if I can really make you mine

Just for a while turn back the hands of time

If I could only hold you now

Tunah hian min han hmu thei ta mai la! Ka ngaihtuahna te hi han hre vek mai la chuan mak i ti ve ngei ang. I thiante nena in awmkhawma i tawng duh ve zia leh nuih i hehzia te kha ka ngaihtuah chhuak leh a. Tunah tak te hian i thiante nen in titi-ho em ni ang? In In chhaka Dinpuii kha a la awm a nih chuan, ni, khatah khan i len ka ring tlat! Chuti a nih loh chuan..., lembu (comics) chhiar i peihzia ka ngaihtuah tel. Nangmah chauhvin, khumah, khum mawng lam hawi zawngin, saisir deuh titih, bawk titihin sap tawng lehkhabu i chhiar ka ring deuh.

Aw...., Sap tawng lehkhabu ka ti em ni? E khai!

Chutiang thu chuan i sap tawng thiam chauh mi ngaihtuahtir thei ta pek lo! I sap tawng thiam ka hriatna khan a zir tlat alawm! Biang insi rialin lembu kan endun a. Pawl sawm zirlaiin a hriat loh ngei tura ka rin ka zawt zel che a. 'I hre lo der,' tiin, min melh raw raw a, mahse ka nawrluih che avangin i hriatzia ka hre ta zel a nih kha. Ni, khatianga thil hriat kha a lo tlo bik emaw tehrêng ni, tun thlenga khatiang thil thlen dan thleng thlenga ka la hriat tak reng le!?

Lembu en turin a daih loh hnuah khan engtinnge kan awm tak kha? Inhnaih teah, inban phak lutuk tlatin kan awm si a, kan inkuah ta a ni em? Tunah tak hian han kuah leh thei ta mai che ila! 'Ka ta i ni tiraw?' tiin zawt che ila, han nui leh ringawt mai la! Hun rei lote chhung tal chu hun hi han pawhkir leh lawk a chakawm mang e! Sana ban hi chu ka duh chen chen ka herh lêt thei. Calendar pawh ka phêk lêt ka phêk lêt thei. Mahse, ni e, mahse maw, khatiang hun duhawm erawh kha chu ka kokir thei si lova, he thu ka ziah lai ngei ngei pawh hian ka hlat tial tial zawk si!

If you could hear me now

Singing somewhere through the lonely nights

Dreaming of the arms that held me tight

If you could only hear me now!

He zan khawharthlâk takah hian, he hringnun khawvela khawimaw lai kilkär, mi tam tak ngaihtuahnain a thlen phâk loh hmun atang hian, lunglên zai sain hun ka lo hmang ve tleng tleng a. Ka bulah awm la chuan ka hla sak hi i duhzawng a ni ve a sin. Ka hria alawm, i duhzawng hla a ni ka sak ni! Ni, he hla hi, duh taka mi kuahna thin i ban ngei kha suangtuah chungin ka sa mek a ni.

Ka sawi thin kha, i la hria em? Kan thusawite hi kan sawi thiam leh thiam loh lamah a innghat lova, kan nundan pawh hi kan zei leh zei loh lamah a innghat hek lo. Kan tihtakna leh kan inpekna chinah a innghat a, chu chuan awmzia a nei ber zawk thin. Chutiang bawk chu a ni - tuna ka hla sak hi. Ka zai thiam leh ka aw nalh lam ka ngaihsak lo, chutiang chuan i lakah awmzia a nei lova, min teh ngai lo tih ka hria. Mahse, ka takna leh ka tuina erawh hi chu min ngaihthlaksak ngei ngei tur khawp a ni tih ka chiang. Min han hre phak hlauh la aw..!

I've been too long in the wind

Too long in the rain

Taking any comfort that I can

Looking back and longing for

The freedom Of My chains

And lying in your Loving Arms again.

'Eng pawh ni rawh se, a pawi lo ve,' han ti ngawt ila, engmah a ven phah der si lo! He hringnun buai leh chuar tak hi a rual chuan kan zawh tih ka hai lo, kan zawh dan leh kan zawhna hmun a inhlat ta em em mai thung a nih hi! Tih tur leh thawh tur indelh thuah tun mai hringnun ka hmachhawn a, a chang phei chuan thli leh ruahin a chhem a; a len vawn vawn ang mai hian ka inngai a. Ngaihtuahnain mu leh mal a neih loh thleng thlengin he khawvel ramzauvah hian chawlhhahdamna zawngin buai ni tin thin mah ila, ka hringnun hman dan ka chhût let chang hian, hmana min phuartu hruihrual kha ka ngai leh thin a; i hmangaihna kut ngei mai kha he ka taksa hian a ngai leh thin!

Ka ngaihtuah a, ka ngaihtuah leh thin pawh hian - a dik thei lo!

'Kawlah niin chhuah zai a rel chhung leh, pangparin par a chhuah chhung chuan, ka hmangaih ang che a, ka theihnghilh lovang che a, ka kalsan hek lovang che,' min ti a ni lo'm ni? Mahse min kalsan a, min theihnghilh a, midang i hmangaih si hi! Ka dem che, ka dem ngawih ngawih che.

Ni lo, ka dem leh lo che! Dem thei che ka ni bik lo. Khatiang thu min tiam lai khan kei pawhin, 'Kei pawh,' ka ti ve tlat si!

Hmeichhia, en teh, i nau hi!

2011-07-18T07:09:00.000-07:00

Mizoram khawpui lian deuh deuh panga thlang dawn ila, tel ve ngei ngei tur khuaa cheng, khawpui nula tih ve mai theih a ni a. Mite anga neinung ni lem lo mahse, an Inah awm sela nula pangngai tak niin, khawtlang leh Kohhranah pawh a hmantlâk pawl a ni ve ngei ang. Mahse kotu neiin a inhre tlat a, an in leh lo a chhuahsan a, hmelhriat loh karah a hun pum a hmang thung.

Thusawi tura dawhsan a rawn pan lai chuan ngun takin ka lo en a. A hmelah chuan khawpui nula hmel a lang lova, Sikserh ei bang, hmai êng pawh awm mang lo, kut no nalh nei miah lovin a rawn chhuak a ni. Chu nula chu ka thlir reng a, ka rilruah, 'Pathian hi chu a va tha em!' tih a lo lût. Missionary ni lo se Mizoram khawpui lian zinga chhiar tel khuaa veng lian ber Kohhranah hian thusawina hun a chan fo ka ring lo. Mahse chu nula thusawi ngaithla tur chuan nula leh tlangval za chuang kan kalkhawm tlat a ni.

A zir leh chhiar atanga a hriat sawi tur a nei lova, a tawn atanga a hriat erawh sawi tur a ngah lutuk. A thusawi chu a ni... a thusawi mawlh mai chu!

"Tawngtaipui kan ngai nasa em em mai, kan Kohhran Secretary meuh pawh, 'Jeremia hi engnge a nih le!?' ti mai mai khawpa ngawng kan la ni. Helaiah hian rawngbawlna tur tam tak a awm tih ka hai lo. Kan velah hian ruihhlo ngai leh suahsualna dang bawiha tang mek chhanchhuah tur an awm tih pawh ka hria. Mahse kei chu, Isua chanchin la hre miah lote hnena tirh niin ka inhre tlat a, chu chu Pathan min kohnaah ka ngai thlap a, ka kal a ni," a ti a, a kotu kohnaah a chiang a, a rawngbawlnaah chuan a nghet mar mar khawp mai.

Nula a ni a, mahse hei hi a sawi. "In chhungah inbualna siam ngaihna a awm lo. Pawnah kan inbual a, kawr ha chungin kan inbual thin. Pawn thawlenga inbual aiah tiin, cement bag ruak ka thui khawm a, ka in bulah chuan ban phunin bualin ka siam a, chutah chuan ka inbual thin. Ina awm reng thei kan ni lova, kal chhuahsan a tam em em. Tum khat chu, ka haw lehin, ka bualin chu a lo bo vek a. Vawkin min lo nawrthlûksak a lo ni. A bag-a pawh chu a ruang hlawm tur a awm tawh lova, naupangin an lo labo a ni ang," a ti.

"Ka dam lova, ka thin a thip em em a, ka khua a sik ser ser reng bawk a, mahni inlum ngaih a na duh ngei mai. Damdawiinah ka inentir a, Sikserh leh pumpuina ka lo ni. Damdawi manah pawisa a ngai tam si, min entu Nurse hnenah huan damdawi man bat ka dil ta ringawt a...."

"Pawisa ka nei lo thei hle a. Inkhawmpui leh hmun dang kan tlawh apiangin keimahni pawisaa motor hman zel a ngaih avangin a hautak ve hle. Tum khat phei chu, March thla tirah inkhawmpui kan neih avangin ka inseng ral hneh hle a, March thla laihawlah chuan cheng riat chiah ka nei ta mai! Inkhawm apiangin cheng khat ka thawh a, a daih rei dawn lo tih ka hria. Ei tur a ngai ve reng bawk si a. Pathian hnenah ka tawngtai a, a chhanna engmah ka hmu si lo. Ka thiannuin min rawn phone a, 'Kohhran pawisa kha pûk mai rawh, kei pawh ka pûk tawp mai. Hlawh lâk hunah kan pe leh mai dawn alawm,' a ti a. Ka ngam thlawt lo.

"Chawhmeh ka neih loh avangin ka zirlai pakhat, pawl 4 zirlai nen ramhnuaiah chawhmeh zawng turin kan chhuak a, Chakai man ka rilrûk a. Mahse ruah a sur deuh reng avangin lui a lo lian nasa mai a, kan daikai ngam lova; lui kama Chakawk chu kan la ta zawk a. Ipah kan beng teuh a, ka lawm khawp mai. Mahse Chakawk chu tel tel lova siam chi a nih mang loh avangin rei lo teah ka tel neih sa ka hmang zo va. Chu bakah refrigerator kan neih loh avangin a lo chhe nual bawk a, rei min daih leh ta chuang lo. Khawpuiah kalin, ka hmelhriatte hnenah puk tur ka va zawng mai dawn em ni tiin ka inngaihtuah a. Chutianga ka inngaihtuah lai chuan ringlomi nu pakhat nen kan inkawm a, kan titi tui khawp mai a, kal chhuahna hun pawh ka nei ta lova. An in atanga ka haw chu, kan Kristian pui zinga mi thenkhat chuan an dil an lo sah chu niin, Sangha, banpuam tia vel pali leh Kaikuang thahnem tak min pe ta hlauh mai. Ka lawm lutuk hi sawi ngaihna pawh ka hre lo. An haw hnu chuan ka inah chuan Pathian hnena lawmthu sawiin ka tawngtai nghal mawlh mawlh a...

"Harsatna kan tawhte hi Pathian hian a phal vek a. Kan harsatna tawhte hi Ama tel lova chinfel kan tum thin avangin a che hman ngai lo a ni. Kei pawhin Kohhran pawisa kha lo hmangin emaw, midang hnenah pawisa puk emaw ta ila chuan Pathian min ngaihsakzia ka hriat ka ring lo. Mahse a hun takah ka mamawh chu min rawn pe mai a ni. Chu chu Kristiante kan vanneihna a ni a. Harsatna pawh tawk ila, englai pawha min kalsan ngai lo Pathian kan neih avangin thlamuanna rûk kan nei tlat a ni," tiin, hmel hlim sarhin a sawi a, ka rilru a va hneh tehlul em!

Hausa ka ni lo, mahse Sangha te chu ka ei chak apiangin Bazar-ah ka lei ve thei. Ei zeuh zeuh atan chuan Chakawk te pawh a tui ve viau tih ka hre bawk. Mahse, zing leh tlaiah, hmeh dang awm miah lova hmeh atan chuan ka duh ka ring lo.

Ruah a sur pawhin inkhawm ka thulh ngai lova, khua a lum pawhin tlaia Thalai tawngtai inkhawm ka hlah phah lo. Member hlate puala tawngtai thin ka ni a, inkhawm leh hnatlang tur pawhin ka sawm thin. Thalaiin Sports kan neih pawhin member hlate kianin, chak em em chung pawhin an tel theihna a nih chuan ka kian ve thin. Kohhran leh Thalai Pawl-a tihtur min pekah ka tlanchhe ngai lova, changkang thei ang ber leh nalh thei ang bera ka hriatin ka tihlawhtling thin. Chutiang ka tih avang chuan 'ti ve hle' in ka inhre thin a, ka theih tawka rawngbawl ni a inhriain ka lungawi tawk viau. Mahse, he hmeichhia hian min tlawm, min tlawm chiang lutuk.

Missionary-in chhuak lo se, khawtlang leh Kohhranah ka kaihhruai zinga mi tur a ni tih ka hai lo. A thusawi lai chuan ka inngaihtuah a, ka zak a, ka tê ngawih ngawih a. Ka chhang rual lek a ni tih ka hria, mahse rinna lamah chuan ka ú a ni.

Lammualah Darkar 4

2011-06-30T23:41:00.000-07:00

Mizo infiammi tawh phawtin a hming an sawi hmaih theih loh, football khel tihnte phei chuan, 'Lammuala khel tawh' nih inchhuan nana an hman thin, Assam Rifles-ho lammual, Mizo mipuite 'Wembley' ve hi Astro-turf phah thar a nih hnu hian vawikhat chiah ka la lut a. Lut mai ni lovin ka inkhel a, ka inkhel mai a ni lova, mit leh beng mai ni lo, rilru leh ngaihtuahna nen a kawmkar pawh ka fang a ni.

Inkhel han tih hian, ngaihtuahna leh rilru aia tharum hmang thiam zawk tam berin an khelh thin ang khela tlan kual ve pup pup kan ni lova. Rilru fim tak hmang a, engtik huna 'hit' tur nge, eng hunah nge mahni inven a ngaih, na taka vawm hun nge a vira vawm hun tihte thlenga ngaihtuah ngaihna game, Cricket kan khel a ni. (lol)

Central YMA Sports Sub-Committee member-te leh Cricket Association of Mizoram hruaituten, Central YMA Sports-a Cricket final an khelh hmaa 'exhibition match' kan khelh a ni ka sawi ni. Inkhel han tih lemah, kan tang mar lo angreng a, kan inkhel chanchin kha sawi zui vak tur a awm lo. Amaherawhchu Mizoram a TV Network ropui ber LPS Vision-in kan inkhel lai kha lang-nghal (live) a a tihchhuah avangin a ropui ve hrim hrim a. Lammual-ah kan inkhel a ni mai lova, kan inkhel kha Mizoram leh khawvel hmun dang dangah pawh lang-nghalin a chhuak tihna a nih chu! A inkhelate kha kan ropui lo ang bawkin, kan inkhel kha kan ngaipawimawh vak lova. Inkhelh laklawh laite khan, kei ngei pawhin ka nupui ka phone a, 'Min lo en rawh,' ka ti vel a! Midang pawhin, 'Min lo hmu em?' an ti ve tho! Chutiang vel chu a ni.

Lammual ka zuk luh hlim chuan, tun hmaa zau viau thina ka hriat kha, hnim lem an phah tak avang khan a zim ta deuh riauva hriatna ka'n nei phawt a. Mahse, tun hmaa khu em em thin, a changa diak em em thin laite leh a laili nuam laite kha, 'An dang chuang love,' tih hla ang mai khan, danglamna reng reng a lo awm tawh lova. A zawl hring cham vel put mai a ni. Hmuh a nuam a, rah a hahdam a, inkhel mite tan chuan duhthusam hi a ni thawthangin ka ring.

Ramhlun leh Chanmari team-in Cricket final an khel a. Chawlh lai leh an chawlh loh lai pawhin duh duhna lai ka fang thei a. Chawhnu her ni sain dawhsan lam a rawn em hrehawm lai phei kha chuan dawhsan hnung lam kha a hlim nuam a, ka zuk tei thla mai mai a. Chutah chuan a ni, ka beisei loh thil, hmuh hrehawm tak mai ka zuk hmuh tak.

Dawhsan hnuaiah chuan bawlhhlawh chitin chitang a lo let rum mai a. Bawlhhlawh zingah chuan a hming ka hriat a kim a ni mai lo, ka hriat loh pawh a kim hial ka ring. Theitui bawm, sap zu um ruak, Mizo zu funna sarang/sahar, kuhva eina chhah sen, kuhva bawm sarang/sahar, panhnah bung, sikret bung, sikret bawm chi tin, lighter chhia, hmawlhtê, hmawlh lian, bandage chhia, bur ruak, nawhalh bawm ruak, mawza tet, pheikhawk chhuat tla, pheikhawk hrui bung, silipar hrui chat, Mama bawm ruak, Wai Wai bawm ruak, Sachin, Sikhar etc eina hnu - a tam lutuk. Hawi zawng mumal nei lovin, awmna mumal nei hek lovin an let rem rum a. Dawhsan hnuai chu a pawn lama a lan fai ang aiin a hnawk a ni mai lo, a thingzai te pawh chu a thingin a kawi-sawia, awmze nei tawh miah lova inkhai vel mai mai te, remhre lo zetin a kilh tuk tih hriat reng te a lo ni vel mai mai bawk.

Zuninah ka kal a, damdawi bur ruak leh kuhva eina chhah sen ngei nguai, ek thing kawi deuh nuaih mai nen - a va han tenawm chiangkuang tak.

Bawlhhlawh then fai leh a tihthianghlim lam chu thil harsa a ni lo tih ka hria a, ka la lungrun lutuk duh lo. Ka rilrua lian ta ber zawk chu - sipai lammuala dawhsan an siamdan chu a ni. A siamtute ka hre lova, Mizoram sorkar siam nge sipai siam tih pawh ka ngaihtuah hek lo. Ka ngaihtuah zawk chu - 'khawi hmunah pawh kan ti thei' tih tê mai kha a ni.

TV-ah sap ram leh India ram hmun changkang te kan enin kan hmu thin a, chutiang chu kan awt ve thin. Mahse chu chu he ram hian a la tlin ve si lo. England-ah khuan stadium ropui tak tak an neih hma khuan eng angin nge inkhel an en ve thin ang le? Tuna kan lammual dawhsan ang hi an hman ve mai mai ka ring deuh tlat!

Mizoram khaw tina Mizo pa awmte hian tum ila chuan Aizawl sipai lammuala dawhsan te, lung an rem ang te hi kan nei ve thei chiang khawpin ka hria. Kan tum lohna chiah hi kan theih lohna a ni awm e. Ngun takin an dawhsan ka en a, a hnuai lama an thing kilh dan te, ban an zawm dante pawh, Zopa pangngai tak tana harsa pakhatmah a awm lova, an aia nalh leh thain kan ti thei vek tih ka chiang a ni.

Kan ram hruaitute lam atangin hmasawnna hi a zuana zuang tura zirtir kan nih vang nge ka hre lo, thil tam tak zuankhuma hmasawn thut kan tum tlat a; hei hi hma kan sawn theih lohna niin a lang. Kan phak tawk thlir thiam ila, kan neih tawk hmang thiam bawk ila, Zoram khaw tin hian sipai lammual ang lek lek hi chu hun rei lo teah kan nei thei em em ang. Ropui taka stadium neih kher kan tum avangin kan naupangte hian inkhelhna tha an nei lova, an inkhel pawh khelmual kotlangah, rualrem lo lutuk atangin kan en reng mai a nih hi.

Hmasawnna hi a zuana a zuan chuan zuan khum a nei duh a. A intahtawla lo thleng chho zel a nih lohva, vawilehkhata kan zuankhum vak chuan, chu hmasawnna chu a hun laiin changkang leh tha viauvin lang mahse, khua reiah rah tha leh duhawm a chhuah duh lo viau a. Chutiang bawkin, kan neih leh theihnain a tlin piah lama hmasawn tumna hian kawng dik lovah min hruai fo bawk.

Hmasawn tur hian a kalin kal ila, kan kal chak zawk ka ring tlat. Hmasawnna zuantir kan tum hi chuan kan tlâkna lamah kan sil a, kan sil kan inbuaipui chhung hian kal bek beka hmasawn thin midang hian min lehpel thui hman tlat niin ka hria.

Thihna leh Pangpar

2011-05-20T03:38:00.000-07:00

Thihna hi khawvel tawp thleng pawha mihringin kan buaipui tur a ni. Kan thi a, kan invui a, kan insun a, kan insùnpui bawk a. Kan insùnpuina langsar ber zingah pangpar hi a tel ve ta zêl bawk. Mi engemawzatin pangpar aia thildang hmanga insùnpui chungchang han sawiri teh thin mahse sawngsawhlawtna a awm lo va, rawtna tha leh awmze nei deuhva lang pawh kan chhawrbawk chuang lo niin a lang.

Pangpar leh thihna hian inzawmna a nei em tih hi mi tam takin an lo ngaihtuahin an lo chhui tawh. Mihring ruang rimchhe tur vênna atan pangpar rimtui hman hi hman tak tak, Neanderthal hun lai atang tawh khan an lo ching tawh ni a sawi a ni. Chu chu 60000BC vel daih tawh kha a ni.

Hetiang hian mihringte chuan kalpui zelin, AD 1800 vel thleng kha chuan insunpuina lam thilah erawh hman a la ni mang lova, mihring ruang tawih rimchhe dan nana hman a ni deuh ber.

Khawvela sakhuana upa ber ber zinga mi Jewish leh Islam te chuan thihna chungchanga pangpar leklam hi an ti vak lova, phal loh erawh a ni lo. Jewish Custom-ah chuan sunpuitute chu mitthi chhungte tana thil tangkai dang keng khawm turin an inti a. Islam Custom-ah pawh pangpar hi an chawisang tehchiam lova, amaherawhchu tih dan hrang an ngah avangin a uar pawl erawh an awm tho.

Bhuddist-ho chuan pangpar inpêk hi tih dan phungah an ngai hmiah a. Kristian sakhaw zuitute zingah tih dan hrang a tam mai thung. Catholic hovin pangpar hi an chawilâr hle a, a langsar laiah an dah nasa thin. Tih dan leh hman dan a inang lo viau chungin, Kristian sakhaw zuitute chuan thihna kaihhnawiha pangpar inpêk hi tih danah turah an ngaiin an hmang deuh vek. Hindu-ho pawhin tih dan phungah an neih chiah lo na a, an uar ve tho.

1950 kuma Iraq rama Ralph leh Rose Solecki ten Shanidar Cave an laihchhuahah chuan kum 60000 lai liam tawha mitthi ruhro an hmu a, a bulah chuan pangpar chi an hmu.

Egypt-ho chuan mitthite chu pangpar nen an phum thin a. Greek-ho chuan mitthite chu pangpar an khumtir a, an thlanah pangpar an dah bawk. Rome-ho chuan mitthi vuina hmanruate chu pangpar leh hnah hmangin an chei thin.

Medieval hun lai chuan Europe-ho chuan mitthi thlànah pangpar an dah thin a, rose leh lili an dah tlangpui.

America President te zinga hmingthang ber Abraham Lincoln-a thih khan America ramah, thihna chungchanga pangpar dinhmun a tidanglam vek a. Khatih hun lai khan America-ah chuan lusun chhungte hnena pangpar pék hi an la ching ngai mang lova. Mahse Lincoln-a kha mimal leh pawl tam takin pangpar an thawn miau avangin dah lansarh loh theih a ni lova, chu chuan America ramah lusun chhungte hnena pangpar inpek a tilár ta hluai ni a sawi a ni.

Mizote hian eng tik atang khan nge lusun chhungte hnena pangpar pêk hi kan chin tan tih hriat mai a har deuh thei a. Eng huna inpe ve tan nge kan nih a, eng hun lai vel atanga uar ta nge kan nih tih lam aiin, pangpar inpêk hi a sawngsawhlawtna a awm em tih hi ngaihtuah ngai lai tak chu a ni zawk ang. Pangpar hi eng vanga inpe nge kan nih? tih lai hi a pawimawh lai niin a lang.

Pangpar kan inpêk hian, tun laiah chuan pangparah khan a petute hming inziak lehkha kan chilh tel ngei thin a, hei hian chapona rawng a kai lo maw? Chapo lo taka pe ni a kan inhriat lai hian, pangpar kan pêk hian kan tih tur tlâk ta huaiah kan inngai em? Mite'n kan pe tih hre ngei se kan duh vanga kan hming tar kan ni nge, mitthi chhungten kan pe tih an hriat theih nan kan tar?

Pangpar hi a mawi a, mihringte tana Pathian siam a ni ngei mai. Chutih lai erawh chuan lusunte hnem tur leh chhawmdawla tanpui turin a tling tawk lo. Tun laia kan pangpar inpêk tam zawk hi a lem a ni nghe nghe. Rimtuina a nei lova, a mawina leh a lansarhna lo hi chu inpêk chhan dang vak a awm hmel loh. Mitthi sùnna atana pangpar kan inpêk khawmte hi a hnu lamah hmanna tur a vang. Bang kilah, khawro zetin a awm vel mai mai a, chumi hnuah chuan bawlhhlawh bawmah a awm leh nghal mai a ni.

Pangpar kan inpêk hian, pangpar zuarte tih loh, a petu leh kan pêkate tan hian hlâwkna leh hnemhnânna a vang khawp mai. Mitthi an awm a, pangpar petu a ngah leh a zuartu a hlâwk ting mai a. Sum leh pai kan sènna hian mitthi chhungte lakah awmzia a neih lohva, kan insènsona chuan inzawmna nei miah tawh lo a zuartu tan chauhva hlâwkna a thlen si chuan ngaihtuahna thar sen a ngai tihna a ni lo'ng maw?

A lem a ni emaw, a tak a ni emaw; pangpar kan inpêk thinte hi cheng za man aia tlawm a awm mang lo. Chuti a nih chuan pangpar sawmnga dawngtu lusun chhungkuate hnenah hian pangpar ni lo, a pawisain pe ta ila, cheng sangnga lai a lo tling ang. Medical Re-imbursement Bill la ve thei lote tan phei chuan pangpar mai mai ai chuan a hlu lutuk dawn tih a lang reng.

Pangpar kan inpêk hian a dawngtu lamah awmzia a nei miah lo tihna a ni lovang. Lawm êm êm lo mahse, mihring nihphungah thilpêk petuin a pêk chu a dawngtu chuan lãwm tak a a dawn mai hi tihdan mawi a ni. Chutiang a nih avanga tun thlenga lãwm taka pangpar la dawng ta zél kan ni em tih erawh sawi hleih theih a ni chuang lo. Amaherawhchu, ngun takin ngaihtuah ila - 'Nang malsawmna ni ang che' tih thu sawia nunpui tura inzirtir thin Mizo Kristian, tlawmngai hnam inti Mizote tan hian, mite tangkaipui hleih loh pangpar inpék reng ai chuan, an tangkaipui zui ngei ngei tur, pangpar man zât tho thildang emaw, a pawisa emawa inpêk hi thil tihawm tak niin a lang. Mizo kan ni a, Kristian kan ni bawk si a.

Inpuanna

2011-05-05T02:28:00.002-07:00

Ka pianna pawh eng ual a nih loh nak laiin, ka parvul lai leh ka taksa pawh a nalh ve lai takin min thliak hmawk hmawk a. Pitar ke khi bal hrih hreihin min han chil hrep mai a. Chumi hnuah, rapchungah, mei khu ur lai tak maiah min dah a, chutah pawh chuan em tha pawh chang zo lovin, pate awng sir siarah min han dah lehnghal a! A hrehawm dan a thuahhnih ngei mai.

Chatuan hi engtia rei nge tih ka hre lova, mahse chatuan tling lo deuh min dah hmanin ka hre hial. A tawpa tawpah chuan min la thla ve ta hram a.

Mahse, 'A zual zapui vaihlenhlo' tih ang maiin, ka hrehawmna chuan kian lam aiin zual lam a pan zel mai lehnghal a. Ip tha pawh chang zo lovin, buara ipah, dim lo baksakin min han hnawh lut a. 'Khawiah chuan min kalpui dawn ni maw!?' tia ka ngaihtuah lai tak chuan min chawi lawp a, motor hnung lamah (a seat pawh chang lo) chuan min han vawrh lut rawk mai a. Hetiang reng renga retheih leh hrehawm hi peih lovin duh lo hle mah ila, ka tana khuanu ruat emaw tih mai turin ka retheihna lah a zaul tak tual tual a!

Chutia hrehawm ti taka ka inngaihtuah lai chuan ka chuanna motor chu a ding chut a. Min han theh thla thuai mai a, chutah chiah chuan a ni, ka hrehawmna chhumpui chuan min kian san a, ka tana vanneihna ni a thlen tak ni. Min dahna khuate chuan min lo tiretheiin min tiduhdah hle ang chu... 'Eng ang takin min nghaisa leh ang maw?' ti a ka lo huphurh ruk em em laiin, chutiang reng reng a lo ni ikhaw lo mai chu... hringmite anga fuke nei te zawng ni ila, pheikhai vawrin chawnban ka phar nasa hle ta ve ang.

Min hmu apiang mai chuan duh em emin min fawp ngawih ngawih zel a. Kei lah chuan a tu amah chu ka lo hnar chai mai si lova. Hnar a hnekin an duh ang chuan ka awm zel mai zawk si a. Naupang nikhaw hre chin atanga puitling, pitar putar thleng chuan mn duh em em vek mai a. Chutih hun lai na na na chuan hmeltha hmingthang Lianchia meuh pawh kei aiin a 'luck' bik ka ring hauh lo.

Chutia min hmangaih a min duh em em tute chu kei chuan ka hmangaih ve thei tlat lo mai pek a! Engati tehreng emaw ni, an chhiatna tur hlir ngaihtuahin an thluakah chuan hri bawlhhlawh pui pui ka tuh ta hmiah hmiah mai a.

Min hmangaih em avangin ka thiltih tha lote chu an hmu thei lova. An tan hri tha lo thlentu ka ni tih an han hriat meuh chuan a lo tlai lutuk tawh thin.

Thenkhat erawh chuan an tan hri thalo thlentu ka ni tih an hre reng chung pawhin ka hmel hmuh leh ka bula awm an chak vang hrim hrim pawh ni chuang lovin, 'rual pawl lo,' nih duh loh vang te, thiante tih ang tih ve duh hrim hrim vang te hmachhuanin an In chhung lumah chuan min hruai lut leh nge nge thin.

Chutiang taka mite duh leh hmangaih chu ka hming pawh i hre duh vein ka ring a; ka hming chu zokhaw rim nam lo ngat, VAIHLO a ni.

------------------------

Tlangval laia ka ziah a ni. Ka ziak tih pawh ka inhre tawh lova, ka lehkhabu hlui ka hai a, exercise bu te pakhat, hlui tawh tak, a kawm pawh awm tawh lovah hian, he ka thuziak hi ka zuk hmu a. 1995 February ni 11 a ka ziah a lo ni a!

Summer of '69

2011-04-15T00:06:00.001-07:00

Sangkhat zakua sawmruk leh pakua nipui lai kha chuan, ka pa pawh kum sawmhnih leh pathum mi chauh a la ni a, ka nu nen pawh an la inngaizawng kher lo maithei. Chutiang chu ni mahse, tun lai chu Canadian zaithiam Bryan Adams-a hla, 'Summer of 69’ hian lunglen a kaitho ve tlat mai!

A hla thu hi lehlin leh sawifiah emaw, faksel leh chhui zau emaw ka duhin ka tum pawh a ni lo. He hla hi tun hnaia ka ngaihthlâk chauh pawh a ni hek lo. Keimah ang Mizo tleirawl dang pawhin, 1993 leh 94 chhova an ngaihthlak hnem he hla hian nun hlui ramah min hruai kir a. Tu ma hriat pui lohva ka ngaih veng veng \hin kha puang chhuak lovin min awmtir thei lo a ni ber mai awm e!

Heti hian a ti a -

I got my first real six-string

Bought it at the five-and-dime

Played 'til my fingers bled

It was summer of '69

Eng kumah chiah nge \ing\ang perh hi ka thiam ka sawi thei tawh lo. Ka zaipui theih hla hmasa ber erawh ka hria - ‘Ka Dawn Thin Ropuina Ram Khi' tih kha a ni. Khatih hun laia kan thiam hmasak ber ngei ngei chu 'D Key' a ni fo. Kei pawh ka thiam hmasak ber chu 'D Key'!

Ka pa te, ka patea te ang thovin ka u pawh zai nasa ve tak, KTP \ing\ang kawl phâk a ni chho ve a. Chutiang chhungkua a\anga zi chhuak na na na chuan mahni lunglen hnawt bo tawk hla sak tur chu kan hmet rem thei ve thuai mai a. Keimahni puala kan \ing\ang neih hmasak ber kha - mi ta hlui chu a ni ngei ang - lian bur mai, a ban kul deuh tawh lam a ni a. Ka pa, mistiri khan engtin tin emaw a siam a, hmeh harsa vak lo chuan a chhuah ve mai a. Kha kha ka perh nasa \hin.

Me and some guys from school

Got a Band and we tried real hard

Jimmy quit and Jody got married

I should'a known we'd never get far

Chutih lai chuan kan \henawmah, ka kum rualpui mipa pahnih, Zova leh Nguna (A hming pum pawh ka hre tawh lo! 'Nguna' tih ngawt mai khan kan kovin kan sawi \hin a nih kha) te an awm a. Zova kha thiam ngah zet mai, tape recorder chhiate pawh hawlh nawk nawka hawlh \ha ve zel, \ing\ang pawh keini ai daiha thiam, 'Pa pa Kehte Hein' pawh rem thiam hmasa kha a ni. Nguna kha a thlahtute lo chawr chhuahna chu Burma lam niin, ani pawh khan \ing\ang han khawih vel chu kei aiin a hnehsawh.

Kan pathum khan, \ing\ang kan nei vek bawk a, hunawlah kan perhho \hin. Hla hrang hrang kan sa a, kei, a zai thiam ber (keini pathum zingah chuan..lol) ka ni a, ka sak thiam tam ber Pathian fakna hla kan sa hnem. Lengzem leh lenglawng kan sa a, vai hla leh sap hla pawh kan sak pawlh vek.

Qayamat Se Qayamat Tak (QSQT) lar lai, Amir Khan leh Juhi Chawla te kan star rawn lai kha a ni bawk a, 'Papa Kehte Hein' kha kan sa nasa. A tirah chuan ka rem thiam lova. Zova, vai hla hre ber mai kha zingah a rawn chhuk. Kan kawta ka \hu lai chu, '|ing\ang zu la chhuak rawh, Papa Kehte kha ka rem thiam tawh a nia,' a rawn ti. Kan han inzirtir a, a remdan dik taka han rem chuan sak pawh a lo nuam nangiang.

Kut themthiam Zova chuan drum set a lo siam a. Tel \in hawnna hi a chik pawp a, chutah chuan alluminium zai sin a khai far a. Han vuak chuan drum set tak taka cymbal ri ang ve tak a ni. Engtin tin emaw bass drum turte a lakhawm a, a rahna (pedal) te pawh pawhfan leh thingzai bungin a siam ve thlap bawk a. Hollow Guitar vek kan neih avangin duh angin a ring tawk lova. Amah Zova bawk khan tape recorder chhiaa thirhipthei lakhawmin, thirzaisin nen, engtin tin emaw a ti vel a, 'magnetic pickup' pathum a siam leh mai a. An sound box-ah kan vihzawm a, kan concert thei chu a ni ta reng mai!

Oh when I look back now

That was seems to last forever

And if I had the choice

Ya - I'd always wanna be there

Those were the best days of my life

Kan veng-a Horticulture deptt-in staff quarter an sak thar, tuma la luah lohva ruak huai mai, lian leh zau \ha takah khan kan in\uk khawm a. Kan veng chhung naupang leh \halaite tan mahni pawisa neih ang anga en theihin kan han concert ve ta a nih kha. A \henin cheng hnih an rawn keng, chengkhat zawr deuh te pawh. Naupang deuh chu thingfâk pawh kan pawmsak. 'Di Chambawihpui' hla kan sa hnem ngiang mai. Keimahni hla phuahchawp,

'Lo infeng chhing tiu teu la,

I pawnfen hnuai var te reuhte nen.

|ap \ap suh, a ho mai mai,

I \ah zawhah i nui leh dawn si.

Awih la, awih suh la darling,

Marry Me please!

Awih ve mai \hin la Parte,

I Love You,'

tih hlate kha kan han sa a! A chang dang a awm chuang lova, a entuten an duh a, a satuin ka sak peih bawk chuan kan sa nawn sek mai a ni! A va han nuam \hin tak em! Keini aia nau deuh, David-a a awm a. Ani kha eng hla pawh, a second part lo sa zel thei, a solfa dik leh dik loh chu thuhran, bei nalh ve thei zet kha a ni a; min pui turin kan la a. Thlan tla phungin kan zai ve \hin a nih kha! Ni, khatiang hun kha! Ka thu ni se chuan khatiang hun kha ni reng mai se ka duh. Ka nuna hun \ha ber leh nuam ber a nih leh nih loh ka sawi thei lo, mahse khatiang hun kha chèn leh thei dawn ila chuan ka la peih. Ka la peih tak tak.

Ain't no use in complainin'

When you got a job to do

Spent my evenin's down at the drive in

And that's when I met you

Standin’ on ya mama's porch

You told me that you'd wait forever

Oh and when you held my hand

I knew that it was now or never

Those were the best days of my life

E heu! Hei chuan hmangaihna lam a hawi lo maw? Ni e, ni rawh se. Kai\en a ni emaw, kailawn a ni emaw, leikapui a ni emaw, porch a ni emaw, a dang chuang lo. Kut vawn vawng vawng te pawh kan neih ve chian kha! 'Innghâk zel ang, khua rei mah se,' tihte pawh kan sawi kha. Mi \henkhatah chuan hlen loh thutiam ni mahse kan tiam ve ngei alawm! Chutiang te chu hringnun kalphung a ni ve hrim hrim zawk a ni lo'm ni?

Man we were killin' time

We were young and restless

We needed to unwind

I guess nothin' can last forever, no

And now the times are changin'

Look at everything that's come and gone

Sometimes when I play that old six-string

I think about ya wonder what went wrong

Ngaihtuahnaah hian thil dang leh thu dang a awm tam lo. Kan pawisa tlém te chu thingfâk kan hmuh kan hralhna te nen kan belhkhâwm a, sa kan lei a. Banglalui mawng lamah, pialtlêp nuam leh rai \ha deuh kan zawng a, kan zuk picnic a. Lung hi a awi êm êm ringawt mai.

KTP lamah kan han ti chho va, rimawi remna lam kan han vuan leh chat a. Chutianga hun engemaw chen kan tihho hnuah, Nguna kha chu a per hrang ta a. Zova nen erawh chuan kan la kal \hiang reng. Sub-Division (chutih lai chuan SDO (C) hnuaia awm kan la ni) huap 'Solo & Beat Group Competition' an nei dawn an ti a. Zova te nen pawh kan phur. Bandh kan din a, a hmingah phuah tur an hre mai lo. Ka hre bik vak lova, ka hawi ka hawi a. Kan tape recorder hma lama thu inziak, 'Megahertz' chuan ka mit a la ta riau a, chu chu ka phuah ta a, kan ring ta.

Khatih laia Kolasib-a bandh lar, Dart Zader-ho rimawi remna bungrua hawhin kan inzir tlut tlut a, kan ri nasa thei teh e! Zan khat phei chu kan guitarist (rhythm perhtu) pakhat Tesena (Hmanni mai khan Chatuan ram min pansan ta!) te In hnuai, Govt. Kolasib College bul maiah khan kan zir a. Zan dar 11 vel a ni ta awm e. Kawngkapui a rawn inhawng rawk a. Pa sa \ha tak hi thinrim hmel tunin, a kut dinglama chempui kengin a rawn dâk! 'Tàwp nghal rawh u, min ti muhil thei hlei ném,' a rawn ti! Nuih a za duh lo teh e!

Michael Learns to Rock (MLTR) lar lai kha a ni a. Inelnaah khan hla pathum - sap hla pahnih leh Mizo hla pakhat bakah, sound enchhin nana sak tur pakhat a ngai a. Sound en nan khan MLTR hla 'Someday' kha kan han hmang ngei a! Tleirawl lamin an thiam a ni a, kan sound 'check' na pawh kha a hit nghal viau mai. Ugly Kid Joe hla - Everything About You kha kan sa bawk a, chumi zawhah Pink Floyd hla - The Wall kha kan sa bawk. Mizo hla pakhat, Zova phuah, 'Nui mawi, vangkhua zawng i mawi ngei e,' tih kan sa bawk. Kan Bandh kha pathumna kan ni a, Rs. 500/- lai kan hlawh ve tak a sin!

Mahse hetah hi chuan ka zai lo. Khuang ka vua.

Kan che chhe lem lo bawk a. Kha contest hnu lawk khan North East mai ni lo, India ram huap pawha hming lang tham, Drixian Empire-ho rawn concert \umte khan 'opening act' min neihtir ve hial a sin!

Hrisel veng vawng lai, hawina lam apianga hlimna tur hlir a nih lai kha a ngaihawm a ni. Rimawi a rîk tawh kha chuan kan za vek a, khawvel thildang hian min tibuai phak tawh lo. Ni, kan kal thui dawn leh dawn loh kan ngaihtuah lova, a hun laia nawmna khan min chiah hneh a, min chiah zawp a ni ber mai.

Zova pawh Assam Rifle-ah a \ang daih tawh a. Ani kha chu a thiam ber kha a ni bawk a, rimawi hmangin ei a zawng mek. Assam Rifle Jazz Band-ah khuang a vaw tlek tlek \hin a ni awm e. A rawn haw chang hian kan hun lai kha kan la sawi kan la sawi \hin.

Hei, hla chu -

http://youtu.be/9f06QZCVUHg

Supermoon

2011-03-17T02:44:00.000-07:00

Japan ramah na takin lir a nghing a. Chu chuan tuifawn nasa lutuk, Tsunami a siam bawk a. Chutianga chhiatna thuah hnih thleng chuan nasa tak leh rapthlak eltiangin hnuhma a nei ta a. Mi sang chuang an thi a, thi zat hi ni tin an pung reng a, hmuh loh an la tam mai!

Hetih lai hian 'Supermoon' an lo ti ve sek bawk. Mi \henkhat, thil inti hre deuh chuan he Supermoon leh chhiatna hi an sawi zawm mek a, chutih lai chuan inti hre ve dangte chuan inzawmna a nei lo niin an sawi ve thung.

'Supermoon' tih \awngkam hi Astrologer lar Richard Nolle-a phuah (coined) niin an sawi a. Thla-in lei a hnaih theih dan ber za a 90 leh a aia hnaia a rawn awm hian 'Supermoon' tiin an ko a ni awm e. Lei (Earth) leh thla (moon) te hi inhipna avanga in-putu thei chauh an ni tih kan hria a. Hnai tea an awm chuan an inhipna pawh a nasa dawn tih a hriat theih mai awm e.

March ni 19 hian kum 18 chhunga thlain kan lei a hnaih ber \um a thleng dawn a. Hemi hunah hian thla hi kan awmna lei a\anga mel 221567 (nuai hnih sing hnih sangkhat zanga sawmruk leh pasarih - 356,577KM) leka hlaah a awm dawn a. Hemi avang hian mi \henkhat chuan thla a lo hnaih avang hian tuipui fawn a nasa ang a, tlang kang leh lirnghing a awm phah bawk dawn niin an sawi a. Kum 2004 December thlaa Tsunami rapthlak tak thleng pawh kha a hnu lawka 'Supermoon' awm nen khan an sawi zawm bawk.

AccuWeather-a ziaktu pakhat Daniel Vogler chuan, 'Spermoon hnuhnung ber, January ni 10, 2005 ami pawh khan Indonesia-a lirnghing magitude 9 laia na nen khan a hun a inhnaih hle,' tiin a ziak a ni.

1955, 1974, 1992 leh 2005 khan supermoon hi a lo thleng tawh a. Heng kumahte hian kum dang zawng aiin khawvel boruak a danglam niin sawi a ni.

Hetih lai hian Khaw awmdan zirtu (Weatherman) John Kettley chuan, 'Thla hian lirnghing vel a nghawng thei lo. Tuipui fawn dante chu a nghawng thei tehmeuh mai a, chu chu tuipui kama awmte tan chuan harsatna thlentu a ni thei,' tiin a sawi a. International Centre for Radio Astronomy-a thawk Pete Wheeler pawhin, 'Supermoon vang hian tlangkang leh lirnging a thleng lovang, a thleng a nih chuan Supermoon vang ni lovin, a thleng ve hrim hrim a ni zawk a,' a ti ve bawk.

Hria intite inthurualna erawh pakhat a awm a. Ni lo, pahnih a ni zawk awm e - Supermoon lo thlen hun, March ni 19 hian thla hi ni danga a enna aia za a 30 in a eng dawn a, za a 15 zetin a lang lian dawn bawk - tih hi a ni.

(Ka thawhna chanchinbu-a chhuah tura ka ziah a ni a. Blog post a khat avangin, a hun a lo hnai bawk nen, ka vawm bei ve hrim hrim a ni. Pic courtesy: http://ihatera.blogspot.com)

Hna leh Keini

2011-02-26T19:31:00.000-08:00

Hna hi engnge? 'Hna i nei tawh em?' kan tih hian, a zawttu leh a zawha thinlungah hian engnge awm? Hna kan tih hian eng chin hi nge kan huamtir? Hna zahawm leh zahawm loh a awm em?

Mi thenkhat chuan hlawh tam tak neih theihna hna an thawk a. An hnathawh avanga mi zah hlawhte pawh an awm. Hna avanga zahawmte hi mi zahawm an ni mai em? Hna hian mi a tizahawm tihna em ni? Mi thenkhat hi chu an hna zahawm viau mahse anmahni zahawm lem loh an awm tho em? Hna hian midangte zah min phurhtir lova, hna tha taka thawh erawh a zahawm thung. Tirhkoh Paula chuan Thessalonika khuaa mite chu anmahni hna theuh, an kut ngeia thawk a, midangte neiha innghat lo turin a hrilh a; chu chuan zahawmna a keng tel niin a sawi bawk. (IThes. 4:11-12)

Kan pi leh pute kha chaw leh hna ngah lo tak an ni awm e. Chaw atan buh an ring a, buh tih loh chu chawhmeh vek a ni mai a. Tam lai chuan buh lo deuhte pawh ei ve thin mahse, 'chaw' an ti ngai mang lo. 'Chaw' an tih chuan buh a kawk deuh bik a ni. Chutiang bawkin Lo hna bak hna dang an nei vak lo. Tuikhur hiah leh karkawng sah te bakah a dang chu awm ve bawk mahse, mimalin hna an neih chu lo lam hna deuh chiah a ni.

Chu rilru chu bansanin, an thlah mi tam zawk chuan lo nei tawh lo mah ila, hna kan tih hian kan la kawhtir tlem viau tho. 'Hna i nei tawh em?' emaw, 'Eng hna nge a thawh ve tak?' emaw kan tih hi chuan, kan rilruah sorkar hna a lang deuh vek mai. Sorkar hna kan thawh hmaa kan tih dangte hi chu, 'Hna nghah nana kan thawh' a ni deuh zel. Kan zir chin mil zela sorkar hna thawh kan tum avangin kan ram hian harsatna a tawk mek a. Hetia sawi mai aia nasa hian he harsatna hi a inphum thuk a, a inphan hnawk tawh.

Zirtir hnaa tui hauh lovin 'hna' ni a kan hriat tlat avangin zirtir hna kan thawk a. Sipai a tha tih vang ringawtin tui hauh lo kan fate kan nem liam zut zut a. A mawm ni-a kan hriat avangin Engineer kan zir bawk a. Sum a awm ni a kan hriat avangin a thei apiangin chanchinbu kan siam bawk. Kan hlawh tam mahse tuina leh inpekna tak tak tel lo, hna a nih avanga thawk hram hram kan nih avangin kan hnathawh hian tuihnang a pai lova, a luanchhuahna turah a luangchhuak zo lo fo. Kan zirna kalphung kan sawisel chuah chuah a, Police zingah venhim leh thenfai hna thawk lo, thlabarna leh hnawksak thlentu an awm chamchi a, kan kawngpuite pawh keini aia zir sang lo zawkte siam aiin a chhe bik reng mai a nih hi.

Hna chungchang sawi hi chuan Blackberry fakna hi ka hrechhuak leh thin. Tawngkam mawl tê, hriat awlsam tak, awmze ril tak nei si an hmang a. Mizo tawnga lehlin ngai lo khawpa thu awl hmangin, 'It's our time. Do what you love, love what you do,' an ti!

Taiwan hmeichhia, kum 60 a upa, Forbes magazine-in Asia-Pacific biala midangte tana inpe langsar zual a thlanchhuah mi 48 zinga tel phak Chen Shu-Chu chanchin hi i hre tawh ngei ang. Primary School thleng chauh lehkha a zir a, a hnathawh pawh ropui tak a ni lo. Taitung (Taiwan) Central Market-a thlai (vegetables) zuar ve mai a ni. Bazar-a thlai zuar mai mai, hmeichhia lehnghal hi khawvelin a hre tlat. A chhan chu rim leh taima taka a thawh a, a thawhchhuah atanga midang a tanpui nasat vang a ni. Khawvela hun bik neia chhuak chanchinbu zinga ngaihsan hlawh bera chhal ngam, TIMES chanchinbu chuan 2010 chhunga mi langsar 100 a thlanchhuah zingah, midangte tana inpe (philantrophist) huang atangin a a telh ve hial bawk.

Midangte tana sum leh pai a thawh dan leh thawh zat te chu kan sawi tum loh lam a nih avangin tarlang lo mai ila. Chen Shu-Chu-i chuan hringnun a thlirdan heti hian a sawi. 'Ka nun inkaihhruaina chu ho tê a ni. Thil engemaw i tih a, phurrita i ngaih tlat chuan thil dik lo a ni mai. I thiltihin a tih hlim che erawh chuan i tana tih tur dik tak a ni tihna a ni - midangte sawi a pawimawh lo,' tiin.

Kan dam chhung zawngin rim taka thawk a, kan thawh rah ei a, hmaia thlantui luang zawih zawiha hun hmang tura duan kan ni (Gen. 3:17-19). Thuthlung Tharah pawh thatchhe lo tura fuih zui zel kan ni (IIThes. 3:10). Rinna avanga khawngaihnaa chhandam ni mah ila, chumi chang tur chuan thawh tho a ngai tih Paula'n min zirtir bawk (Phil. 2:12).

Hnathawh hi zak lo ila, eng hna pawh ni se, tha tak leh rinawm taka kan thawh phawt chuan a zahawm tih hi hre bawk ang u. Amaherawhchu hei hi hriat reng a tul - Fel lo taka dehchhuah tam tak ai chuan fel taka dehchhuah tlem tê a tha zawk (Thuf. 16:8).

Changkanna Changkang Lo (REV)

2011-01-13T04:18:00.000-08:00

Thawhtan tlai Ina ka haw chu, thut pawh ka thut hmain, ka fapa upa zawk chuan, 'Pa, naktukah a-nutei te lovah ka feh dawn,' a lo ti nghal a. 'Tul lo, a hahthlak, i chau lutuk ang,' ka ti a; a tang ve tlat. Tan chhan pawh a nei tha, 'Aaaa, A-nu pawhin a phal...' a ti a! Kei aia thuin a lo phalsak tawh si a, ka phal leh phal lohvin awmzia a nei ta lo!

'Remna Ni' a ni a, Electric Department lam pawhin Office chawlh chhuanlamin an 'line' siamthat hna thawh nan an hmang a ni chek ang, power an rawn supply lova, tih tur a vang ngang mai! Ka lehkhabu lei thar - lehkhabu thar phei chu ni lem lo - Ziakmite Chanchin chu ka chhiar a, ka chhiar zo thak a. Ka fapa, kum 10 pawh la tling lo, a pian atanga a vawikhatna atana a feh ve ta chu ka ngaihtuah deuh reng mai.

Chawhnu tlang herah ka fapa feh a lo haw a, Berul, Maian, Vaimim, Hmazil etc. te a rawn hawn a. A Hmazil rawn hawn chu, 'Bawiha, hei hi engnge?' ka ti a, a hming a hre lo! E khai! Ka fapain Hmazil a hre hauh lo! tu thiam loh nge?

Kan naupan ve lai kha chuan Mizo naupang zingah 'tuai' kan tih ang chi kha kan hmusit thin. Khapdiau leh zuanbak hmuh avanga ‘Awi’ dur dur thin te, chemtum leh sairawkherh ngaina lo tlat te, tui dungchhir leh kalchhet kal nuam ti miah lote kha tuai kan ti thin. Tawlailir khalh ngam lote pawh kha 'tuai' zingah kan telh thin a, tuaingawt man ngam loh ringawt pawh kha ‘tuai’ nihna hlawh theihna khawp a tling. Tunlai hian, kan naupan laia 'tuai' kan tih thin naupang ang kha Mizo mipa naupang hi an ni ta deuh vek hial em ni le tih mai a awl.

Mizoram Cable TV lar LPS in 'Pro-Fight' a buatsaih tir lam kha ka en zeuh zeuh a. Hmuhnawm loh fe fe kha an tam lutuk a, thenkhat phei kha chu, 'Mizo mipa si, heti em ema inhnek thiam lo hi a awm theih a ni maw?' ka ti hial. Mizo naupang zingah hian 'Mizo naupang' kan tih, pa hrek hrawk, thiam loh nei lo, tih hreh nei lo, ram kal nuam ti, inbuan leh inchai ti thang ang chi kha an vang ta hlein a lang.

Kan changkan tawhzia hi sawi tham a tling. Kan kawng te, kan khawlaite hian mi ram a la tluk lo tih chu sawi a ngai lova, mah se khawvel hmasawnna hian Zoram pawh a rawn hrut a. Khawvel changkang zel milin kan pen vek thei lo chungin, kan hawiher te, kan khawsakziate hi chuan khawvel ke pen rualin ke a pen mek a. Chu chuan he Mizo naupang hi a ti tuai zo ta a ni em?

Keiniho kha chuan sikul kai bakah kha chuan ram kal te, tawlailir siam te, inrallemchan te, inburchhevawm te, football pet te kha kan hna a ni ber a. Ram kan kal a, thui deuh deuh lui dung kan zawh a; tlangah kan lawn a, hnim kan bawheng a. Khatianga kan tih thin khan, kan hriat lohvin kan taksa a lo ti 'fit' a ni ang, kan dam lo ngai mang lo! TV en tur pawh kan nei mumal lova, Independence Day leh Republic Day vela en man awm lova Cinema an chhuah thin kan ente kha a ni deuh mai. Mit chhiatna khawpin lehkha kan chhiar peih bawk si lova, kan rualpui, naupan laia tarmit vuah/bun kha an awm mang lo.

Kan inkhel a. Ball kan nei tha ngai lova, football tak tak phei kha chu kan pet phak tawh kha chu chhe tak a ni deuh zel a; a hamna (tube) lamin a perte pawh kha a na viau tawh thin. Mahse, sertawk a ni emaw, saphing a ni emaw a dang chuang lo, ke lawngin kan pet lawng lawng a, ngal charin kan inpet chawrh chawrh a. Na tia kan ke kan khai vaw vaw a, kan bai chai chai laite khan hrehawm ti ve deuh thin mah ila, kha'ng khan tawrhchhel min lo zirtir reng mai!

Tunlai naupangte hian khatiang kha an kal pel tawh a. Mahni In chhung lumah, TV hmaah an thu a, ei an duh tho si a, an thau ta leng luang hlawm! An taksa hmanga infiamna kha nu leh pa lam pawhin kan ngaihtuahpui ta lem lo a ang. Computer kan leisak a, games kan dah a, an kap tek tek a, a nih loh leh an kutzungtang hmangin an inkhelin an intlansiak a. An taksa dang an sawizawi tam ta lo. Chu chuan kan naupan laia 'tuai' kan tih mai thin ang deuhah khan a chhuah ta hlawm. An ngo puak a, an no duai a. 'Hidden Treasure' te khel thin an ni bawk a, 'Brinjal, Pumkin, Rolling pin, Hulla girl' te thlengin an hre vek a. Mahse, an hmuh reng, an ei thin, Mizo thlai ngei mai Hmazil chu an hre ta tlat lo!

Vangvat kai avanga te (au) chhin ngai lo Mizo naupang kha an ni tawh lova, ketin tla mai mai avanga inkhelh thulh ngai lo Mizo naupang an ni tawh lo. An tuaitut tlat tawh a. Ball boot bun lovin ball an pet ngam tawh lova, lung phawka Chakai man dan te chu sawi loh, a ei dan pawh an thiam thathum tawh lo! Pizza, Hamburger leh ice cream ei chu an zei viau lawi si!!

Mizo thalai chu an 'fit' bik thin tia, sipai hotute'n an sawi thinte pawh tunah chuan a dik vek bik ta lo. Thiamna lamah chuan kan sang tawh zawk a, kan hriatna pawh a zau e. Mahse kan taksa hian tharum a nei tam tawk tawh lova, insawizawi pawimawhna hre lem lova kan lo insawizawi chiam chiamna ang kha a awm tawh si lova. Ram changkanga insawizawina an neih that kan hmu a, kan nei ve phak lova, tih lohvah kan tlak ta mai mai a. Lirthei a lo chhuak a, a thar apiang kan lei a, ke-a kal peih pawh kan awm ta mang lo. Khup tuah tet tut, KM khat pawh tlan thei lo tur hi kan va tam ta em!!

Phaiah kan kal a, relah vaihovin min han hmuhte khan min endan a dang a, kungfu thiamah min ngai fo a nih kha! Mahse tunah chuan a ni tawh lo tih an hre tlat a, min zuam ve tlat tawh mai! Ni e, ka unau, kan computer folder-a Britney leh Beckham-te thlalak bula kan thlalak a awm ve tak chinah hian kan sawngnawi ta riauin i hre ve thin lo maw??

Mi zawng zawngah chuan a dik vek lo tih ka hria a, mahse a nawlpui zingah hian, a bik takin, khawpuia cheng naupangte nunah hi chuan hei hi a dik tih ka hmu.

Kan in chhungah Khuhhriang a awm tawh lova, suankual leh chaicheh pawh kan thlawhbotir tan mek. Mahse thlangra leh tuthlawh thlenga kan hmang thiam lo chho zel hian he Mizo hnam dinhmun hi a tichhuanawm sawt miah lo. Chu chu tu mawh nge??

Kan aia ute'n kan chalah chil inhnawm tura min tih a, min inbuantir a, min insualtirte kha a chhe lam chauh emaw kan tih laiin, a tha lam pawhin kan taksa tan a lo hlawk reng a; tuarfeina min pe a, ngam lo chung pawha tih luih talh duhna thinlung te nen. Chutiang chu a awm tawh lova, a hmanlai tawh. Kan fate hi kan naupan laia kan infiamna ang khan infiam turin kan beisei thei tawh lo. Mahse, inkhel turin field kan nei mumal lova, kawngpuia an inkhelh kan phalsak si lo. Badminton khelh ve an chak a, naupang tan he Zoramah hian khelhna hmun a la awm mang lo. Officer dulkiar leh neinung ten he Zorama hall tha thaah hian, inkhelhna atana hun tha zawng zawng an hmang zo va. Veng khata infiamna hall leh field awm miah lohna hi a tam zawk a la ni bawk si. Kan fate hian an taksa an sawizawi tam tawk tawh lova. Chu chuan engnge a hrin? An sawngnawi a, TV leh computer lama an hmuh anga nun ve mai loh chu tihtur an hre lova. An sam a sei a, an lam hawh hawh a, nalh tak takin an inchei a, kan hriat leh beisei aia hmain ‘hriam’ an lek ta deuh vek a nih hi!

Chu chuan engnge a hrin zel?

Chawm theih leh theih loh thlek thluk hman lova chhungkaw dinna a hring a. Inrelbawlna fel leh tha awm lova chhungkaw din chuan ruahmanna tha a keng tel lova. A nei tlak nia kan hriat, lehkhathiam leh fing var, neinung zawkte zinga a tam zawk lah hian nupui pasal neihna chang an hre lova. A nei tlak lo leh la hun lova kan hriatten an nei reng thung a. Chu chuan kan khawtlang nunah hian nghawng tha aiin nghawng thalo a hring hnem niin a lang.

Infiamna leh thildang tih tur a tlem miau avangin kan thalaiten TV an en hnem a. Mobile phone an lawm a. Chu chuan thil tha aiin thil thalo a zirtir hnem zawk. Kan education system fuh tawk lo avangin mi tam tak kawng lakah kan thlauh va, chu chuan he hnam tan hian pawi a khawih a; thiam nel nual, hre nel nual, finna leh taimakna tak tak thleng phak si lo tam tak kan nei mek a, chu’ngte lak atang chuan he hnam hian thil ropui a beisei leh si. A lungphum a fuh lo tih lam kan ngaihtuah duh lo lui tlat a. Remand Home leh Rescue Home te, ‘Khap Bur’ hmangtein a lerah thuai that kan tum leh mek a, a harsa tawh a nih hi.

Kan changkanna hian hnam taima kha min ti thatchhe ta sawt nge, kan ram kalphung fel lo hian he hnam hi a tichhia? Hnam dinchhuahna tur hian pawnto khap, exam laia tape play khap leh Zu khap hi a tawk em? Rairahtea thawnthu aia Snow White kan ngaihpawimawh hnu hian Mizo naupang hi a ‘Zo’ lo sawt em? Chu ‘Zo’ loh sawtna chuan eng rah nge a chhuah mek a, a la chhuah zel dawn tih hi kan chhut ngai em? ‘A zo’ tih tawngkam, thil thing, thil chhia leh tawmkai lo sawi nana kan hman chinah hian he Mizo hnam hi eng dinhmunah nge a din? Kan changkanna hian kan Mizona tam tak a umtiau mek niin i hre ve em?

Changkang takin thil kan ngaihtuah a, Chhiatnia kan Mizo intuamhlawmna leh inpuihbawmna kalphung pangngai pawh kan su her ta bawih bawih mai! Hman a Mizo tlawmngaihna kha ngil takin kal sela, he changkanna avang hian nghing hauh lo se, kan changkanna avanga hmanrua kan neihte hi hmang tangkai chuang lo ila tihna lam a ni lo. Kan changkannain a ken tel miau tawh avangin tlangvalten tlawmngaihna an lanchhuahtirna thin zualko kal dante pawh a dang zo tawh. Kan tih tur kan tih tho chuan changkanna avanga awlsamna tam tak hi kan hmang tangkai ngei tur a ni. Chutih lai chuan Mizo hnama min dina min siamtu Khuanu'n he khawvela hnam dangte aia danglam bika min siamna - khawhar chhungte lenpui thleng maia kan her danglam a, a awlsam leh dahlau zawnga kalpui kan tum mek leh kan kalpui ta mek zel hi a pawi ka ti.

Zonun ze mawi chhawm nunga chawi nungtu pawl YMA in kalphung tha pangngai kan neih sa pawh vawng nung zo tawh lo khawpa kan changkang ta mai hi changkanna changkang lo tak a va ni em!

He Mizo hnam lo pawh hian tlawmngaihna hi an nei nasa ve fe mai. Chhiatna rapthlak a thlena mingo leh hnamdang inpuih tawn dan te, midangte tana an inpek dante kan hre fo. Tanpui ngaite tanpui a, chhanchhuah ngaite chhanchhuah a, mangangte thlamuan hi mihring nun tha pangngai zia a ni - Mizo tlawmngaihna zia a ni kher lo. Amaherawhchu Mizo hnam tih loh hi chu he khawvel ram zauvah hian, mi lian leh mi te inang veka hrut rual a, chhiatnia hnam khat kan nih avanga kan insawngbawl anga ti ve hi an awm em? Hei hi hnamdang laka kan danglamna awmchhun a ni lo maw? Chu kan danglamna ber mai pawh a tei te zawnga kan changkang kher kher hi chu a beidawnthlak ngawt mai. Hei hi kan tihbo a, kan nuai reh leh zel chuan he hnam hian eng hi nge maw a chhuan ang a, he hnam hian khawvel hnam dang lakah danglamna a neih tehchiam ang le!?

Kan thlanga vaiho khu en teh. A changkangte khu chu changkang rem rem tak an ni, hausak lamah pawh khawvela a ber el phak te an ni. Hmelah pawh kan ngaihsan mingo aia hmel tha, anni aia zei, sap tawng pawh anni aia thiam zawk mahte an ni. Mahse, ni e, chuti chu ni mah se, a hunah chuan rawng an intheh rang chei chuai a, bati an chhi tlar tiarh tuarh mai! An inneih dawn chuan meialh hel kualin, an sakhaw puithiam chhampual kher kher a ni an duh leh fo ni! An changkanna khuan an hnam nun ril a khawih buai ve lova, an sakhaw dan a nekchep ve vak tlat lo!

Mahatma Gandhi khan sap ram atang khan sap anna zir chhuak lovin hnam hmangaihna a rawn zir chhuak zawk a, khawvel thiamna leh finna a zirte khan a hnam tihdan a hnualsuattir hek lo. Duh se chuan changkang takin, sap nun zirin, kawrchung leh nghawngawrh nen ukil hna a thawk thei. Amaherawhchu, sap nun changkang a hmuh leh an thiamna a zuk zirte chuan hrenpereng kaih leh thinga siam chapal bun thlahtir tur khawpin finna leh changkanna a pe tlat lo. Hmana Mohandas-a kha sap ram atanga a lo haw hnu pawhin a la ni reng a, changkanna thlipuiin a hnam hmangaihna a chhem nghin ve theih miau loh avangin India ram ropui hi a chhanchhuak mai a ni!

Kan changkannain kan Mizona a nek chep kher kher hi hriat thiam a har a, Mizona tel lo changkanna hian he Mizo hnam hi eng chena thui nge a hruai ang tih hi ngaihtuah hmasak a ngaih laiin, Mizo loh aiin changkan loh kan hlau hmasa laklawh tawh si a; a va hahthlak tehlul em!

Kan changkanna hian kan Mizona hi dip ral lo se, Mizo takin changkang ila, Zonunmawi hi vul reng se; he Mizo hnam hi dam zel se ka ti.

Ka va ti tak em!

Mas A Hnai - Lung A Leng Lo!

2010-12-08T03:38:00.000-08:00

A mak ngawt mai. December ni 6 a ni tawh, lungin Krismas lo thleng tur lamah len a tum tlat lo! Engtia tih tur nge maw ni dawn ni? Kumin Krismas chu engtinnge kan hman ang aw?

Hmun leh khaw danga awm thiante an rawn haw khawm leh tak tak ang a, Masi rim a nam chhunzawm tawh ngei ang. Chutih hunah chuan engnge kan tih leh ang aw??

Ka thian MLA nih zir te, Ukil nih zir te, High School Headmaster aia zirtirtu pangngai nih duh zawk tlat te, sumdawnna lam zir, sumdawn tum hauh si lote kha an lo haw khawm leh ang a. A kum a tluana inkhelh loh te chu sawi loh, mi inkhel pawh en ngai lo kha, 'One Day Tournament nei ila, badminton shuttle leina tur leh tlem kan thawhkhawm anga, tlaiah kan ei khawm leh ang a..' an rawn ti leh ang em?

An tih leh chuan,ka hun neih loh thu te, kekawrbul leh puanpheikhawk sen ka neih loh thute khan min chhan leh dawn miah lo. Khum bul bang cheimawina ni maia mawia a awmna ngaia awm rei tawh ka Badminton racket lakchuah a ngai leh ngei ang a, phur lo viau mah ila, an zinga pakhat talin min hneh hma min khelh chhawk leh dawn avangin ka hah leh dawn mang e!

Chaw kan han ei khawm ang a, chhun lama Under-ten-a thlansa phulkaiho kha, Gopichand-a unaupa emaw tih mai turin an thiam leh tawh ang a, an insawi chak leh vek tho dawn tih a lang reng mai! Thenkhat phei chuan a tuk chanchinbua chhuah tlak khawpin kan inkhel chanchin kha an sawi ngaihnawm leh dawn a. Editor fapa te an awm leh ngei dawn avangin a then chuan an tlawn leh hiam hlawm ang!

Zan a lo ni ang a, hman atanga tun thlenga rawlthar nih bansan hleithei lo tlangval Robert-a, sam phir zet, rimtui takin a rawn lang ang a; Kamis var te tak te, nau mipa a nei lo tih hre lo tan chuan, 'A nau ta a haksak a nih dawn hi..' tih mai tur kha a rawn ha leh ang a. A pheikhawk pawh nikum a mi, mangai pheikhawk chhip zum bawk, tle elkhen a rawn bun leh ngei ang.

Chutiang zanah chuan intukkhawm an duh ngei ngei a, a khawlhkham zawnga awm reng reng chu ar chuk tui lovin ka thiante hian an chhuah ziah a. Chhuah tum lo eng ang pawh ni ila, chhungte laka inthlahrunawm khawpin phone a ri zing leh ang. La duh lo pawh ni ila an rawn lang leh tho tho dawn. Phone la ila, kal loh chi loh inhmuhkhawm pawimawh an ko a lo ni leh ngei ang a, kal lo chu nupui ngam lo kan ni leh nghal ringawt ang.

Han kal khawm ila, a thenin Tuikuk Issue an tuipui ang a, a thenin NLUP. Pakhat lah khan Computer a thut chilh leh chawt ang a, 'nakina hman tur' tiin computer-a a film ente kha a mobile-in a la leh vel maithei!! Dawhkanah kuhva hring leh Gold Flake a tam leh ngawt ang chu! Kum tluana nghei tawh RBA pawhin a ei leh phah ngei ngei dawn sa.

Engpawh nise, kumin chu - ka dam phawt chuan kum dang zawng aia nasaa zaikhawm ka'n tum phawt mai teh ang......

Aw, Vaia, Vaia!!

2010-11-22T06:00:00.000-08:00

I sakhmelah dar zam mawlh lo,
Pial thin thenin i sam i khuih;
Nam rem tel lah i ban phal lo,
Dawih hmel puin mi tin i nuih!

Si lo hian e, i dawih si lo,
Khu-ah, saw-ah - i lo kalna!
'Ka u, Eng a?' i thiam zeng lo;
A kham chuang lo, i lo kalna!!

A mak ngei e i sakhming chu!
'Belal ni hi,' i ti a mak!
Hming pum hriat loh, tawng thiam lo chu;
Duh duh thawk si - leh zual a mak!!

'Sang sing ka thawn,' i ti - i chun kiangah!
Vaia, Aw, Vaia, Vaingalsin-a leh!!

Hausa Ka Lo Ni!

2010-09-22T04:37:00.000-07:00

Mihringin hausa a tehna chu sum leh pai leh thil neihah a ni. Sum ngah apiang hausa an nihna khawvela chengte zingah hian hausak duh lo tunge awm thei ang?

Mihausa ka hria a, mihausate nundan ka hmu thin; hausak nawmna leh awmzia tak tak erawh ka hrethiam lo - ka la hausa ve ngai tlat lo. Retheih awmzia erawh hrechiang ve tawkah ka inngai.

Middle Sikulah vawthlep inkhing lo buna vawi tam sikul kai thin, kekawr mawng bel ha thin ka ni. Matric pawh khawnvar eng hnuaia inzir chunga inziak pass ka ni a. College-ah pawh kekawr tlawn pakhat, Kamis pahnih leh thelret chapal senduk nena kum hnih tluanchhuak ka ni.

Mizo mipa pangngai, thiam bik nei tih lohte thawh thin thawh loh ka nei lo hial maithei. Lei ka lai fo va, cement, balu leh rora chawhpawlh ka chawk nasa tawh a, kawng chhawrdawh (step) ka rem tawh a, thingzai In saknaah ka thawk fo bawk. Huan sam ka thiam a, mau chik pawh ka hnehsawh. Fai takin hlo ka thlo thiam a, buh tuh pawh ka chak chiam lo na a, ti ve thei pawl ka ni thin a; buh seng pawh ni sa leh ruah sur hnuaia ka lo tih hnu a ni. PHE pipe ka pu nasa tawh a, Furniture workshop-ah Almirah leh thutthlengsei ka siam ve fo bawk. Tuilakna kawng laiin ka inhlawh tawh a, Tlawng lui kamah balu ka la tawh a, leirawhchan siam tharin ka kut a tipilh ve tawh bawk.

Aidu leh tumbu ka khawrh tawh a, chakai meichher chhit leh hmunphiah vaiin ka ramchhuak tawh. Teak tang ro kuai thlain thing ka fawm tawh a, phulraw ro melhin raw me karah ka vak zing tawh mai. Mautak tuai aia rawnal tuai me zawkzia hre tur khawpin rawtuai ka khawrh hnem ve tawh a, behlawi sik leh hmarcha mal pawhin ka inhlawh tawh a sin!

Tlangval laia Office lian tak chhuata mutmu tuah nawm lem lohzia hre tur tawkin a kuma kum ka mu a. Zing tin pi leh pute bawlhhlawh paih khawn khawma hal thin ninawmzia ka hria a, hmunphiah engzat nge ka phiah ral ka chhiar ta lo kha a pawi.

Zingkara ngaihzawngte Ina, hmel phak tak chunga chanchinbu sema kal ziah ngai nun neih nawm tawr tawr lem lohzia ka hre tawh a; ruah sur chung pawha chawlh theih loh chanchinbu sema inhlawh ngai tlat nunte khan retheihna awmzia min hriattir ngawih ngawih thin.

BA ekzam dawn a form man tur takngial pawh neih loh a awm thei tih ka hre tawh a. Chhungte ngawih ngawih pawh chutiang atana dil an harsatzia leh van sanzia pawh ka hriat hnu a ni.

Ni, chutiang nun leh hmun atang chuan mite hausakzia ka hmu a, hausa tura an beih dan erawh ka hriatpui phak lo. Nasa takin hna an thawk ang tih erawh ka ring tihn. Kei hian nasa tak chuan ka thawk vein ka hre thin a, mahse ka thawhdan leh hausakna kawng hi a inpersan nge, ka thawhrimna hian a ni lo zawng a kawk bik tih ka hrethiam lo.

Mi hausakzia leh nun nawmzia ka hrethiam phak chiah lo zawk hi ka vannei - an hausakna han awh nachang ka hre tlat lo. Hausak ka chak ve thin a, nawmsak ka thlahlel ve fo, chu chu mihring dan a ni. Amaherawhchu hausate hausakna erawh ka it lova, ka thik ngai lo. Hun a kal zel a, ka hmuh a tam tial tial a, ka hriat pawh a tam ve zel; amaherawhchu hausate hausakna hi ka it lo zel a, ka thik lo tawlh tawlh mai! Hausakna hi sum leh paiah teh a nih a, neih leh inbel atanga chhiar a nih chhung chuan kei hian hausak ni ka neih ka ring lo. A chhan chu - hausak hi ka tum tlat lo!

Zankhaw tairekah, sorkar hnathawk thenkhatte nen inthurualin, sorkar phal loh thil ti a motor hmanga thil phur kual a, kawi tina biru chunga a kuma kum an tih hnua hausa an awm tih miin min hrilh tawh. Hausakna tur a nih dawn chuan dik lo taka tanpuina leh zangnadawmna lak hreh lo mihausa an awm niin an sawi ka hre tawh bawk. Chu'ng mite chu khawtlanga mi langsar an ni a, Kohhran inkhawmah pawh tlar hmaa thu thin an ni fo an ti lehnghal!

Mi tam takin hausak tuma an beihna hi a nasa ka ti. Taima takin mi an tlawn reng peih a, taima takin mi an fak peih. Ni tin party office-ah an thu peih a, work order bung changin a thlaa thla hna dang thawk hlei thei lo khawpa buaiin an awm thei tihte pawh hi a dik ka ring. Hetiang mite hi chu hausa lo zia an ni lo - an tum em!

Sorkar hnathawk tam zawk hi hausa turin an hlawhin a tlin lo tih an sawi thin - a dik ka ring. An hlawh leh hamthatna dang dawn theih zatte pawh mi sawi ka hre thawi tawh. A dik a nih chuan tuna hausa engemawzatte hi chuan chhan dang an nei a ni ang.

Office pawisaa lei hmanrua leh thil hlu hi sorkar hnathawk Inah hian engzatnge awm ang tih ka chhut peih lo - a awm erawh ka ring. Department hotu lian zingah an mimal lirthei thunna lehkha thlenga office-a nam liam an awm tih an sawi - a dik thei ang em? Inkhawmna leh huana feh nana sorkar motor leh driver thlenga hmang an awm tihte phei hi chu kan sawi peih tawh lo zawk a ni lo maw?

Kan MLA ten an zin lohnaah 'zin bill' an la tih sawi a nih khan kan sawi luai luai a. Mahse, sorkar hnathawk zingah hian zin lohnaa 'zin bill' la hi engzatnge awm ang? Trasury Office lamah hian thla tin MR lem engzatnge lut thin ang? Kohhran Upa sorkar hnathawk, zinna tura zin si lova zinna tur pawisa la hreh chuang lote pawh an awm an ti em ni?

Mihausate hian dik lo takin thil an ti vek lova, hausa zawng zawng eiru leh dik lo taka thiltia ngaih vek leh hmuhsit tur an ni kher lo tih ka hria. Chutih lai chuan mi tam tak hi chuan hausak tumin nasa takin an bei a, a mawi leh mawi lo an ngaihtuah lova, a dika dawk an thlu lo tih hi he khawvelah hian a dikna chen a awm ngeiin a lang. He'ng mite hi ngaihsan leh awh chi niin ka hre lo.

Mihausa engemawzat, rethei taka hun hmang ka hmu tawh. Chu chuan hausak ka chak lohna leh an dinhmun ka thik lohna a tizual thin. Hausa lem ta lo se fapa la nei tur tam tak hian an hausak avangin an chan tawh a, ka rualpui zingah pawh chutiang chu ka hmu tawh. Motor nei tam tak hian zan tam tak thinthia mut loh an nei fo tih ka hria. Contractor zingah pawh mahni contractor pui ngeih hlei thei lo, inerna leh elrelna nena hausakna kawng zawh an awm a ni awm e.

Mihausa thenkhat hi chuan In leh lo nuam tak an nei a, lirthei chhuak thar ber ber nen khawlai an leng a, a tui ber ber an eiin an in thei. An inchhungah thutthleng dup nuam taka an thut theih laiin, chu'ng mihausa fate chuan hmeithai Ina herhsawp awn bei bawia thut nilen nuam an ti zawk tlat thin hi mak ka ti.

Chhungte bul leh Kohhran Thalai pawl member-te bul aia daifem lama inkhalh chhuah a interek hran duh fa neih hi a hahthlak awm ka ti thin. 'Khawiahnge Mama? Zanin a lo haw ang em? Motor a rawn ti hmelhem leh ang em?' tih reng mai ngai tur chu - Hausakna man em ni ngai!? Sum ngah mahse a retheihthlak dawn hian ka hre tlat.

High School kan kai laia thiante damdawi ti turin, 'Ti ve rawh,' an tih laia kan thosilen chhe zet leh kan chhuat awng hiu hiau ka mitthla tlat mai khan tun thlengin min chhan a lo ni!

Nachhawknain a chhawk theih tawh loh hnua rilru leh tihtakzeta tawngtai mai loh chu hmabak a awm lo tih hriaa vawi tam ka tawngtai avang khan Pathian a awm tih ka hriat phah tih tun hnu hian ka hrechhuak thin a. Laltin enga lehkha zir thin ka nih avangin, mi tam takin lawmthu sawina atan pawha hman ena an en loh, ka faten electric eng hnuaia lehkha an zir hmuh ringawt pawh hi nuam ka ti a, Pathian hnenah lawmthu ka sawi thin.

Hausakna tak tak chu he khawvela neih tam leh khawl tamah hian a innghat lo a ni ang, a hausak thu tumahin an sawi ngai loh Buonglienkung (Fam) kha -

" Khawvel hausakna, ropuina
Leh chawimawina Nei lo mah ila,
Hausa ka lo ni - Krista zarah;
Chatuan hmun, In nuam leh ropui chu
Ka tana buatsaih a lo ni!
Halleluiah!! Ka hausakna chu Lalpaah a ni " tiin, engthawl takin a lam diai diai thei reng tlat!

Dik taka ti thinte chu thlamuang takin an khumah an mu siai siai thin. [Isaia 57:2b]

I Tel Lo Chuan

2010-08-19T06:26:00.000-07:00

[Article ropui tak a ni lovang.
Lehkha thiam te, mi challang te, mi pawimawh te, sorkar hnathawk te leh khawtlang hruaitute tana chhiar leh zawm tur thuziak hi a tam khawp mai. Mahse langsar si lo, kan khawtlanga hmun pawimawh tak luah ve reng tho si, kan thalai, lehkhathiam tia chhiar tur ni si lote tana chhiar tur thuziak hi a tam lo. Chutiangho tana ziah chu a ni. Kumin Govt. Kolasib College Annual Magazine atana thuziak thawh tura min sawm laia ka lo zawh hlim a nih avangin ka pe tih hi ka'n sawi tel leh ang e. Sawi loh chuan - 'chutah-khatah ka hmu tawh' tih palh a awm thin... lolzz]

I nu leh pa, i pi leh pu, in chhungkhat laina hnai lam ka ngaihtuah lo. I pian leh murna lam pawh ka chhui lo. I zir san zawng ka chhut lova, eng hnathawk mi nge i nih ka en lo va, eng Kohhranah nge i lawi a, eng ang rawngbawlna nge i chelh tih pawh ka engto ber lo. Driver nge i nih lecturer? Sumdawng nge i nih inhlawhfa? Puanthui nge i nih thirdeng? Pa nge i nih tlangval? Nula nge i nih nuthlawi? heng zawhnate hi a pawimawh lo. I tel lo chuan ka tlei thei lo tih lai hi a pawimawh lai ber a ni.

Hmanah, sap lal fapa hmeltha chu nuthlawi tel lova a tlei theih miau loh avangin tihngaihna a awm thlawt lova, a buaithlak teh mai a sin! nuthlawi zunzam avangin ram ni tla seng lova rorel tura thutphah ropui a chan tak dante kha a ngaihnawm tham. Eng ang fakauva hmangaihna nasa nge ni ang, lal fapain lalthutthleng a han mausam mai theihna chhan kha aw?? Kha nuthlawi tan khan dam man a awm awm mang e!

He khawvela i lo piang ve ringawt hi a mak tih chang leh hringnun hi engmahlo mai ni a ngaih chang te, sawngsawhlawt lo riau a hriat chang te i nei thin em? Pawimawhna nei ve lo, dam chhan leh dam man nei lo riauvin i inhre leh thut thin lo maw? Ni, chutiang chuan i inngaihtuah tawh thin maithei. Nu leh pate pawhin, 'Lak tlak loh, tangkaina reng reng nei lo,' tiin an ankhum che a, khawtlangah pawh hnawksak i ni tawh maithei. Mahse, kei erawh chuan, 'I tel lo chuan..' ka ti tlat mai!!

Lehkha thiam thei lo pawh i ni hran lova, i dai sual laklawh vang maia tuna i dinhmuna ding kha i nih kha. I naupan laia i lo suangtuah thin i phak lohzia kha nangmah aia hrechiangtu an awm lo. Chuti a nih avang chuan mi tam takin an dem che a, a mawh zawng zawng an phurh che a ni; ka hria e. Sawi tur i neih vete chu i nu leh pa pawhin an ngaihthlaksak ngai lo che a, midang phei chu ngaithla turin i phut ngam ngai lo hrim hrim. I u leh naute meuh pawhin i lakah hian beiseina an nei lova, i nunah hian meisi chhem nun tur awmin an hre tawh lo hial. Chutiang chu ni mah la, i tel lo chuan ka tlei thei chuang lo.

I sikul kainaa zirtirtute khan ngunthluk takin an zirtir lo che a, i hma lam hun atan i nun siam lam an thupui lo. An hlawh leh hamthatna an ngaipawimawh ber a, chumi hnuah chuan kum khat chhunga an zirtir tur an zirtir zawh hman loh che an hlau leh tawp. Chu bakah chuan an sikul chu result chhuah huna dinhmun chhe lutuka a din an hlau leh, a bak chu an ngaihtuah lova, i nun an ngaihtuah lo. I hma lam hun an thlirsak ngai lo che a, Zoram hma lam hun thlir nachang an hre lo nge - an ngaipawimawh reng reng lova; chu ai chuan an teak huan an ngaipawimawh zawk a, Car loan an dah pawimawh fe zawk.

Lehkha thiam nel nual, kuthnathawka inhlawh tur pawha thiamna tak tak nei lo; rualawh nachang hre tawk siin zirtir chhuah i ni a. I nu leh pa leh i zirtirtuten an zirtir chin bak i tan pen ngaihna a awm lova, i lo heti ta a nih hi. I dinhmunah hian lungawi lo mah la dem tur i nei lova, dem tur i hre lova, dem dan pawh i thiam lo. Mahse, a ti diklotute chuan an tih dik loh tih an ngaihtuah lova, nangmah an kawk che. Thlarau Thianghlim siamthar i ngai ni tein an hria a, Kumpuan hmanga chhir that chi niin an hria che a ni awm e!!

Siamthat i ngai a nih pawhin chumi atana pawimawh ber chu nangmah i ni. Hei leh chen hi i dinhmunah hian i ding tawh a, i awmna ngaiah hian - rih artui phur ang maiin - i awm rei tawh. Dik tak chuan i nun leh i hun siamthat hi tumahin an ngaipawimawh tak tak lo, ngaipawimawh ni se he ram hian lehkhathiam a ngah tawk a, Pathian thu awih a ngah tawk a, thusawi thiam pawh ngah tak a ni - mahse engmah a thleng lo. Chu avang tak chuan nang aia pawimawh hi tumah an awm thei lova, nangmah kha in en rawh.

Khawvelah hian nang aia lehkha thiam lo hi a maka maka tam an awm, nang aia rethei pawh chhiar sen loh an ni. Chutiang chu i chhut phak lova, i ngaihtuah ngai loh avangin rethei ber, mawl ber emaw intiin i ram tan tangkaina nei lo leh tih theih nei lo emaw intiin i hun i hmang thin. Chu chuan hmasawnna a thlen lo che a, hma i sawn miau loh avangin i hnung tawlh a ni. I hrethiam lo maw? Khawvelah hian ni tin thil thar hmuhchhuah a ni a, i hriat thiam phak loh khawpa nasa hian he khawvel hian hma a sawn mek a, kil tinah rethei leh mimawl pung mahse, kil tin atangin hmasawnna hna thawh reng a ni. Hmana class khata i thutpui thinte i phak tawh lohzia ringawt pawh hi chhut la, i hnufum nasat tawhzia i chiang ang.

Khawvel hmasawn ruala hma sawn a, khawvel thiamna leh finna sang ber ber hre turin ka phut lo che a, vawilehkhata changkang thut turin ka beisei lo che a; chutiang tum tur pawh chuan thurawn ka pe hek lo che. Amaherawhchu tih tur i nei a, he Zoram, dinhmun thawpikthlak taka ding mek tan hian tih leh thawh tur i nei. I tel lo chuan he ram hi a dam dawn lova, i dinhmun atang khan tho turin i puanveng sawi chhing rawh le.

Khawpui lun lai saw thlir teh - eng nge i hmuh? Vaiho thil chherchhuana chhipchhuanho saw i hmu em? Engzatnge an hlawh ang aw? Lehkha an thiam em? teuh lo! Anmahni tawng pawhin an hming an ziak thiam mang lo. An chawn leh an bante saw en teh, nang aiin a te zawk nia! Chuti chung chuan he ramah hian, tawng pawh thiam lo, hmelhriat pawh nei lo, in leh lo pawh nei lovin an rawn kal a; an ni tin ei khawp an thawkchhuak a ni mai lo - an chhungte thawn tur thleng thlengin zuk thawkchhuaka maw le!!

Ti teh, Automobile Workshop-ah kal teh ang. Saw, eng nge i hmuh? vai!! A mak mang e!! Lehkha an thiam em? teuh lo!! Engzat nge an hlawh ang aw?? A hmaa mite ai khan an hlawh a tha ngei ngei ang. Nang aiin an hmelchhia a, nang aiin an mawl daih. An samte saw - thlawh loh ba hmun ang mai, a buk chhem chhum mai! Mahse anni saw chuan 'unemployment problem' hi engtihna nge an hre tehchiam lo, ni tin hna an nei tlat.

Ral lehlama Concrete In rel uaiha hnathawkte saw en chiang teh - vai bawk. A mak mang e! Saw mite sawn an khua pawh an sawi dik thei lo, khawi atanga lo kal nge an nih zawt mah la, 'Karimganj' bak an hre lo. An hria a nih pawhin an sawi chuang lovang. Ziak leh chhiar thiam sawih sawih chu lehkha zir sang pawl an ni. Chuti chung chuan a mistiri-ho saw chuan ni khatah zahnih zathum an hlawh. A chhawrtuten an chhawr duh a nih chuan anmahni hruai leh hmuh kher loh chu 'helper' an duh lo! Kum khat pawh helper ngai an hruai meuh lo - mual lehlamah chuan 'mistiri' an ni zel. He mite hian kan sawm ni miah lovin he ram hi an rawn lut a, kan rama In sak hna hi kan hriat loh laiin min rawn chhuhsak ringawt! Hmana harsa taka ILP la thin, a thente phei chu a ruka rawn lutte pawh khan, tunah chuan mamawhtu kan tam em avangin anmahni bawhzui leh thawh hah ngai miah lovin ILP tharlam tak tak an kawl reng thei tawh! Kan ram sum an lak hnemzia leh chumi atana kan rama chhiah an pek tlem si zia hi!! Khai, chu zawng, i bula ka sawi tum a ni lo.

Bazar-ah kal leh la, vai naupang dawl zuar i hmu ang. Hralhna tur a awm tlat a, vai naupang te te pawhin ni khatah zali zanga an hlawh thei!

Furniture Workshop-ah kal leh la, an mi chhawr tam zawk saw engahmah i ngaih lem loh 'khi' lama mite, 'saw' lama mite an ni zel mai! Kawng siamnaa thawkte lah vai bawk!!

He mite hi eng vang mahin he ramah hian an awm reng lo - hna a awm vang a ni chiang mai. Awm awl leh ei tui turin an rawn lut lova, nuam chen leh hawi thawveng turin an lo kal lo chiang. Mizo thalai tam takin thawh tur an hmuh loh laiin anni chuan hna an hmu a, an thawk a, an hlawh reng a ni. Mizo tam tak aiin an hnaah an rinawm a, an taima a, an tuar a fei a, mi hnuaiah an kun peih a, hringnun awmzia an hria a ni.

Khawi hmuna awm pawh ni la, eng dinhmuna ding pawh ni la, Mizo i nih ngat chuan heng ka sawite hi i hmu ve ngei ngei ang. I naupan lai chhut la, tun hun nen han khaikhin teh. Engemaw i tih loh chuan tun aiin i fapate lo leikan hunah chuan he thil hi a nasa tawh dawn. Kan inzirtir a nih pawhin hei aia level sang hi kan sawi a ngai tawh ngei ngei ang. Chutiang hun a thlen loh nan chuan nangmah kha i pawimawh a, tun hi hun lawmawm chu a ni.

Kan buante hi tisa an ni a, nang aia mawl, nang aia zir hniam, nang aia ban te, nang aia ngal sin an ni. Chuti chunga he ram rethei pawisaa an sahmim an tipuar reng mai si hi a tlawm thlak i ti em? He thil hi a reh theih nan tumahin engmah an ti si lo! He ram hi a ke a bai mek a, i tel lo chuan a dam thei dawn tlat lo.

Tho la, fanghmir hnenah va kal la, va zir teh. Awmhmuna inhumruh a sawt lo, dinhmun leh thuthmun sawn chuang si lova invaivung ringawtin awmzia a nei hek lo; tharum nena inpawngneka reh chi pawh a ni lo. Nangmah, nangmah ngei kha tho la, i thil hmuh leh hriatte atang hian zir la, fing rawh. An dil ni miah lova hnamdang hnena i ram i hralh hunah i harh ang a, i tlai tawh si ang e? Tho la, ding la, thawk rawh le.

If Tomorrow Never Comes

2010-08-02T06:03:00.001-07:00

Thu hmatheh :

Lung a leng rum rum a lawm!! Ni tin eizawnna leh thildangah hun engemaw chen ka buai avangin Blog ka vil thei lova, update a vang pharh mai. Thiante blog-ah pawh - LAIRIL One month ago - tih kan hmu thleh thluah a; a zia lo lek lek a ni. Ni e, June ni 17 khan ka post hnuhnung ber ka post a, kha pawh chauhthubarawh tak tak lehnghal. Tunah pawh hian eng ruai chu a ni chuang lo. June ni 15 zan khan, ziah tul si, ziah tur hre lova ka computer folder ka en kual mai mai laiin, he hla thu ka dahna txt file hi ka zuk hmu a. Ka lo chhiar chiang ngai hauh lova, ka han chhiar a, a hla ka ngaithla zui bawk a; tum lawk miah lovin ka ziak chu a ni ta der mai. Peih huna chhunzawm leh tura ka tih a ni a, 'peih hun' a la thleng si lo, blog update a ngai tawh si a, losul haw lam kesil ang nuan a la ni tih hre reng chungin, chhan loh aiah 'Petera' kan ti a ni ber mai. Chhiar chhin teh -

-----------------------------------

E khai! ka lo ngaihtuah ngai reng reng hlei nem!! He hringnunah hian a kalh tikimtu mai chauh ni tur emaw ka lo ti hial zawk em ni? Hetianga chiang hian ka lo la en ngai lo. Ka en a, ka hmu chiang a nih pawhin ka thinlung leh ngaihtuahna telin ka lo thlir ngai lo a ni chek ang, tun hma zawngin hetiang hian ka ngaihtuah ngai tlat lo!

Zan rei tawh tak a ni a. Pawn lamah chuan ruah mal a tla siap siap tih hriat takin bathlar dithlifarfem atanga tui far thla ri tliar tliar chu a hriat theih a. Thawm dang hliahtu awm hek lo, ka thil thlir lai mek mihring, tui taka muhil thaw ri sek sek pawh chu a chiang ngang mai. Ka thlir reng a, tui takin a mu tih ka hria a, mumang nuam leh hahdam tak a nei a ni ngei ang, a hmel a hlim siah mai!

Eng ka hmet thim a, ka hmangaih ber bulah chuan ka mu ve ta a.

Muthilh mai theih ziazang a ni lo. Engati tehreng nge maw ni? ka rilruah thil tam tak a rawn lut indawt zut zut a. Ka bula mu, he khawvel hmeichhe zinga ka hmangaih ber nena kan intawn dante chu ka ngaihtuah chhuak ta hial a!

'Hmangaihna hmasa ber hi a na ber mai' an lo ti thin. Chuti a nih chuan he hmeichhia aia hmangaih nasat hi ka nei tawh a ni ngei ang. Mahse tun dinhmunah chuan amah aia hmangaih ka nei thung si lo, a mak mang e!! A tan ka neih rosum ka ui ngai lova, ka hun leh tha ka seng hreh hek lo. Chutiang chu a hriat vang pawh a ni chuang lo, min lo hmangaih ve a, ani pawhin kei tehlul tan hian a engkim a phal a, dam lai par chu hmang chul turin kan intiam ta a nih kha.

Kum engzat nge liam leh ta a va tam tawh ve! Eng tik nge, 'Ka hmangaih ber che' ka tih hnuhnun ber kha?? He hmeichhia hi ka hmangaih a, ka nun hi ama tan chauh tiin ka pe a; a tan ka rinawm. A nuamsa lovang tih hlauvin ka thiamna leh theihna zawng zawng hmangin ka thawk a, a thawh hah phal lovin ei ka zawnsak. Nitin ka chhuahsan a, zanah pawh a tul a nih chuan ka chhuak a, atan chuan a thim a var pawh ka thlu thei lo. Mahse chu chu a tawk em?

Naktuk zingah hian tho tur awm ta lo ila, a tana thawk turin chakna nei zo ta lo ila, amah be turin tawng thei tawh lo ta ila, atana ka thiltih zawng zawng te, ka thinlunga ka hmangaihnate hi a tan hian a tawk zo ang em? A ringhlel mai thei ang em??

A tan tiin ka theihtawp ka chhuah ve thin tak na a, a hriat tur hian eng chen nge amah ka hmangaihna hi ka phochhuah? Ani chauh hi he khawvela ka hmangaih awmchhun a ni tih hi ni tinin a hriat nawn theih nan ka theihtawp ka chhuah takzet em? keimah pawh ka chiang lo! Chuti chu ani phei chu a va chiang lo lehzual awm ve!!?

He khawvela ka hringnun hman hun chhung hi tawpin, ani hian ka tel lovin hringnun kawng chhukchho hi rawn zawh ta se, hun kal tawha a tana ka inpekna te, amah ka hmangaihna ka lantir zawng zawngte kha a tan hian a tawk zo chiah ang maw??

He hringnunah hian hmangaih tak tê a ka hmangaih, mahse ka hmangaih a ni tih hrethiam hauh lo tur ka chan tawh. A hun laia ka hmangaihna ka lantir hnem tawk loh avang leh ka thiam tawk loh avanga lungchhira hringnun ka hman takzia hi! Ni, an laka ka rilru putdan te, ka hringnun dungchhir tibuai vek khawpa ka hmangaih dante ka hrilh lohva liamtate kha ka dawn kir a, 'Tichuan lo ti ila, khati khan lo ti ta lo zawk ila,' tiin, inchhirin ka indawm kun leh si kha a ni lo em ni??

Ni e, ni chiah e. He hmeichhia hi ka ta a ni a, ani pawhin min nei ngei mai. Ka hmangaih a, ani lo chu hmangaih dang neih leh pawh ka tum lo ve. Mahse hei leh chen In khata chengdun a, khum khata kan mutdun hnu hian eng chena sangin nge ka hmangaih tih hi ka lo lantir tlem hle mai ka ti! Ka sawia, ka lanchhuahtir si loh chuan engtin nge a hriat tehlul ang!? Naktuk atang chuan, ni tinin amah ka hmangaihzia te, ka tana a hlutziate ka lantir tawh ngei ngei ang. Chuti lo zawng, naktuk hi a lo thlen loh palh thut a, hun remchang ka neih loh hlauh zawngin, ka thlarau a inthiamlo kumkhua tawh dawn a sin!

Sometimes late at night

I lie awake and watch her sleeping

She's lost in peaceful dreams

So I turn out the lights and lay there in the dark

And the thought crosses my mind

If I never wake up in the morning

Would she ever doubt the way I feel

About her in my heart

If tomorrow never comes

Will she know how much I loved her

Did I try in every way to show her every day

That she's my only one

And if my time on earth were through

And she must face this world without me

Is the love I gave her in the past

Gonna be enough to last

If tomorrow never comes

'Cause I've lost loved ones in my life

Who never knew how much I loved them

Now I live with the regret

That my true feelings for them never were revealed

So I made a promise to myself

To say each day how much she means to me

And avoid that circumstance

Where there's no second chance to tell her how I feel

If tomorrow never comes

Will she know how much I loved her

Did I try in every way to show her every day

That she's my only one

And if my time on earth were through

And she must face this world without me

Is the love I gave her in the past

Gonna be enough to last

If tomorrow never comes

So tell that someone that you love

Just what you're thinking of

If tomorrow never comes

--------------------------------

15/07/10 11:21PM

Serlui Thlalak

2010-06-17T21:40:00.000-07:00

Serlui hnaih tak khuaah ka awm a, mahse Serlui thlalak hi ka la post ve miah lo. March thla daih tawh khan ka zuk tlawh ve a, Camera tha lem lo hmanga ka thlalak thenkhat ka'n vawm bei ve ang e. Ruah a sur nasat leh tawh avangin tunah hi chuan tui chim chin hi a dang tawh ngei ang.

Tuikhuah - a lian/zau lai

Hei pawh, tuikhuah lai tho.

Tuikhuah lai tho - a sir vei lam atanga lak

Tui khuap tura chhun pawn. Tui chim chin leh a tlang chung lam inkara chhawrdawh lang riak khi chiang takin lo en teh.

Hei hi tuiin a chunga kan sawi tak chhawrdawh a chim thlen huna a luan liamna tur - Spillway an tih chu a ni.

Tuikhuahna tura lei chhun pawn chung zawl hi motor lian kal theiha siam a ni.

A chunga mi tho, a lehlam atanga lak a ni thung.

Tui khuahna tura tlang chhun pawn thlang lam. Power house te dah a ni a, step thui tak kalin a thlen thlak theih.

Lei chhun pawn thlang lamm, step chanve thlen hma deuh atanga lak.

Tlai ni tla tur - Camera tha lo chuan a mawi har ngei mai!!

World Cup 2010 : Khawvel hi a va danglam ta em!!

2010-06-13T07:11:00.000-07:00

[Eizawnna lama tulna avangin thingtlang lam hrutin ka zin nual a, blog pawh ka uaplum thei lo. Serlui 'B' thlalak rawn tar ka tum pawh ka thulh leh rih. Kar tawpah Inah ka awm a, Kolasib chanchinbua chhuah tur thu ka ziahsak hi - blog khawhar lutuk tur ven nan ka han vawm bei leh tawp a ni e. 'Kolasib' tih vel a awm nual a, a local viau thei a, (misual dot com dan takah) a duh duh tan OT theih a ni e. :D]

Kum 20 kalta kha chuan South Africa khu ram hrehawm tak a ni a. Vun hang ho lakah vun var an inlulin avangin hmun tinah buaina a chhuak a. Chi inthliarna avangin he ram hi ram hrehawm ber zinga mi a ni ang.

Kum 2010 a lo herchhuak a, chi inthliarna avanga ram hrehawm leh buai takah chuan mi ngo leh mi hang an au za a. Kawr eng leh hring an ha ho a, Vuvuzela an ham a, lungrual takin an team-te inkhel an au a, rilru hmun khat mai a ni lo, tlar khatah, dar insiin an thu ho ta! Khawvel hi a danglam tawh chiang a ni.

Chi inthliarna duh lo pawla a meizanghlaptute leh an thlahte leh, hnam hnufual, mi hang bula awm duh ngai lo mi ngote chuan, Anti-apartheid movement-ho hlapui an sa rual dual dual a, chumi hnuah white-minority government-ho hlapui an sa rual leh dual dual a. Chumi hnuah chuan ring mangkheng takin Vuvuzela an han ham ho leh a; a va ropui em!!

Stadium panna ticket chang lo mi sang tam takte tana sorkarin fan park a siamah pawh boruak a danglam chuang lova, Stadium chhung ang tho a ni.

FIFA ranking-a 80-na hnuai lama awm South Africa hi World Cup thlengtu ram zinga ranking hniam ber ni mah se danglamna tehchiam a awm lo va. An aia ranking sang, World Cup pawh khel hnem fe tawh zawk Mexico lakah goal an khung hmasa ngat. Group A inkhel hmasa zawk, 2010 World Cup game hmasa berah South Africa tana record danglam neitu Siphiwe Tshabalala chuan goal a khung hmasa a, he left winger hian goal a khung tawh chuan South Africa hi chak lo zawkah an tang ngai lo va; Mexico chuan an si phurh rawn sut leh mah se, an game khatnaah a thlengtu an chak lo bik lo. A thlengtu ram hian Group Stage an pel ziah a, South Africa hian he record hi an siam danglam hlauh ang em? Danglam lo ta se, Group A atang hian tute hi nge Group Stage paltlang tur??

World Champion hlui pahnih France leh Uruguay inkhel lah goal awm lovin an tin ringawt bawk si. Anni inkhel khan beisei a phak lo. Lyon goal khung khawl Karim Benzema te, Barcelona leh Arsenal goal khung khawl thin Thierry Henry te, Juventus tana goal khung reng mai thin David Trazequet-te kha khawiah nge an awm? Bayern Munich winger tlan chak Franck Ribery-te pawhin goal an khung bik loh chuan, Uruguay hmatawng Diego Forlan leh Suarez-te pawhin an khung thei bik lo.

Group B ah kan Bial chhunga awm South Korea an rawn lang. European champion hlui Greece chu 2-0 in an rawn hneh ngat mai! An inkhel kha a hma deuh na a, entute duh zawng takin goal a lut tlat a, a hmuhnawm. Chu mai chu ni lovin, Manchester United-a a khel lai kan hmuh thin Park Ji-Sung ngei kha captain a rawn ni a, goal a rawn khung lehnghal a!

Group B hi a hmuhnawm hrim hrim. Argentina leh Nigeria inkhel pawh kha hmuhnawm tak a ni. An coach hova ‘star’ ni vek Argentina-ho kha MHIP lamin an tan nasa leh pek mang e! Lionel Messi-a’n teuh deuh deuhva a pet laia nuho au thawm kha i lo ngaithla em??

Engemaw laia Manchester United leh Liverpool inkara inhmel-makna tichiang thei ang bera boruak nei Gabriel Heinze, kan hmel hriat ngei khan diving header mawi takin goal a han khung a! Carlos Tevez leh Lionel Messi-te an han tlan per per a! Higuain a lo lang zeuh zeuh bawk a. Senior lamin a hming an lam thiam ‘bon’ tawp tawp Maradona a lo lang zeuh zeuh nen.. World Cup an ti World Cup ngei mai.

An hlawh zatte nen lama kan hriatsak, an nupuite leh an bialnute hming chena kan lo hriat ve England-ho an rawn inkhel ve leh. Khawvel ram ropui ber USA nen an han inkhel a. Kumpinu hian an tluk hleih theih tak loh USA ber kher nena Group khata an awm hi duh thlang thei ni se chuan an thlan loh tur zinga mi a ni ngei ang.

John Terry-a’n a uiresan avang leh a thachhangdawltu Rio Ferdinand-a’n a dam lohsan avanga Captain banhren hreng Steven Gerrard ngei khan inkhelh tan atanga minute 4 na lekah goal a rawn khung ta mai a; Kolasib veng hrang hrangah zan dar 12 pelh hnua au thawm la rinzia khan World Cup kan en tih a lantir.

USA lamah hian khawvel huapa player lar tam chiam lo mah se English League-a khel, English player te hre chiangtu an awm nual a, Lampard leh Gerrard-te awmna field laiah USA an chungnung zawk tlat. Spain leh Real Madrid keeper Iker Cassilas-a’n, ‘England goalkeeper-te zingah hian European Competition khel phak pawh an awm lova, an player dangte tha mahse an chak loh phah thei a ni,’ ti a a lo sawilawk a thleng dik tlat pek a. Clint Dempsey-a shot ropui em em lo kha Robert Green khan a dang thei lova, point hnih an hloh phah.

Hun rei pawh a la ni lo, 1994 hma lam World Cup-ahte kha chuan Kolasib-ah hian In tinah World Cup kan en ngai lo. Television set nei phak te kawngkapui bula Sleeper leh chapal tam theihziate kha sawia fiah chi a ni lo va. A neitute awmna pawh leng lek lova inkhel en duh kan tlim hmur thin dante pawh kha sawi mai hian a fiah lo.

Khatih hun lai kha chuan ‘Power ren rawh u,’ tih pawh a ngai tehchiam lo. A chhan chu inkhel enna In kha a tam lem lo tlat. Tunah chuan Mizote khawvel pawh a danglam zo tawh a. Maradona leh Baggio-te hming bak hre fumfe lo thin khan World Cup khel ramte zingah hian an hming leh hmel hriat pakhat tal neih lohna kan nei tawh mang tlat lo. In tin ah TV kan on vek a, kawng kal chung pawhin commentator-te tawng leh Vuvuzela ham ri a hriat theih reng. Khawvel hi a danglam tawh a ni.

Ni, khawvel hi a danglam tawh a. Sap hovin khawmualpui thim an tih thin ngei maiah World Cup an khel mup mup a. Ram changkang nia an sawi thin Europe-a an thlendan nen a danglamna sawi tur a awm lo.

Mahse..... hei erawh a la ngai reng a, a pawi lungrun mang e!! Mizoram chu World Cup kan en ve tirh ai khan Power-ah kan la hniang-hnar ta chuang lova, kan mamawh zatve pawh kan la siam chhuak lo cheu! A dik a dawk thlu lova Compensation la duh Kristiante khan Politician-te in mawhpuh a, in kawk leh ringawt em ni? In zak em?? Sorkarna chan apianga chhung leh khat, vua leh vang vulh duhna thinlung chiah nei Politician-te pawh kha zak rawh u. Sorkar hnathawk, mahni pumpui tanghma chauh ngai a, ram hmasawnna atana sum lo kal, dik lo taka hmang thintute u, nangni avang hian kan la heti cheu tih hi mipuite hian kan hria tih in hria em? Zak ve bawk rawh u.

Ni, ka unau, hei hi hre teh. Kan intodelh lo mai ni lovin, a ba-in kan chhi si a, Power renchem hram ang che. Chuti lo chu World Cup kan en thei lo a ni mai.

DUHTHLANNA

2010-05-03T03:32:00.000-07:00

A pawi ngawt mai. Naupang fel a ni thin, tleirawl fel a ni chho zel, 'Ani hi chuan tleirawl sual pawh a nei lo,' tih thin a ni. Mahse, chutiang chu ni mah se tunah chutiang chu a ni tawh lo. A Matric pass kum Krismas lai khan, 'Mite pawhin an ti tho a lawm, vawikhat pian mana tih ve chhin zeuhte chu a pawi hlei nem,' tiin a ti ve chhin a, khami zan atang khan 'Zu' a la thlah leh ta lova, zu pawhin a thisen a chhuahsan ngai ta bik lo. Tunah chuan nupui fanau a nei duah tawh a, a fate pawh an nula tlangval ve uaih tawh. Mahse ani ber hian hma a sawn lo. Tun hmaa a thiam thilte chu a theihnghilh a ni lo, zu vang chuan hmang theiin a awm tawh lo. Zu a in loh chuan a khur tlat a, chakna a nei lo. Zu a in lahin a rui a, engmah a ti thei chuang si lo.

A naupan laia a kawm thin, Sikul pindan khata a thutpui thinte kha chu khi-ah an awm tawh. A then chuan sorkar hna lian tak an thawk a, a then chu Kohhran leh khawtlangah hruaitu, mi zahawm tak tak an ni. Ani ve chuan, 'He mite nen hian sikul kan kaiho thin,' tih bak sawi tur a nei ve lo, chu bak chu a fate hnena han insawitheihna tur a nei ve thlawt lo. A nupuiin sorkar hna thawk lo phei se chu.....

******************

A thi tawh! Naupang hmel tha tak, harhvãng em em, a rualpuite aia lehkha thiam thei thin a nih kha. Mi tam tak chuan a hming, 'Lalthafamkima' chu inhmeh an ti thin. A chhan chu a hmel tha a, a fel a, lehkha a thiam thei bawk a; a kuziak nalhziate kha a a sikul kai rualpuite sawi a nih thin kha.

Ni e, kha tleirawl hmeltha kha kum khat lekah a hmel a danglam vek a, a cher ruam a, a thú thet a, lehkha pawh a thiam thei tawh lo, Matric pawh a pass zo lo. A chhungte pawhin mak an ti.

A thih hma khan a thian thenkhatte bulah chuan khatia a awm chhan kha a sawi an ti. Matric an zir kum khan a thian chhar thar - mikhual lehnghal, pahnihte nen khan an inkawmngeih fal a. Pawisa an nei a, an fel bawk si, kawm an nuam em em mai. Ni khat chu - ruihhlova an inchiunaah an hruai ve. 'I duh ve em?' an ti, a duh lo. Mahse, an ban an tawn a, han invit a, an invih zawha sikret an han fawp vang vang a, an kut an han nuai set sette kha 'pa' riauvin a hre tlat a. 'Ti ve chhin rawh, i ti hlen chuang nang, keini pawhin a awm loh chuan kan nghei thei reng a lawm, engmah a ni lo; a nuam a nia,' an tih khan, 'Aih' ti se a fel tur; a ti si lo. A invit ve chhin a, a nuam a ti. A zawngchhang a, a tawpah chuan a thiante aiin chu damdawi chu a ngaina ta a, a chhungte leh khawvel thildang zawng zawng ai pawhin a mamawh tawh zawk a; a thih phah ta. A thih chhana 'accident' tih kha chu 'tih mai mai' tih mi zawng zawngin an hai lo.

********************

'Mite pawhin an ti tho, ka tih loh avangin engmah ka ni bik lo. A ti nasa apiangin lawm an hlawh zawk niin a lang tho,' tia, inthiam taka a hlawh ni lo thla tin a lak ve ziah thin khan tunah chuan a thing let ve tan ta.

In leh lo zahpuiawm loh tak a nei, lirthei pawh a chhuak thar ber ber a khalh. A fate pawhin sikul tha atangin tha takin an zir chhuak. A buaithlak lai ber chu - a fate chuan an zirnaah chuan hringnun zirlai an zir tel tlat lo. A nupui pawhin thawmhnaw chhuak thar ber ber a inbel a, rimtui leh tlereuh changkang chitin a nei, a hmui hmai leh a sam pawh 'world class' a ni hial ang chu; mahse a nalhna leh mawinate chu a pasal chuan a pumbilh tlat lo; a driver-te nen miin an sawi leh thin. Thudik a nih leh nih loh tumahin an hrilh duh lova, ani lahin a tak a nih leh nih loh a fiah thei si lo.

A fapa chuan lehkha a thiam thei a, zirna in thaah a kal bawk a, a zir zawh ve leh hna a hmu nghal. Sum leh pai thawhchhuahah a buai lo, a thawhchhuah sa sum leh pai hmanna lamah a buai a ni. A thawhchhuah zozaite chuan zahawmna a pe lova, hlimna a pe hek lo. Vawi tam tak a staff-te nuihzat khawpin a 'rui' a, a ruih vangin vawi tam tak a chesual tawh a, rui chunga motor a khalh avanga a chetsualnaah a malpui ruh a titliak tawh. Chuti chung chuan zu leh nula vanga mi sawi a la reh thei lo.

Ni, sum leh pai ngah hi zahawmna niin a hria a, zahawmna chu In leh lo leh lirtheiah a awm emaw a lo ti thin; dik taka thawhchhuah a nih loh chuan zahawmna thlawhbotirna hmanraw tangkai ber a ni tih a hre tawh. Mahse a hriat chhuah chuan a tlai lutuk tawh. A va hahthlak em!!

****************

Mosia chuan hun rei lo tê atana sual nawmna hlimpui ai chuan Pathian mite nena tihduhdah tuar a thlang zawk a. Krista an hmuhsitna chu Aigupta ram rote ai chuan sum ropui zawkah a ruat.

Daniela leh a thiante chu lal chaw leh uain in thin te chuan an intihbawlhhlawh duh lo tlat a, chutiang ei leh in thin te ai chuan an hmel a lang mawi zawk mah a! A rawng an bawl thin, an Pathian chuan meipui lak ata chhanchhuak dawn lo mah se Nebukadnezzara pathian chu chibai an bûk duh lo tlat a. Meia paih luh an nih pawhin an taksa chungah meiin thiltihtheihna a nei lova, an sam pawh a kang kir lova, mei rim pawh an nam lo!!

Khawvel mithmuha thiamlohna pakhat mah nei lo chungin Ruthi chuan a pasala nu chu a kalsan duh lova, a vuan tlat a; Isua Krista, khawvel chhandamtu thlahtute zingah chhiar tel a nih phah ta.

Ringtute chuan -

Ram zau taka lal bera thut ai chuan,

Sual thunun ka nih si chuan;

Isua neih ka duh zawk, thil dang zawng aiin,

Khawvel zawng ai pawhin.

an ti mai!!

Sikul Tha

2010-04-22T22:18:00.000-07:00

Zirna In (Sikul) that leh that loh hi a In (building) chhiat leh thata teh tur a nih chuan he sikul hi chu a tling lo sa. Zirlai ngah leh ngah lohva teh tur a nih pawhin, zirlai ngah lo ber zinga mi a nih avangin sikul tha zinga chhiar tel tur a ni lovang. Zirtirtute thiamna te, an mihring mihrinna leh khawtlang tana an inpekna chungchangahte, naupangte fai leh balh chungchangahte, zirlai naupangte pass-na division san leh san loh te pawh a ki pui bera hman a nih chuan he sikul hi sikul tha a tling kher awm lo ve.

Mahse...

Tun laia mi tam takin kan sawi leh kan hriat, sorkar enkawl sikul that tawk loh fo thu te, zirtirtute inthlahdah dan te, naupangte tana theihtawp an chhuah lohziate hi he sikul-ah hi chuan sawi tur a awm ve lo.

Sikul thenkhat chuan kum tin Distinction-a pass an nei a, kum tin first division-ah za chuangte an hlangkai a, chutih lai chuan chutiang ni ve phak lo mai ni lo, exam pawh exam phak ve lo; ni lo, chu mai pawh la ni lo, an sikula kal ve phak lo pawh tam tak an nei thung. Mizorama sikul tha zinga chhiar tel tam tak hian zirlai engzat nge an thlauh a, hlawhtlinna mualeng hmu phak lova an nem pil tawh tih hi i chhut ngai em? Chutiang chu sikul tha kan tih chuan, he sikul, Govt. Hortoki High School hi sikul tha a ni ve lo maw? An sikula kal turin duh thlang thei an ni ve lova, a awm ang ang an zirtir mai. Chuti chung chuan kum 4 (li) chhung a zawnin Class X zirlai zawng zawng an pass-tir thei vek; thlauh an nei ve lo!

Mi tam tak chuan he thu hi in hnial chak nghal. ‘Tuna sikul tha, zirlai duh duh thlang theite hi hun rei tak atanga zirtirtute thawh rah senga tun thleng hi an ni,’ in ti ngei ang. A dik maithei e, mah se, he Hortoki High School hi chuan a zawna kum 4 za a za passed result an nei chung pawhin tumahin an bawh phah lo. En reng rengin a building hlui bum maia zirlai naupang nih chaka rawn pan vang vang an awm dawn lo tih a lang nghal. He sikula zirtir hna thawk tur hian sorkarin mi thiam leh tha zawk a rawn dah lah chu Bin Laden-a vanram kai a rinawm loh ang vela rinawm loh a ni bawk si!

An sikul building chu thawm that lohva a awm rei tawh em avangin a chung a pawp chek chuk a. Hotute hnena sikul sak thatna tura zirtirtute’n an dilna te, khawtlang nu leh pate’n an dilnate chuan ngaihpawimawh a hlawh lo; he sikul aia ngaihven leh ngaihpawimawh hlawh zawk he Zoramah hian a tam lutuk a ni ang. Ruah a sur chuan pindan tam zawka awm chu pawna awm aiin a ziaawm hret tih chauh a ni a, class lâk ngaihna a awm lo.

Zirlai an ngah a, sikul pindan an indaih loh pawhin tihngaihna dang a awm lo. Zirtirtute chuan an sum thawhkhawm hmangin thingtuai leh Silpoulin an lei a, khawtlang hruaitute hmalâkna avanga a thlawna dâp an neih hlauhte nen tangkawpin an zauh belh a, a inpui (main building) nen pawh a inmawi phian zawk!

1974 a din, din a nih atanga kum sawmhnih hnua Provincialized Hortoki High School hian mi sikul angin building tha an nei lova, zirlai thiam thei pawh an nei lem lo. He khuaa hausa deuh leh thiam thei deuhte chu Aizawl leh hmun dangah lehkha zirin an nu leh pate’n an tir chhuak vek zel a, zirtirtute chan chu a sikhaw pawl an ni deuh zel. Chuti a nih avang chuan he sikula zirtirtute hian an thiamna ang thiamna nei, an hlawh zat ang hlawh ve tho sikul dang zirtirtu aia an hah a ngai tih an hria.

Kum tinin Class X zirlaite chu exam vawi 5 tal an neihpui thin a, Board Exam an hmachhawn dawnah, a thlawnin zirlaite chu study camp an neihpui a, theihtawp chhuaha an zirtir a. Hlawh belh chu sawi loh, an tha leh tui bakah an sum leh paite an sen zawkna chuan rah tha a chhuah a, a zawnin kum 4 lai mai za a za passed result an nei ta a ni.

Zorama sualna hrang hrang hi chhut ila, páwngsual, rûk rûk, zu leh damdawi hman sual - sualna tenau, kan buaipui êm êm ni mek, kan khawtlang hmel tibaltu tam ber hi eng ang mihringin nge ti thin? Chhût chiang ta ila, High School zo lo hi tam tak an ni tih a sawi ngam a, a tam ber an ni hial ang em? Zirna kawtchhuah thleng phak lo, a mawl tawk chauhva lehkha zir, kuthnathawh peih lo tingtang; kut hna thawk lova hna dang thawk tura chhawr tlak si loh he Zoram hian a ngahzia hi chhut a hun. Ei hmuhna khawpa thiam si lo, a nawmna hre phak tawka mobile phone leh computer application hrang hrang hre ve phak si thalai engzat nge kan neih mek? Korean serial film lehlin lohva hrethiam lo, an sam suasam dan leh an thawmhnaw inbel ang inbel tura fuih ngai miah lova inbel chakna thinlung nei pha si engzat nge kan neih? Hetiang thalai kan neih tâk vakna chhan hi eng vang nge? Kan zirnain kalphung vang a ni em? Ni ta se tu’nge mawh phur ang??

Sikul tha kan tih tam tak hian Class X failed tawh an zirtir nawn lo fo. Result tha nei tam tak hian result tha an neih nan hian thiam thei lo zawk an chhawk fo bawk. Hortoki High School-a Class X zirlaite hi, an nih ang ang hian, Mizorama sikul tha ber bera zirtirtute hian, tuna an naupangte an zirtir ang hian zirtir ta se engnge an an ang tih hriat a chakawm. Khawpuia zirlai naupang tam tak hian an pian hlim atangin Television an thlir nghal a, ‘Computer’ tih thumal an hriat hmain a tak an hmu. Hortoki High School-a zirlai tam zawk hian an Inah TV set an nei lova, Computer-te phei chu vana rah ang a ni. Chuti chung chuan IT Subject an zir ve a, hlawh inang theuh theuh zirtirtute tan a inhahdamthlak leh inhahthlak hleihzia tur hi chhut a ngai lo. Tuition la turin pawisa an nei lova, a hman pawh an hman lo; sikul chawlha lo lama feh turin an chhungten an tha an ît tlat. Chuti chung chuan kumin (2010) HSLC result chhuakah khan first division-ah mi pahnih laiin an passed ve tlat a, pakhat phei chuan subject pakhatah letter mark a hmu ve hial!

Zirtirtu inthlahdah vangin kum tin zirlai naupang tam takin an zirlai an pass zo lova. Thuneitute dahnaa awm tha duh lo zirtirtute avangin an hlawh hmuhna chhan zirlai tam takin an nih tur ang an ni phak lo. Naupangin an naupan lai hun tha tam ber an hmanna sikula lo enkawltu zirtirtute mawhphurhna hi a va sang tehlul em! Zirtirtute hlawh thatzia hria, an mawhphurhna sanzia hre si lo zirtirtu hi engzat tak nei ang i maw??

Sikul tha chu engnge ni a, eng ang tehna nge sikul tha leh tha lo teh nan kan hman ang a, khawi chinah nge ramri kan kham ang? tih hi inhnialna tawp thei lo a ni hial maithei. A enga pawh chu ni se he’ng zawhnate hi i inzawt ve tawh ngai em?

* Sikul hi lehkha thiam thei naupangten division sang taka an passed chhuahna tura din leh ruahman ni lovin, thiamna nei lo zirlaiten thiamna an neih ve theih nana din leh ruahman a ni zawk ang em?

* Naupang duh thlang thei sikulten an zirlaite first division leh a chunglama an passed-tir suau suau avanga an lawmna nge, an hmuh ang apiang admit a, division hniam lama passed-tir ve hram hram zirtirtute lawmna hi sang zawk ang?

* Zirna avanga mi tha leh tangkai kan siamchhuah nge, zirna avanga khawtlang tana hnawksak kan siamchhuah hi tam zawk ang?

Vai-vawm A ??

2010-04-07T21:03:00.000-07:00

Readers’ Digest-a an fiamthu pakhat, ka hriat chhuah fo a awm - ‘Vaipa pakhat leh a fanu tê hian India leh Australia-te’n One day International Cricket an khel chu a hmunah an en a. India thawh (bat) ni a ni a. A fanu tê chu a ngawi vang vang a, ‘India tan khuan chak ngaihna a awm lo,’ a rawn ti chhuak phawng mai a. A pa chuan, ‘Engati maw?’ a lo ti a. A fanu tê chuan, ‘Khu, en ‘che, Australia player khu 11 an nia, India ve khu pahnih chauh an ni si a, engtinnge an chak theih ang?’ a lo ti a!!’

Hrethiam lo tan chuan Mizo tam takin ‘Vai-vawm’ kan tih mai, Cricket hi a hmuhnawm tehchiam loh khawp mai. Amaherawhchu India thluak hmanga din leh kalpui mek ‘Indian Premier League’ chu khawvela infiamna lama sum tamna ber zinga a tel tak avang hian ngawihsan reng thei kan ni bik lova, a kawngkapuia kan lut thei lo a nih pawhin, pal hniam lai deuhva lawn liam tal kan tum ve loh chuan, IPL a sum leng vel zozai leh la leng leh zel turte hi midang ta tur a ni zel ringawt dawn tlat.

Alpha

Sang leh zakua tih lam a ni lo, kum zabi 12-na leh 13-na vel daih tawh atanga zung kaih tawh Cricket game hi a khel hmasa bertute pawh sawi fak theih a ni lo. Mahse khawvela Cricket pawl hmasa ber leh upa ber zinga mi leh tun laia Cricket Dan leh Hrai (Dan leh Dun ni lovin) lama thuneitu ber - The Marylebone Cricket Club (MCC) hi 1787 a din a ni tih erawh a chiang a. Chuti chung chuan London Cricket Club khu 1744 khan din a ni tawh tih hriat chian a ni bawk. 1744 khan Cricket changkansan tum, tun lai Mizo thangthar min thlahtute khan eng thuamhnaw nge an la inbel kha??

Ram 15 chauh!

Ni e, khawvela Cricket khel thin ram te hi ram 15 chauh an la ni. Amaherawhchu heng ram 15 te hi han thlir teh - Asia khawmualpuia ram lian tak tak - India, Pakistan, Bangladesh leh Sri Lanka te hi ram ropui taka chhiar vek theih an ni lo chungin, mihring tam lamah chuan an duai lo a nia. Australia khawmualpui pumpui khuan Cricket aia game ngaihsan an nei lova, Africa khawmualpuiah pawh a changkang lamin an tuipui mek a, a rethei zawkte pawh an thangharh chho zel. Europe khawmualpuiah pawh England chu sawi lohva leng an ni a, Netherlands, Scotland leh Ireland tih vela a lar chuan ram dang hian an ngainep rei dawn lo tih hi sawi ngam a ni ang.

Ram ropui USA ah pawh Cricket hian zung a kaih mek a, 2004 atang khan Cricket Professional League an tan tawh a. Twenty Twenty format an chin thar tak atang phei hi chuan American-ho khuan Cricket hi an ngaihven thar hle an ti. China ropuizia pawh hi sawi ngai lova chiang a ni. Anni pawh hian Cricket-ah hian ‘awm’ a awm tih an hmu a ni ang, 2004 khan he game tihhmasawnna tur ruahmanna an duang tawh a, tunah hian 2019 World Cup khelh phak ngei tumin an bei mup mup tawh a sin!

Game hmuhnawm

American-ho khuan khawvela game ropui bera kan ngaih Football (anni chuan soccer an tih) hi an ngaisang hlei thei tlat lova, a chhan chu, ‘Score a tlem lutuk,’ an ti! Game hmuhnawm reng reng hi chhut vang vang la, score tam a lo ni deuh zel a, American-ho ngaihsan infiamna khu score tam a ni zel. Basketball-te pawh, second tin deuhthaw maia score a awm hi a hmuhnawmna lian ber a ni.

Cricket phei hi chu a hmuhnawm a sin! A hrethiam lo tan chuan a vawmtu lam 11 lai field chhungah an lut a, a vawtu lam pahnih chauh an ding si a, a vawmtu lam hi chak zawk tura rin a awl ngawt ang; a ni der si lo. Vawikhat thawh (Over khat) ah a vawmtuin vawi 6 a vawm thei a. A vawtu chuan ball (vawm) tina run 6 a siam phei chuan Over khatah run 36 a ni daih thei. Chutih lai chuan Over khatah batsman zawng zawng an thi (out) phiar thei tho bawk! Out dan lah a tam - a Stump (hmawlh pathum hi) a fuh te, a Bails (hmawlh pathum chunga kham pahnih) ball-in a pera, leia a tlâk te, Middle Stump zawna ball kal tur ke hmanga lo dan palh (leg before wicket) te bakah Catch out te, Stumping te, Run out-te a la awm a. A thiam leh thiam an inkhelh a, target sang tak mai an han ûm te hian a hmuhnzawm zual. Over khata an run vuak chhuah (run rate) te hian awmzia a nei thui lutuk tlat a. Football anga a goal hun nghah ngawt ngawt a awm ve lova, titi pah leh haw-haw chunga en mai mai chi pawh a ni lo; rilru zawng zawng hmanga en ngei ngei ngai a ni.

Vai vawm a?

Silchar khawpuia vaiho pawh khu MLA 40 nei ve thei ngat Mizo mipuite hian kan zāt lova, Silchar lêt nga vel khu Kolkata khawpuiah khuan vai kan tihte hi an la awm a! Kolkata khawpuia awm lêt tam tak India ramah hian ‘vai’ an awm, tam tak hi an ni ringawt!! Chu’ngho tuipui ber chu Cricket hi a ni. Silchar Super Market a ni emaw, Kolkata Fancy leh New Market a ni emaw, New Delhi-a Karolbagh leh Sarojini te leh Chennai-a T-Nagar leh Broadway Market emaw pawh ni se a dang chuang lo, India team-in Cricket an khelh tawh chuan boruak a danglam vek a, dawr neitu zawng zawngin TV emaw Radio emaw hmangin Cricket chanchinthar an ngaithla a, India hnehna chan lai taka i dawr palh a nih phei chuan an zuansan tawr tawr che ‘nga, i hrilh a hai hial maithei. Chuti chu ni mahse India hian 1932 atang khan Cricket hi a khel ve tan chauh a, an khelh hman hian SAP kan tih zinga an aia sap awm thei chuang miah lo England te, Australia te, New zealand-te leh Canada te chuan an lo khel daih tawh a. International Cricket game hmasa ber phei chu USA leh Canada-te khuan 1844 khan an lo khel tawh a, 1859 khan English Professional player-te chuan North America khawmualpui fangin, ‘Overseas tour’ an lo nei daih tawh! Helai tlang kar atanga ‘Vai-vawm’ kan lo ti ngawt hi chu!!

Kan khelh ve chi a ni em?

Cricket game hi game zinga rilru hmanhmawh ngaithei lo ber pawl a ni hial ang. Rilru hmanhmawh, tih ngai ti rei peih mang lo, kum tina thlawhhma sawn thin Mizote tan khelh chi a ni ang em? Test cricket lam hi chu kan tuipui har deuh maithei a, khawvelah pawh a lăr chak lo. Mahse tun laia lăr chak em em, Over 20 ve ve (Twenty20), invenna rilru tel hman mang lova vawm leh vuak pawp pawp mai ngaihna ang hi chu Mizote khelh chi lutuk a ni.

Hmanni lawk atang khan Mizo thalaite hian an khel ve tan a, Vairengte tlangvalte khu Dholai leh Bagha vaiho, englai pawha Cricket tuipui reng mai thinte khuan an hneh tawh mang miah lova. Kolasib tlangvalte chuan Silchar Cricket Association team an zuk hneh ringawt bawk! Kan thalai engemawzat hi chuan training tha nei ve ngat se chuan Virender Sehwag leh Mahendra Singh Dhoni-te aia nep chuang lo tur Cricket talent an nei ngei ngei ang. A vuaka vuak lamah phei hi chuan kan tha lutuk tlat a, a vawm lamah lah kawng kama Chepa leh Tukkhumvilik vawmthla thei thlahte kan ni.

Kan khel ve dawn em?

Dawn e, dawn chiang e. India ram game tuipui ber Cricket hi Mizote hian kan khel ve dawn khawp mai. India ramah hian khawvel hriat tham khawp a Cricket Stadium ropui 19 a awm a, a tê tham deuh phei chu sawi sen a ni lo. Board of Cricket Control in India (BCCI) a Member State ni turin stadium neih ngei a ngai a, Mizoram pawhin chumi kawng zawh chuan hma a la mek. Sairang bul Sihhmui ramah Cricket Stadium tur a zawl duai tawh a, hna a kal mup mup reng. Stadium kan neih tikah Member State niin, BCCI atangin Promotional Grant nuai bi mai ni lo, vaibelchhe biin kan dawng dawn. Chutih hunah chuan Mizote zingah Santosh trophy khel phãk Footballer kan sawi vul aia nasa hian Ranji Trophy khel phãk hming a lãr zawk ngei ang.

A hlawk em? Hmabak engnge?

Hlawk lutuk tlat. Indian Cricketer-te hi Sponsorship leh commercial atanga an sum hmuhte nena chhut chuan khawvela Cricketer zinga hlawh sang lawr lak an ni a. India football team captain Bhaichung Bhutia aia Sachin Tendulkar hausak zawk dan atang hian a chiang mai. Indian Premier League hi khawvela infiamna ‘event’ zinga player-te hlawh chawhruala sang ber dawttu (NBA dawt) a ni a, chu IPL-ah chuan Cricket an khel. He IPL ah hian player hlawh tlem berin, ni 50 vel chhungin cheng maktaduai khat a hlawh ngei ngei a, chutah chuan match money leh bonus a la tel lo! IPL team an leina man to turuzia te, player man san dante kha i hria ang, khati chung khan IPL team zingah Kings XI Punjab tih loh chuan season tin pound maktaduai chuang vek hlawkna an tel!

Mizote’n football kan buaipui dan leh India football-a kan thlen chin te, India-in International football-a kehniak a neih tlemziate hi chhút teh. Mizo tlangvalte hian Cricket khel vein, IPL team-ah hian khel phãk se, National team-ah tel phãk ta se, International player langsàr a ni nghal dawn.

He khawvel kan awm chhung hian ‘fame & fortune’ a ni lo’m ni kan duh? Chuti a nih a, infiamna lama kan kal dawn a nih rau rau chuan Cricket hi khelh mai chi a ni.

Chokapui-ah

2010-03-23T03:18:00.001-07:00

Hman a ni ve tawh ang chu, kan naupan lai khan, mi Inah TV enin kan lut laklawh tawh si, Cricket an lo chhuah a, awmzia hre miah lovin kan en ve doh doh thin a. Khatih lai kha chuan Kapil Dev kha a lar thin ngang mai.

Hman a la ni chiah lo, 2004 mai kha a ni. Assam Chief Minister Tarun Gogoi-a bulah khuan chaw ka zuk ei ve zan pek a! Hmarchhaka chanchinbumi kal khawm, Assam RD Minister-in Hotel Ashoka, Brahmaputra lui kama zanriah min buatsaihsak tumin Gogoi-a hi a rawn kal ve 'goi goi' a nih kha.

Kan naupan laia ning chung chunga Cricket kan en thin leh Chief Minister Bungalow-a zanriah ei hi a inzawm ang tih ka ngaihtuah ngai lova, ka beisei phak loh thil a ni.

Board of Control for Cricket in India (BCCI) hausakzia hi kei chuan ka hrethiam chiah lova; mahse an hausa tawk ang tih erawh ka ring. BCCI hnuaia Affiliated member State-te hnenah kum tin Promotional Fund cheng vaibelchhe chuang an pe thin tih an sawite ka hre ve thin a. Chu pawisa chu he Zoramah hian engtinnge a rawn luan luh ve theih ang a, India hausakna hi engtiangin nge hemi kawngah hian kan chhawr ve theih ang tiin mi thenkhat chuan hma an la a. Chumi atana hmalak a awlsam nan Cricket Association of Mizoram (CAM) hruaitute chuan Chief Minister Pu Lal Thanhawla chu President atan an sawm a. Ama tawngkam takin, kan CM hi Jagmohan Dalmyia - khawvela Cricket game tilartu pawimawh bera an sawi hial - nena thlawhnaa lo chuang dun fo tawh a nih avang leh, a CM nihna nen tangkai dawn riauvin kan hruaitute chuan an hria a ni ang, CM an sawm a, ani pawhin 'Zoram tan' tiin a lo pawm ve mai a. Tichuan, kar hmasa mai khan, a hovin Cricket hruaitute chuan Meeting kan nei ta a, chumi tum chuan CM chokaah zanriah ka kil ve khiah a ni.

Chairman-ah CM

Sports Association thutkhawm a ni bawk a, kan Chairman chu CM ni mahse a CM na a tilang lo thiam ngang mai. Pu Hawla hi 'biak har, induh ngulh' niin ka hmu thin. A Committee kaihhruaia member nih erawh ka huphurh aiin a nuam a, ka beisei aiin ka zalen tlat. Ka beisei phak bakin Cricket game a hria a, India rama chengte tana Cricket khelh hlawkzia te, Mizote tana khelh chi tak a nihziate pawh a hminga District hruaitu ka nih avangin ka hre sil ve nial nual a, mah se Pu Hawla hian kei aiin a hre zawk a, kei aiin a sawi thiam bawk.

Committee boruak ti zahawm lo chuang si lova fiamthu han thawh zeuh pawh ka rin aiin a thiam zel. A tul a nih chuan Protocol ngaihtuah hauh lova Sports Minister dah pawimawh a thiamzia pawh mak ka ti a. Budget sawiho nghal kan ni a, CM hova Committee chuan kan sum sawi rik pawh a thau deuh!

Khua a thim

Kan la sawi zo lova, khua erawh a thim tan der a. Kan awmna pindan chu tihen a ngai. CM chuan midang tir lovin amah ber chu a tho thurh a, a kal kual a, pindan chhung tieng turin pindan banga electric switch chu a va hmet kual dun dun a! Hei pawh, ka beisei loh thil.

Hemi hnu rei loteah hian Sonia Gandhi lo kal nia Sonia-i bula inti thu fahrana tawlh harh harh, Mizoram first Lady Pi Rii a rawn lut, 'Zanriah kan peih tawh a nia..' a rawn ti! A lu a rawn hreng tah a, eirawngbawl thuamhnaw nen pawh kan PI hi a nalh tho mai!

Zanriahah Se sa

State pakhata thu ber Inah meuh chuan eng chawhmeh nge kan hmeh ang tih kha, keini mi In hnuai luah ve satliah rilruah chuan a riak lo thei lova. Beisei ngaihna awm miah lo, Sial sa an lo chhawp a, Se chek a lo awm bawk. Hmeh dang chu sawi lo mai ang, rawtuai leh behlawi bai pawlh, tui ka tih em em mai CM chokaa a lo awm ve kher kher erawh sawi loh ka phal lo. Ka chaw ei a tui vang nge ze nge ka hre lo, kan chaw ei lai thla hi ka la ta miah lo!

Mak ka tih leh mai mai chu, CM te nupain kan chaw ei tur inbuatsaih vel min kilkawi zel mai te, inti lal viau tura ka rin ka Pi in a naute nena min suahsak hmiah hmiah maite kha a ni. Hmuhnawm ka ti a, sawi nuam pawh ka ti.

Rii Sermon

CM Pu Hawla nupui Pi Lal Riliani hi Indian Society On Tobacco and Health, (Mizoram Chapter) ah President ni lai a ni tih kan hre theuh awm e. Zanriah kan ei zo va, kan titi khawmuang vel a; anni nupa chu Nilai zan inkhawm turin an lo inpeih leh der a! Kan chhuak tur leh an inkhawm kal tur chu kan chhuak rual a ni ta ber a. Kan chhuah hma chuan amah Pi Rii chuan, 'Sports Association hruaitu in ni a, thenkhat hi chu zuk leh hmuamah in fihlim lo tih in hmel atangin ka hre thei. Infiammite pawh zuk leh hmuama fihlim turin kan ti a, a hruaitute pawh in fihlim loh chuan hruaitu ni tlak in ni lo. Kan inhmuh leh hunah chuan in nghei vek tawh tur a ni,' a ti bawrh bawrh a; a sawi dik phian mai.

Tichuan, an kal a, thian thenkhatte pawh an kal zel a. Kei, CM Bangla ka vawikhat kalna chauh a nih avangin a pawnah chuan, ka phone-a camera hian zan thim a ngam lo tih hre reng chungin thla ka'n la hram a!

Engtin Awm Ta Zel Maw??

2010-03-04T20:19:00.000-08:00

A ding lama a fanu kum hnih mi mu chu a en a, a hnar sek sek a, a kut a phar diai a. A hmel chu a en ngawih ngawih a, kuah pawh a kuah lo; a en tawp mai a ni.

A vei lamah chuan a pasal a mu a, lehlam a hawi a, a ngawi reng a; ngawi reng mahse a muhil lo tih a hria. Engnge a ngaihtuah tih pawh a hre thei. A thinrim lo tih a ring a, a rilru erawh a na tih a chiang. A rilru nat chhan chu a hrechiang em em a, engtia hnem tur nge a hrethiam lo thung. A be ngam lova, sawi tur lah a hre hek lo. Hria pawh ni se sawi hun a ni em tih a chiang lova, eng tianga sawi chhuah tur nge tih pawh a ngaituah thiam lo, a rilru chu a chawl vekin a hre hial.

Kum sawm liam ta a ngaihtuah let a, khatih laia a awmdan avang khan zaninah hian rilru mangang, baihvai leh hrehawm takin a awm a. Khawvela a hmangaih ber a pasal rilru na lutukin a awm a, a va pawi lungrun kher em! Siamtha turin theihna chhe te pawh a nei tawh lova, he khawvela a dam chhungin kum sawm kaltaa a thiltih khan a zui zel dawn.

VL-i chu tleirawl hmel chhe lem lo tak, a rualpuite aia langsar lo thei lova sang bik, Mizo hmeichhe dangin an neih ve loh hnar ngul sang vah mai, khabe ruh kual mawi tak nei a ni a. A tleirawl chhuah hlim atangin mipa tam takin an mitmei a, ani pawhin a hai lo. A tam zawk chuan an fiam mai mai tih a hria a, thenkhat chuan a taksa mawina an thlahlel niin a ring. Chutiang zingah chuan tlangval ngawichawi zet, hmel tha tih tur ni si lo, mah se nelawmna leh duhawmna riau nei tlat si pakhat a awm a, a hming chu Biaka a ni. A ute inleng zingah Biaka chu a lo tel ve thin a, kil khatah a thu ve ran thin.

Tlangval liana sawi tur a ni lova, amahah chuan danglam tehchiam awmin a lang lo. A fai vang reng a, mei a zu zeuh zeuh a, kuhva a ei thin bawk a. A sualna sawi tur a hre lova, a felna em em pawh sawi tur a hre chuang lo.

Zan tin deuhthaw VL-i te inah chuan a leng ve thin a, engmah sawi lem lovin, midang rualin a lo lut a, midang haw rualin a haw leh mai thin a. Chutianga hun engemaw chen a len ve tak hnuah chuan VL-i nen pawh chuan an innel tial tial a, an inbe ve ta fo va.

Vawikhat hmuhnaa inhmangaih nghal ang chi hi an sawi teh fo va, mahse thil thleng zen zen niin a lang lo. Inhmangaih tur chuan inhriat chian a ngai a, hmangaih tura keimahnia engemaw bik awm turin kan hriat chian loh lakah chutiang thil a thleng ngawt thei lo fo. Chutih lai chuan a hmaa inhmangaih lem lote pawh hun engemaw chen inkawm a, duh zawng leh duh loh zawng te, ngainat zawng leh huat zawng te, titi dan kalhmang te, chhung leh khat te leh an mizia te inhriat vek hnua inhmangaihna piang a awm fo va, chutiang chu a tam zawk a ni hial ang. Chutiang chu a ni a, chutiang chuan VL-i leh Biaka inkarah pawh hian thil a thleng ta a ni ber mai.

Khawi hmunah nge hmangaih biahthu an inhlan hmasak ber tih te, a tu zawkin nge sawi hmasa a, eng hunah nge an lo inhmangaih tak tih chu thil pawimawh ber a ni lova, an lo inhmangaih a, inneih hial duhna rilru an pu chho ta tih hi a pawimawh lai chu a ni.

Hmangaihna hmasa ber hi a na a, a reh pawh a reh har an ti a, thudik tak niin a lang. Thinlung thianghlim tak, tumahin an la hliam lohva hmuamhma awm hmasa ber chuan engvangin nge a tawh nat loh tehlul ang? Sakawrekhrik danna tur pawhin taksa raldo tithangharh a, inrinna leh invenna dar vuak a nih theih nan Sakawrekhrik ve tho an thun thin an ti a ni lo'm ni?

Hmangaih dang reng reng la nei ngai lo VL-i tan chuan a hmangaih hmasak ber leh amah hmangaihtu hmasa ber Biaka tluka hlu an awm thei lova, he khawvelah hian an pahnih chauh pawhin awm se nuam a tih a ring hial thin. Englai pawhin a bula awm a chak a, an Inah chuan lo leng reng se a duh a, zan hi a ral chak a ti a, a kham thlawt lo. Chhunah an inhmuh theih loh avangin a tan chuan chhun hi a ninawm ngawih ngawih.

Chutiang chuan hun a kal zel a, a thian kawm thin te a mamawhna aiin Biaka a mamawhna chu a lian zawk tawh a, Biaka hualvel lo chuan a khawvel a vir thei lova; amah tlansan zawng phei chuan a ngaihtuahna a hmang ngam thlawt tawh lo.

Biaka bulah chuan khawvel hi a nuam a, a rilru a hlim a, engkim mai hi mawiin a hria a. Khawvelah hian thil mawi ber ber te, thil hlu ber berte nei lo mahse Biaka bulah chuan engmah dang a ngai lova, 'Hmangaih berte nena Bahra laih' an sawite chu a huam zek zek a, chu aia hrehawm pawh chu tawn dawn se, a bula Biaka a awm dawn phawt chuan a pawiti lo a ni satliah lo, a zuamin a zuam hliah hliah zawk a ni! A tel lo chuan ni te hi a sa ve ringawt a, zanah pawh a tel lo chuan thla engin awmzia pakhatmah a nei lo, lunglen tizualtu mai a ni. A thiltihna apiangah a ngaihtuahchhuak a, a mitthlaah a hmu chamchi a. A hre reng phei chu a ni lo, a hriat loh karin a lo ngaihtuah leh thin zawk a; a hre reng tluk chu a ni!!

Zan khat chu Biaka chuan, 'Innei mai ang, ni tin i bula awm ka duh, englai pawha ka ta i nih ka duh,' tiin a sawm ta! VL-i chuan Biaka chu a ngai a, a hmangaih a, a thlahlel tih a hria a, a pha lo. Mahse inneih lam erawh a lo ngaihtuah ngai miah loh a ni. Chhan dan tur a haihchham hle a, a duh loh bur chuan a thinrim ang tih a hlau a. A nihna takah chuan Biaka bula awm tluka chak a nei lo. Inneih chungchangah a rilru a la pe miah lo tih mai a ni.

A inngaihtuah a, a ngawi reng a. Biaka chuan, 'I duh lo a mi? min duh lo a mi?' a ti a, a zawt sek sek tawh si. 'A, kan la naupang si, bakah...' a sawi zawm thiam lo.

'Engnge bakah, ngaihzawng dang i nei a ni maw? Min neih i duh lo tihna em ni?' Biaka'n a ti.

VL-i chuan, 'Kan la naupang em a, ka nute'n an phal ka ring lo a lawm. Bakah, nang pawh i nute'n an phal lovang, hnathawh pawh i la nei si lo..' a ti a. Mahse Biaka a tang tlat, 'A.. min duh lova, chhuanlam i siam mai mai a nih kha. Min hmangaih a, ka bula awm i duh ve emaw ka ti a, ka lo ring sual a nih hi..' a ti deuh hmak a. A tho a, VL-i chuan sawi ngaihna a hre tawh lo, 'A....' a ti a; Biaka kal liam chu a thlir reng ringawt a.

Chumi zan tluka a inngaihtuah nasat chu a la awm kher lovang. Biaka chu a hmangaih a, a tel lova awm a theih a inring lo. A bula awm a, a nupui nih chu a duhthusam a ni. Mahse pasal nei turin a indah chhin ngam lova, a la naupang lutuk. High School chu kai ve tawh mah se pawl sawm em pawh a la pass si lo. Engtinnge a tih ang?? A thinrim a, a haw tau kha a ni a, engtinnge an awm zel ang? A la hmu duh ang em? Inhmu leh ta se engnge a sawi ang? Sawm leh ta se engtinnge a chhan ang? Innei dawn ta se... a nu leh pate'n hria se engtinnge an tih ang? A thiante'n engtinnge an sawi ang?

An inhmu leh ta ngei a, a sawm leh ta ngei mai. A hmangaihna chuan engmah a dang zo lova, eng pawh thleng dawn se Biaka chan ai chuan a thak thakin thak mai rawh se a ti ta a, 'Aw' a ti ta! Aw, kha 'Aw' kha 'Aih' lo ni zawk se tunah hian hlim takin a awm tur! A va pawi tak em!!

Inneih pangngaia innei turin kawng pangngai zawh chu Biaka'n a ngam tlat lova, mite pawhin an zawh fo, kawng bel zawk mah chu an zawh ve mai loh chuan tihngaihna a awm lo; awmdun an duh si!

Ni, chutiang chuan a ni a, zan khat thil thuah a riahna a sawn a, Biaka khum chu a khum atan a thlang fel a, a mu ve ta ran mai! Chumi zan chuan khawvela a la tawn ngai loh a tawng a, a hmangaih ber Biaka nen chuan eng ang chiahin nge an awm tih hriat theih a ni tawh lo; amahin a sawi si lo!

VL-i nu leh pate chuan an fanu chu pasal nei turin an la phal lova, Biaka nu leh pate pawhin an fapa chu nupui nei turin naupang an la ti. Thil awmdan chu siamthat theih ni tawh lo mahse, an pahniha dinhmun thlirin sawirem chhunzawm chi-ah an ngai lo. Zan khat an riak dun a, a tukah chuan an chhungte ve ve remtihnain lakhran an ni leh nghal. VL-i pawh venthawn thilah a Patea-te awmna lamah puanthui zir turin an tir bo ta daih a, engemaw chen awm turin an tir lo; 'Rei tak awm rawh se,' an ti!

--------------------------------------

Hun a kal a, a kal zel a. VL-i chuan Biaka chanchin a hre ngai tawh lo. A hmuh loh rei tawh vang a ni ang, a ngaihnate, a duhnate pawh a reh tial tial a, a hrechhuak khat hle tawh. Kum sarih lai a Patea te Ina a awm hnu chuan an khaw lamah a haw a, a thlen tirh chuan a rilruah Biaka a rawn lang zawk a! A thiante an lo lut sap sap a, a thian kawm ber thin Lawmi chuan Biaka nupui neih tawh thu te, a awm loh chhunga nupui pahnih lai a lo neih hman thute a hrilh a, mak a ti lutuk. A hmangaih thin Biaka kha chu a la hmangaih reng a, mahse nupui pahnih nei tawh Biaka erawh eng vang maha hmangaih a tum lova, a lam hawia a ngaihtuahna sen a tum tawh lo. Biaka pawh chuan chutiang chuan a en chhunzawm lo a ni ang, khawlaiah pawh an inbe ngai ta lo va.

Nula dang ang bawkin a awm chho a, Kohhranah pawh a inhmang a, nuam a ti viau zel. A hmelin a zir a, duh dertu pawh a hmu ve reng, mahse tihsual a hlau tawh a, a fimkhur em em tawh. Engemaw chang chuan hmana zan khat kha a hrechhuak thin a, a inthiamlo thin. A chang chuan mite pawh an chesual fo va, ani a nih avanga chuti lutuka a pawina a awm chuang lovin a hria a, engahmah a ngaih loh chang a awm bawk a.

Chutianga hun a hman lai chuan mi danglam pakhat a tawng leh ta.

chu tlangval chu vawikhat mah a la hmu ngai lova, a hriat mi a ni lova, a chanchin miin an sawi pawh a la hre ngai lo. A hmuh hmasak ber tumin an inbe nghal a, a miziaah chuan 'engemaw' awmin a hre nghal a.

An thawmawmte an awm lova, chu tlangval chu an thenawmte Ina len tumin a lo kal a, ruah a sur bawk si a, an Inah chuan a ko lut ta ngawt a nih kha.

Tlangval nelawm tak a ni a, a tawng duh a, a nui heuh heuh a. A titi atang chuan lehkhathiam a ni ngei ang tih a rin theih. A duh zawng leh duh loh zawng sawi ngam tur khawpin tlangval naupang a nih tawh loh bakah a awmdan atang chuan a danglam hrim hrim.

Ruah a sur reng avangin a leng ta reng a, eng vanga a album-te kha entir ringawt nge a hre lo. A entir a, a tleirawl lai thlalak a en a, 'Hei hi a va hmeltha ve, tunge?' a tihte khan a sen ap ap a, a zak hle a nih kha! A mak mang e! Nula senior a ni ve tawh a, tlangvalin an fiam nazawngah a zak ngai tawh mang lo kha a ni a, he tlangval hi chu a danglam tlat mai!

Khami ni atang khan chu tlangval chu a hre chiang tial tial a, an inkarah engemaw a awm chho zel a. A nunah tun hmaa a la hriat ngai loh hlimna engemaw riau a rawn thlen tlat a, a fimkhurna zawng zawng a sawmkhawm pawhin a lakah chuan a tuiral lo chauh a ni tho tho a, a tana khuanu ruat a nihte a ring rum rum.

Chu tlangval chu Remliana a ni.

Ani chuan kawng pangngai zawh lova kal a duh lova, VL-i chu nula thianghlimah a ngai a, a nupui atana a duh thu a sawi pawhin VL-i chuan a phu lo tih a hria a, engmah a sawi ngam lo. 'Palai ka rawn tir ang aw?' a tih pawh, ban zetin, 'Aw' a ti ta a, hmana 'Aw' a tihna ka tho kha a ni a la hman ni!

Chutiang chuan an awm ta a, fa hial an nei ta a. Nupa hlim tak an ni a, an fanu pawhin kum hnih a tling ta hial a. Khawtlangah pawh mi zahkai pawl tak niin, Kohhran leh khawtlangah a pasal chu mite rin kai tak, a theih ang tawk tawka inhmang thin a ni a, an nupa nunah sawiselna tur a hre lova, a laka a awmdanah a pasal chu demna tur a hre lo.

Tlai khat a pasal office bang rawn haw chu hlim lo riauvin a hria a, a awmdan a zawhin engmah fel lo a awm loh thuin a chhang mahse a hmelah chuan thil dik lo a awm tih a hai si lo.

Zan a ni a, an mu ta a. Ni, chutah chuan a ni, a pasal, a hmangaih em em, hmangaih theihtawpa hmangaihtu, hnathawh pawh phal lova duat taka enkawltu chuan a thinlunga thu awm a puanchhuah tak ni. Chumi zanah chuan a pasal chuan hmana 'zan khat' kha tute emaw hnen atangin a hrechhuak tih a hre ta a, awmdan tur pawh a hre lo. Van chimin rawn khuh hlup sela, khawvel hi thim mup se, thi daih se a inti a, a thaw a ipik mup mup a.

A pasal rilru nat dan tur chu a ngaihtuah a, eng ang chiahin nge a nat ang tih a hrethiam chiah lo chungin, amah a hmangaih dan a ngaihtuahin a rilru na chu tawrh a har dawn tih a hmu tlang reng a; hnem ngaihna a hre lo.

A ngawi tawp a, sawi tur a hre lo; a hre hlawl lo.

Hmanah khan 'Aw' a lo ti a, kha tawngkam khat avang khan tunah a khawvel chu tihchhiatin a awm mek em ni? He a khawvel keh chhe mek hi engtia phuarkhawm leh tur nge ni ang?

A pasal chuan a hmangaih tih a hria a, eng dinhmunah pawh ding se a phatsan dawn lo tih a hre chiang em em. Mahse he thil kher kherah hi chuan eng rilru nge a put dawn a ngaihtuah thiam lova, a ngaihtuah ngam bawk lo.

A pasal hmangaihna chuan he thil hi a ngaidam zo ang em? Vawikhat mah a la ngaihtuah ngai loh, a pasal nena inthen chu a ngaihtuah a, a ngam lo. Ngaihdam dil a duh a, chu pawh a ngam lo. Engatinge hmanah, an inhriat tirh khan a sawi loh? Ama ka ngei atangin hria se chuan a tuar nep deuh maithei a sin! Mahse chutiang chu a ni si lo, engtin nge a tih ang??

Chu zan khawhar takah chuan, zan danga hlim taka a nuihna thin khum ngeiah chuan, a pasal leh a fanu inkarah chuan, ngaihtuahna mumal nei hleithei lovin, khawhar takin a mu a. A fanu chu a en a, ani chuan engmah a hre lo. Tui takin a mu a, he khawvel buaina hian a rilru a la tibuai ve lova, chu zan reh tak hnuaiah chuan eng boruak nge inmun hre lovin a thawri sek sek reng a..

Thlalak

2010-02-06T01:21:00.000-08:00

Megapixel, Shutter Speed leh Macro lam sawi turin ka hriatna a tlem lulai a. Sawi tum ta talh ila chuan lehkhabu leh internet lam atangin engtin tin emaw ka zawng kual anga, Aditya Mandanapalle thuziak atang ringawt pawhin thumal sang hnih khat emaw chu ka khawl khawm ve thei maithei. Amaherawhchu chutiang ai chuan hmana ko pang rinchhana kan thlalak te, pal nghenga ka sing-gul thlalakte khan ka lung a tileng zawk a, chutiang boruak vel chu sawi nuam ka ti zawk tlat.

Hun rei pawh a la ni lo. Chawlhni zingah, thlalatu kan ko va, chhungkua kan awm kim thap a. Pawn ni engah thutthlengsei kan chawi chhuak a, Nu leh Pa leh a naupang ber thutthlengseiah an thu a, midangte chu a hnungah ding chungin, a upat dan indawt emaw, a san dan indawt emaw khan kan han inrem a. Thlalatuin ngun lutukin min tin a, 'One, two..' a tih laite kha chuan kan thaw tha ngam tawh mang lova; a hmeh lai taka kan lo maimitchhin palh kha chuan kumkhuaa maimitchhin hlen kha a nih tawh avangin a 'three' lai taka chhing lo tura inrin reng a ngai thin a nih kha.

Chutianga thla kan lak hnu thla khat dawnah thlalatu kan han hmu fuh hlauh a, 'Kan thlalak a chhuak ve tawh em?' kan han tih dek dek te khan, thlalatu lar tak a nih lem loh phei chuan, 'Roll film ka la hmet zo lo,' tihte kha a chhanna kan dawn a ni ta thin a, a va nghahhlelhawm thin tak e aw! Beisei tawh loh hnuah a rawn chhuak a, copy khat chauh a rawn siam, kan en laih laih a, print belh leh turin kan han ti a; a rawn print leh kha chuan a hmaa mi kha tlemin a tluk lo deuh hlek zel thin lehnghal a.

Thlalatuin a hmeh laia lo awm dik loh deuh chuan kan beisei loh deuhvin a lo chhuak a, a inchhirawm vawng vawng a, siam that leh ngaihna a awm tawh lo. Chu mai chu a la ni lo, thlalatu tan pawh khan fimkhur a ngai, a camera-a eng a luh palh hlauh chuan a zavai chhiat a, chhungkaw tam tak thlalak kha a vai chhiat puk a, channa hlir, channa hlir a ni tawh mai.

Duh hun hunah thla lak theih a ni lova, inchei nalh lai pawh ni engang mahse thlalatu a remchan loh chuan a ngaihna a awm lo. Chu chu thuhran, tunlai angin Camera-ah LCD screen vuah a la ni ve lova, kan en let leh mai theih a nih ngai loh avangin eng angin nge a rawn chhuah dawn hriat lawk theih a ni lova, a hmeltha leh chhia kan inang vek a, a chhuah hun kha kan nghak tlang ngawt ngawt mai thin a ni.

A lo chhuak ta ngei a. Thlalatu tharlam deuh, a camera chinchang la hre tam lo lak a nih phei chuan beisei loh deuhva chhuak kha a tam thin. Uluk fein kan indawh a, ka lang chhia ang tih hlau takin kan thaw tha ngam lova, nalh theih tawpa kan hriat angin kan han awm theuh va. A lo chhuah chiah kha chuan kan mit chin chunglam zawng hek ta vek te, taksa chanve sen ta rem rum te, engnge a nih hriat theih map lohva paw reu ruau ringawtte pawh a rawn chhuak ta thin a nih kha.

Thlalak bawmah, a film roll nen an rawn dah ngei a. Kan en dan dan a, a copy siam pun tur duh kan han thlang a, a nuam ve mai mai thin. Khang hunlai khan thlalak a hlu a, thlalatu an hlu a, Album nei hnem thei nihte kha changkanna chikhat a ni a. Anmahni chauh lanna thlalak kan neihsak theih nulate nen kha chuan kan in chu-kha ve fe tawh a ni tlangpui thin!

Thil danglam chakzia hi sawi thiam pawh a har zawk. Keini hriat phak chin ringawtah pawh hian a inlumlet nasa lutuk. Ka Ni pasalin a thlalakna a rawn keng a, thla la tura kan din thap a, hnuai lam a bih ngar ngar lai kha a la rei lo hle. Kha thlalakna kha engnge a hming pawh ka hre lo. Ka va bih ve a, a nih ang ang khan, 'kalar' ngat khan kan lang a, mahse a rawn chhuah chuan kan thlalak kha chu a dum leh var vek kha a ni bawk si a, mak ka ti em em kha a ni a. Tunah chuan khangte kha a mak leh tawh miah lo! A mak zawk mang e!!

Digital Camera a rawn chhuak a, duh duh an hmet a; an duh loh loh an paih leh a! Thlalak print chhuah a, inthawn vel pawh khan a daih rei lo. Computer-ah kan dahlut a, kan duh lai te chauh lo chu kan print chhuak ta mang lo. Mobile phone a lo chhuak leh a, a buaithlak zawk ta hial. Lak loh tur tur an la a, mi hmuh loh tur tha tha kha miin an hmu ta a, a pawi khawlo zo ta zeuh zeuh mai.

He khawvela kan awm chhung hi chuan khawvel hmasawnna hian, kan duh emaw duh lo emaw, eng hunah emaw chuan min rawn thlen chilh ve lo thei lo. He khawvel changkan leh than zelnain a ken tel thilte hi a tha zawnga hman dan kan inzirtir thuai thuai zel a ngai niin a lang a. A ni lo zawnga hman dan hi chu kan thiam nghal mai zel a, a tangkai zawnga hmang tur leh keimahni leh kan ram tana hlawk zawnga hmang thei tura lo intahhriam hi mi fing zia a nih hmel a, chutiang tura mahni tu leh fate lo inralrintir chu Nu leh Pate mawhphurhna a ni ngei ang a. Khua leh tuite tana a tha zawnga hman a nih theih nana hma la tur pawh Sorkar thuneitute an ni ngei ang.

Untitled

2010-01-21T00:57:00.000-08:00

(Kolasib chanchinbu hlun ber TURNIPUI in January ni 20 khan Silver Jubilee an lawm a. Souvenir an buatsaihah 'Nang Editor teh, kan buai em mai,' min ti a, ka Editor ve ta ngawt a. Tuna i thu chhiar tur hi chuta ka Editorial atanga a then lai siamthat leh paih then etc. a ni a. Blog khawhar lutuk tur ven nan chauh a ni e.. Tak a, ni 20, Jan, 10 hian www.turnipui.com pawh tlawh theiha hawn nghal a ni tak e!! I lo lut ve thin dawn nia.. )

Mizoram chanchinbu-mite zingah chawimawi tlak leh phu tam tak an awm rualin, chawimawi leh fak tlak loh hi an tam ve khawp mai a, zep rual a ni lo. Mi thenkhat chuan thahnemngaihna thil avangin chanchinbumite an sawisel fo a, ka beng pawh hian chutiang thu chu vawi tam a ngaithla tawh. Sawiseltu thenkhat phei chuan thahnem an ngaih vang aia lianin an hmu hniam tel ni tein ka hre thin. Chutih lai chuan he Zoram khalh ngil a, kawng dika mipuite hruai an nih theih nana mahni theih tawk tawka ngaihtuahna seng thin chanchinbumite thurawn pe thin erawh kan tam lem lo niin ka hmu thin.

Kan hmuh a zau a, kan hriat a tam a, kan theihna leh kan neih erawh a tlem thung si a. Kan hmuh leh hriatte hmangin bukna kan khai a, kan neih leh theihna lam a zang si a; a inbuktawk ta lo a ni.

1991 ah Rupert Murdoch-a'n STAR TV a lei a, India ram a rawn run a, keini pawh min rawn thlen chilh ve chawpchilh a. Khami hma lam zawng kha chuan Doordarshan leh Bangladesh TV Channel tlem te leh Radio bak chu khawvel hmun dang chanchin hriatna kan nei lem lova. Television Set nei thei an la tam lova, a nei chhunte Inah kan en luih luih thin a nih kha. Khatih hun laia chanchinbu chhuahtu Pu Hmaa (Turnipui Editor) te hi chuan beng sika Radio ngaithlain, Portable Typewriter nen, Cyclostyle-ah pawh a her chi awm hma, a nawra nawr ngaite kha a hmang hial maithei. Chutiang atang chuan vawiinah, Offset khawl changkang nen, Computer leh Internet nen, Local News pawh Digital Camera nen a lakhawm ta a, kan changkang tawh mang e!

Digital camera sawi takah chuan Kolasib chanchinbu mite pawhin thlalak an tar ve ta chei chuai a, a lawmawm ta ngawt mai. 2003 AD ah khan Guwahati-ah khuan Journalist Workshop chhimin hruaitute hnung ka zuk zui ve a. Chumi tum chuan photo-journalist pakhat a lo tel ve a. 'The Hindu Times chanchinbu leh Indian Express ten ka thlalak hi min leisak thin,' a ti a, kan han ngaisang khawp a. Khatih lai khan Zoramah chuan Computer a awm sa leh ziah chawp tih loh chu chanchinbu ah thlalak dah thei a ram la awm hek lo i, kan hawi he hu ta hlawmin ka hria.

New York Metropolitan area a chanchinbu lian pasarih zinga tel ve phak, Newsday-a an Director of Photography ni thin Harvey Weber khan, "Chanchinbu phek a thlalak kan tar chhan ber chu a chhiartute rilru lak a, kan thuziak an chhiar duh nan a ni," a lo ti a. Engnge kan ngaihdan ni ve aw?

Mizo te hi kan mak khawp a. Ni khat pawh thlalak leh chanchinbu lama hun la hmang lo hian, kan chanchinbu mite hi, 'Photo Journalism awmzia an hre lo,' tih te kan han phuhchhuak thlazen a! Amah Harvey-a bawk khan, "Photo-journalism chuan thlalak hmanga thawnthu sawichhuah a kawk a. Thawnthu chuan bul leh tawp a nei a, mahse keini chu chutiang hman kan ni lo. Thawnthu ah chuan kan hman remchan hun apiangah kan tel ve a, thildangah kan kal leh zel a. Chuvangin kan duh lai kan la anga, kan tar pawp mai ang. 'Photo-journalist ' in ni lova, 'News photographer' in ni, chumi ah chuan lawm tawk hmiah rawh u," tiin a naute a hrilh. Kha daih kha a sin!

Hna zawng zawng hi tih tak zeta thawh ngai vek a ni a, tih tak takna tel lo chuan hlawhtlinna a awm thei lo. Chanchinbu chhuah hna hi tih tak zet tulna ber a hi hial mai thei. Chhel a ngai a, beih hram hram a ngai a, tan mar pat a tul. Hna zahawm tak a nih rual hian hna hlauhawm tak a nihna chen a awm bawk. Tun hnai kum 12 liam ta chhung khan khawvel pum huap chuan Journalists 1100 chuang thah an ni! Khawvela mipui rorelna ram lian ber India ram, "Mitinin tuma tihbuai lohvin ngaihdan leh duh dan an neih a thiang a, an ngaihdan te chu eng hmanraw hmang pawhin puangzar turin zalenna an nei a ni," (Universal Declaration of Human Rights) tih thu sawi rual dual dualna ram ngeiah pawh chanchinbu mite hian neksawr an hlawh fo. Hmanni lawkah India rama News Channel lar CNN-IBN Office chu Political Party pakhat Worker ten an phingchil chiam mai! Nikum lawk khan Turnipui pawh Party pakhat chuan an vau titih! Democracy ramah chuan chanchinbu te hi "Ral vengtu" tia koh an ni lawi si! Mi diklo ten pholan an duh loh thudik hailan a, mipuite hriat tura tarlan hi chanchinbumite hna a ni a; dawihzep leh mite tlawn ching tan he hna hi a tuma tum ve chhin chi a ni lo.

Zalenna hi a hlu a, khawvel hian a zawnin a zawng reng a ni. Mitinin zalenna inang kan nei vek a ni tih hriat a tha. Chanchinbumi then khat, chanchinbu te zalenna chauh hria a, midangte zalenna hre duh lo, a tak taka hna thawh aia an zalenna neih hmang suala kaw hreuh tum an awm fo. Zorama chanchinbu enkawltute zingah hian an tam zual em ni aw? ‘Freedom of the Press’ hi ‘duh duh ziah theihna’ a ni ngawt lo tih hriat a tha. Chanchinbuin zalenna a neih hi a hlu a, dan huang chhungah fimkhur taka hman tur a ni. Diklo taka hman a nih chuan, lailung dawt dang tam tak aia Napoleon-a’n a hlauh zawk enkawltute dinhmun hi mite thinlungah a hniam zel ang. Chu chu chanchinbute lo chuan an veng thei lo.

Rem A Tih Chuan

2010-01-06T00:21:00.000-08:00

He kum tharah hian eng thu nge ka'n ziah hmasak ber ang aw?

TV ka thlir a, Brazil-ah tuilian vangin mi 60 chuang an thi tawh tih ka hre chawpchilh nghal a. India ramah rel chetsual vangin mi 2 an thi tih a rawn intar chhunzawm nghal bawk. Zoram lam thuthar pawh a dang chuang lo. Zualko tharlam a awm reng, kum 17, kum 32, kum 45, kum 72, vawiina vui tur tih intar a awm reng mai. He khawvela piang chhuakte hi chu thi tur kan lo ni ngei e!

Krismas tuk a ni a, ruai kan theh mup mup a. Ka chaw ei kham, kam pawh ka la thuah fel hmain Kolasib Hospital-a CMO hlui Pu Hminga'n, 'Lalhmingliana a thih kha i hre tawh em? tun maiah khan a boral a ni awm e,' a ti a; mak ka ti kher mai! A nat thu ka hre lova, damdawiina a awm phei chu a ka hre lo leh zual.

Hman a ni ve tawh ang chu - kum 12/13 vel lek kan nih lai khan, kan thianpa pakhat chuan, 'Engtikah emaw chuan kan la tar ve ang a, kan tar hunah engtinnge kan awm ang le?' a ti a; dawn thui hi ka ti khawp mai. Mahse, a sawitu chu tunah chuan khawvelah a awm tawh lo, a tar hmain thlanmualah phum a ni. Kan hma lam hun hi kan va hre lo em!!

Kan dam reng dawn lova, kan la thi dawn tih hre rengin, 'Kum za dam tur angin hna thawk la, naktuka thi turin inpeih rawh' tih thute chu kan pindan bangah te tar thin mah ila, thi mai tura inbuatsaih leh inpeih hi chu kan tam lem lo niin a lang. Kan hma lam hun hi, keimahni duh dan leh remhriat danin kan thlirin kan ruahman ve a. Mahse a hlawhtlinna leh a lo thlen leh thlen loh chu kan thu a ni lo tawp tih hi kan ngaihtuahna chhungrilah hian riak reng mahse, kan rilruah thuneitu hnena hlan lova mahni chakna hmachhuana thlirna leh ruahmanna neih hi a awl ngawt mai.

'Kan dam ang a, nakkumah chuan chutiang chu kan ti ang a. Tuna hetiang mite hi chutih hunah chuan chutiang chu an ni tawh ang a, keini pawh chutih hunah chuan kan chuti ve tawh ang..' tiin hmabak kan thlir a, beiseina leh ruahmanna kan siam thin.

Khawvel hi a tawp mai dawn niin an sawi a, 'Kan naupan lai pawhin a tawp dawn an ti tawh a, tun thlengin a la tawp lo,' kan ti fiamthu thin. Kan chenna khawvel hi chhiain boral lo mahse, a chhunga cheng mihringte hian kan tlin lo zawk zel a nih hi!

Rap In, a chung di, a bang leh a chhuat dap kha kan duh tawh lova, kum tina In thawm that ngaia chen kan peih tawh lo. Kum engemawzat daih turin In kan sa a, rinawm tak leh tlo tak, fur leh thala nghing lo tur, furpui tam tak tuar zo tur kan sa a, kan chhawng er ur a. Kan In sakte chuan kan beisei a phak a, kan ruahman lawk aia rei daih tate pawh a awm thin. Mahse a satute bawk hian kan daih rei leh lova, kan thawhrim rah hi kan thihsan leh mai mai thin tih hi thudik a ni. Thudik a va ni tehlul em!!

Engkimah hian Bible hian min lo daikhalh a, kan la ngaihtuah turte, kan la hmuh turte hi a lo sawi lawk dim diam thin. "Tunah ngai teh u khai, nangni, 'Vawiinah emaw, naktukah emaw, chu mi khawpuiah chuan ka kal ang a, chutah chuan kum khat kan va thang ang a, kan sumdawng ang a, hlawkna kan hmu ang,' titute u. Naktukah chuan engnge lo awm dawn in hre si lo. In nunna chu engnge ni? Chhum rei lo te lo lang a, ral leh ta mai thin ang hi in ni si a. Chutichuan, 'Lalpa'n rem a tih chuan kan dam ang a, chu mi kha mi kan ti ang,' in ti tur hi a ni. Nimahsela, in uannate hi in chhuang zawk si a, chutiang chhuanna zawng zawng chu sual a ni." [Jakoba 4:13 - 17] a tih kha!

He kum tharah hian ruahmanna tam tak kan nei a ni thei a, hmabak thlirin ring kan fan mek ngei ang. Eng pawh ti ila, eng pawh ruahman ila, eng pawh tum ila; engkim siamtu LALPA hriatpui ni sela. Kan nunna chungah hian thu kan nei lova, naktukah chuan engnge lo thleng dawn kan hriat loh avangin, 'LALPA'n rem a tih chuan,' ti chung zelin kum thar bul i tan teh ang.

Eden Kawngkhar An Hawng Leh Ta!

2009-12-15T02:43:00.000-08:00

Mizo Kristian hla hmasa ber phuahtu nia ngaih, Patea'n (1894 - 1950), 'Mal Min Sawm Turin' tih hla a phuah hi vawi tam kan sa ve ta. A rilna leh a thukna aiin, a mawina leh a boruak vangin kan sa hnem zawk em aw? ka ti. Kum tin, Krismas a lo thlen apianga ka hla duh berte zinga tel ve ziah he hla hian kumin ang em em hian min la tawk ngai lova, heti ema thuk hi em a lo nih ka chhut thuk ngai lo.

Adama, Pathianin duh taka a siam, Ama anpui ngeia a siam mihring kha, a chenpui tura a pek hmeichhia hmangin setana'n a thlem thlu a, hlim taka a lenna thin, a thuhnuaia engkim awm thin, a lalna ram Eden huan chu chhuahsan a lo ngai ta. Chu huan, a chanpual, Pathian nena an lendunna huan ngei mai chu ama chakna leh thiltihtheihna hmanga luh leh theih rual loha ven a ni ta a, he leiah hian vakvai a ni ta!

Bawhchhiatna suala tlu tawh hnu Adama chuan lei danin hun a chhiar a ngai ta a. A bianga thlantui luang zawih zawihin a ei tur a thawkchhuak a. Enghelh nei lovin, rilru kaptu awm hauh lovin, hlim leh engthawl takin kha Eden huanah khan a leng thin a. Kha huana awm ei mi chi hrang hrang kha a ta a ni a, a chhunga ransate pawh a thu thua awm a nih thin kha. Mahse a bawhchhiatna chuan chu'ng chu a lak atangin a thlawhbotir zo tawh a, a tan beisei tur a awm tawh lo.

Adama thlah kal zel chuan ran thisen leh mihring felna hmangin chunglam rawng bawl a tum a, a inthawi a. Mahse ran thianghlim ber thisen pawhin a chhandam zo lova, a tan Eden huan chu vana rah ang a ni tawh. A felna chuan khawi mah a thlen lova, kawlvalenchhama tuikeplung aia hlaah lenbo a ni tawh tlat.

Mahse, hmangaihna tawp nei lo Pathian chuan chutianga a hmangaih, a duh taka a siam ngei mai a bo hlen chu a phal lova, tihdan a dap ta. Ama duh thu ngeia Pathian kalsantu mihring chuan a duh phawt chuan a kalsan Pathian lam a hawikir leh theihna tur ngaihtuah a duh ta tlat. Chutah chuan a ni, 'Van khuaah ro an rel' tak ni!

Chu rorelna hmunah chuan thurel tur a tam lo ang bawkin, a hotupa ber duhdan a nih miau avangin midangin an hnial thei lo hulhual dawn tih hi a lang reng a. A hmangaihna luangliam chuan ui a nei thei tawh lo. A hmangaih mihring, amah tlansantute ngei chu laklet leh a duh a, a hnena kohkir leh a duh. A duhna ringawt chuan Amah anga a siam mihring chu a kokir zo lova, a man a pek a ngai ve ta tlat. A man atan a thilsiamte an tling zo lova, lei leh vana thil awm zawng zawng an zawn hnuah pawh mihringte chhandam tur chuan tling zo reng reng an awm ta lo. A thilsiam mihringte tel lova tlei thei lo Pathian chuan a lama a pawh hnaih leh theihna a nih phawt chuan a fapa, a fapa mal, a neih chhun ngawih ngawih pawh a ui zo ta lova. Chu Vankhuaa rorelnaah chuan Pathian fapa, beramno thianghlim ber chu lei mihringte sual phura, Kraws-a thi turin thutlukna an siam ta!!

Chu thutlukna chu thlarauva mit tihvar lohte tan hmuh thiam chi a ni lova, mihring taka thlirtu tan hriatthiam theih a ni lo. Chu ngei chu 1922 March ni 10 a Presbyterian Kohhran Upa atana nemngheh Patea chuan fiah takin a hmu a, he lei mihringte hriat fiah theih turin a sawi chhuak ta a, a va mawi em! Han chhiar teh -

Mal min sawm turin,
Vankhuaan ro a rel;
Eden kawngkhar an hawng leh ta!
Lut r'u, Zion khua a var ta!!

Chu thutlukna avang chuan lei lalte aia lal, hotute hotu, lal zawng zawngte lal, Zion - Pathian khawpuia roreltu chu lei mihring zingah, tlawm takin, Bethlehem-a ran inah chuan a lo piang ta ngei mai! He thil a thlen theih nana hmangaihna insawkkhawm nasat dan tur hi mihringte ngaihtuahna leh chhutrilna hian eng ang fakauva thuk leh nasa nge a nih a chhut thiam lova, tu tan mah chu zawhna chu chhan dik theih a ni lovang -

'Lal berte lal ber,
Leh Zion roreltu,
Engtia awm thei nge mihringah?
A hmangaih a va mak em ve!'
tih mai loh chu he mihring lei hian sawi tur a nei lo.

Van rorelna hmanga Eden kawngkhar, mihringte tana luh rual lohva khar leh ven hnu lo inhawng leh ta vanneihthlakzia hre tur chuan, Eden huan atanga mihringte paih chhuah an nih avanga mihringte dinhmun chhiatzia hriat fiah phawt a ngai a. Chumi hre fiahtute chuan, 'Hmanah Eden huana nunna kraun hlu kan hloh kha, Tunah Lalpa’n min chharsak leh ta;' [(Rokunga (1914 - 1969)] an ti hial a ni.

Ni e, chu rohlu chu a neitu tur bik siam a ni lova, a changtu tura ruat lawk pawh an awm chuang lo. A vanneihthlak leh zel mang e! Hmana Bethlehem-a lo piang, Kraws lera vuakthitlina awm ta Lal Isua ringtu leh a hnen pan duhtu apiangte luh nana hawn a ni a, a duh apiang tan a ni!

Ka unau, i tan leh ka tan Eden kawngkhar a inhawng mek. Zion-a khawvar hmu turin i lut ve dawn em??

Out Of My Life

2009-11-30T00:08:00.000-08:00

Kum 50 mi ni a a han thih meuh chuan, a hla hluite a lar thar leh a. Hmana mite duh em em thin a hlate pawh mite chuan an duh thar leh a, mite thunlungah thu a sawi thar leh a; kei ve pawhin he hla, King of Pop, Michael Jackson-a'n 1980 kuma Off the Wall album-a a dah, 'She's Out of My Life' tih hla a sakte pawh ka ngaithla nawn leh a, lung hlui a len thar leh a nih hi!

A hla dangte ang lo takin he hla hian lam a rem ve lova, lairil fan chi (emotional ballad) a ni a. A sa thiamin a sa lungrun bawk a, a thu lah hi, he khawvel mihring tam tak nunah hian a dik bawk si a; a hun lai leh tun thleng pawhin mite hla duh ber zinga mi a ni ta zel a ni.

Sapho te leh khawchhak lam unaute pawhin an duh em em he hla hi, he vailui kam atang hian, mahni rin dan danin i'n khawih chingpen leh chiam teh ang!!

She's Out Of My Life

And I Don't Know Whether To Laugh Or Cry

I Don't Know Whether To Live Or Die

And It Cuts Like A Knife

She's Out Of My Life

A hmangaih hmeichhia chu a nun atangin a paihchhuak tihna lam a ni lo. Chu hmeichhia chuan he hla neitu nuna tel ve hi a duh tawh lova, a tlanchhuak emaw a ni ang. Ni lo se vawihnih ngawt a sawi lovang. A nun atanga he hmeichhia a tal hran atang hian lawm tur nge lungngaih tur a hrethiam lova, 'Nuih tur nge tah tur ka hre lo,' a ti! Nungdama awm zel pawh a thlahlel chiah lo em ni? A mak ngawt mai! A pahnih hian - a ngaihtuah a ngaihtuah hnuah pawh - dik thei ve vein a hria em ni? Chuti chung chuan chu thil chuan chemte-a vih ang maiin a chhun na tho si!

It's Out Of My Hands

To Think For Two Years She Was Here

And I Took Her For Granted I Was So Cavalier

Now The Way That It Stands

She's Out Of My Hands

He hla ziaktu, Tom Bahler hi a nupui, Karen Carpenter nen hian an innei ren rawn a. Mahse Karen-i hian Tom-a chanchin a hre chiang a, hmeichhe dang lakah fa a lo nei tawh reng a! A rilru na chuan a pasal hi a tlanchhuahsan niin an sawi a. Chumi avanga a rilru na chuan he hla hi a ziak a ni awm e.

Kum hnih lai chu a hmangaih nen hian an inhre tawh a. An awmdun a, an inhriat leh an inhmuh thin lai chuan chutiang chu thil awmdan ve reng tur emaw a ti a. Chutiang hun lai chuan a hmangaih chu a hmangaina hrilh nachang pawh a hre lova, pangngai takin, nundan tha nia a hriat angin a nung a; chu chuan awmzia neih hun a nei dawnin a hria a ni ang. Mahse chu hun chu a thlen hmain a ban phak lovah a awm a, tuna thil awmdan chu a duh dan a ni tawh lova, a lo mangphan ang a ni ta hauh lo! A la hmangaih reng a nih si chuan a va na dawn e aw!!

So I've Learned That Love's Not Possession

And I've Learned That Love Won't Wait

Now I've Learned That Love Needs Expression

But I Learned Too Late

Helai chang hian mi tam tak a vel a, a satu ngei pawh hian hemi chang atang hian a mittui a sum zo lova. An record dawnin vawi tam a sa nawn a, a mittui a tla zel a. Michael Jackson-a producer Quincy Jones chuan a mittui tla lai chu a record-tir ta nge nge a ni awm asin!

Chutianga rilru na leh ngaihtuahna bing mum muma a awm lai, a hmangaih tak tak a ni tih a inngaihtuah lai vel chuan, a hmangaihna chu a lo hrilh tam tawk lova, a sawi tam tawk lova, a lantir lem lo tih a inhrechhuak a ni ang. A inhmuchhuak a, a piangthar ta hial a ni ang. 'Hmangaihna hi kan thil neih lam a ni lo, hmangaihna hian engmah a nghak thei lo, puanchhuaha lantir a ngai a ni,' tiin a testimony a sawi a; mahse a tlai lutuk hman tlat!

Thih dawn tepa piangtharte tan pawh Vanram dah ni mahse, he hmangaihna chungchangah hi chuan pianthar hian tlai luat a nei a ni ngei ang. I hmangaihna chu a hun laia i puanchhuah loh chuan, i puanchhuahna tur lakah khan a tlai thei a tihna em ni? Chu chu he hringnun lamtluangah hian thudik a ni reng em? Dik vek lo pawh lo ni mahse he hla phuahtu nunah hi chuan a dik a; a inhmuhchhuah chuan a tlai lu tawh a, "'A tlai lu ta,' an la ti ang" tih kha a nunah a thleng dik a, indawmkun ngawih ngawih mai loh chu tih tur a vang tawh a ni ber mai!

She's Out Of My Life

Damned Indecision And Cursed Pride

Kept My Love For Her Locked Deep Inside

And It Cuts Like A Knife

She's Out Of My Life

A va hahthlak em! A inngaihtuah fo va, a ngaihtuahna chuan duh mahse thutlukna a siam thei ngai lova, mahse chu a thutlukna siam theih loh chuan a nun atanga hla taka a awm hnuah a rawn thing nawn leh si! A thutlukna siam theih lawk lohna chhan kan hre phak tawh lova, mahse, amah pawh hian hrehawm a ti a, a inhumruh tih chu a hriat mai! A rilruah inngaitlawma, a hnena hmangaihna dil tura thingthi nun neih ngai nia a hriat laia a tlawm thei lote pawh tunah chuan pawi tiin, insehruh engang mahse awmzia a awm tawh lo. A hmangaihna chu phochhuak lovin a thinlung chhungrilah a vawng reng ringawt a, a puanchhuah loh chuan a hretu tur khan a hre thei si lova; a puanchhuah loh hmangaihna chu a lairilah chuan a la awm reng thung si. Puanchhuah duhin han tum mahse a ban phakah a awm tawh lova, a nun atanga hla taka a awm tawh avangin a hmangaihna vawn reng chuan chemtea vih ang maiin a chhun na ta thung a ni. A na vawng vawng a, a na zel dawn a, a na reng dawn pawh a ni maithei!

He hla, Michael Jackson-a hla dang ang lo taka muang kal raih, lairil fan tak mai hi a nalh bawk a ni ang, MJ chauh hi a satu a ni lova, Patti LaBelle, Ginuwine, 98 Degrees, Jon Lee, Barbara Mandrell, Willie Nelson leh Josh Groban te pawhin an kurpui tawh a. He khawvela mihring hrang hrang, vun ngo leh hang, vun sen leh vun eng te zingah hian nalh titu pawh an tam a, a hun lai khan Michael Jackson-a hla hit niin, United States-a hla lar bikte chauh lanna thin, Billboard Hot 100-ah 10-na a rawn kai phak a. UK lam (Singles Chart) ah pawh 3-na a ni phak bawk a. A sak tirh atanga kum 29 hnu, 2009 a a satu a han thih takah hian a rawn lar thar leh a, UK Singles Chart-ah pawh 95-na arawn ni chho leh ta hial a ni.

(A thih hlim chhawn, MTV, Channel V, VH1 etc. a a hla an rawn play chhen lai vela ka ziah kha a ni a. Khatih lai khan MJ a hawi thuziak hi a tam em a, chhiartute'n in nin ka ring a, ka post ta lova. Post tur nei lova ka Computer Folder ka keu mai maina lamah ka hmu fuh a, ka han tharthawh leh ta a nih hi..)

Interval

2009-11-20T03:13:00.000-08:00

Kan naupan laia kan film en thinah kha chuan 'Interval' a awm ngei ngei. Zunram thiar nan te, kan film en sawiho nan te, kan film ena a changtute tihdan zir nan te kan hmang tlangpui thin. Eng pawh ni se, chu lam chu ka sawi tum a ni hran lova. Tun lai chu thu ziak turin ka kut a chawl tlat mai a. Kar thum lai, buai em emin hna ka thawk a. Tunah erawh ka awl leh ta deuh a, chuti chung chuan ka buai lai ang tho khan ka rilruah thu ziah tur a rawn lut hlei thei tlat lo. Hetia hun khaihlak lai hian, thu fahrah te te tal, blog update nan tiin ka han thaikawi a, chu vang a nia, a sap tawng thiam lo ber maiin, 'Interval' ka'n tih ngawt.

Pu Chawnghilh-te'n ni khatah post pahnih emaw te an dah laiin, post tur nei miah lo, hmeichhe thi hul taka han hul thak mai hrehawmzia hi sawi thiam a har zawk a. Ziah tur ngaihtuah lawk lem lo pawha rawn lut ve zut zut thin kha, vawrh bo ang diak a ni ta mai a, engtia hmuh let leh chi nge maw ni dawn ni? Tesep te te hian bul tan ila, a rawn inkahpup(k)-chaw chho leh mai mahna...

Icon : October thla chawhnu lam atanga tun thla chawhma lam inkar chhung khan Youth Icon thlanna, District dang rualin Kolasib District-ah pawh neih a ni ve a. Management Committee din a ni a, Secretary ka'n ni mauh mai a! A buai theih rem rem teh e!!

Live show engmah la buaipui ngai lo, Visual/Electronic Media-a kerek pawh la dai lo kha, a bultumtu berah ka'n tang ta a, buai lo rual ka ni lo. Zanah dar 12 hmain ka mu ngai lova, ka mut tawh pawhin a tuk zana programme tur ka ngaihtuah niap niap a, dar 3 ah te ka va tho a, ka note bu-ah pawimawh ni a ka hriat ka ziak chhuak leh thul. Show neihna hmunah lah, themtleng te zawk ang maiin, a lang ve lo ber kha ka phili a. Thianpa Tawia'n, 'Task Manager' min ti mathlawn lovin, Computer-a Task Manager-a thil kal inluh thuah nasat tluk zetin ka buai. Contestants, Judges, Hosts, Musicians, Beauticians, a.... refreshment chenin, advertisers leh Organisers inkar chinfel nen... hahdam taka, mahni In luma show lo sawisel thin bak ti ngai lo tan chuan lu a hai map map khawp thin mai!

Buaina kara ka thil hmuh chu - tun lai tleirawl leh rawltharte hian thil hi an lo ti tak tak ta deuh tih hi a ni. Mal zai hmanga inel an ni a, a tu mai pawh an thil tihah an chiang. An thata tur a nih chuan a hma lehtlai an pawisa lo, mi an tlem leh tamah an buai lo, an zai ngawng ngawng a, an duh dana thil a kal loh pawhin an sawi hreh lova, an duh dan an sawi ngam bawk. Kan thalai, engmah thawh peih nei lo, hma lam hun ngaihtuah lem lo nia kan hriat nawlpuite hi chutiang an lo ni vek lo tawp. An thiltih apiang ti tak tak chi, duh tui chi, hmabak ko taka chhawp duh, hmasawn chak, hlawhtlin duha hrehawm tuar peih tam tak he Zoram hian a nei tih ka hmu.

Farewell: Office lama kan pute engemawzat an awmna hmun sawn a ni a, kan thlah a. Kan pute zinga pakhat thusawi hi ngaihnawm ka ti. Sorkar hnathawk zawng zawng hian hria se, hre vek se, an nihdan ni ve vek se ka ti.

'He hmunah hian nikum mai khan ka rawn kal a. Nupui fanau nen, kan inbengbel ve dawn chiah a, ka nupui pawh he lamah a hnathawhna kan ti fel chauh a ni a, ka chet ka la ring lo viau. Beisei loh deuhvin ka che leh ta thut a, kan la inring lo viau a ni. Mahse sorkar hna kan dil lai khan, thawh duhin theihtawp kan chhuah a. Kan luh tirhin, khawi hmunah pawh, eng hna pawh thawk turin kan intiam a. Chuvangin, khawiah pawh, eng hunah pawh min sawn se, phur taka kal mai tur kan ni a...' a ti. A va mawi em!!

A sawitu hi a awmna Kohhranah rawngbawltu a ni lova, Pathian thu a sawi ka la hre miah lo. Chuti chung chuan Kohhran Upa tam takin an pawm theih loh, a nihna leh awmna hi a pawm thlap mai a, hotute rorel a sawisel miah lo. Kohhran hruaitu, mipuiin kan rin em em zingah hotute rel anga awm thei lo, mahni duhdana sorkar hna thawh tum ka hmu fo. Ka pu, ka fak che, ka fak thlawt che.

He tawngkam avang hian ka pu hi ka theihnghilh tawh kher lovang. He lam hawi ka ngaihtuah apianga ka hriat chhuah tur thu a sawi tlat.

Khai! A thupuiah sapho tawng hlir ka hman tak chu! Weekend (leh pek a!!) hman nuam vek u le....

Khuangchawi Thla

2009-11-04T21:19:00.000-08:00

A hming ka hre tawh lo. Tlangval hmel chhe lem lo, lian lem lo, te lutuk lo, pangngai tak, lu buk lam lek lek; felfai tak a ni tih erawh ka la chiang. Kekawr zuih uar lai kha a ni a, a inha zuih ve ngang mai thin.

Tingtang tawng lam tawh, a ri erawh la dik ve zet, hmel hlui bum tawh mai kan nei thin a, kha tingtang kha ka tingtang hmeh hmasak ber a ni nghe nghe.

Kha tingtang leh kha tlangval kha tun thleng hian ka mitthlaah ka hmu hrang hleithei lo. Kan In luah kha sorkar quarter awngrawp lam tawh, lian huau mai a ni a. Bungrua kan nei tam lova, kan luah seng lo lam a ni. A thawl deuh vang a ni ang, aw a thangkhawk thei lek lek a, zai a mawi duh phian thin.

Kha tlangval kha a rawn leng fo a, a rawn len tawh chuan, a haw leh hma chu tingtang nen chuan an inhlat ngai lo. A zai a zai thin a, zaithiam ka ti thei ngang mai.

A rawn len apiangin hla pakhat, sak ngei ngei a nei a, chu hla chu a sak hma chuan a haw ngai lo. Chu hla chu hla dang zawng aiin a duh tih a hriat a, kei pawhin mawi ka ti thin. Hla dang zawng aiin a sa thiam ka ti a, a aw nen inhmeh ka ti a; a zai paha tingtang a'n perhdante chu tun thleng hian ka la mitthlain, ka bengah hian a la cham thei.

Kawngkapui atanga luh a ding lam, lo hmasa berah thutthleng sei kan dah a. Chu thutthleng hmawr tawp lam, In chhung lam zawkah chuan, a sir deuhvah a thu ziah a. Chu hla a sak apiang chuan a bawp a khawkherh a, a bawp ding lam chu a vei lamah hlang chhovin, a ke veilam chuan chhuat a khawng dat dat thin a. Tingtang chu a perh sawt deuh auh auh a, a chang chuan pindan bangah chuan a tukkhum nghat meuhvin a dak a, a zai vang vang thin.

A hla sak thin chu -

Hun leh nite an her liam zel

Thal tui ianga ka nghah hlim ni

Hmangaih lenrual lungduh zawngte

Hlim leh lawma kan len hun tur

Dawnin zan mu ka chhing thei lo

Chung khuanu malsawmna zarah

Damte'n kan tawng leh ta hlim ni

Lengzawngte hian kan au a che

Ding rih turin, aw, hlim lai ni

Kan chan tawka khuanulengin

A rel ve chu i vui lo'ng aw

Chantawkah lungawi thiam ila

Ral leh mai tur hringnun kan chan

Damlai pialral i chantir ang

A tawp ber atan chuan hei hi

Vawng reng ang u, lenrualte u

Hmangaihnaah insuihkhawmin

Tuarte tuarpui, Lawmte lawmpuiin

Lungngaih ni leh hlimni zawngte'n.....

He khawvelah hian kumhlun a awm lova, engkim hian hun lai a nei vek mai. Pian hun, parvul hun, chuai hun leh boral hun nei vek kan ni.

He kumhlun lohna khawvela cheng mihringte zingah hian nunhlui leh hun liam hnu chhuikir ngai lo a awm theih ang em? He nun hlui hi eng tik hunah nge mihring hian a ngaihtuah let thin ang aw?

Kum khata thla sawmpahnih zingah hian thla ngainatawm bik, kan nun theuhva kan hriat rei deuh bik vek, kan intawm hi a awm ang em? Awm ta se Khuangchawi Thla hi a ni ang em?

Hlimna leh lawmna zawng reng renga hun hmang thin mihring kan ni a. A hnu leha hlimna kan beisei avanga hun harsa leh hrehawm tam tak tawn tlang hreh lo mihring kan ni vek mai. Hlim leh nawmchen duh luat avanga a tawpa hrehawm tuar thin pawh he mihring tho hi a ni a. Chutiang mihringte chenna khawvela cheng ve zinga hnam tlem te kan nih avangin, tun hma ata tawh Kut ni vangthla leh neinungte'n chawng an chen a, khuang an chawina thin thla, he Khuangchawi Thla hi Mizote rilruah chuan thla ngainatawm ber zinga mi a ni ngeiin a lang.

Mizo hla phuah thiam C. Durthanga chuan he Khuangchawi Thla chhawrthlapui eng leh a chhehvel, a eng lawma mihring lawm nui rite nen lama chiang taka min hmuhtir thei khawpa lungkuai leh chiang siin heti hian a phuah a -

Leng zawngte hlimna ber Khuangchawi Thla hi

Pi leh pu vanglai paw'n sawi nuam an ti

Chung Turni khua tlaiin, thlang kawla'n a liam

Chhawrthlapui engmawia'n khuang a rawn chawi e

Chuti'n zaleng zawng te a eng mawi lawmin

Mahni chhai lai di run hlimten an kai a

Chhawrthla arkai partlan hlimten zai an vawr

Lengi hlim nui ri nen, lengdang an ngai lo

Thangvang sang lah mawi chuang, thlir ninawm loh

Siar lengrual zawng paw'n a sir an bel a,

Vanrang chhum lah sira'n an herliam zel a

Thlir ninawm loh thangvan khua in mawi ngei e.

Mahse khuanu leng ruat dan rual si loh

Thlang khuandimin kawlrawn an liam zo ta

Ngaiin au mah ila kir zai an rel lo

Thangvan mawina zawng pawh puanang chul zo ta!

Khuangchawi thla arkaiden zan thla eng mawi lutuk hnuaiah, ral lehlamah pathlawi lungleng a zai vawng vawng a. Tlang pawng remchang leh kawng chhawrdawh (step) remchang laiah, tingtang nen tleirawl rual an lo zai that that bawk a. Kawtthler mam leh zal tha laiah naupang an tualchai bawk a; a tua mah chu an inngaihsaktawn lova, nuam an ti ngei mai!

Van lam han thlir ila, a hliahtu tur chhum rang awm hauh lo vanga intithei fahranin thla a lo eng paw heu mai a. A bul hnaia arsite pawhin chu chhawrthlapui chu an zah a ni ang, an eng tha ve ngam lova, an awm ve tih hriat chang changin an de set set a; thlir nin a har mang e!

Ni, chutiang hunah chuan a ni, mi tam takin nunhlui an ngaih a, lungleng taka an zai vawng vawng thin. Chutiang hunah chuan a ni, mihringin a mihringpui a hmangaih theihna sang bera inhmangaihte'n hmangaih biahthu an inhlan fo ni. Chu hun duhawm avanga nupa kawp chawi rem tak ni chho ta tam tak an awm ngei ang a; chu hun avang vek chuan hringnun hrehawm taka hmang zui ta pawh engemawzat an awm ngei bawk ang.

Hlim leh lawm takin, chu thla eng hnuaiah chuan kan nui thler a. Kan zai vak vak a.

Khua a vawt deuh vur tawh a, kawrlum hakchhuahna tham em a la ni si lo. Pangti luma inur tawn nawm hun lai tak a ni. Chu hunah chuan tirila khur deuh der der chungin chu thla eng hnuaiah chuan kut insuihih, inngheng rialin kan kal a... kan kal zel a...

Hma lam huna thil lo thleng tur chu suangtuahna hian a chhui phak lo tih kan hriat vang a ni lo, ngaihtuahna chang kan hre lo zawk a ni. Kan hmaah chuan eng hun nge lo thleng dawn, chu kan hma lam hun atan chuan eng chen nge kan lo inbuatsaih theih ve tih lamin ngaihtuahna a luah phak lo. Kan hlim lai chu a rei dawn lova, nakina kan la ngaih vawng vawng tur a ni tih kan hre si lo.

Mahse, khuanu ruat chu dan rual a ni lo. Ni a chhuak a, a tla leh a, thla pawh a chhuak a, a tla leh a. A de a, a bial a, a mang leh thin a. Chu'ng chu vawi tam tak a rawn kal leh chuan hmana Khuangchawi thla thla eng kan hmuh ang bawk kha a rawn eng leh a. A eng chu hmana mi ang mai kha a la ni a, a mawina chu chhe te pawhin a la danglam lo. Mahse a thlirtu mihring chu a lo pangngai tawh si lova, a thlirna hmun pawh a dang ta. He khawvela thil mawi zawng zawng hi nei vek mah la, mawi ti tura i thinlung i pek loh chuan awmzia a nei lova, chu mawina chu i lakah chuan vawk hmaa tuikeplung paih ang chauh a ni ang.

Ni lo, chu mai a la ni lo. Mawi tihna thinlung neiin, mawi ti takin i thlir zawk em ni? Nia, i thlir a nih kha. Mahse a mawina kha a kim lo ni si lovin engatinge i kim loh riau? a mak a sin! Hmana Khuangchawi thla thlahleinga zan i hmanpui kha a awm tawh tlat lo. A then chu he khawvela i hmuh ngai tawh miah loh turin phum bo an ni tawh a, a then chu eng tika nge i hmuh leh ang tih rin chhin ngaihna awm lo khawpin, kawlvalenchhamah an lo awm tawh. A then chuan nupui an nei a, pasal an nei bawk a, i hmuh leh pawhin hmana hun hlimawm kha kohkir leh chi a ni lo tih i hriatchhuah ngei theih nan an hmelte pawh a lo danglam zo tawh a, chutih lai chuan i chunga chhawrthlapui kha chu a la pangngai reng lawi si a, a lungawithlak loh lek lek mai ka ti!!

** October thla kha ka pian thla a ni a. Chumi pual chuan he thu hi ziah ka tum a, mahse ka hna lamah ka buai em avangin ka zo hlei thei lova. Tunah pawh hian a phuai lai a tam ang tih hre reng chungin, blog update duh ve bawk si avangin ka han post ta rawih a ni.

Thawhrimna Mai

2009-10-19T00:45:00.000-07:00

October thla, Khuangchawi Thla a lo thlen hi chuan Zoram boruak hi a nuam tan tawh a. Khaw lum huam huamin mual a liam tan a, ral khata romei zam chek chuk thin pawh a phai tan a; lung tileng tawk chauh a ni tan tawh a - chu chu chhun lam boruak a ni. Zan lamah ni se, pi pu chena an lo sawi, Khuangchawi zan thla eng en hun a ni chho va. Thla a rawn eng a, thla pangngai tho kha ni mahse, van lam boruak a thiang tawh a, thla eng daltu tur chhum a tlem tawh avangin a eng bik riau a. Van dumpawl ruih mai kara thla eng rawn chhuak chu a eng pawh a mawi a, a lunglenthlak bik tlat.

Chutiang hun, hun thengthaw leh nuam lai takah chuan ka nu chuan, kum 32 liamtaah khan nau a pai puar luah a, a pum pawh a na ve sek thin ang. Ni 17 zante chuan a mu tawh mang lovanga, mahse a tuk ni 18 ah chuan nau a nei tawh ngei dawna ring chungin, huphurh leh beisei rilru tak chungin a inpet nasa awm mang e! Ni e, a chhan chu kei hi Khuangchawi Thla tahrik ni sawm leh pariatah ka piang tlat.

October ni 17 kha a ni a, niminpiah mai kha a ni. Aizawl atangin Kolasib panin motor-ah kan chuang a. Hmanhmawh avanga tlan chak theih chuang map loh khawpa kawng a chhiat avangin kan tlan det det a, kan insawh bep bep a. Ka hma chiahah pitar, kum 70 mi, motor a ruih thin mai piah lamah a kum upat tawh em avanga thutna tha ka ken avanga hlim taka titi bawrh bawrh reng mai a thu a. Ka bul chiahah chuan mipa, kum 47 a upa, hmai hnawih leh rimtui lama sumdawng, tunlai ve zet a thu bawk a.

Driver nen chuan sawi tur kan hre ve vak lo. Kan upate pahnih titi chu kan ngaithla a. An kum zat te, an chhungte leh thiante kum zatte an thlur chhoh lai chuan, a tuk lawk chu ka pianchampha a ni tih ka lo zep zauh a. Ka kum zat min zawt var a, naupang min la ti ngang mai! Mahse an titi chhunzawm zel a, huan te, In leh lo te, sumdawnna te, thihna leh inneihna chungchangte an sawi nawk nawk a; ngaihdan sawi ve lem lo mah ila, an thusawi atang chuan tun hmaa ka ngaihtuah tam lem loh ka ngaihtuah ve rauh rauh tho a.

He khawvela awm kan nih kan hriat ve tan atanga tun thlenga kan nun ka ngaihtuah a. Naupan lai chuan, a changin han tapin, a chang chuan han lunghnur ve deuh thin mah ila, khawvel hi a nuam a. He khawvelah hian thi thei leh na thei kan ni tih pawh kan ngaihtuah ngai lo hial thin a nih kha.

Kan upa hret hret a, rualawh a na tial tial a. Chu mai chu ni lovin, he khawvelah hian 'thawk' tura piang kan nihzia a lang chho tial tial a, kan hmabaka awm apiang kan thawk chho ve zel a. Tun hmaa kan thawh loh pawha awm mai thin tam tak kha a awm mai thei tawh lova. Mahni kea din hnu phei chuan thawh hma leh thawh zawh tawh hnu thlenga rilru sen a la ngai zui a. Engkim maiin man a neih a, lei a ngaih vek hnuah phei hi chuan thawh nasat hi a ngai ta ngawt mai. Pianchampha kan vuiliam hnem tial tial a, thil thar tam tak kan hmu a, thil hlui a lo thar leh thin bawk a. Mahse ngai reng leh danglam ve lo chu - he mihring hi dam chhunga hnathawk tura piang a ni tih hi a ni.

Mite angin dinhmun sangah ka awm lo. Mite angin hmun leh hun pawimawh chang phak ka ni lo, mahse kum 32 lai khawvela ka awm tlin ve tak hnuah hian dam rei hi thawhrimna mai a nihzia hi kei ve tehlul nunah pawh hian a va lang chiang em! Ka phak tawk leh theih ve tawk ka thawh a, duham leh duhthawh taka hna ka lak avanga a hun taka he thuziak pawh hi post thei lo ka ni.

Engpawh nise, mi tam takin ka pianchampha hriain duhsakna thilpek min pe a, SMS leh internet kaltlangin duhsakna thu min thawn a, ka lawm ngei mai. Hei hi ka lawmthu sawina ni teh se.

Kum engzat nge kan dam anga, engtikah nge thawhrimna piaha chawlhna ram chu kan thlen ang??

A reina chu thawhrimna,

Lungngaihna, hrehawmna mai;

Kan chamchhung nite chhiardan min hrilh rawh.

Hapta Hapta, a ninawm . . .

2009-10-08T23:23:00.000-07:00

(Tun lai chu mahni tawkah ka buai ve hle mai a, thu pawh ka ziak thei meuh lo. Hei, kumin Faina Hapta puala Kolasib chanchinbu pakhatin thuziak tura min ngenna tihlawhtlinga ka ziahsak hi update loh aiah ka'n post ang e. Hetia ka'n tih duahna chhan hi 'intih engemawna' lamah min ngaihsak lo ula. Mahni tawka theihtawp chhuaha thuziak ni lo, mi phut luiha ziah ang chi han post hi, ka blog lo tlawh thinte hnena chhawpchhuah ka inthlahrun vang zawk a ni.)

Kum engzat nge Faina Hapta hi kan hman tak aw? Zoram pumah Faina Hapta-a lawmman atan te, a hawnna leh kharna inkhawm senso atan te hian pawisa engzat nge kan hman tawh ang? Hetianga Faina Hapta kan hman a, a hapta chhunga Sorkar Office-te ni khat tal dawr mumal theih mang lova an awm ziahte hi a man pe dawn ta ila, engzat nge ni ang? Tichuan, chutianga sum leh pai leh tha leh zung kan sen hnuah chuan eng ang faina nge he Zoram hian a hmuh a, eng chen nge he Faina Hapta hian awmzia a neih?

Faina Hapta kan hawng a, mipuite rilruah faina thinlung a inhawng a. Khawtlang hruaitute’n faina an ngaipawimawh thar a, Hotel leh Restaurant-ten fai an ngaina thar a; Sikul leh Office-te pawhin fai turin hma an la thar leh a. Veng tinah fai hnatlang kan nei a, kan thawk sup sup a, kan fai vék vúk a. Hapta khar a ni a, kan thinlunga fai duhna te, ngaihpawimawhna te leh inzirtir tûl nia hriatnate chu he Hapta kharnaah hian kan khar hnan tel ta ni ngeiin a lang, a Hapta kan hman zawh veleh kan bal leh tan a. Vawk tuihâwkah bawk a inbual leh thin ang maiin, tûn hmaa kan tihdan pangngai kan chhawmnung chho leh a, kan va fai rei lo thin ve le aw!!?

Kan thil chai mek hi a hlinna hrui tur kan thlang lian lutuk a, kan hlin tumna hrui hian a hling fuh thei lo a ang riau.

Bawlhhlawh hi engnge tih sawifiah a ngai lo. A bawlhhlawh mai a ni. Bawlhhlawh hi a tirah chuan bawlhhlawh a ni lova, a tirah chuan a tenawm bawk lo. Kuhva ei thinte hian Cheng ngain, Chinai tah sa Panhnah thleh nga leh Kuhva cheh phel panga kan lei thin a, chu chu mawi takin sarãng/sahãar varah thun a ni a, tumahin bawhhlawh kan ti lo. Mahse kha sahãr/sarãng pangngai tho, Panhnah pangngai tho kha, Kuhva kan han ei zo va, kan han hmet hlãwm a, kan han thlauh a; bawlhhlawh a lo ni ta der mai! A awmzia i man em? Hetiang bawk hian bawlhhlawh dang pawh a ni - bawlhhlawh hi bawlhhlawh lo atanga rawn insiam a ni a, a siamtu pawh mihring a ni. Eng hunah mah heng bawhhlawhte hi kan hnén atang hian paih bo a ni dawn lova, ei duh, kam hlei Mizote zingah hian a awm reng ringawt dawn. Mahse kha bawlhhlawh kha bawlhhlawh bawmah chauh paih ta ila chuan kan khawlai pawh hi a thianghlim ngei ngei ang.

Dik tak chuan, ‘Fai hi Pathian anna a ni,’ tih te, ‘Fai i tlin e!’ tihte hi kan hre hnem tawh. Mahse heng thute hian min faitir si lo. Min faitir lova, hetiang thu inhriat thar tir a, hnatlanga Veng leh Khua tihfai leh fai lawmman sem hian he ramah hian awmzia a nei lo tih a chian ém èm hnu pawh hian eng vangin nge ‘Faina Hapta’ kan tih reng mai le!!??? Faina hi hnatlanga hlawh chhuah theih a ni lova, haw-haw-a nawr chhuah mi a ni lo tih hi a lan chianna a rei tawh. Lawmman duh vanga faina te, lawmman duh vanga thuziakte hian ram ropui min thlen lo tih hi kum tin kan hmu reng.

Thildang ang bawkin faina nei tur pawh hian thinlung lam a pawimawh ber tho. Vantlang hmuna bawlhhlawh paih hreh lohna thinlung hi he Mizo thinlung atang hian paihbo a ngai a. I fa hnênah khan ‘bawlhhlawh a bawmah chauh paih tur a ni,’ tih i zirtir a, a zawm hunah Faina Hapta awmzia i hmu ang. Kawngpuia In sakna bungrua chhék i sim hma chuan YMA hruaitu, Faina Hapta-a nasa taka hma latu ni mah la, faina hian a kalsan rih dawn che a, kawng kama In sak te, Motor sil te, In chung atanga kawng puia tui khawhthlàktir te i chin reng chhung chuan, i lehkhathiamna te, i neihnunna te khân faina a pe dawn lo che a; i In chhung kha faiin, i Car te pawh fai teh mahse, i chhehvél kha a bal reng tho tho va, faina tak tak chu hla takah a la awm tho.

Changkãng taka thil ngaihtuah a, District Level leh State Level-a Committee din lo hian fai hi kan tlin ang em le? Túna kan hman aia nasa zawka tan lak hi a ngai tihna nge, kan hman dan hi kan tumdan nen a inang lo zawk aw?? Faina Hapta chhunga fai chauh tur hian em ni Committee kan din? A mak ngawt mai!

Ram dangah leh State dangahte i kal tawh em? Dawr changkãng tak takah i lut tawh em? Chu'ng hmunahte chuan bawlhhlawh bawm lovah bawlhhlawh i paih ngam em? Engatinge nangma Khua, i Veng ngeiah khan bawlhhlawh bawm ni lovah bawlhhlawh i paih tlat si!? Midangin an tihhnawk pawh hau zawk tur khan eng vangin nge inthlahrung lo taka i Veng leh i Khua kha i tihbawhhlawh tlat mai? Chu zawhna chu inzawt theuh ila, a chhanna kan hmuh phawt chuan kan fai ngei a rinawm. Faina hi hla takah a awm lo, a Hapta hmang kher lo pawh hian khawvel hmun hrang hrang hi an fai mai. Keini zawng, Rih-artui phur ang mai kan ni reng mai a, a zia lo a ni.

Faina Hapta hian min balhtir a nih loh pawhin, min faitir lêm lo tih hi chu a chiang reng a. He Faina Hapta kan hman thin veng hi em ni mi tam takin mahni kawta bawlhhlawh awm pawh kan thenfai hreh tâk? tih te, mahni feh kawng leh huan kawng takngial pawh hnatlang kher lova tihfai tumna kan nei ta lo hi a chhan engnge? tihte hi zawhna ho te te ni mahse chhan a ngai a ni.

Faina lama hma la thate lawmman pêk hian faina kawngah thui tak min kal tir lo tih a chian ém èm hnu hi chuan Sorkar lam pawh hian tibawlhhlawhtu hremna lamah hian tun aia awmkhauh zawk thupêk zawm tur chhuah ta se awmzia a nei deuh ang em? Fai Lawmman inpêk aiin balh man inchawitir a fuh zâwk ang em? tih hi zawhna awm thei a ni.

Chhandamna a awm theihna tur pawhin Pathian fapa meuh Kraws-a a thih a ngai a. Chu Kraws-a a thihna avanga chhandamna chang tur pawh chuan mihringin he leiah hian chan leh kalsan tur tam tak a nei bawk. He khawvélah hian kan mamawh nei turin a man kan pék a ngai a, Pawisa kan neih loh pawhin a ba tala kan lâk a ngai. Faina pawh hi a lawmman la lovin, a pêka kan pêk a, a leia kan lei a ngai a ni ang. Faina Hapta kan ti reng a, kan bal reng tho, a ninawm ém mai. Fai tura inpuahchahna thinlung tel lo chuan Faina Hapta hi i hmang tawh lo mai zawk ang u. ‘Mizote chuan kum tin Faina Hapta an hmang a, an bal reng tho,’ tia hnam dangin min sawi a, kan thãwm a than mawi loh viau hunah kan zak lutuk palh ang e..

Vànráng Tèkmei! - Chang hnihna

2009-09-22T03:33:00.000-07:00

Chang hnihna, ka theihtawp ka chhuah hnua ka tlin tawk hi han en leh teh u.

Chang khatna hi thla hnih vel ka dah tawh hnuah, ka phuah belh theih ngang loh avangin ka rawn phochhuak a. Thian thaten min lo fuih liam liam a, thenkhatin e-mail hmang tein min rawn hrilh fing zel bawk a, ka lawm ngawt mai. Chang hnihna hi, vawiina ka phuah a ni a, a dang chu 'line' khat mah ka la phuah lo. A la awm zel turah erawh ka ngai.. A thui lo bawk a, han chhiar ve leh hrim hrim teh. Tin, chang khatna pawh hi a rhyme scheme ka lo vuah dik loh avangin ka tidanglam hret a, ka han dah tel leh e.

Turni a hrang vawng vawng thangvan sangah,

Khuangruahpui sur thei hian a mawi lo ve;

Tahpuan a khawng chun nu’n – dai chhuat hangah.

Thangvan sang a thiang mawi vawng vawng e,

Virthli a leng, vanrang chhumin a bawh;

En teh hei pui! Chhingmit khap kar lovah,

A hrang dawn e, chhim thlipui – khua lianah.

‘Zuapa lo haw thuai rawh,’

Tiin a au laisen lungmawl – phi ruai ruai.

Chhimthli hrang tur a zuam lo ve – men pei puai.

Kawl a hnim, vanrang chhum a thlawk vut vut,

Chhak tiang, thlang tiang, chhim tiang, hmar tiang dang lo;

Chung tiang a thim, kawlkil eng sen phet phut,

Chunnu’n tahpuan khawn zai rel tawh lo.

Chungah khawpui a ri, a nghing dur dur,

Vanrang tekmei kawla’n a phe zawr zawr;

Tualbawng, vai kel no hruai an tlan dawr dawr,

Murva pawh thlawk ur ur!

Vaivut a leng chum chum, thangvan a vawr,

Thawngaleivir a hrang, hnawm tin a lawr.

(Thlukna vel hi, ka dah ta rih lo mai..)

Vànráng Tèkmei!

2009-09-13T23:39:00.000-07:00

Ka hna pangngai bakah hna dang, rip zet mai ka neih belh a, ni khata ka hun neih zawng zawng zatve dawn hman a ngaih thin avangin Blog update-na hun a vang ta viau mai. Chu mai chu ni lovin, update tura thu ziak turin hun neih a har ta hle bawk. Mahse kan bei fat fat zel turah ngai ila.

Tun tum chu - ka hlahril ziah mek, chang khat chiah ka la puitlin, ka chhunzawm hleih theih rih loh hi, kei aia thiam zawkte chhunzawm turin ka rawn chhawpchhuak a. Thiam zawk lova inngaite pawhin han chhunzawm ve hrim hrim teh u...

Hei hi a nia -

Vànráng Tèkmei!

Tùrni a hrang vawng vawng thangvàn sángah,

Khuangruahpui súr thei hian a mawi lo ve;

Thangvàn sáng a thiang mawi vawng vawng e,

Tahpuan a khawng chúnnu’n – dai chhuat hángah.

Mahse hei pui! Chhíngmit khap kar lovah,

Virthli a leng, vànráng chhûmin a bawh;

A hrang dawn e, chhim thlipui – khua lianah.

‘Zuapa lo haw thuai rawh,’

Tiin a au laisen lungmãwl – phi ruai ruai.

Chhimthli hrang tur a zuam lo ve – men pêi puai.

Ngun taka i chhiar chuan a tlar zat ringawt pawh hian awmzia a nei tih i hmu anga, rilrua a lan ang anga ziah ngawt a ni lo tih i hre thei ang a. Awmze nei takin a thu lam (syllable) zat te, a tlar tawp thluk leh lam (rhyme) te pawh dah a ni tih i hmu thei ang.

Hemi structure ang hlir hian phuah chhoh tur a ni ang :D

A bik takin, Thianpa KKa leh Hotunu Mesjay-te kha ka sawm a che u... han bei ve teh u; ka tum chu in hre ngeiin ka ring. :P

Zu aiah Tuisik (Wine into water)

2009-08-30T21:21:00.000-07:00

Khuangchawi thla, tahrik ni 30, 1954 a Arabi (Georgia, USA) a piang, Anthony T. Graham Brown hi American Country Singer lar a ni a. 1986 atangin hla record tanin, Grammy Award pahnih lai a dawng tawh a. Troyal Garth Brooks aia lar hmasa, album 13 zet siam a, a hlate pawh Billboard Hot Country Songs Charts a tel reng reng, a singles pathum - Hell and High Water, Don't Go to Strangers leh Darlene te phei chu Number One ni thei, a dang 8 lai top 10 a awm bawk a ni a; pa nep lo tak chu a ni.

Chu mihring chuan a larnate, a hmingthanna leh a hlawhtlinnate chu amah Siamtu Pathian tan hmang lovin zu bawiha luhna kawngkaah a hmang a. A sum lakluh zozaite chuan In leh lo leh rosumte leiin nei mahse hlimna a lei tel lova. A nupui Sheila Brown leh a fapate tan 'pa' a tling zo lo. Zu chuan mite hmuh leh hriat phak aia hniamah a hnuklut a. A ropuina chuan hringnun puk thimah a khung ta hlauh a ni.

Chu mihring siamthat nan chuan khawdur mai a tawk lova, thlipui a ngai niin a lang. A nupui mittuiin a zu um a paihtir lova, a fapa tap riin a zu no a thlahtir lova; a fapa a kuah lohna lam kutin zu no a keng zui zel a ni!

Valentine's Day-a a nupui hmangaihna leh beidawnna inpawlh luangliamin lehkhathawn phek 16 zet a thawn hmangin hringnun kawng dik atanga a vahbo hlat tawhzia a hmuhtir a. 'Lalpa, tunah ngei hian ka zu in sim ka duh, min pui rawh,' tiin tawngtai mahse, a bawih rinawm atana lawmluta, nghet taka lo kuah tawhtu thim lal chuan awlsam takin a chhuah bik hauh lo.

Chu nun hrehawm, beidawnna vawrtawp, beiseina leh beisei tur zawng zawng a bo hnuah chuan tanpuitu a au a. Chu a auh chu tu dang ni lovin, mangan laia tanpui vartu hnai reng, amah ringa pantute tana inhumhimna kulh nghet, chakna leh theihna nei tawh lote tana chakna petu, mamawh chhanna, Kana khuaa inneihnaa tui Uain-a chantirtu, Nazareth Isua kha a ni.

Amah avangin Pathian hnenah a nupui ngei pawh vawi tam a tawngtai tawh tih a hria a, a tana dilna chu Pathianin a dawng hnem tawh tih pawh a ngaihtuah phak. Vawikhat chauh dil leh pawh a inthlahrung tawh a, chuti chung chung chuan, a hringnuna indona chu amah maiin hneh tumin a bei tawh a, a hneh rual loh indona a hmachhawn tih a hre si a, tanpuitu a au lo thei lo.

You've hear a multitude of prayers on my behalf

I pray that one more is not too much to ask

I've tried to fight this battle by myself

But it's a war that I can't win without your help

A nun avangin amah hmangaihtu leh ani pawhin a hmangaihte chu hliamin an awm a. Amah hmangaihtute chu beidawnna khurah a namthla lek lek fo tih a hmu. A zu um chu a paih loh chuan hmangaih taka enkawl a, a tana tawngtai thinte chakna chuan eng chena rei nge a daih ang? Chu zu um chu engkim chunga thuneitu hnena a hlan loh chuan engmahin a paihtir thei si lo, chu chu a paih si loh chuan a hmalam hun a ngaihtuah ngam bawk si lo!

So many times I've hurt the ones I love

I pushed them to the edge of giving up

They've stood by me but how much can they stand

If I don't put this bottle in you hands

Chu a nun chu a hria a, tlansan a duh. A chakna hmangin a bei a, a hneh lova. Van lam hawiin a kut a hum ruh a, that a tumna avanga hrehawm a tawrhna chuan chuanglam rorelna pawh a demtir lek lek mai! Mahse chu a thiltih avang chuan engmah a hmu lova, zahngaihna leh thilmak chauh lo chuan a tidam zo lovang.

I shook my fist at heaven for all the hell that I've been through

Now I'm beggin' for forgiveness and a miracle from you

A hla ruahthamloh a phuah a, a sakpuia, nuamti taka a hmeh thin a Piano chu a zu nghei avanga kut khur der der chungin a hmet a. Thiam a intihna te, ropui a intihnate chuan a kiansan vek tawh. A dinhmun chu a enchiana a ngaihtuah chian poh leh a hmu chiang a, chu aia nun khuarkhurum thuk zawkah chuan tlak leh ngaihna a awm tawh lo tih a hria. Tui Uaiina chantirtu hnenah chuan thingthiin, a nuna zu pawimawhna leh hnathawh zawng zawng chu tuisika chantir tura ngen a tul a ti a; mittui tla chungin a thingthi a.......

To-night I'm as low as any man can go

I'm down and I can't fall much farther

And once upon a time you turned the water into wine

Now on my knees I'm turning to you father

Could you help me turn the wine back into water

Eng ang mihring pawh ni ila, he khawvela kan pian chhuah tawh chuan duhthlang theia siam kan ni a, kan nunah keini aia thu an awm lova, kan duhthlanna hmang thei turin min siamtu Pathian pawhin zalenna min pe. Mahse chu duhthlan theihna zalenna kan neih chu kan hmang thiam tawk lo thin a, min siamtu Pathian vahbosana pensan nan kan hmang zawk fo. A malsawmna kan dawnte chuan mal min sawmtu min hliah a, min siamtu chu a thilsiam dang vangin kan hmu phak thin lo.

Eng dinhmunah pawh ding ila, eng ang pawhin sual ila, kan Pathian ropui hi ban phak lohvah a awm ngai lo! Kan harsatna chu eng pawh nise hneh theih loh a nei lova, eng natna pawh tuar ila, tihdam theih loh a nei lo. Kan nuna sual thiltihte chu thlarau thara thlak turin a inpeih reng a, mahse chumi a thlen nan chuan mihring duhthlan theihna zalenna khan Pathian a thlan a ngai a; a nuna thusawi tur leh thu nei tura Pathian a sawm a ngai thin.

Sual khur thuk takah tlain, chu lam kawng chu hun rei tak lo zawh tawh mah ila, khawtlang leh u leh naute, chhung leh khatte pawhin min endawngin min thinhrik tawh mahse, danglam ve ngai lo kan Pathian chu a la pangngai reng a! Hmana Kana khuaa inneihnaa tui uaiina chantirtu kha a la ni reng a, a lam kan hawi chuan kan dilna ngaithlaa, min tanpui turin englai pawhin a inpeih reng a ni.

Hlim Takin - Swine Flu Nen

2009-08-22T03:40:00.000-07:00

Swine Flu (H1N1) a lar a. Khawvel ram hrang hrangah a darh tawh a, mitin an ralkhel a; a bik takin India ram chu he hriin a sawisak nasat pawl kan ni awm e. Thihna leh a vei tam lamah a nasa ber kan nih loh pawhin, he hri avanga buai nasa ber pawl chu kan ni maithei.

He thu ziah lai (Aug. 21, 2009) hian khawvel pumah Swine Flu vanga thi hi 1800 vel tling tawha sawi a ni a. India ramah pawh mi 48 an thi tawh.

World Health Organisation (WHO) chuan khawvel pumah he natna hi mihring tluklehdingawn 2 velin an vei dawn niin a chhut a. Ram thang mek (developing countries) ah he natna hi a darh chak lehzual dawn niin sawi a ni bawk.

Hetianga hripui leng thin te, chutiangin mihring a suat puk puk dante chu lehkhabu leh internet-ah chhiar sen loh a awm a, chhui zui lo ila. Amaherawhchu hetiang dinhmuna kan awm mek lai, Swine Flu nena kan lenho mek lai hian eng ang rilru pu tur nge kan nih tih hi ngaihtuah tham a ni.

Khawvela piang tawh phawt hi chu thi tur kan ni a, chumi avang chuan ni tin, thla tin, kum tinin khawvela cheng mihringte hi kan thi reng a. Mithiamte chuan hritlang khawsik pangngai (Ordinary/Common flu) avang hian kum tin mihring nuai hnih atanga nuai 5 vel an thi ziah niin an chhut a. A chhan chu eng pawh nise, kum tinin, khawvel pumah mihring maktaduai 56 vel kan thi ziah a ni.

Chhan hrang hrang tam tak a awm thei a. Khawvel boruak inthlak (climate change) avanga natna hrang hrang avangin kum tin mi 150,000 vel an thi ziah ni a chhut a ni a; WHO chuan 2030 ah phei chuan kum khat chhunga climate change vanga thi hi nuai 3 vel an tling dawn niin a chhut.

Lung natna avangin kum khatah mihring maktaduai 17 vel an thi ziahin, Cancer vangin maktaduai 7 vel an thi ziah bawk ni a chhut a ni a. AIDS avanga thihna pawh kum tin maktaduai 3 vel a thleng ziah bawk a. Zu vangin kum tin mi maktaduai 2 aia tam an thi ziah bawk a. Khawvela ram changkang ber, USA ah meuh pawh khuan kum tinin Doctor leh damdawiina hnathawkte tihsual palh (hospital medical error) vangin mi nuai 2 dawn an thi ziah nia chhut a ni a. USA ah pawh chutiang a nih chuan, khawvel hmun dangah chuan engzat nge a thlen ang tih hi chhut phak pawh a ni lo hial ang.

Ni e, heng thihna hrang hrangte atang hian, Swine Flu tel lo pawh hian mihring hi kan thi reng tih a lang chiang a. Thi tura piang kan nih miau avangin he thihna hi kan pumpelh thei lova; kan thi reng a, kan thi mek a, kan la thi zel dawn tih hi ngaihtuah miah lo pawha sawilawk theih a ni.

Chutiang chu a nih mek laiin Swine Flu a rawn chhuak a, kan buai ta nuai nuai mai! He hrileng hi kan theihtawpa kan do tur a ni ang, he hrileng lak atanga inven te pawh kan theih tawkah kan tih tur a ni ngei ang. Chuti chu ni mahse heti em ema lo talbuai (panic) erawh hi chu, kan ngaihtuah chian loh vang a ni thei ang.

Swine Flu hi leng lovin, natna dang pawhin min tlakbuak lo mahse, he khawvela mihringte zingah hian dam hlen tur kan awm lova, eng chen pawh dam ila, kan la thi tho tho dawn. Chu chu kan hre vek a, chuti chung chuan thihna hi kan tawh tur, kan chunga tla ve thei niah ngai mah ila, thi tur erawh chuan tumah hian kan indah thiam meuh lo. Thihna hi kan hlau emaw hlau lo emaw, kan tum emaw tum lo emaw, mihring tan pumpelh theih a ni lova, kan hmabaka awm vek a ni tih hi chiang ila. A chhan chu eng pawh nise - Swine Flu emaw flu lo emaw pawh nise - kan la thi dawn tihah hian chiang ila, chu chuan nunkawng dik min kawhhmuh theih a rinawm a; he Swine Flu pawh hi pawmdan kan thiam ngei ang.

John Donne (1572-1631) chuan thihna hi a'n hlau lo khawp a, 'I tur leh ralthuam tha ber ber nen inthuamin, khawvela mi chi hrang hrangte chu i chhiahhlawhah dah mah la, min tihlum thei lova, rei lote atan chauh min muthilhtir mai a ni. Chu muthilhna chu a reh hunah chuan chatuan atan kan harh tawh thung anga, thihna a awm tawh lovang. Thihna, chutih hunah chuan i thi ve tawh zawk ang' (Death Be Not Proud) a ti a. J. McGranahan (1867 - 1937) pawhin, 'Thihnate hlau tawp lo turin, kan nunna thuhruk a ni,' (Nangni Chhandam Fate Tho R'u - KHB No. 398) a ti bawk.

He Swine Flu hi mawl leh â taka lo dawnsawn tur chu a ni lova, chutih lai erawh chuan kan hmabak hi chiang taka kan chhut a, kan nihna dik taka kan chian erawh chuan hlauhna awmze nei lo lak ata inthiarfihlimin, Swine Flu nen pawh hlim takin kan leng thei ngei ang.

Rose Par A Til

2009-08-14T04:38:00.000-07:00

Aih, nilo, ni lul love........Lalpa leh!

A ni thei dawn em ni??

Mak ka va ti tehlul em!!

He khawvel lungngaihna, hrehawmna leh nawmnate tem tura khawvel êng ka hmuh ve tan tirh atanga ka hmangaih ber chungah hetiang thil rapthlak lutuk hi a thleng thei dawn em ni? Ka hmangaih, ka thinlung zawng zawng neitu, ka duat, ka enchimloh; ka nunna ai pawha ka hmangaih chungah kher kher engah nge Khuanu pawh hian a thlentir le!??

Vantirhkoh aia thianghlim, pawisawi lo, nunnem leh zaidam, sualna tem chhinte chu sawi loh a rilruah pawh lut ngailo a nihzia hre chiangtu ka ni a; eng ang pawhin awm tehrêng se ka phatsan thei dawn em ni?? Nilo, ka phatsan tur a ni lo. Ka tana a hmangaihna a hlan lai hmelte, ka hmangaihna kuta ka kuah laia a lungawi hmelte kha ka theihnghilh thei lo; lo thei ta tehrêng pawh ni ila ka phal chai lo mai.

Nichin lawka thlaphang hmel, dang sawp sawpa min en a, inthiamloh hmel taka min en lai khan hnemtu a ngai tih ka hria a; hnem theitu pawh ka hai lo. A rilru natzia a hmel atangin ka hriatpui takzet a, a inthiamlo hmelte, a lungngai hmelte leh a mitmeng pawisawilo lutuk thinin mangang hmel taka min en ngawih ngawih lai khan hnemtu a ngai tih ka hria a; mahse, hnem turin ka theihnain a tlin thlawt lo. Ka kha a chih zova, ka bing mup mup a, mihring hi rilru nat avanga puak keh thei chu ni sela he thu ziak tur hi ka awm tawp lovang.

Doctor hnenah chuan rilrua rinhlelhna, beiseina, beidawnna leh mak tihna inpawlhsawp avanga aw tham tuak chungin, “Ka pu, tihsual a awm chu a ni si lova maw?” ka’n ti a. “A pawi ngawt mai, hetiang hi tihsual har tak a ni. Ma’rawhchu thil fello palh chu a awm ve thei tho,” tih chu chhanna ka hmuh chhun a ni a; hriat loh inhrilhna tawngkam satliah ai mahin inhnemna tawngkam a ni mah mah zawk lehnghal!

Rinhlelh rual a ni lo. Khawvela ka hmangaih ber, ka rilru leh ngaihtuahna zawng zawng ka chhunkhawmna, ka hmangaih, runlum nuthai atana ka thlan, ani pawhin a fate Pa leh atana Pasastha ni tura min thlangtu ngei chuan natna tihbaiawm AIDS a vei a nih chu!!

Nizan lawk khan kan inhmangaihna tipuitling tura kan pahniha chhungkua kan din theihna turin ruahmanna kan siam fel a. Theihtawpa ka tana a rinawmna te, lehkha a zir chhante tihpuitlina a han awm tur a rilrua a suangtuahna avangin a hlim tih hriat tak maia a biang tai tek maite kha ka mitthlaah a cham reh thei lo. Thil tam tak leh zawhna chhan sen loh ka rilruah a rawn lut zut zut a. Mahse, a rilru leh ngaih -tuahna tihdanglam a, he hmun râpthlak - kan tana thu dengkhawng lutuk ber mai kan hriatna hmun - hi chhuahsan thuai phawt a ngai.

Insum tih hriat takin ka hnungah min zui a. Mize zawi mi leh tluang tlam a nih tehlul vei nen, a rilrua phurrit nasa lutuk maiin a han delh lehnghal phei chu ka tan chuan hmuh a hrehawm takzet mai. Ka Car chhunga kan lut chiah chu a tap chhuak ta hawm hawm a. Theihtawpa hnem tumin ka awmah ka pawm bei a, a sam chu ka’n zut-sak a. Ka thinlung chuan hnemna thu chitinreng sawi duh mahse ka kâ chuan a sawi thei tlat lo. Ka dang a ro zova, thusawi turin chakna ka nei hlawl lo a ni. Ka biangah chuan mittui a rawn luang zawih zawih a, chu chu ka hmangaih ka hnem theihna sang ber a ni rih mai.

Ngawi rengin Car chuan an In thleng kan inphur phei a. Kan thlen veleh a chhuk a, min en a, a hmui a pet a, a mittui a khap per sawk a; a kal ta nghal a. An gate a luh dawn thleng chuan ka thlir zui vawng vawng a. Rawn hawi let miah lovin a lut nghal a.

* * * * * * * * * *

Tlai ninawm tak a liam a, zan a nih thleng chuan ka rilru-ah eng dang mah a lut thei lo. Chaw ka lem thei lova, khawi dang kal zai ka rel thei hek lo. Thla eng chuan ka pindan chu a rawn chhun eng raih a, zan danga ka thlir nin ngai loh Chhawrthlapui chuan zanin zet chu ka tan awmzia a nei tlem ngei mai. Kan kawmchhak lawka Biak In ah pawh inkhawm zan zan dang ang bawkin khuang a ri dup dup a, inkhawmho an zai rual thup thup a. Thil engkim chuan an nihphung pangngai an hloh lo. Ka pindan banga Ronaldo thlalak ka tar pawh a nuih ngaiin a la nui sang a, ka lehkha ziahna dawhkana ka sana tê pawh a kal ngaiin a la kal beuh beuh zel bawk. Kei erawh zawng mihring ka tling lo a-chha chu a ni. Ka hmangaih ber chu thi si lovin a lu ka sun a, a na ka ti. Ka khumah ka bawk a, kan pahniha thlalak ka en a; ka rilru tawt up up chuan kian zai rel a tum lo. Kan hlim lai ka dawnkir a, induh leh inthlahlel tawn taka hmangaihna kan inhlan laite kha ka dawnkir a ni. ‘Hmangaihna dik tak chu pakhat bak a awm thei lova, mi pakhat leh mi pakhat inkarah a lo piang a, chu chu a nung reng a, a lo thanglian zel a; mawi takin a parvul thin. Chu hmangaihna dik tak chu eng lai mahin a reh thei lova, a kiam deuh thei hek lo. Lui tui lianin a kama hnawl a liampui duak thin angin hun leh kum tam liam pawhin a liampui ve thei lova, a neitu mihring dam chhung chu dairial a chang thei lo’ tih thuziak ka pek laia a nui hmelte, a biangsum khuar kek maite kha aw..............

Aw, hetianga tapa, indawm-kun bak tih theih ka nei ta si lova maw? Eng vang nge? Eng vang nge ni takzet??

Tettê atanga inkawp kan nih vang ni lovin, ka hmangaih em avangin ka ringhlel ngai lova, ka phal hek lo. Inthiam lo chungin ka hmangaih, ka damchhan ni a ka hriat leh ka lei hlimna chu rinhlelhna tur ka zawng ta a ni.

A Nu leh Pa, a chhungte AIDS vei an awm lova, a Pa phei chu Kohhran Upa, mifel leh mitin fak huai huai a ni. An chhungkua atanga kai a ni mawlh lovang. Thisen pek ngai khawpin a dam loh ka hre lova, chutiang turin tawhsual a tawh ka hre bawk lo. Drugs a ti thin em ni? Teuh lo. Hmeichhiaah mah a ze zawi mi, tualchai tam lem lo leh mitin entawn, mi Nu leh Pa in an fate zilhna atana an hman thin a nih kha; Drugs zawng a ti lo tawp ang. A nih chuan eng vang nge ni a ang?

Ka kut hmawr pawha ka khawih phal loh, ka ta a nih hun atana ka khek khal, duat taka ka khawi ni a ka hriat chu midangin min lo thliahsak ta a ni thei ang em??

* * * * * * *

Ka jacket ka ha a, Car chabi ka la a, ka inkhalh chhuak ta nghal a. An In ka va thlen chuan ka sana ka en a, dar 8:45 a ni a.

An door bell chu ka han hmet ri a, amah ngei chuan kawngka mi rawn hawn a. Thutak hmel takin ka mitah tak min en a, engmah ka sawi lo. Ka kal pel a, inkawmna pindan lamah chuan ka pheisan daih a. Mi rawn zui a, ka bulah chuan a thu a; ngawi rengin T.V. chu kan en dun a.

“Eng vang nge?” han tih tawl mai tuma ka kâ ka ân dawn lai takin, “Sena, min ngaidam thei lovang tih ka ring,” tiin mi rawn tawng khalh a. Ka mur uai uai a, ka en ngai ka en reng a; ka ngawi reng a. Amah vek chuan,”Nang chauh hi ka hmangaih che a, midang tumah ngawihzawng melhin ka la melh chhin ngai hek lo,” a ti a. Ka la ngawi reng a, ka hawi sawn hek lo.

“Ka laka i thatnate, i rinawmnate leh min hmangaihnate avang hian ka lawm takzet a, chumi rul tura i nupui nih a, i rawngbawl ka chak ber thin. Mahse, tunah chuan engmah zep theih a ni lova, a sawt tawh bawk hek lo,” a ti a. Ka ngawi reng a, ka kut ka hum ruh tang tang a. A sawi zawm zel a. “MBBS ka zuk zir lai, a kum hnihnaah khan zankhat chu ka thiante nen Cinema kan en a..” a chawl dat a, a mittui chu a rawmawl-in a han hru zauh a.

“Kan Cinema en haw chu vanduaithlak takin ka thiante nen chuan kan inhloh ta daih a, ka tih ngaihna hre lo chuan taxi ka la ta a. Taxi driver chuan nui vur vur chungin ka kal duhna min zawt a, chhan pawh ka chhan zawh hmain a tlan ta nghal a. Rei fe mi tlanpui hnuah chuan hmun fianrial deuh maiah hian taxi chu a tiding a, ka lam chu rawn hawiin min nuih leh ta vur vur a. Ka hlau lutuk chu awrawl tawpin tanpuitu zawngin ka au ta chiam a. Chutih lai tak chuan vai tlangval pakhat hi motorcycle-a chungin kan zawn a rawn thleng hlauh mai a. Ka mangang au thawm chu a hriatin kan bulah chuan a rawn ding a, min rawn chhan ta a ni,” a ti a.

Ka rilru-ah chuan engkim chiang thawkhat tho mahse a thusawi chu ka ngaithla chhunzawm zel a. “Chu pa chuan ka awmna min zawt a, ka sawi hnu chuan, ‘Hei, zan a rei tawh si, kan Inah i riak anga, naktuk khaw enah ka va thlah dawn che nia,’ min ti a. Han hnial ka tum zet na a, duh thlang thei dinhmuna ka din miau loh avangin an In lam chu kan pan ta a. An In kan va thlen chuan thei tui ni awm tak hi min pe a, ‘I dangro a ziaawm deuh ang. Helaiah hian i mu anga, i bul pindanah hian ka riak dawn a, hlauh tur a awm tawh loh hi; naktukah ka va thlah ang che,’ a ti a, a nui var var a. A thil mi pek chu ngaihthatlohna nei hauh lovin ka in ta a. Ka lem chiah tih chuan ka za chuai chuai a, nui var var chunga mi rawn pan laite pawh chuan hnar nachang rêng rêng ka hre ta lova. Ka kawr mi phelhsak a, a duhtawkin mi suasam ta a ni. A duhtawk a ngah hnu pawh chuan ka la kham ta lo cheu a, ka la pawmbet tlat a.....................”

A sawi zawm zel na a, a thusawi engmah ka hre mumal tawh lo. A thusawi chuan ka thinlung a vit a, a na ka ti takzet mai. Ka mittui chu tih-tlak loh hram tum mah ila, dan sen rual a ni lo. Ka biangah chuan a luang zawih zawih a; ka thil hmuh chu a phe ruai bawk a.

Ka ding hluai a, a mitah tak ka en a. Theihtawpa insum chungin, “Mangtha.........F.” ka ti a. Ka chhuahsan ta nghal a.

Man Nei Tlawmngaihna ?

2009-08-07T08:24:00.000-07:00

Chawngbawla, Khuangchera leh Taitesena te an awm tawh lo. Vanapa leh Neuva pawh an ngaihawm thlawn. An tlawmngaihna avanga hriatreng hlawh an ni bawk a, lu suk an peih lohzia te, kawthalovin a zut vak avanga chawlhkar khat lai an khumbet thute leh Sanghal sarep leh Sazuk zangti aia Tumbu thukphum leh Dawltawm bawl an duh zawk zia te pawh sawilan a ni ngai lova; chutiang chanchin an neih loh vangte pawh chu a ni mahna.

A ho hle mai!

Thangzachhinga kha Vanapa a nih theih nan tu emaw ber kha chuan a tlawmngaih neih a ni maithei a. An inneih zante khan an invin nasa ang em? Vana nu kha nu ropui tak a nih loh pawhin sehhel ve tak a ni maithei, an inneih dawnte khan a thiannu te pawhin thingphurh leh tuichawi pahte pawhin an zilh fo maithei. He nu hi awm ta lo se, kan Zorama Hall hmingthang ber hi ‘Ambedkar Memorial Hall’ a ni lovang tih tunge sawi thei? Hman hmanah, Lal Solomona meuh pawh khan hmeichhe hmeltha pakhat vangin a leidote remna saui a tanpui tih a hriat vang a ni thei ang em – he nuin thinchhe bawrlawk Thangzachhinga a’n neih ngawt maina chhan hi?

Chutiang thu ho mai mai ngaihtuah takah chuan, a arbawm tah chungchangte pawh ngaihtuahnaah a lo lang zut zut mai! Thinchhe khing tawp Thangzachhinga khan an khuaa mi zawng zawng a nih em loh pawhin an veng chhungah tal kha chuan tihthinrim a ngah ngei dawn tih hi a chiang a. Thinnel leh zaidam a zir lai khan a lo ankhum tawh mi engemawzat leh tleirawl hawklakte khan a arbawm tah laite kha an han phingchilsak vel ngei ang a! Arbawm pakhat tah nan khan thla khat a hman hial i ring ve em?

Nopui nena chawimawi hlawhna ni mahse tlawmngaihna khan hlawkna aiin channa lam rim a nam a. Hmingthatna leh mite ngaihsan hlawhna ni mahse, chumi tlang thengthaw nuam lawnkai nan chuan zan thim tam tak te, luikawr dung khawkrawk, kham tihbaiawm leh suar rapthlak zet zet zawh chhuaha paltlang a ngai a. Ruahpuivanawn leh ni sa rum rut tuar lova ban tlang ngawt theih a ni lova. Vangvatseitial leh tho thlarang te, Nghal mal hliam leh zuanbak pangang thlengin tawn tlang a ngai a. Hnimpik bawn leh zawng luro kal kahlen loh theih a ni lo. Sakei hahum hmaa zam loh thiam a ngai a, Savawm hmuh hnaih hreh lem lohte pawh a tul. Thimhmul leh khuantevik pawh ni se, phurdan ngai renga phur loh a rem lo.

Zawltling vawn nat nei chi, hmangaihna avanga artui chhum pum khat seh keh thei lo tan Nopui dawm chu kawlvalenchhama lunghlu thami ang mai a ni a. Chhuan khat ei loh vanga tamchhawl thin tan a tina tin chi a ni lova. Ruahthimpui leh huihchhuk thli a tleh changa pawnpui hnuaia biru thin tan lek phei chuan vana rah ang a ni hial ang.

Tlawmngai thin thlah kal zelte hian a chang chuan Mizo tlawmngaihna kha kan hmu fiah thiam tawh mang lova, kan sel ta fo mai! Nopui dawm a, lal In bathlar langsar laia tarlan lansarh duh vanga tlawmngai mai mai, mahni thatna vanga midangte tana inpekna tel lo, chawimawina lallukhum khum duh vang chauhahte kan puhthlu ta hial mai!! Mahse, Mizo pasaltha, tlawmngai hmingthangte khan zan engzat nge rampalailengah, chemtum lukhamin mutmu ang tuah ang? Sakei hniak leh kawlphe karah tamchhawlin vawi engzatnge an awm ang?

Thut pindan thutthleng dupa thu chunga football inkhel en te, concert leh huau huau chitin mai mitthla tur an nei ve lova. Mahse leng len ar khuan ruala mualveng nula In pan phurawmdan an hria a, mi hmuh loh lai remchanga lengi vei melh te pawh an tan chuan thlakhlelhawm tham a ni ve tho a sin!

Tlawmngai tura hruaitute phut chhuah ngai tunlai Mizo thalaite hian tlawmngaih awmzia engtinnge kan hriat ang aw? Phut chhuah leh nawr chhuah chawp tlawmngaihna hmangin khawtlang tan kan phek chhuak ve sasawi a, chuti chung pawhin kan theihna zawng zawng kan la hmang phal mang lova. Kan thiam zawng pelin kan tlawmngai thei ta mang hauh lo lehnghal! Khawtlang tan a nih chuan lupan hnathawhin kan thawk a, hlawh nei lova ni hnih khat kan inpek chuan kan kumkhaw sawi a tling dawn dawn a, kan hmai a uang viau zel mai!

Tunlaiah chuan tlawmngai nih a harsa tawh vak lo. Zanlaia mi ruang zawna khaw karkawng kham bakbahai tak tak kal ngai a awm tawh lova, mut tui lai a ni emaw, mang ropui tak neih lai a ni emaw sawi theih hauh lohva, ‘Sa a tla e,’ tih thawm vanga thawhphan awm hauh lova tlanchhuah nghal a ngai tawh hek lo. Bus chhungah, hmeichhia leh tar chaklo zawkte tana thutna han ken zeuh té maite kha tlawmngaihna a ni der tawh a! Tunlai Zoram thalaite tlawmngaihna lamchhuahtirna langsar ber chu mitthi Ina tlaivar a ni awm e. Mi In lumah, electric eng hnuaiah, thingpui leh a hmeh nen, peih lo tan zai loh pawh a mawi lohna em em awm lo a ni tawh lehnghal! A va hahdamthlak tawh em!

Huaisen, ral hrat, tuarchhel leh zaidam hmingthang kan pasaltha kal tate hun leh tun hun hi khaikhina sawi pawlh chi a ni kher lovang. Nasa takin he Zo hnam hian hma a sawn a, khawtlang nun leh Inchhungkhur inrelbawlna a danglam a; eizawnna leh inthenawm khawvennaa kan rilru putzia thlengin a inthlak danglam tawh. Mawi kan tih a danglam zo tawh a, nalh kan tih a hrang tawh a. Kan ngaihsan a inthlak a, zahawm leh ropui kan tih pawh a inang tawh lo.

Chuti chu ni tawhin, Zamzo aiin Anthurium mawi tawh mahse, he Zoram leh Zo hnamah hian, khawi hmunah pawh tlawmngaihna lanchhuahtir a la ngai ta reng a. Lanchhuahtir dan danglamin, tlawmngai tura tih turte pawh nasa takin inthlak tawh mah sela, tlawmngaihna zepui kha chu a awmna ngaiah a la awm reng a ni. Veng leh khawtlang tinah, mahni theihna leh thiamna zawna tlawmngaih chhuah a la tul reng a. Hlawh leh hlawkna awm miah lo chu sawi loh, mahni tana heksak leh channa ni zawk chiang saa ‘Mizo nih’ a ngaih chang a la awm fo a ni.

Man neia tlawmngaih tumte, tlawmngai thinte pawh awm theih a ni tawh a ni maithei. Veng leh khawtlang tana inkhelh te, hnam lam intihsiaknaa telte, inhruipawha tel te; a mak khawp mai – thenkhat hi chuan, ‘hlawh nei lovin ka thei lo’ an ti ta hial mai! An tlawmngaihnain man a nei a ni maithei. Mahni theih chin china he Zoram leh Zo hnam tana inpek hi tlawmngaihna a nih loh chuan engnge ni ang? Chu tlawmngaihna chuan man a nei ta em ni? Khawhar Ina tlaivarte hian hlawh phut ta se, khuang vawtute hian zan khatah ‘rate’ insiam se, hlahriltute pawh hian, ‘Hla khatah cheng chuti zat chu ka hlawh thin,’ ti ta se a mak ngawt ang! YMA member, thlan laia chhuakte hian ruang pakhat zelah ‘rate’ nei ta se; chu chu YMA sumah lut ta bawk se, a mak thei awm mang e!!

Mizo tlawmngaihna hian man a nei ngei a, mahse a man chu a tlawmngaia te tel tur ni lovin, an pek zawk tur a ni dawn lo’m ni??

S.M.S.

2009-07-30T23:57:00.000-07:00

A la rei lo. Kum 2004 hma lam kha chuan Mizoramah SMS a la lar lova. Khatia, Bharat Sanchar Nigam Limited (BSNL) in Mizoram lam hawia an mobile phone tower-te an rawn phurh chhoh atang khan SMS pawhin Mizote a rawn run ve nghal a; kan hmang thiam nghal a, kan hmang rim nghal a nih kha. Keini lai lai, ‘Mobile phone-te chu rawn thleng ve sateh mahse kan nei leh phak chuang hlei lo’ng e,’ lo ti thinte pawhin a tel lova awm nuam ti lo khawp hialin kan hmang rim ve ta! A mak zawk ngei mai!!

Chutiang chu thil awmdan a ni a. Chutia SMS hmanga khaw lam hla taka mite nena ri lova kan inbiak theih tak hnuah chuan vawi tam tum tam SMS (Text message) kan dawngin kan thawnchhuak ve ta a; chumi chungchang chu ni lovin, ka message dawn thenkhat hi, inbox atanga ka delete hmaa dahthat tul ve tlata hriain, hetiang hian ka’n chhimthal bekang puahpui ve dawn a. Mi thenkhat tan chuan armit tet khuan ve mai mai lek kan ni ang tih ka ring chung chungin, thekhat tan vitamin te a lo ni ve mial thei bawk a. Mi inang sa inang kan nih vek loh avanga he khawvel hi khawvel a nih avangin ka inthlahrung duh ting ta lo.

Ka piancham lawmna atana, ‘Let wind blows away all the weariness and sadness, Let rain wash away your worries. Let Moon brings you romances, Let stars brings you love and let my SMS brings you happy birthday,’ tih ka dawnte hi chu mi phuahsa inthawn a an em avangin ka ngaihlu lutuk lova, sawichhuah kher ngai pawh ka ti lo.

Fiamthu lawm lo mihring hi kan tam lo maithei a. A lawm berte zinga mi ka nih ve ka inring. Chu chu hriain thiante hian an fiamthu hriat thar hi min thawn chamchi a. Thianpa Hranga’n Khasi-ho kahna fiamthu min thawnte pawh hi ka lawm ngang mai, han chhiar ve chhin teh – A khasi had three sons and he loved his youngest son most. In his will, the eldest got the house, middle got the money, and the youngest…his leather jacket and boots!!

Fiamthu lamah hi chuan thianpa Auhmuna hian a hriat apiang hi min hrilh lovin a awm thiam lova. Ani hi Mizorama fiamthu avanga mi hriat hlawh a ni bawk a. A awmna hmun apiang hi a ‘au hmun’ a ni maia, a fiamthu hriat apiang hi sawichhuak lovin a awm hlei thei lova; mi rawn thawn var thin. Zing, chhun, tlai, zan, zanrei, zing, a engamah hi a thlu lo. A rilrua a lan hun apiangah min thawn ni hmiang ka tia, ka chhanlet a phut hran lova, ka chhanlet loh pawhin min thawn a thulh chuang lo. Min thawn hnem ngang mai, thenkhat chauh hi han chhiar ve teh –

Restaurant-ah a thiante 4 a chawlhpui a, menu ziahnaah : 1) Momo, 2) Momo, 3) Momo!

Pa inren tih takah pre-paid mobile top-up pawh, ‘missed call pack’ hlir a thun

Inti press mi zetin MP thlan thar a interview ve a: Love song hi sual i ti em? Engnge i chawhmeh duhzawng? I nu nge thi hmasa se i tih i pa?

Kolasib MZP ten Kolasib tantlangtu National Highway chhe lutuk siamtha tura BRTF ho an ngen chhuah zawh hlim, kawngpui an siam lai khan kawng a khu thei bawk a; Vengthar leh Silchar Road kawng kama In neite tan awmngaihna a awm mang lo hial a. Khatih hunlai khan, ‘Vengthar leh Silchar Road chu kawng a khu bawk a, a nei deuh tan chuan vawkin te pawh laminate vek a tha khawp ang’ tihte hi a rawn ngaihtuahchhuak a!!

India ram inthlanpui dawna lar em em, Varun Gandhi-te kha fiamthu thawh nan a hmang a, ‘Rahul Gandhi-te cousin, tun hnaia politics-a rawn lar thar kha Hmelvarung Gandhi em ni kha?’ te hi a rawn ti a! ‘Real Madrid striker kha, Raul Gandhi an tia mi kha?’ te pawh a rawn ti!! ‘Union Home Minister P.Chidambaramthanga chu a tling leh maw!?’ te pawh mawle!!

Ka nuih tiza ber pawl zinga mi chu, ‘A tu leh fate an sual bawk a, tu mawng beng pawh a ni satliah lo, ‘Tu leh fa mawng, hmai, tukkhum, awbawr, nak, etc. beng’ a ni deh ber’ a tih hi a ni!

Pastor fapa, Mapuama a tih, Mamuana of Y2 Goal teho nena an inthawn thin, SMS chhiar har zet maite pawh hi min han share ve lawp lawp a, han chhiar ve teh – Qua uh loom lootoock a, ca chhuaque vague pay lou. Tea hyean ohm huhdham eelha uh nooam tuck tuck – (Khua a lum lutuk a, ka chhuak vak peih lo. Tihian awm hahdam ila a nuam tak tak)!! A peih thlak teh asin!

A thianpa nupui ruk thar a va en ve a, ‘E he, Drogba a va ang ve’!

….Br. YMA chuan a mamawh apiang hman turin thisen Unit 50 an pe. Thisen petute hi mipa 40, hmeichhia 9 leh pherh 1!!

An sikulah naupang an tam lo ve angreng. Naupang zawng zawng zingah Thangliana a thiam thei zawk!!

Advertisement : Delhi-a MBA zir duh tan spot admission at Ziri Store, Mimbung. Sumo counter kan ni bawk!!

Eden huanah khan mobile chu awm tawh se: ‘Ny ce. Ne t? Om my2 mi? Huan laia mi apple kh ei cin a, tui bon. Lo kl vt rh, k ei joh hmain’ !!

‘Thil tha tih ka tum ve leh ka sual leh thin’ tih hla phuahtu hi thil thalo tih a tum lai phei chuan a sual vet vet ang chu aw!!

Bike accident: ‘Helmet a hreng uluk bawk a, a lu chu a him pial mai’ ‘A taksa engnge a an?’ ‘Kan zawng mek,’

Phaia khawsaho khuan an dam loh nikhua hian phai an pan ve tho ang em?

Tawk teh sen

Thian circle hrang hrang i nei ve ngei ang. I thiante zinga thenkhat chu i tel lova inkawm ngai miah lote pawh an ni anga, i tel lo pawhin a then chuan nuam an ti ve tho tho ang. Ka thian bial then zinga ka nuna hlimna tam tak min thlen thintu, Pu Sangtea (MCS) te, Awma (MZP) te leh thianpa Tawia te nena kan SMS inthawn thin hi a chang chuan a nuihzatthlak a, a chang chuan han zir chian hial mai chakawmte pawh a awm ve! Kan zinga a phanchang ber, tawng lam thiam elkhen; hmel lamah chuan ‘ka u’ min ti ve mai tura lang, tuiah pawh tla se ‘kang hlum’ tih tho tho tura mawi, mahse a bula awm loh nuam lo zeta mi awhfik thiam Pu Sangtea hian SMS chu a tawk thlum thei ber maiin ka hria. Awma te’n an lunglen changa, ‘Aw.. khaw’nge in awm tak ka lenrual te, engah mahriaktea min lo siam le,’ an han ti vete hi chu a kharchhawng tawngka deuh a, rui puam lungleng thu hla a ni mai mai ang tih a awl!

Kan Pu Sangtea chuan, ‘Ngaihni bang lo - lenrual lungduh kimtea hlim lai par tlana kan len lai nite kha,’ a’n ti te te a. A leng thlu ngang nge, a phuah thlum ve hrim hrim – Kian zai rel lo tuan tulin maw rualduh suihlung hlimtea len lai ni kham zai a rel le? Hmuh theih chang se hnampui len ka nuam e – a’n tih chhunzawm a. Tak tak a nih leh nih loh phei chu a hriat lohva. Min ngai ve hle niah kan han ngai thla chawt a!!

En teh, In lungtum ka ring nem maw tualtul kal lai kham lo lenna tlang dang, hel lai siali di thiang chhai iang lairil tuanna lamtluang iang e. Theih chang che khua hmunah, a ngur nun ngai lotea hlim ni par tlanin, zatlang relthang sirah hnawlin, nauang nuin ni amte’n chen ka nuam e. Thlunglu hai leh kalchawi her liai a pawi ne’maw, thangril tuan rel rual duhte – han tihte hi! Aizawl College-a a thawh lai ni se, a zirlaite hmaah han hrilhfiah vel sela, kil khat atangin han ngaithla ve ila, a ngaihnawm awm hi ka tia lo’m!!

Hna kan nei, tih tur a hrang, ngaihtuah a thuhmun lo; buaina a dang. Kar tawpah, chu pawh kar tawp apiangin a ni thei lo, thla khatah vawikhat pawh a ni lo, a remchan hun apiang kar tawp hi kan inkawmho theih hun a ni maia, a remchan hun hi a tam lo eltiang lehnghal a. Chutiang hun a lo thlen hun tur chu – buai em ema ni tin hun hmang thin tan chuan thlakhlelhawm a tling a. Tumah vengthawng lova kan nuih duar duar a, tu mitmei mah veng lova kan nghengtawlah, saiawnah hun chu keini pawhin kan hun hlim ber lai zingah kan chhiar ve thova, ani pawhin chutiang hun a lo thlen leh hun tur chu thlirin, ‘Khuanu’n tawn leh nan a tuahrem nikawl lo eng tur thlirin, hril zel nang e ngaih lai thu di, aw, kar mah hla se maw??’ a ti vawng vawng mai!

Chutiang hun kan han hmang a, puar el euhva uisa bai kan ei hnuah kan han inthen a, In a thleng hman lovang a tih turah hian - Mahriakte’n lunglen ka chhiar zan tlaiah - ngaih lungrun zaleng ngaiin, hlim lai ni kohkir theih chang lo, muala liam hnu hlim ni zawngte – a rawn ti leh hman thin a! Motor khalh pah chuan a type a rinawm si loh!!

Office-ah, tih tur nei lovin a thu mai mai anga, games a khelhpui thin lah ka awm hla ropui si, a lunglengin a rawn type a ni ngei ang – A pawi ngei mai lenna tlang dang, theih chang se kar dantu mual za tam sawn ka nuam e, chuti’n kar hla vangkhua fing khat iang a hnai mai tur – a rawn ti! A bei nalh viau mai! Chuti na na na, tun kar tawp chu khawnge, programme duang ila, kan ti a; kan han inrawnkhawm a. Keiniho zinga mikhual lo zet, kan hriat sa vek, keini pawh kan nihna ve tho a ni na a, hetia a rawn tih takah hian a nuihzatthlak zual a – Chunnu lunglian anka dam tawn nan, nghahlai ka rel zawk mai nang e runhmun chu! - A awm tho, a nupui a rai puar ul a, chutih laia hna tul pawh nilo, sum senga thiante bula kartawp hmang tura lo kal chu – keini pawh ni ila kan ngam loh tur a ni!!

A nupuiin nau a nei a, ka han SMS a – Lalmama nau sakhmel tha maw? Chun leh zua lawmna lo ni se, khuanu zarah damte’n leng se, Sialang lianin lo mam rawh se. A sakhming pawh a mawi ngei ang – ka han ti dek dek a - Ami zaleng dang zawng chhing zo nem maw, kim tlang leh sakhmel mawi chuang suh e, chun leh zua suihlung zawng a dum zo na e. Kan lawm a kim, kan hlim a sei, a sakhminga’n Lallawmkimi lo sa e – a u Lalmama’n – a rawn ti hnap mai!! A duai lo asin!

Tawng lova sawi teuh theihna, inhrilhrukna atana tha fahran, midangte nena kan inkar pawhhnai nana tha fahran, kawlvalenchham piah lam daiha awmte nen pawha hla pakhat min saktir theitu SMS hi a fuh char char ngawt mai!!

Changkanna Changkang Lo ?

2009-07-12T23:00:00.000-07:00

Thawhtan tlai Ina ka haw chu, thut pawh ka thut hmain, ka fapa upa zawk chuan, 'Pa, naktukah a-nu liani te lovah ka feh dawn,' a lo ti nghal a. 'Tul lo, a hahthlak, i chau lutuk ang,' ka ti a; a tang ve tlat. Tan chhan pawh a nei tha, 'Aaaa, A-nu pawhin a phal...' a ti a! Kei aia thuin a lo phalsak tawh si a, ka phal leh phal lohvin awmzia a nei ta lo!

Kan naupan ve lai, 1980 bawr kha chuan Mizo naupang zingah 'tuai' kan tih ang chi kha kan hmusit thin. Tuai kan tih chu, mipa ni ve si, tawng sin tlat te, mipa chetdan lo deuh hleka che te, awmdan phunga mipa pangngai tihdan phak lo deuhte an ni a. Tawlailir khalh ngam lote pawh kha 'tuai' zingah kan telh thin a nih kha. Tunlai hian, kan naupan laia 'tuai' kan tih thin naupang ang kha Mizo mipa naupang hi an ni ta deuh vek hial emaw le tih mai a awl.

Mizoram Cable TV lar ber, LPS in 'Pro-Fight' a buatsaih tir lam kha, ka en zeuh zeuh a. Hmuhnawm loh fe fe kha an tam lutuk a, thenkhat phei kha chu, 'Mizo mipa si, heti em ema inhnek thiam lo hi a awm theih a ni maw?' ka ti hial.

Mizo naupang zingah hian 'Mizo naupang' kan tih, pa hrek hrawk, thiam loh nei lo, tih hreh nei lo, ram kal nuam ti, inbuan leh inchai ti thang ang chi kha an vang ta hlein a lang. Hei hi eng vang nge ni ang?

Kan changkan tawhzia hi sawi tham a tling. Kan kawng te, kan khawlaite hian mi ram a la tluk lo tih chu sawi a ngai lova. Mahse khawvel hmasawnna hian Zoram pawh a rawn hrut a. Khawvel changkang zel milin kan pen vek thei lo chungin, kan hawiher te, kan khawsakziate hi chuan khawvel ke pen rualin ke a pen mek a. Chu chuan he Mizo naupang hi a ti tuai zo ta a ni em?

Keiniho kha chuan sikul kai bakah kha chuan ram kal te, tawlailir siam te, inrallemchan te, inburchhevawm te, football pet te kha kan hna a ni ber a. Ram kan kal a, thui deuh deuh lui dung kan zawh a; tlangah kan lawn a, hnim kan bawheng a. Khatianga kan tih thin khan, kan hriat lohvin kan taksa a lo ti 'fit' a ni ang, kan dam lo ngai mang lo! TV en tur pawh kan nei mumal lova, Independence Day tih vela en man awm lova Cinema an chhuah thin kan ente kha a ni deuh mai a. Mit chhiatna khawpin lehkha kan chhiar peih bawk si lova, kan rualpui, naupan laia tarmit vuah/bun kha an awm mang lo.

Kan inkhel a. Ball kan nei tha ngai lova, football tak tak phei kha chu kan pet phak tawh kha chu chhe tak a ni deuh zel a. A hamna (tube) lamin a perte pawh kha a na viau tawh thin. Mahse, sertawk a ni emaw, saphing a ni emaw a dang chuang lo, ke lawngin kan pet lawng lawng a, ngal charin kan inpet sawk sawk a. Na tia kan ke kan khai vaw vaw a, kan bai chai chai laite khan hrehawm ve deuh mahse, kha'ng khan tawrhchhel min lo zirtir reng mai!

Vangvat avanga te (au) chhin ngai lo Mizo naupang kha an ni tawh lova, ketin tla mai mai avanga inkhelh thulh ngai lo Mizo naupang an ni tawh lo. An tuaitut tlat tawh a. Ball boot bun lovin ball an pet ngam tawh lova, lung phawka Chakai man dan te chu sawi loh, a eidan pawh an thiam thathum tawh lo! Pizza, Hamburger leh ice cream ei chu an zei viau lawi si!!

Mizo thalai chu an 'fit' bik thin tia, sipai hotute'n an sawi thinte pawh tunah chuan a dik vek bik ta lo. Thiamna lamah chuan kan sang tawh zawk a, kan hriatna pawh a zau e. Mahse kan taksa hian tharum a nei tam tawk tawh lova, insawizawi pawimawhna hre lem lova kan lo insawizawi chiam chiamna ang kha a awm tawh si lova. Ram changkanga insawizawina an neih that kan hmu a, kan nei ve phak lova, tih lohvah kan tlak ta mai mai a. Lirthei a lo chhuak a, a thar apiang kan lei a, ke-a kal peih pawh kan awm ta mang lo. Khup tuah teh tuh, KM khat pawh tlan thei lo tur hi kan va tam ta em!!

Phaiah kan kal a, rel-ah vaihovin min han hmuhte khan min endan a dang a, kungfu thiamah min ngai fo a nih kha! Mahse tunah chuan a ni tawh lo tih an hre tlat a, min zuam ve tlat tawh mai! Ni e, ka unau, kan computer folder-a Britney leh Beckham-te thlalak bula kan thlalak a awm ve tak chinah hian kan sawngnawi ta riauin i hre ve thin lo maw??

Mi zawng zawngah chuan a dik vek lo tih ka hria a, mahse a nawlpui zingah hian, a bik takin, khawpuia cheng naupangte nunah hi chuan hei hi a dik tih ka hmu.

Kan in chhungah Khuhhriang a awm tawh lova, suankual leh chaicheh pawh kan thlawhbotir tan mek. Mahse thlangra leh tuthlawh thlenga kan hmang thiam lo chho zel hian he Zo hnam dinhmun hi a tichhuanawm sawt miah lo. Chu chu tu mawh nge??

Kan fate hi kan naupan laia kan infiamna ang khan infiam turin kan beisei thei tawh lova. Kan aia ute'n kan chalah chil inhnawm tura min tih a, min inbuantir a, min insualtirte kha a chhe lam chauh emaw kan tih laiin, a tha lam pawhin kan taksa tan a lo hlawk reng a; tuarfeina min pe a, ngam lo chung pawha tih luih talh duhna thinlung te nen. Chutiang chu a awm tawh lova, a hmanlai tawh. Inkhel turin field kan nei mumal lova. Kawngpuia an inkhelh kan phalsak si lo. Badminton khelh ve an chak a, naupang tan he Zoramah hian khelhna hmun a la awm mang lo. Officer dulkiar leh neinung ten he Zorama hall tha thaah hian, inkhelhna atana hun tha zawng zawng an hmang zo va. Veng khata infiamna hall leh field awm miah lohna hi a tam zawk a la ni bawk si. Kan fate hian an taksa an sawizawi tam tawk tawh lova. Chu chuan engnge a hrin? An sawngnawi a, TV leh computer lama an hmuh anga nun ve mai loh chu tihtur an hre lova. An sam a sei a, an lam hawh hawh a, nalh tak takin an inchei a, kan hriat leh beisei aia hmain ‘hriam’ an lek ta deuh vek a nih hi!

Chu chuan engnge a hrin zel?

Infiamna leh thildang tih tur a tlem miau avangin kan thalaiten TV an en hnem a. Mobile phone an lawm a. Chu chuan thil tha aiin thil thalo a zirtir hnem zawk. Kan education system fuh tawk lo avangin mi tam tak kawng lakah kan thlauh va, chu chuan he hnam tan hian pawi a khawih a; thiam nel nual, hre nel nual, finna leh taimakna tak tak thleng phak si lo tam tak kan nei mek a, chu’ngte lak atang chuan he hnam hian thil ropui a beisei leh si. A lungphum a fuh lo tih lam kan ngaihtuah duh lo lui tlat a. Remand Home leh Rescue Home te, ‘Khap Bur’ hmangtein a lerah thuai that kan tum leh mek a, a harsa tawh a nih hi.

Kan changkanna hian hnam taima kha min ti thatchhe ta sawt nge, kan ram kalphung fel lo hian he hnam hi a tichhia? Hnam dinchhuahna tur hian pawnto khap, exam laia tape play khap leh Zu khap hi a tawk em? Rairahtea thawnthu aia Snow White kan ngaihpawimawh hnu hian Mizo naupang hi a ‘Zo’ lo sawt em? Chu ‘Zo’ loh sawtna chuan eng rah nge a chhuah mek a, a la chhuah zel dawn tih hi kan chhut ngai em? ‘A zo’ tih tawngkam, thil thing, thil chhia leh tawmkai lo sawi nana kan hman chinah hian he Zo hnam hi eng dinhmunah nge a din?

Ka fapa Vaimim hawn, a nuin a chhum, hmin tui tak ei pah chuan, kan changkannain a hrin hrang hrang, changkang lo tak tak ka ngaihtuah zel a..

Nawmchenna Hrehawm

2009-07-01T04:14:00.000-07:00

(He thu hi, Kolasib tlangval lehkhabu chhuah thar review-na a ni a. Blogger-te tan a relevant lo maithei tih hre reng chungin, post tur awm loh lai hnawhkhah nan ka hmang ta tho a; in hriatthiamna ka dil e. Kolasib mipuite chhiar tur bika ziah a ni si a. - Zaia.)

Haihawt hi upat vang a ni an ti em kha? Chuti ni se ka upa ta tihna a ni thei em? Taima tan lo chuan haihawt hi peih chi pawh a ni lo. Ka Office bang tawh hnu, ka haihawt man tel a Office lam pan tuma ka inkhap buai lai takin Tumpui tlangval fel pakhat leh nula pakhat nen kan intawk a. ‘Remliana lehkhabu kha I chhiarsak tawh em? Rawn review la,’ an ti. Ka la chhiar lova, ka la nei lova, ka la hmu hek lo. ‘In inah kan rawn dah dawn nia, tunah chuan a copy kan keng rih lo,’ an ti a. Kan inthen mai a. Kan inbiak hnu darkar 1 vel lekah In ka thlen chuan, ka lehkhabu bawm chungah, lehkhabu tharlam tak, a kawm en pawha chhiar chakawm zak mai, ‘Nawmchenna Hrehawm’, Kolasib Tumpui tlangval Lalremliana ziah chu a lo awm vang tawh a! Tunlai tawng takin, min betute kha, an ‘prompt’ ngei mai!

Kei tehlul, thu leh hla tha hlang ziahna lehkhabu review tura min han sawm der ve chu, insit teh mah ila, a lawmawm ru viau tho a. Kei hi, mite tihdan loh deuhva thu ziah kher nuam ti, hlate pawh, han hrilhfiah ve changa mi kalphung – a rhyme scheme, a genre, sonnet a ni nge Ode, Elegy zawk em ni? tih lam thlek thluk duh lo lui tlat thin ka ni a. Lehkhabu review chungchangah pawh hian – ka thiam loh chu thuran ni se – ka hmuh dan bak han ziah vak tulna ka hre lova. Min beiseitute beiseina hi ka tibeidawng mai ang tih ka hlau.

Tunlai hian lehkha ka chhiar tam vak lova, lehkhabu tharlam pawh ka bih tam lo. Chu mai bakah, tun lai lehkhabu chhuak tharho zingah hian ka chhiar chak zawng a tlem riau. Chutiang karah chuan, review tur rilru puin ka’n keu dek dek a, zan dar 1 dawn ka men phah he lehkhabu hi Mizo thuziak chhiar thiam tawh phawtte chhiar atan ka rawn chhawpchhuak e.

Mizoram Publication Board-in chhuah tlaka an hriat, a chhuahna tur an tumsak he lehkhabu hi Louis Bet kutchhuak a ni a, an hnu a mam a. Phek 184 a chhahah hian chhut sual pahnih khat bak ka hmu lo. A kawm a nalh a, a felfai a. A kawm hi ka enchiang lova, ka chhiar chhuah hnua ka’n enchian chuan awmze ril zawk a lo nei niin ka hmu. Kolasib khaw thla a lang a, chumi atang chuan khawvel lem (globe) a thlawkchhuak a. A ziaktu hi Kolasib tlangval a nih avangin, Kolasib atanga a khawvel thlirna a ziak tih a lo entir reng niin ka ngai a, tidik tak i maw?

A kawmah, ‘Essay, Short Stories & Poems’ tih a inziak a. Chutiang chiah chuan a chhungah Essay 16, thawnthu tawi 2 leh hlahril 6 a dah a. A ziaktu hian thuhmahruai a nei thui lova, Nawmchenna Hrehawm essay hi a thuhmahruaiah a dah lo naa, a lehkhabu kamkeuna a nih rualin, he khawvel nawmchenna hi a tawpa hrehawmna thlentu a nih fozia a sawichhuak nalh hle a; chu chuan rilru a hruai peng nghal a. Chhiartute tan thildang ngaihtuah a har nghal ringawt.

‘Mizo tawng kan hman dik tawk lohte’ tih te, ‘Mizo tawnga H pawimawhna’ tihte ziak thei khawpa Zo tawnga ril a ni bawk a, a thuziakah hian tawng duh uluk mi tan pawh, ‘Hei chu heti deuh se’ han tih tur a vang hle.

Kan miril zinga mi Lalhmingliana Saiawi ziah, Hmangaihna chungchang, College-a kan zir thin kha Mizo kutchhuakah chuan a vawrtawp a ni mai awm e ka ti thin a, mahse Remliana hian a nih lohzia a rawn tarchhuak chiang hle a. Saphovin hmangaihna – Love, Agape, Eros etc. a an then thin pawh rawn phekphelenin, First love atanga Beidawn love thleng a awm theihzia a rawn tarlang a. Pathlawi love leh Nuthlawi love pawh, a dinhmuna ding mekte pawhin hrilhfiah se a aia chiang a awm lo hial ang tih turin a khurbinpui thei nia! Hmangaihna kawng chhukchhoa tang mekte tan phei chuan hmangaihna chungchang a luhchilhna, ‘First love nge beidawn love’ tih hi chhiar ngei ngei chi a ni.

Zonumawi din thar leh tuma Mizoram Kohhran lian ber dawttu a insingsak mup mup lai taka he lehkhabu ziaktuin, chiang leh fiahfai zeta Zonunmawi chungchang a rawn thalthuam hi tunlai thangtharte leh an nu leh pate chhiar atana tha fahran a ni a, ‘Thalfavang kut hi eng kut nge?’ tihte phei hi chu zawhna ropui, a hmang thinte tana inchhira kun ngawih ngawihna tham a ni a; a thlawptute tan lah chhan let hrehawm khawpa chiangin he kut awmze neih lohzia a tarlang bawk si!

Tawngkam inkawlkalah (contradict) tak tak, rem tak leh chhiar chakawm taka hman a thiam riau a. A bu hming, ‘Nawmchenna Hrehawm’ han tihte pawh hi a mawi danglam riau a. A thawnthu tawi ngaihnawm zet, ‘Kum that kum tha lo’ han tihte pawh hi, a thupui atang hian chhiar a chakawm nghal ringawt a. A thupui atang ringawt hi chuan keini ang tana thawnthu han ziah ve ngawtna chi a ni lova, ani chu ani a ni tlat a, a thupui hian a thufun a pholang nalh ngang mai! Chutih lai chuan, thil inang leh tum inang pawh, a hmangtuin a hman kawpa, a hman kawp thiam si loh chuan a buaithlakzia leh chu dinhmuna kan din mekzia a tarlanna, ‘Tha leh Tha’ te hlei hlei hi a phuah fuh.

Remliana mak ka tih em emna chu, Middle School pawh kai rual reng, kei aia thiam thei lo zawk thin, Mizo tawng pawh kei aia thiam lo thin nia ka hriat kha a ni a, mahse a lo thiamzia leh rilzia te, Mizo thu leh hla huang a lo dai thukzia leh a chhiar zau zia he lehkhabuah hian a lang a. ‘Mizo thalaite leh thu leh hla’ tihte hi, Zo pa lungfing chinin an ziah ang maia chhiar ka tum a, thalai ziah a ni bawk a, a ziak thalai thiamin, a khawrh ril tho si a, a thupui a huphurhawm aiin chhiar a nuam a. Kaphleia leh Biakliana te pawh kan rualpui chei lek lek mai mawle!

A thawnthu tawiah hian a talent tak tak zawk a langin ka hria a, thawnthu ropui tak a la phuah ngei ka ring tlat. ‘Kum that kum tha lo’ hi, ZOPPEN CLUB in thawnthu tha ber dawttua an thlan a ni a, a tha bera an thlan ka chhiar chak phah ngawt mai. A chhan chu, Remliana hian kan pi pute nundan te, an lo neihdan phung te, an rilru putziate kha a hrechiang hle tih he thawnthuah hian a tarlang a. Thawnthu thin thawng, chhiartute tana ngaihtuahna dang put theih miah loh khawpa ngaihnawm a ziak thiam hian Remliana naupanna hi ngaihnep ngawt chi a ni lo tih a lantir a. Kolasib behchhan ngeia thawnthu ngaihnawm leh ngaihtuah ti thui, ‘Mizoram lung hlu’ a ziahte hian belhchet a dawl a. A thawnthu behchhan hmun, tlang leh ruamte hi kan kal ve tawhna hmun vek, a thawnthu lairil ber pawh kan hriat deuh vek si, ngaihnawm leh chhiar loh theih loh khawpa buaithlaka a ziak thiam hi fak mai loh chu tih theih a vang.

A hlahrilte pawh hian belhchian a dawl viau. ‘Zan’ leh ‘Kan nghilh tawh lo’ng che’ tihte hi Shakespearean Sonnet kalphung dik taka a ziah a ni a. Rhyme Scheme dik, metre thlenga dik veka hlahril phuah hi Zo tawng chuan a harzia hre ve viai vuaiah ka inngai a; chutiang thlirna tlang atang chuan heng hlate hi chu ‘phu loh lungdi’ an ni. Chutih rual chuan, a hlahrilte hi thinlung lairil atanga rawn luangchhuak ni chiah lo, tum luih anna a awm zeuh zeuh a, hei hian chhiartute rilruah duh angin a luan ngiltir lovang tih ka hlau deuh.

Fakna mai lo chu ziah tur a awm mang lova. Remliana hi Mizo thu leh hla lama miril, MA (Mizo) a nih avangin thu leh hla huangchhunga then hrang hrang (genre) a hrechiang hle tura ngaih a ni a. Chutih laia he lehkhabua a thuziak tam zawk, Essay huanga a dah vek hian lung a dum kim chiah lova. Thenkhat hi chu essay ni lovin, article huanga dah zawk awm tak niin ka hmu a. Uluk zawka thliarsin chuan essay tling chiah lo a awm nual. Chu bakah chuan, a thu rem indawt dan (sequencing) hian duhthu a sam lo deuh hret bawk a. Thupui inzul dah thian a hreh vang ni maw, a chhiartu tana rilru dang put phawt hnua a hma lama kan chhiar tawh zulzuia min hruai leh thei turin a dah a; a duhdan ve reng a nih chuan kan sawi phak a ni lova, uluk zawka rem atan chuan ka it ngang mai.

Eng pawh ni se, Kolasib thuziak thiam lar, thianpa Mus-a’n a kutchhuak a phochhuak tawh a; chumi hnuah Remliana a rawn che ve leh ta hian Kolasib mi nih a tinuam a. Thu leh hla luipui kama len nuam timite tan phei chuan vanneihna a ni chiang a. A chhe lam zawnga Zoram pum huapa lar leh thin Kolasib nih hi a nuam lova, he lehkhabu a lo chhuak ta hi Kolasib hmangaihtu tan pawh hmasawnna rahbi pakhatah a chhiar theih awm e.

Thu leh hla tha ngainate tan he lehkhabu hi chhiar hmaih phal chi a ni lova, thawnthu ngaihnawm ngainate tan chhiar ngei ngei chi a ni.

Chuailo Par

2009-06-15T03:30:00.000-07:00

Chul hnu bukthlam sirah a par chiai e,
A sakhming iang a chul thei lo;
Thliah loh ram hnim chu hrang mah se,
Chuailo par mawi par lai a kham thei lo.

Dawn teh kan nun sul tam liam hnu,
Thliah hnu chhawl ianga uai mai tur;
Uaia'n ka phal thei lo lung min lentu,
Chuailo par ianga lairil fan tur.

Khuangruah, turni, chhimthli hrangin,
Chuailo par mawi a nuai buan buan;
Dawn lem nei lo chuailo parin,
Suihlung mawlte'n a tuar fan fan.

Chuailo par iang kan nun hlim lai,
Ding reng mai se a pawi hlei lo;
Mahse dawn teh, ka thian, a pawi ber mai,
Kumsul veiin ban ni a nei si lo.

A do zo lo chhim thlipui nuai,
A hrang lua e khuangruah, turni;
Chhantu nei lo chuailo par mawi,
A chuai zo ta, awi maw - a chuai!

Dan rual lohvin kumsul a vei,
Chuti'n hringnun par mawi a chuai;
Sakhmel mawi pawh par ang a chuai,
Hai ang kan tar an ti - Karei!!

I Tawngtai Ngai Em ?

2009-06-08T06:02:00.000-07:00

Hman ni lawk khan kan thian pakhatin a In luah thar a lawm a, thenrual thate zanriah min eipui a. Hemi tum hian, titi khawchang kan sawinaah, kan thian pakhat chuan, ‘Kei chu ka tawngtai ngai lo. Pathian hnenah hian lawmthu ka sawi ngai lova, ka vui ngai lo bawk. Mahse Pathian ringtu ka ni a, min awmpui a, min enkawl tih erawh ka ring a, ka theihnghilh lo,’ a ti a. Ka ngaihtuahna a kal thui khawp mai. Pathian ringtu si, tawngtai ngai lo, lawmthu pawh sawi ngai lo, Pathian hnena mamawh pawh thlen ngai lo a lo awm theih a ni maw??

‘He khawvelah hian hlimna te, lawmna te, thlamuanna te, nihlawhna te leh malsawmna tam tak kan dawng a, Pathian hnen atangin chutiang chu kan beisei thin. Mahse he kan hringnun dam chhung hian harsatna te, lungngaihna te, tahna te, vanduaina te pawh kan tawh tur a ni a, chu chu ringtu kan nih avangin Pathianin kan tawrh a phal lo bik lova, chu’ng zawng zawng kan tawrh lai pawha Amah hre reng tura din leh siam kan ni,’ tih te; Manganna leh lungngaihna, hrehawmna leh harsatna vawrtawp kan tawh lai pawhin Amah chu kan hnaih reng tur a ni a, Ani chu min tanpui turin englai pawhin a inpeih reng a – Pathian chu kan inhumhimna leh kan chakna, mangan laia tanpui vartu hnai reng a ni – tih te hi i hre ve tawh em?

Primary School kan kai lai a ni a, retheih bak berh lai tak a ni. Chawei dawhkan kan nei lova, chhuatah chaw kan kil bial laih thin. Chutiang hun lai chuan tun lai angin ‘Malaria’ a la tam lova, ‘Sikserh’ erawh a tam ngiang thung. Kei pawhin sikserh chu ka vei ta. PF (Pawi Fe) an tih ang chi hi a ni lehnghal an ti! Chaw eina hmunah chuan hmalam bawh zawngin - bai beng baw zawng ngeiin – chu sikserh chuan min namthlu.

Pathian ropui zahngaihna vang liau liauvin he sikserh hian min ngam lova, hun rei tak chu min tibuai zui lo.

Matric kan ekzam dawn a, he sikserh bawk hi a rawn lang leh. Ekzam nan ni thum chiah a awm tawh tihte chuan - chu sikserh umbo nan chuan - thisen chaw ka la khai a, ka lu a la hai mum mum mai. Hemi tum pawh hian Pathian zahngaihna vang bawkin min ngam lo leh a, Matric pawh vantlang zingah ka zo ve mial.

A reh leh vang vang, kum 8 hnuah he sikserh bawk hi a lo lang leh. Thak sep sep khawpin Quinine ka ei ta mai. Ka cher chhe vek a, ka thu thel bawk a. Nupui neih tum lai lai lehnghalin! Mahse hemi tum pawh hian - Pathian zarah bawk – a tlawm zawkah a tang leh ta a. Tun thleng hian a la rawn inlar leh ta lo.

I kua a thalo ve tawh em? A mak ngawt mai, dam taka awm lai chuan, ek chhuak tak maia ek in han pan a, hahdam taka han inpaihthawl nawmziate hi kan chhut ngai lem lova. A hun pangngai nilo leh dan pangngai aia zing daiha ek in han hmuh thin hrehawmzia te, chhuak em ema a ‘chhuak’ hlei thei lo chunga kal tho a ngaih tumte hi chuan dam vara zing kan han tho va, a hun dik tak maia rilru hahdam taka han ‘thut’ nawmziate a lo lang thin a ni lo’m ni?

Nupui neiin kan han invawm hrang ve a. Hetiang hunah chiah hian dam loh hi a hrehawm. Computer nen, inah, hahdam ve deuhvin hna kan thawk e kan ti a. Chutih lai chuan ka kal (kidney) a rawn tha lo ve ta tlat. A tirah chuan sikserh natna kha a rawn inlar tha leh ngat emaw kan ti a. Hunbi nei deuh hian khua a rawn sik a, a hunbi lovah chuan ka dam viah thung si thin a. A tawp lamah chuan kawng te, kawng chung deuh, nak te a na ta vak vak mai. Ni khat pawh thawk lova awm thei lo kan ni, ka thawh loh chuan kan nghei a ni mai.

Hna thawh laklawh laiin a rawn na a. Khum tlangah ka va vial ngawlh ngawlh a. Damdawi te ka’n ei a, a ziaawm ve leh zel mai bawk a. Inentir a ngai tih ka hria, pawisa kan nei si lo. Mahse thil pakhat tih theih kan nei – tawngtai. Rei tak chhung ka buai a. Ka thutna ngaiah ka thu rei thei lova, ka zung sek a. Chutianga hun ka hman fe hnuah chuan ka kala lungte awm chu ka zung chhuak! Misual tawngtaina pawh ngaithla a, chhang duh thin kan Pathian chuan kan tawngtai A ngaithla a, kan hnenah A awm ngei a ni tih ka va chiang em!

Mihring nih chhungin a dam reng theih loh va, a lawm reng theih hek loh. Hlimna tur emaw kan tihte hi min tilungngaitu an ni thei a. Kan lawmna tur emaw kan tihte hi kan thinrimna thlentu a lo ni daih thei bawk.

Fanu kan nei a, kan lawmzia chu! Min tihlim a, min tilawm a. Kei ber mai hian ka lawm. Ka en ning lova, ka lawm kham lova, ka pawm ning lo. A tawng thei lo tih ka hre reng a, ka tawng pawh a awmzia a hre miah lo tih ka hre reng, mahse chu chuan ka biak a dal chuang lova, a duhzawng tur nia ka hriat apiang ka hrilh a, ka kawhhmuh thin. Hlim taka kan awm laiin, ani, chutiang chu he hringnun hi emaw kan tih lai takin, ka fanu, ka fanu neichhun chu a dam lo ta. ‘Khawsikpui a ni’ an ti a, damdawiina dah a ngai. Ka fanu a dam lova, damdawiina dah a nih thu ka hriat tirha ka rilru natzia leh min den nghin nasatzia kha aw! A bana thisen chaw pekna tur an vuahsak luau mai ka hmuha ka lainatzia kha!!

Mah se, ngai teh, natna hi natna ni mahse nat hlenna a ni lo. Hlimna leh lawmna pawhin tawp chin a neih chuan lungngaihna leh manganna pawh hian chatuan a daih bik lo. Ka fanu pawh chu rei loteah a dam leh a. Kan lawmna kha kan tahna a ni hman a, mahse chu tahna leh lungngaihna chu Pathian hmel min hmuhtirtu a lo ni leh ta zawk.

Hmanni lawk khan ho lutuk tak maiin, ka hahchhiauna lamah ka kawng ka herh a. Ka herhdan a hoh tehlul nen, a natdan chu a ho lo hle thung a. Ka inkhawm peih lova, Office pawh ka kai peih lo. Ni leng lengin Inah ka awm a, pawnah ka kal chhuak thei lova, ka kal hlat ber chu bualin a ni mai. Thutthlengseiah ka thu awn a, TV remote aia rit ka chawi peih lo!

Natna engemaw kan tawrh apianga hian dam nawmzia ka hrechhuak thin. Mahni nat loh pawhin, chhungkuaa mi tu emaw a dam lo thei a, chutiang hun a lo thlen pawh chuan dam leh hrisel taka awmho nawmzia leh hlimthlakzia ka ngaihtuah thleng lo thei thin lo.

Ni tina boruak thianghlim leh ni eng kan hmu te, ruahsur te, thli tleh seng sengte hi a thlawna kan dawn a ni tih ka theihnghilh thei lova. Ka sawi tam tawk lo tih inhre reng chungin, he’ng avang hian Pathian hnena lawmthu sawi tur ka ni tih ka hre reng thin.

He khawvel zau takah hian ni tin mi tam tak an thi reng tih ka hria. Ei leh in tur tha nei zo lo naupang maktaduai tam tak an awm tih te, an thiam loh ni miah lovin naupang maktaduai engemawzatin AIDS an vei tihte hrilhhriat ka ni thin. An sual vang leh awmherh vang ni bik miah lovin mi tam tak chuan natna khirhkhan an vei a, natna khumah mangang takin an awm a, an chhungte pawhin beidawng takin an thlir mek tih ka mitin ka hmu thin. Chutih lai chuan fel leh that vanga dam tur ni se dam lo nasa ber tur zinga mi kei hi ka dam tlat a, ka chhungte pawh an hrisel tlat. LALPA zahngaihna vang ni lo se eng dang vang nge ni ang?

I lungngaih ni leh i lawm niin i tawngtai ngai em??

Concert Ka En

2009-05-31T21:39:00.000-07:00

Kekawr bul tial kan ha ve ve a. Kil khatah, hahdam zetin kan thu a.

Dawhsan chu a la thim thap a, mipui an rawn lut nguah nguah a, kan bulah pawh an rawn thut belh zel a.

Aurinna atang chuan minute nga hnuah concert tan a nih tur thu a rawn puang lauh lauh a. Ka Nepali thianpa, Manu Subedi chuan a phone a lachhuak a, sana a en a; kei aiin Mizo hla hlir sa thin T-Melody Concert chu tan thuai thuai se a ti zawk niin ka hria.

Kolasib an lo kal hmasak tuma an concert lo huaihawttu zinga mi ka nih avangin T-Melody te hi ka hrechiang ve hle a, tun tumah hian an khuangpu (drummer) an rawn thlak a, a bika zai turin Lalpanliani (Pantei – Maphasi) an rawn hruai bawk a. An zaitupa ber Lalnunsanga leh an guitarist Thanthawngate sam a sei ta deuh bawk a, a bak chu a ngai vek an ni.

A e-mail address min pek, ka ziahna lehkhabu te nena ka tihbo tak daih, vawikhat mah ka biak zui tak loh, an guitarist Thanthawnga ngei mai chuan a tingtang a rawn chawi chhuak a. Lengzem leh lenglawng sa tur an nih theihnghilh ni awm fahran hian – hla mawi leh mittui pawt ngawih ngawih, ‘Khawngaihna Mak,’ (Amazing Grace) ngei mai kha, mawi-fan-nalh-ril leh lungrun lutukin a’n rawn zut hmasa tehreng a nih kha!

Dawhsan a eng a, Tahan Bial KTP Leader (an rawn kal hmasak kha chuan a ni a, a la ni zel em aw?) Lalnunsanga a rawn chhuak a, boruak a dang tan. ‘Pathlawi Lungleng’ kha a rawn sa a. Kei ni ila Concert bul tan nan chuan ka hman ka ring lova, mahse ‘anni’ an ni tlat. Sanga chuan ‘Thinlung Thawnthu’ a rawn thlawh leh bawk a, boruak a nuam tan ta takzet.

Pantei a rawn chhuak, rawlthar rual an au dur dur. Parema hla mawi lutuk, ‘A Thlawn Mai Maw’ te, ‘Pari Zun’ te pawh a rawn sa a, an zawm dual dual mai! ‘Pari Zun’ a sak lai chuan. ‘Pari ka hriatho hi an hmeltha teh ual si lova, he Pari zet hi chu ‘Pari’ tak tak a ni ngei ang, a hmel hmuh nghakhlela han muthilh theih miah loh khawp tur chu!’ ka lo ti rilru a!

Zaithanmawia a rawn che ve leh a, lungkuai takin, ‘Mangtha’ a rawn sa. Lung a leng a, lung a chhe tel thei deuh bawk. ‘Mangtha, liam mai rawh, Ngaihzual lungrun..’ han tih ngaih ngaih mai chu! A sa zo va, rilru hnim leh khawhar atanga chhuahna tur ni awm fahranin, Pachhunga hla, ‘Han nui leh la’ tih a rawn thlawh leh nghal a. Kolasib khawpui thawm a chhuak tan.

Lalnunsanga a rawn chhuak ve leh, ‘Kar Mah Hla Se’ a rawn ti! Kar lam hla taka ‘D’ neite tana a mawi dan tur ka ngaihtuah a. Ka hma lawka tlangval pahnih, ‘lam huaina’ an ti hmasa ni ngeia langte’n maimitchhing, thle lawng lawnga an lo zawm vete chu ka dem lova, ka nuih lo bawk a.

Lalnunsanga leh Pantei te’n an hla chuam, ‘Ka hmangaih che’ an sa leh. ‘Lungrunpui, Ka hmangaih che’ tih laia Kolasib thalai awrawl rin lutukzia kha!

Tlar hma lam chu a boruak a tang ngang mai. An su dual dual a, tuisik bur ni awm tak hi an rawn vawr chhuak leh nawlh nawlh thin a. A then an inkokichhuan a, an lam hulh hulh a. Kan naupan laia kan inkhelhna thin, sikul sport leh football tournament zawng zawng an nghahna thin, tuna Youth Hostel tur, ‘tur’ ni rei tawh tak an sak hnan tak, Hmarveng Field chu a suk hian a su dup dup a ni ber mai.

Pantei’n, ‘Khua pawh min varpui mai la, duhlai,’ a’n ti leh chiah mai chu! Tlar hma lam chu a khek hian an khek ruih ruih a ni ber.

Eng a tha a, rimawi hmanrua a tha a, ring mahse a bengchheng lo. Dimmer angzatnge an hman ka chhiar lo, an hmang thiam hle tih erawh ka theihnghilh lo. An thawm kha, Kolasib eptu, chhuah lam tlanga awm Bukpui leh Hlimen khuate pawhin, ‘Kan hre pha,’ an ti!

Venhimna lam a tha a, intibuai an awm meuh lo. A lam duh leh lam ve duh lem lote inkara daidanna bang a rinawm a, buaina a awm lo. Police duty te pawhin concert an en ve mai mai, tihtur an nei lo. Khawlum lai a ni a, pawn boruaka concert kha a inhmeh lutuk. Kolasib-a Concert awm tawh zinga a ropui ber a ni ngei ang.

Concert ka en lai leh ka haw hnua ka rilrua awm ber chu – min zirtir an nei em? tih a ni a, hengte hi a chhanna niin ka hria – thil engemawzat min zirtirin, kan nihna pawh chiang takin kha concert khan a tarlang – tih hi.

Min zirtir nia ka hriatte –

1. Mizo hlain a rock theih a, hlim takin zan hnih lai a lam theih.

2. Mi tam tak sawi ang em emin kan khawchhak unaute hi kan haw lova, kan hmusit hek lo.

3. Zu rui tam tak an awm. Zu ruih thiam lo an awm mang lo. Kan in thiam lovang tih hlau tlat tute hlauhna hi hlauhna awmze nei lo a ni em?

4. Engkim deuhthaw khapna ramah hian thalaite hian hlim an duh a, zalen tak leh engthawl taka nun an chak a; chutianga an awm chu hmuh a nuam.

Thildang pawh a la awm thei ang. Engpawh nise, ka rilrua lian ber zawk chu – Mizo hla ngei hian a ‘rock’ theih tih hi a ni.

Mizo thalai zingah rock band din a, theihtawpa hma la an awm ve ta nual. Mizoramah, Mizote zing ngeia concert si, sap hla un tak tak leh rimawi danglam pui pui zir chawpa bei vak vak an ni deuh vek. T.Melody te hian Zoram chhungah na na na chuan Mizo hla ngei maia rock a theihzia leh sum lakluh nan a tawkzia an rawn lantir a. Zan hnih chhung khan cheng nuai hnih deuhthaw an lalut tlat! India ram zau zawk leh khawvel hmun hla zawka chuang chhuak tlaka inngai leh chutiang tumte tan chuan sap hla ngei sak a tul ang. Chuti a nih lem lohva, he Zoram awi tlei tur hi chuan Mizo hla ngei mai a mawi a, chu chu kan rilru a chawktho a, kan thinlung pawh a fah a; Zofate rock nan chuan ‘Zo hla’ ngei a tawk tih a chiang a ni.

Zir Chawp

2009-05-22T03:03:00.000-07:00

Kan pi leh pute khan nunze nghet tak an nei a. Anmahniin engkim, tawng leh Pathian biak thlengin tihdan bik, kalhmang leh nunphung an nei a. An chhehvela hnamdang awmte tihdan leh awmdan an la ve mai lo niin a lang.

Kum 1894-ah mingo ram atangin mingo Missionary te Zoramah an lo chuangchhuak a. Kan pi leh puten an la hriat ngai loh sakhua chu kan pi leh pute ngam loh sorkar atanga thiltihtheihna nen an rawn thehdarh a. An inthawina chi hrang hrangte hnawlsakin Pathian engkimtithei chanchin tha an rawn hrilh hre ta a. Chu chuan Zoram dung leh vang a fanchhuak thuai a. Hnam mawl, khawvel zau zawk boruak hap pha lo, rilru leh ngaihtuahna tluang tak nei Zofate chenna ram chu khawvela chanchin tha than chakna ber ram a ni ta a; kum tam a liam hmain a hnam pum huapin Kristian kan ni ta. Kan pi pute nunphunga bet tlat, kut ni vangthlaa Zu leh sa nena hlim taka chaite chu Kristian sakhua nen a lo inhmeh ta lova, tunhmaa an hriat ngai loh Pathian hnena tawngtaia, Amah biak dan an zir chawp a ngai ta. Chu Kristian sakhua chu an la hriat ngai miau loh avangin an nuna bet tlat ‘Zai’ nana hman tur hla pawh Kristian sakhua nena inhne rem thei tur an neih loh avangin mingo ho, Mizo tawng zir chawpten an thiam ang tawka an phuah leh anmahni hla atanga an lehlinte chu an zir chawp a ngai leh ta lo thei lo bawk a. Tichuan -

“ Vawiin chuan e, lung a leng mang e,
Darkawn tlangah lungdi va au i,
Darkawn tlang leh sawngka zawn thliai e,
Khatah Haungova a leng emaw,
Suihlung ka rualpui? ”

ti thinte khan -

“ Isuan, heta awm lai khan,
Thu tha tak a sawi fova;
Ka awih chuan Lalpa Isuan,
Keimah min chhandam ang a;
Awih lo ila Jehova’n,
Dik takin min hrem ang a.”

an ti ta fawk fawk mai a ni!

Pathian nung, he khawvel leh a chhunga cheng zawng zawng siama enkawltu hnena min hruai thlengtu an nih avangin mingo ho chu zah nemen lohvin kan zah a. Mingo thusawi tawh phawt chu awih chanin kan chang a, kan chhiat phah ta a; vawiin thlengin kan chhiat phah a nih hi. Mingo ngaihsanna chuan kan nunah bu a khuar nghet telh telh a. An nun - thianghlimna an ngaihsan dante, hun an hman dikziate leh a tha zawng thildang kan zawm theih loh laiin, incheinaa an sanziate, an hausakziate chu a ler atangin kan hmu a, kan han zir ve nghal chawt a. Keini aia kum engemawzata upate chu umphak tumin baklengin kan tlan ta a. An tawn ang tawng tur leh an nih ang ni tura zir leh hriat tur a tamzia ngaihtuah lek lovin kan hma lam chu kan ar khawthim dai bian bian ta mai a, kan buai mek zel zawng a nih hi.

Mingo ho kan ngaihsan luat avangin kan hnam tihdan leh nunphung paih lo leh chumi hmanga Pathian kan biak chu kan Pathian hian a lawm ngei ang tih hre lovin, kan zir chawp mingo tihdan chuan Pathian kan bia a. Kan Mizo hla thluka Pathian biakna hlate chuan Bethlehema ranthleng leh kan biak Pathian beng a thlen kan ring lo a ni ang, kan zir chawp mingo hla thluk leh Mizo tawng dik mang lo hmang lo chuan kan Pathian hi biak nachang kan hre ta lo hial a nih hi!

Kan ramah Politics a lo lut a, Lal thuhnuaia awm thin Zofate chuan kan man thiam lova. Bawm tawta khung, thawklehkhata chhuah tak ang maiin kan khauphar thawven a. Kan hriat ngai loh Politics tui nu chuan a nawlpuiin min len ta hum hum mai a ni. Lal hnuaia mahni ngaihdan leh duhdan sawi thei lo khan mipui rorelna leh lalna Politics-ah chuan sawi leh sel tur kan nei ta theuh a, a thei apiangin mahni tana tanghma hai dan zirin kan phe ta hlawm a. District Council leh Union Territory kan nih hnuah phei chuan tunhmaa kan la hmuh ngai loh Central atanga sum leh pai lo kal chu khawvel eng hmu ve tan det det chauh Zofate chuan hman dan kan thiam lo nangiang mai. Kan zir chawp politics leh kan Zo nun chu a inpersan em em a. Zofa, ‘Ani a nawm phawt chuan kei chu hrehawm deuh mah ila,’ ti thinte tan chuan chu politics, a chak leh thei apiangte dinchanna; ‘ani chu lo thlep mai mai rawh se, kei ka chan a that phawt chuan’ tih ngaihna boruak chu kan zir chawpa kan hman nghal a ngai ta a ni.

Mingo hovin Kristianna boruak atanga kan hnam nunphung leh tihdan min hnawlsak vek avangin kan tan chuan a har bawk a; Politics leh kan Kristianna pawh chu kal kawptir chi niin kan hre leh ta lova. Kan Bible-ah ‘Misualin rorelna an chanin, mithate an rum thin,” tih a awm reng laiin Kristian tha deuh tan Politics-a inhman chu thil tihchiah kan ngai lova, chuti a nih avang chuan kan politician te chu eiru thei, zu rui thei leh khawvel mi tak hmuhin kan hmu vek mai a; a pawi hle a ni.

Kan rama chanchin tha eng rawn puluttu an nih avangin mingo ho hi kan kan ngaisang tawp thei lova. Tun thlengin an tawng pawh kan thiam ang ang pawhin kan hmang tha ngam lo. Chuti a ni chung chuan an tawng chu ngaihsan namen lohvin kan ngaisang a, thiam kan chak a. Chumi avang chuan keimahni tawng ngei pawh thiam thathum lo mahse kan fate chuan mingo tawng an thiam phawt chuan pawi ti lem lo nu leh pa kan tam ta mai. Mingo tawnga tawng thei deuhte tan Zoram chhung khawi hmunah mah School din a harsa lova, sum leh pai nei apiangin kan bawh nghal ruak ruak zel avangin kan rama zirna pawh sumdawnnaah kan siam titih ta. Hei phei hi chuan kan nunkhawchhuahna thleng a khawih theia, a pawi dan a ril em em a ni. Kan zir chawp mingo tawng zep tel ngeia thusawi thinte chu Zo tawng hlang hlaka thusawi thinte ai chuan kan hmu sang deuh tlat tawh a, Zo tawng fira thuziak mite aiin mingo tawng nena chawhpawlh par buai thin thuziak mite pawhin ngaihsan an hlawh chho mek zel zawng a nih hi!

Kan khawvel changkang zelin a hrinchhuah a nih avangin kan nunphung atana thil tangkai thil thenkhat hi chu kan zir chawpa kan hman nghal mai ngai chite a awm ngei tak a. Amaherawhchu, kan hnam rilru putzia thlauhthla thak khawpa kan zir chawp thilin min chiah hneh ta lutuk hi chu thil pawi lungrun tak a ni a; a la pawi dawn chauh maithei.

Kan nunphung atana kan mamawh em em, a lova kan awm theih hauh loh thil tamtak a awm. Chu’ngte chu zir chawp lovin ‘kan thiamsa hi i hmang zel zawk ang u’ kan tihna lam a ni lo. Chutianga kan nun mek lai chuan, kan zir chawp tawngin kan tawng neih sa a luahlan mai turte, kan Zo nun mawi tak, kan zir chawp khawthlang nunin a delhbet mai turte leh kan zir chawp tihdan hrang hrangin kan hnam tihdan, kan nihna tichiangtu ber a hliahkhuh mek zelte hi i phal lovang u. Kan thlah lo la awm zel turte sawisel leh dema kan awm lohna turin vawiina Zofate hian tan kan lak a ngai a ni.

Dam Chhan

2009-05-11T22:13:00.000-07:00

Kei chu, hla reng reng hi – Ballad nge Sonnet, Elegy nge Ode, Epic zawk em ni? Tih lam ka thluk lo. Nalh ka tih zawng chu ngun takin, chik takin, vawi tam tak ka ngaithla a, a thu pawh tum tam ka bih a, ka chhiar nawn thin.

Ka hla duh, a mawi ka tih leh ka nun khawihtu a nih chuan, a phuahtu themthiamna leh a mawina lam ka thluk tawh lova. Ka thinlunga a thawhdan chu ka ngaihpawimawh ber a ni ringawt mai.

Khawvelah hian hla tam tak phuah a ni tawh a. Mi tam takin an lo hrilhfiah tawh thin. Hla lam zirmiten sin te tea an thliar a – Hyperbole, Metaphor, Simile, Synedoche, etc. tia an hrilhfiah chhiar tur tam tak a awm. Chutiang chu ka tlin ve lova, ka thiam zawng a ni ve lova, a tum lah ka tum chhin eih lo bawk.

Vawi tam ka ngaihthlak a, tum tam ka chhiar hnuah, ka duh zawng zawngin ka ziak tawh mai thin. Kalphung pangngai ngaina tlat tan chuan, ka thuziak ve hi chu chhiar peih chi a ni lova, chhiar tlak a ni lo – ka thiam ve tlat lo!

Khawvel leh a chhunga chengte hi engkim chunga thuneitu tan lo chuan siam leh din rual a ni lova. A siamtu leh dintu hi eng pawh ni se, nun thawrawng, ngaihtuahna nei lo leh finna nei lem lo a ni thei lo hulhual ang. He a thilsiam ropui tak lo than chhoh dan tur thlenga chhut a, ngaihtuah a, ruahman fel thlap thei khawpa ngaihtuah kim, hriatna leh thiamna laimu neitu, finnaa khat a nih ngei a ngai ang.

Khawvela thilnung tinrengte hi chhiarsen an ni lova, chi hrang chi hrai engzat nge awm tih hi he leia mihringte hian kan la hre zo thei lo. Chutiang siamtu chuan finna leh thiamna ropui taka thuamin mihring a din a. Chu mihring chu he khawvel hi ar khaw thim dai miah miah turin a chhuah lovang tih a rin theih a. Eng ti tur leh eng vanga dah nge a nih ang tih hi i ngaihtuah ve tawh ngei ang.

Hringnun kawng chhuk chho te, tlang leh ruam chungchangte hi mi tam takin nasa takzetin an lo chhuiin an lo ngaihtuah tawh thin a. Zir bing pawl leh mimal tam tak an awm reng bawk. Chuti chung chuan, he hringnun thuhar hi lei mihring dam chhunga zir zawh chi a ni lo a ni ang, a zir chhuak a, he khawvel hriata hringnun zirlai ropui chhawpchhuaktute zingah hian Siamtu’n mihringte Dam Chhan a siamsak sawi thei an vang em mai!

Chuti khawpa ril leh buaithlak, thuk leh khunkhan si chu kei tehlul hian, he Vailui kam atang hian ka sawifiah zo dawn ikhaw lova, ‘A then pawh kan hre thei lo, he luikam atang hian,’ tih ai pawha fiah lo ka nihzia hi ka fiah tawk a, a tum pawh ka tum ting lo! Mahse, he thupui hi ka thlang tlat a, ka inchhir loa, ka zak lova, ka mur chhin eih lo! A chhan chu hla pakhat, ni e, pakhat chauh, ‘Dam Chhan’ hla a awm tlat.

He hla hi hman deuhva zaithiam lar em em thin, C. Vansanga sak a ni a, tu phuah nge ka hre mai lo. A hla hian sawi tum a nei lem lo maithei a, zawhna ril leh thuk, chhan theih si loh; he khawvela kan chen chhunga mi tinin kan inzawh theuh si erawh a rawn sawi chhuak nalh ngang mai!

Eng dawn ang maw hmanah Khuanu hian,

Hringnun hi a duan lai khan?

Hraileng awmhlei dung a thul em ni,

Hringnun hi a lo duan le!?

Kristiante leh Juda te chuan he khawvel hi Pathianin thu ringawta a siam, ‘Awm rawh se’ a tiha lo awm mai niin kan ring. Muslim-ho chuan he lei leh a chhunga chengte hi Allah siam, ama ta, mihringte enkawl tura a duan niin an ring a. Hindu-ho chuan he khawvel hi an pathian Vishnu chhiahhlawh, Brahma in, Vishnu taksa atanga lo chawr chhuak Lotus pangpar atanga a siam niin an ring a. Lotus pangpar chu hmun thumah thenin, van, lei leh boruak siam nan a hmang niin an ring.

Eng pawh chu nise, he hla phuahtu hian Pathian (Khuanu) in he khawvela mihringte awmdan tur a duan lai khan engnge a ngaihtuah ang tih a chhut a. Ngun taka a chhut a, a ngaihtuah fe hnuah pawh he khawvel a siam chhan awm hi a ngaihtuah phak lova. Naupang awmhleiin eng eng emaw an khawih lawr ang maiin he hringnun hi, Siamtu hian, a tum lawk leh duan lawk, felfai taka a din ni lovin, tih palh thil thuin a siam a ni thei mai ang em? tiin a inzawt a ni.

Aw enga’n nge maw Khuanu hian

Hringnun hi a lo duan le?

Thamral leh mai tur hian em ni le?

Duh vang rengin kan piang si lo.

He khawvela mihringte awmdan hi ngun taka a ngaihtuah hnuah pawh eng vanga lo awm ve ngawt nge tih a ngaihtuah chhuak zo lova. Khawvel mihring zingah mahni duh vanga lo piangchhuak a, he khawvel hrehawmna leh buaina, a nawmnate pawh hi kan duh leh peih avanga tem chhin ta kan awm miah si lova tih ngaihtuahin, a zawhna pangngai bawk kha a thunawnah a hmang lo thei lo a ni.

Mimang piangin Sialang kan seilian,

Haiang tara pam ralin,

Aw, damchhan hi nei tak ang i maw;

He khawvel sual khurpuiah?

Duh reng vanga piang ni lo mah ila, kan lo seilian a. Duh lo engang pawh ni ila kan dam lai hi a rei lova, kan parvul lai pawh a rei lo. Kan tar a, natna avanga thi lote pawh an tar thi ngei ngei si. Chu hringnunah chuan sualna te, hlemhletna te, elrelnate, duhamnate chuan nasa takin ro a rel a. Chu sualkhurpuiah chuan mihringte hian dam chhan kan nei ang em? Zawhna zawh awm tak a niin i hre ve em?

Khawi lamah tuan ve tak ang i maw,

Hringnun hi a ral hunin?

An sawi Pialral hi awm tak ang maw;

Tah chuan engtin zel ni maw?

Hringnun dam chhung chauh a ni lo. He hringnun kan hman zawh hnuah hian khawi lamah nge kan kal ang? Sakhuana lam thlek thluk lova ngaihtuahtu tan chuan hei hi zawhna awm tak a ni a sin. Pialral an sawi thin a, a awm tak tak em tih hi tuin nge finfiah tawh? Pialralah chuan Pawla’n mi a lo sai thin an ti, a dik tak tak em? Tuin nge hria? Chu Pialral-ah chuan eng thil nge awma, he lei mihring taksa ang hi kan la pu zel dawn em? Pu tawh dawn lo ni ta ila eng taksa nge kan neih ang a, eng ang pianzia nge kan put ang? Engtin nge ni zel ang?

He hringnun hi a engemaw zawnga ngaihtuah chuan awmze nei lo ni maiin a hriat thin. Vanneihnain a duhsak ve loh mihring tan phei chuan he hringnun hi a hrehawm ngawih ngawih a. Retheihhna, natna leh hrehawmna tinreng atanga hringnun tukverh dak chunga thlirtu tan chuan thawvenna tur hi a awm mang lo. Mite neih awt lo tura zirtirna dawng ni mahse, a neih let sang tam taka neite chu engvang ngawtin nge a awh loh theih tehlul ang? A rilruah duhamna a awm ve a, nawmsak chakna pawh a awm ve a lawm. Engvangin nge rethei bakberh renga he khawvela a hun a hman zawh vek bik ngawt ang??

Dam chhan nei tawh lova inhriate hian engnge an dam chhan ni ang? He khawvel hi mi beidawngte tana siam a ni ve lo em ni? Chuti si engvanginnge beidawnna hi mihringte-ah Siamtu hian a dah tlat si!? Beidawna khur atang chuan he khawvel hian awmzia a nei lova, 'Lo piang lo zawk ila tha tur,' tih vawng vawng a awl ngei ang. Sap lemchan pakhata a changtupa, beidawnna namenlo kara awmin, 'To never have been born, may be the greatest boon of all,' a tihte kha ka hrechhuak hial mai ka ti!

Awhna leh duhamna tawpintai awm lohna khawvelah hian he mihring hian a dam chhan hmu turin, rim takin, ni tin a thawk thin a. A dam chhan chu a hmu em? Hlim takin a hringnun a hmang tluan chhuak ta em? Nawmsak tuma kan beihna avang hian he khawvela kan nun zawng zawng hi hrehawmna leh harsatna nen, rilru hah reng rengin kan hmang zo thin a ni lo maw??

Isua Krista ringtu chuan khawvel thilte chu dam chhanah a ruat lo. Hausakna te, ropuina te, sanna te leh nawmsaknate chu a dam chhan a ni ve lova, a zawn pawh a ni hek lo.

Ringtu chuan,

Chhandamna hril a, A ram din hi,

Aw, leia kan dam chhan a lo ni e!

an ti fel then mai nia!!

Kan Vanglai - 02 : Television

2009-05-04T02:34:00.000-07:00

A English chuan sawi ila, 'Nineteen eighties' kan ti anga, a tawiin a chiang viau tho mai tur hi a ni a. Mahse, Zo tawng ngeia dah a ngai si a; 'sangkhat zakua sawmriat chhovah kha chuan' tiin bul ka'n tan ang e.

Khatih lai kha chuan, Aizawl tih loh khaw dang hi chu thingtlang tak tak vek kha kan la ni mai a. Khaw khata Television (TV) awm miah lohna khua kha a tam zawk a la ni. Keini pawh, Aizawl atanga motor-a darkar 3 tlan chauhva hlaa awm ni mah ila, 1980 chhovah kha chuan TV en tur a la tam lo khawp mai. Veng khata a neinung deuh tak tak chauh khan an la nei a. Chutah pawh, tun laia remote control hmanga thunun ang chi kha a ni lova. A TV in a bawm leh a chhin thlenga a rawn chhawm tel ang chi, BPL, sei ret rut, a bawm a sei ang aia a tak te leh viau si ang chi kha a ni. A kawngkhar kha han hawng ila, a sir lehlam lehlamah khan a chhin kha a pilbo daih thei lehnghal a. A channel pawh hmeh chi a ni lo, a herha herh chi kha a ni. A dum leh a var (Black & White) chauh a la ni bawk.

A TV set chu thuhran, TV programme mawlh mai khan rualawh a tina thin. A hun lai khan rualawh vak ngaihna kan hre mang lo kha a vanneihthlak ngawt zawk mai. Tun laia Disc Antenna lian pui pui ang chi hi a awm thei ang tih pawh kan ngaihtuah chhin thiam loh lai, Antenna pawr chhir chher, herh herh ngai kha a ni a. Tlang sang deuhva awmte an vannei a, an TV a fiah deuh bik a. Kawr ruam deuhva awm, TV nei phak ve site Antenna hrui kha chu a sei thei khawp mai!

Radio fiah lo zet atanga Thangbuaia teho zai ngaithla a, Pathianni zinga T. Lalengzauva leh The Sun Beams ngaithla thin tan kha chuan a dum emaw, a var emaw, hmuh theih a nih a, a che thei a nih kha chuan, a hmuhnawm emaw hmuhnawm loh emaw lam a ni lo, a chhuah hrim hrim kha chuan 'en reng' kha a ni tawp mai.

Channel dang a la awm lo, Doordarshan leh Bangla kha a ni mai a. India ai khan Bangladesh TV ah Sap film a chhuak nalh thei zawk. Film hmuhnawm a chhuah hmaa, peih lo leh hrethiam lo chung chunga Cricket highlight kan en tluanchhuah zak zak thin te, bengngawng tana thuthar an puan thin, hrethiam ve hawt lova kan en tluan zak thinte, Muslim-ho pathian bia, an kun rual dual dual a, ring zeta pakhat a au ruah ruah thin en zawh phawt a ngaih thinte pawh kha hmanni lawk a la niin ka hre mai ka ti!

Kha'ng hun laia kan film en thinte kha ka la hre nual mai. The Fall Guy, Street Hawk, Against The Wind, Wizard, Knight Rider, The A-Team, McGyver... a va han hmuhnawm thei tak. Knight Rider leh McGyver te kha hmuhnawm ka ti zual bik. Pathianni zingah, inkhawm kal pahin He-Man kan han en a, 'Bai da pauar awf greis skal' (By the power of great skull) kan han ti a; kawrkilh tla phungin kan han inpawt a! Chawhnu inkhawm banah 'Thunder Cats' kan han en leh a! Pathianni kha chu a nuam thin mang e!!

Thunder Cats kan en zo chiah a, mahni In lam panin kan tlan haw a. Kan inthlak sawk sawk a, phelsepa siam ngunhnam kan lachhuak a, ving lutukin, 'Thunder, Thunder caaaaaaaaaattts' ti chungin kan han tlanchhuak leh nghal a!

Pathianni bawk a ni em, ka chiang lo; vai naupang pali channa film, hmuhnawm ve zet, 'Ek-Dui-Tin-Char' kan en thin bawk kha. A hlate kha mawi kan ti thei. A awmzia kan hre lova, a dik leh dik loh pawh kan thlu chuang lo, 'Ek-dui-tin-char, charo milge kis-ka riske namaskar' te kha kan ti a, kan tui ve em em tho va. Kan ban, bal tial ve thin takte kha kan han tilang a, TV a an tih ang chiahin kan kut kan han inbawhthuahtir a...

Fakna pawh kha a la tam lo. Chhiar tham lek a la ni. Fakna a rawn lan dawn apiang khan a bialin, rin tam tak kha a rawn inrin chhuak tuarh a. A zawh ve leh chutiang chiah chuan a rawn inrin leh a, a lut leh raih raih thin a. Bangladesh TV ah khan Red Cow kha a lar a. India TV ah chuan Nirma, insukna sahbawn fakna kha a lar ngang mai. Red Cow kha - a dumin a rawn zuangchhuak ngei a! A bur varah khan a'n zuang lut leh thauh a! (Color TV a awm hnuah Red Cow kha a sen a, a bur pawh a eng tih kan hre hnuhnawh a nih kha!!) Nirma kha chu, naupang te, kawr var ha kha, a rawn vir chhuak chiai chiai a; a lam zui a. 'Washing powder Nirma, Washing powder Nirma, Nirma...'!

Mithun-a te, Kumar Gourav te kha an lar em em thin a. Vinod Khanna leh Amitabh Bachchan pawh an la cher khawp mai. Infiamna pawh TV ah a la chhuak tam lo. Kapil Dev-a te, Sunil Gavaskar te kha an lar em em ringawt a. An lem chuanna poster kan neih avangin, TV a an lo lan tawh kha chuan kan inti hmelhriat ve viau thin! 'Chittrahar' en tur ringawta kan inhnawh nasat thinziate pawh kha aw..

Thli tleh avanga TV Antenna tliak te, a booster chiate kha, a neitu aiin kan ui lo chuangin ka ring lo.

Hun a lo kal hret a, Video player (VCR) a lo chhuak a, tun hma ai chuan en tur a tam ta hret. Wrestling-te kha hmuhnawm kan va han ti thei tak em! Khang hun laia larte kha - Hulk Hogan (Halkhugan!!), Tatanka, Hitman, British Bulldog te kha an ni a. 'Vakineia' te, 'Rulneia' te pawh an awm kha! Tun thleng hian kha mite kha engnge an 'screen name' ka hre lo, keimahniah kha chuan, 'Vakineia' tih leh 'Rulneia' tih khan a chiang tawk viau mai.

Kumar Gourav-a channa, 'Love Story' te, Amitabh leh Dharmendra channa, 'Sholay' te, Mithun Chakraborty channa, 'Dance Dance' te, 'Vai Tarzawn' kan tih maite kha kan en hnem a; kha'ng film-a hlate kha sak theih loh kan nei mang lo. Kan lam dik em chu ka hre lo, mahse kan sa ve thei vek a, a thiam pawl ka ni ziah lehnghal!! Interval a'n awm ngei a, pawnah, zun pahin kan han chang chhin vel a, misual lama chan fuh kha a ninawm. Tluk deuh reng a ngai a, a tir lamah kha chuan kan han ri ve fua fua a, a tak taka kan hneh ngei ngei turte pawh kha a changtupa an nih tawh chuan a tawp lamah kan hneh loh a ngai a. Misual nih chuan, a tawpah a changtupa kha hneh loh a ngai tih kan hria a, a taka kan ngam a nih vang ngawtin thil tihdanglam theih a ni ngai lo.

Kan fate hi chu an vannei ta ngawt mai. TV neihte chu ‘mihausa tan chauh’ emaw kan tih thin ang te, a neituten an in chhunga min luhtir phal dawn leh dawn loh hre lova, kan film duhzawng a chhuak dawn tih hre chung sia, rilrua enghelh leh helhkham nei ran chunga kan awm thin dante kha – ni e, khatih hun laia kan ngaihtuahna angte kha engtikah mah an pu ve tawh dawn lo. Ni tina Pogo, Cartoon Network leh Demand Channel nen, an duh duh hmetchhuak thinte hi chuan kan naupan lai huna kan rilru ang kha an pu ve ngai dawn lo kumkhua a. Kan lunglenna leh kan ngaihtuahnate pawh a inthlau dawn mang e tih hi ka ngaihtuah thin. STAR zarah anni chuan khawvela thil thleng pawimawh apiang, an duh hun hunah an en thei tawh a. An kum ang kan kum lai khan hetiang hi lo nei ve phak tawh ila tun ai hian kan hmantlak zawk ang em? Kan fate hian eng ang chiahin nge he hringnun hi an rawn hman chhoh ve ang?

Kan fate rual lek lek, naupang te te, tarmit vuah fir fer an tam ta mai! Hengte hi kan hmasawnnain a hrinchhuah, In tina kan hun tak kan TV set-te vang hi a ni ang em? Kum 10 aia tam computer hmanga eizawn tawh hnu pawha tarmit vuah ngai lova ka la awm theihna chhan hi – Pathian ropui malsawmna a nih rualin – kan naupan laia TV en tur mumal pawh nei lova kan awm vang a ni thei ang em? Chumi vang chu lo ni kher lo ta se, kan tu leh fate ang hian, kan hmuh theih tirh atang khan ni tin zan tin TV hmaah, duh duh hmetchhuak theiin awm ve ta ila, tun ang hian kan mit hi a la tha kher ang em?